Башталыш

30 Рахил төрөбөгөндүктөн эжесине ичи күйүп, Жакыпка: «Мага бала бер, болбосо өлөм»,— деди. 2 Жакып ачууланып: «Мен, эмне, Кудай белем?! Кудай сага бала бербесе, мен күнөөлүмүнбү?» — деди. 3 Рахил: «Күңүм Биланы+ ал, мага бала төрөп берсин, анын аркасынан мен да балалуу болоюн»,— деди. 4 Ошентип, ал күңү Биланы Жакыпка берди. Жакып аны аялдыкка алды.+ 5 Биланын боюна бүтүп, ага уул төрөп берди. 6 Ошондо Рахил: «Кудай менин сотум болду, үнүмдү угуп, уул берди» — деп, атын Дан*+ койду. 7 Биланын дагы боюна бүтүп, Жакыпка экинчи уулун төрөп берди. 8 Рахил: «Эжем менен катуу күрөшүп, жеңип чыктым!» — деп, атын Напталы*+ койду.

9 Лия төрөбөй калгандыктан күңү Зилпаны Жакыпка аялдыкка берди.+ 10 Ал Жакыпка уул төрөп берди. 11 Ошондо Лия: «Жолум болду!» — деп, атын Гат*+ койду. 12 Зилпанын дагы боюна бүтүп, Жакыпка экинчи уулун төрөп берди. 13 Лия: «Кандай бактылуумун! Эми аялдар мени бактылуу дешет»+ — деп, атын Ашыр*+ койду.

14 Буудай орулуп жаткан кезде Рубейин+ талаага барып, бир нече мандрагора* таап алды. Анан аларды энеси Лияга алып келди. Рахил Лияга: «Мага балаң алып келген мандрагорадан берчи»,— деди. 15 Лия: «Күйөөмдү тартып алганың аз келгенсип,+ эми баламдын мандрагорасын алгың барбы?» — деди. Рахил ага: «Эгер мандрагора берсең, Жакып бүгүн түнү сени менен болот»,— деп айтты.

16 Кечинде Жакып талаадан келатканда, Лия алдынан чыгып: «Бүгүн түнү мени менен болосуң, сени балам терип келген мандрагораларга сатып алдым»,— деди. Жакып ошол түнү Лия менен болду. 17 Кудай Лиянын үнүн уккандыктан, анын боюна бүтүп, Жакыпка бешинчи уулун төрөп берди. 18 Ошондо Лия: «Күңүмдү күйөөмө бергеним үчүн Кудай мага сыйлык берди» — деп, атын Исахар*+ койду. 19 Анын дагы боюна бүтүп, Жакыпка алтынчы уулун төрөп берди.+ 20 Лия: «Кудай мага эң сонун белек берди. Эми күйөөмө кичине болсо да жагармын*,+ анткени ага 6 уул төрөп бердим»+ — деп, атын Забулун*+ койду. 21 Андан кийин кыз төрөп, атын Дина+ койду.

22 Акыр-аягы, Кудай Рахилге назарын салды. Анын үнүн угуп, бала берди.+ 23 Рахилдин боюна бүтүп, уул төрөп: «Кудай мени шылдыңдан арылтты!» — деди.+ 24 Анан: «Жахаба мага дагы бир уул берди» — деп, атын Жусуп*+ койду.

25 Рахил Жусупту төрөгөндөн кийин, Жакып Лабанга: «Эми мени коё бериңиз, өз үйүмө, өз жериме кайтайын.+ 26 Аялдарым менен балдарымды да алып кетейин, алар үчүн иштеп бердим. Сизге кандай кызмат кылганымды өзүңүз жакшы билесиз»,— деди.+ 27 Ошондо Лабан: «Суранам, кетпей эле койчу. Жахаба мага сен үчүн батасын берип жатканын жышаандардан* билдим»,— деп айтты. 28 Анан: «Акыңа эмне берейин, айт»,— деди.+ 29 Жакып ага: «Сизге кандай кызмат кылганымды, мен келгенден бери малыңыздын канчалык көбөйгөнүн өзүңүз жакшы билесиз.+ 30 Мурун малыңыз аз эле, азыр болсо абдан көбөйдү. Мен келгенден тартып, Жахаба сизге батасын берди. Эми качан өз үй-бүлөм үчүн иштейм?» — деди.+

31 Лабан: «Акыңа эмне берейин?» — деп сурады. Жакып: «Эч нерсе бербей эле коюңуз. Болгону, мен айткандай кылсаңыз, малыңызды дагы багып, кайтарып берейин.+ 32 Бүгүн малыңыздын баарын карап чыгалы. Темгили бар койлор менен ала-була койлордун, кара күрөң жаш кочкорлордун, ала-була, темгили бар эчкилердин баарын өзүнчө бөлүп коюңуз. Бүгүндөн баштап туулган ушундай мал менин эмгек акым болсун.+ 33 Малымды текшергени кайсы күнү келбеңиз, адал эмгек кылып жатканымды көрөсүз. Эгер эчкилеримдин арасында темгили жоктору, ала-була эместери бар болсо же жаш кочкорлорумдун арасында кара күрөң эместери бар болсо, анда алардын баары уурдалган болот»,— деди.

34 Лабан: «Макул, сүйлөштүк, сен айткандай болсун»,— деди.+ 35 Ошол күнү Лабан чаар ала текелерди, темгили бар, ала-була эчкилерди, анча-мынча болсо да ак тактары бар же кара күрөң жаш кочкорлорду өзүнчө бөлүп, уулдарына тапшырды. 36 Анан ошол малын Жакып турган жерден 3 күн жол жүрө тургандай алыстыкка айдап кетти. Ошентип, Жакып Лабандын калган малын кайтарып калды.

37 Жакып стиракс дарагынын*, бадам дарагынын, чынардын жаш чыбыктарын алып, кабыгын ала-була кылып аарчыды. 38 Анан куут маалында суу ичкени келген мал ошол чыбыктардын жанында жупташсын деп, аларды мал көрө тургандай кылып, суу куюлчу аштоолордун ичине таштап койду.

39 Ошентип, чыбыктардын жанында жупташкан малдан чаар ала, темгили бар, ала-була козу-улактар туулду. 40 Анан Жакып жаш кочкорлорду бөлүп алды. Анан чаар ала, кара күрөң ошол эркек малды Лабандын оторундагы калган малдын бет маңдайына койду. Ошондо Лабандын калган малы аларды карагыдай болуп калды. Ошондон кийин ал өзүнүн малын бөлүп алып, Лабандыкына кошпой, өзүнчө кармады. 41 Малдын жакшысы жупташканда, Жакып аларды чыбыктардын жанында жупташсын деп, чыбыктарды алар көргүдөй кылып суу куюлчу аштоолорго таштап койчу. 42 Ал эми малдын начары жупташканда, чыбык таштачу эмес. Ошондуктан Лабанга малдын начары, Жакыпка болсо жакшысы тийчү.+

43 Жакып байыгандан байып, малы, төөлөрү, эшектери, күңдөрү менен кулдары көбөйгөндөн көбөйө берди.+