Филиппиликтерге
2 Машаяктын жолдоочусу катары бири-бириңерге дем-күч бергенге, бири-бириңерди жакшы көрүп жубатканга, өз ара күйүмдүү, ынак, боорукер болгонго бүт күчүңөрдү жумшагыла. 2 Биримдикте болгула, бири-бириңерди сүйгүлө, бардык жагынан, атүгүл оюңарда да биримдүү болгула.+ Эгер ошентсеңер, кубанычым ого бетер артат. 3 Эч нерсени атаандашып кылбагыла,+ көйрөңдөнүп-менменсинбегиле.+ Анын ордуна, момун болуп, башкаларды өзүңөрдөн жогору көргүлө.+ 4 Өзүңөрдүн эле эмес,+ башкалардын да кызыкчылыгын ойлогула.+
5 Машаяк Исадай ой жүгүрткүлө.+ 6 Анын табияты Кудайдыкындай болсо да,+ Кудайга тең болгонго умтулган эмес, бул атүгүл оюна да келген эмес.+ 7 Кайра, бардык нерседен баш тартып, кулдай болгонго даяр болуп,+ жерге адам болуп келген.+ 8 Ал эле эмес, адам болуп жүргөндө өзүн басынткан жана өлгөнгө, жаза устунуна* кадалып+ өлгөнгө туура келсе да, Кудайга баш ийген.+ 9 Ошон үчүн Кудай аны мурункудан алда канча жогорулатып,+ ага бардык бийликтен жогору турган бийлик* берди.+ 10 Ал муну асмандагылардын, жердегилердин, жер астындагылардын* баары Исанын бийлигин урматтап-сыйлашы үчүн кылды.+ 11 Алардын баары Иса Машаякты Мырзасы катары кабыл алганын ачык көрсөтүп,+ асмандагы Атабыз Кудайды даңкташы үчүн ошентти.
12 Сүйүктүү боордошторум, араңарда жүргөнүмдө дайыма баш ийгениңердей эле, азыр да араңарда жок болгонума карабай баш ийип жатасыңар, атүгүл андан да көбүрөөк баш ийип жатасыңар. Куткарылышыңар үчүн мындан ары да Кудайдан коркуп, аны кастарлап, бүт күчүңөрдү жумшай бергиле. 13 Анткени силерди күч-кубатка толтурган Кудай, ага жаккандай иш кылышыңар үчүн, силерге каалоо да, күч да берет. 14 Бардык нерсени наалыбай,+ талашып-тартышпай кылгыла.+ 15 Ошондо Кудайдын эч ким айыптай албаган, куулук-шумдугу жок балдары болосуңар.+ Эгер эч ким айыптай албагыдай болсоңор, азыркы бузулган,+ ыйманы кеткен дүйнөдө чырактай жаркырап турасыңар.+ 16 Кудайдын өмүр бере турган сөзүнө бекем кармангыла.+ Ошондо кылган аракетим, мээнетим текке кетпегенин билип, Машаяктын сот жүргүзө турган күнүндө кубанам. 17 Силердин Кудайга берилип кызмат кылып жатканыңар курмандык чалганга тете.+ Мен ошол курмандыктын үстүнө суюк тартуу* сыяктуу куюлуп жатсам да,+ баарыңар менен чогуу кубанып-шаттанам. 18 Силер да мени менен кубанып-шаттангыла.
19 Мырзабыз Иса туура көрсө, жакында силерге Тиметейди+ жиберейин деп жатам. Ал ал-жайыңарды билип келсе, кубанып калат элем. 20 Аны жиберейин деп жатканымдын себеби силерге чын дилден кам көрө турган башка эч кимим жок. 21 Андан башкасынын баары Машаяк Иса каалаганды эмес, өз жыргалчылыгын гана ойлошот. 22 Ал эми Тиметейдин кандай экенин жакшы билесиңер. Атасына жардам берген балага окшоп,+ мени менен чогуу жакшы кабарды таратыш үчүн ал кара жанын карч уруп кулдай кызмат кылды. 23 Ошондуктан эмне болорум билинер замат аны силерге жөнөтөйүн деп жатам. 24 Мырзабыз туура көрсө, жакында өзүм да барып калам.+
25 Азыр болсо силерге боордошум, кызматташым, Машаяктын жоокери Эпафродитти кайра жөнөтүшүм керек болуп жатат. Аны ал-акыбалымды билип, мага жардам бериши үчүн жөнөтпөдүңөр беле.+ 26 Ал баарыңарды сагынып жүрөт. Ооруп калганын укканыңарды билип, көңүлү да чөгүп жатат. 27 Чын эле, ал катуу ооруп, аз жерден өлүп кала жаздады. Бирок Кудай боору ооруп, аман алып калды. Ага эле эмес, мага да боору ооруду, болбосо кайгыма кайгы кошулмак. 28 Аны мүмкүн болушунча тезирээк жиберейин деп жатам. Себеби аны көрүп, кубанып калмаксыңар, мен да силерди ойлоп санаа тартпай калмакмын. 29 Мырзабыздын башка жолдоочуларын кандай тосуп алсаңар, аны да кучак жайып, ошондой жылуу тосуп алгыла. Андай адамдарды жогору баалагыла.+ 30 Ал Машаяктын* ишин аткарам деп аз жерден өлүмдөн калды. Силер алыста болуп, мага жардам бере албай калгандыктан, ал мен үчүн өмүрүн тобокелге салды.+