Эзра

1 Персия падышасы Корештин*+ башкаруусунун биринчи жылында*, Жахабанын* Жеремия аркылуу айткан сөздөрү+ аткарылышы үчүн, Жахаба Персия падышасы Корешке буйрук чыгарганга түрткү берди. Ошол себептен ал бүт падышалыгы боюнча оозеки жана кат жүзүндө мындай деп жарыялоону буйрук кылды:+

2 «Персия падышасы Кореш мындай дейт: „Асмандын Эгедери Жахаба Кудай мага жер жүзүндөгү бүт падышалыктарды багындырып,+ ага арнап Жүйүт жериндеги Иерусалимге ибадаткана кур деп буйрук кылды.+ 3 Ошон үчүн араңардан ким анын элинен болсо, Жүйүт жериндеги Иерусалимге барсын да, ибадатканасы Иерусалимде болгон* Ысрайылдын Кудайы Жахабанын, чыныгы Кудайдын, ибадатканасын кайра курсун. Аларды Кудайы өзү колдосун! 4 Алар келгин катары каякта жашап жүрбөсүн,+ бул жакта кала тургандар аларга алтын-күмүш, мал-мүлк берип, ошондой эле чыныгы Кудайдын Иерусалимдеги ибадатканасына тартуу берип, жардам көрсөтүшсүн“».+

5 Ошондо Жүйүт уруусу менен Бенжемин уруусунун башчылары, дин кызматчылар жана лебилер — чыныгы Кудай түрткү бергендердин баары Жахабанын Иерусалимдеги ибадатканасын кайра курганы барыш үчүн даярдана башташты. 6 Кошуна-колоңдору аларга Кудайдын ибадатканасына деп берген тартуусунан сырткары алтын-күмүш буюмдарды, мал-мүлк жана кымбат баалуу нерселерди берип жардам кылышты.

7 Кореш падыша Небухаданасар бир кезде Иерусалимдеги Жахабанын ибадатканасынан алып кетип, өз кудайынын ибадатканасына коюп койгон буюмдарды кайтарып бергиле деп да буйрук берди.+ 8 Муну Персия падышасы Кореш казыначы Митредатка тапшырды. Ал болсо буюмдарды тизмелеп, Жүйүт башчысы Шешпасарга* берди.+

9 Аларды эсептегенде, себетке окшош алтын идиштен 30, ошондой күмүш идиштен 1 000 жана башка идиштен 29 болду. 10 Кичине алтын идиштен 30, кичине күмүш идиштен 410 болду. Дагы башка буюмдардын саны 1 000 болду. 11 Алтын буюмдар менен күмүш буюмдардын жалпы саны 5 400 болду. Шешпасар туткунда жүргөндөрдү+ Иерусалимге алып барыш үчүн Бабылдан алып чыкканда ошол буюмдардын баарын кошо ала чыкты.