Жакан

8 12 Иса кайрадан элге кайрылып: «Мен дүйнөнүн жарыгымын.+ Ким менин жолумду жолдосо, эч качан караңгылыкта жүрбөйт. Ал өмүргө жеткире турган жарыкка ээ болот»+,— деди. 13 Буга фарисейлер: «Сен өзүң жөнүндө өзүң күбөлөндүрүп жатасың, ошон үчүн күбөлөндүрүүң жарабайт, айткандарыңа ишенбейбиз»,— дешти. 14 Иса аларга: «Өзүм жөнүндө өзүм күбөлөндүрүп жатсам да, менин айткандарым чындык. Анткени кайдан келгенимди, кайда баратканымды билем.+ Силер болсо кайдан келгенимди, кайда баратканымды билбейсиңер. 15 Силер башкаларды адамдык көз караш менен соттойсуңар,+ мен болсо эч кимди соттобойм. 16 Соттосом да, адилеттүү сот жүргүзөм, анткени жалгыз эмес, мени жиберген Атам менен чогуу соттойм.+ 17 Анын үстүнө, өзүңөрдүн Мыйзамыңарда да: „Эки кишинин ырастаганы ишеничтүү“,— деп жазылган.+ 18 Өзүм жөнүндө өзүм эле күбөлөндүрбөстөн, мени жиберген Атам да күбөлөндүрүп жатат»,+— деди. 19 Алар Исадан: «Сенин Атаң каякта?» — деп сурашты. Ал: «Силер мени да, Атамды да билбейсиңер.+ Эгерде мени билсеңер, Атамды да билмексиңер»,— деп жооп берди.+ 20 Буларды Иса ибадатканада, казына идиштери*+ турган жайда элди окутуп жатып айтты. Бирок аны эч ким кармаган жок, анткени анын убагы келе элек болчу.+

21 Иса аларга: «Мен кетип баратам. Мени издейсиңер, бирок баары бир күнөөкөр бойдон өлөсүңөр.+ Мен бараткан жакка силер бара албайсыңар»,— деп дагы айтты.+ 22 Ошондо жүйүттөр: «„Мен бараткан жакка силер бара албайсыңар“,— деп айтканына караганда, эмне, өзүн өзү өлтүргөнү жатабы?» — дешти. 23 Иса сөзүн улап: «Силер төмөн жактан, жерденсиңер, мен болсо жогорудан, асманданмын.+ Силер ушул дүйнөдөнсүңөр, мен болсо бул дүйнөдөн эмесмин. 24 Ошон үчүн силерге: „Күнөөкөр бойдон өлөсүңөр“,— деп айттым. Мен өзүмдү ким деп айтсам, ошол экениме ишенбесеңер, күнөөкөр бойдон өлөсүңөр»,— деди. 25 Тигилер болсо: «Сен кимсиң?» — деп сурашты. Иса аларга: «Деги силер менен эмнеге сүйлөшүп жатам? 26 Силер жөнүндө айта турган сөзүм көп. Силерди айыптаганга да көп себептер бар. Бирок мен мени дүйнөгө жибергенден уккандарымды гана айтып жатам. Ал болсо дайыма чындыкты айтат»,+— деди. 27 Бирок тигилер Исанын асмандагы Атасы жөнүндө айтып жатканын түшүнүшкөн жок. 28 Иса аларга: «Адам Уулун устунга кадаганыңарда*,+ ошол мен экенимди,+ өзүм билип эч нерсе кылбай турганымды,+ Атам эмнени үйрөтсө, ошону гана айтарымды билесиңер. 29 Мени жиберген дайыма мени менен. Ал мени жалгыз калтырган жок, анткени мен ар дайым ага жакканды кылам»,+— деп айтты. 30 Бул сөздөрүн угуп, көптөр Исага ишенип калышты.

31 Иса өзүнө ишенип калган жүйүттөргө: «Эгерде айткандарымды аткарсаңар, анда чындап менин шакирттеримсиңер жана 32 чындыкты таанып-билесиңер.+ Чындык болсо силерди эркиндикке чыгарат»,+— деди. 33 Алар: «Биз Ыбрайымдын тукумдарыбыз, эч качан эч кимге кул болгон эмеспиз. „Эркиндикке чыгасыңар“,— дегениң кандай?» — дешти. 34 Иса: «Силерге чындыкты айтып коёюн, күнөө кылган ар бир адам — күнөөнүн кулу.+ 35 Кул кожоюнунун үйүндө түбөлүккө калбайт, кожоюндун уулу болсо түбөлүккө калат. 36 Эгерде силерди Кудайдын Уулу эркиндикке чыгарса, анда чындап эркин болосуңар. 37 Ыбрайымдын тукумдары экениңерди билем. Бирок силер мени өлтүргөнгө аракет кылып жатасыңар, анткени менин сөздөрүм жүрөгүңөрдөн түнөк тапкан жок. 38 Мен Атамдын жанында жүргөндө көргөндөрүм жөнүндө айтып жатам.+ Силер болсо өзүңөрдүн атаңардан үйрөнгөнүңөрдү кылып жатасыңар»,— деди. 39 Алар: «Биздин атабыз — Ыбрайым»,— дешти. Иса болсо: «Ыбрайымдын балдары болсоңор,+ ал кылганды кылмаксыңар. 40 Силер болсо мени — силерге Кудайдан уккан чындыкты айткан адамды+ — өлтүргүңөр келип жатат. Ыбрайым эч качан минтмек эмес. 41 Силер өзүңөрдүн атаңар кылганды кылып жатасыңар»,— деди. Тигилер: «Биз никесиз* төрөлгөн балдар эмеспиз. Биздин бир эле атабыз бар: ал — Кудай»,— дешти.

42 Иса аларга: «Эгер Атаңар Кудай болсо, мени жакшы көрмөксүңөр,+ себеби мен Кудайдан келип, ушул жерде турам. Мен өзүм эле чечип алып келип калган жокмун, мени ал жиберген.+ 43 Менин айткандарымды эмне үчүн түшүнбөй жатасыңар? Анткени сөздөрүмдү уккуңар* келбейт. 44 Силердин атаңар — Ибилис. Силер атаңардын каалоосун аткаргыңар келет.+ Ал Кудай жөнүндө калп айткандан баштап эле* киши өлтүргүч болгон+ жана чындыкты четке каккан, анткени анда чындык жок. Ал жалган сүйлөйт, себеби ал ошондой: ал — жалганчы жана жалгандын атасы.+ 45 Мен болсо чындыкты айтам, ошон үчүн мага ишенбей жатасыңар. 46 Кана, күнөөм бар экенин кимиңер далилдей аласыңар? Ал эми чындыкты айтып жатсам, анда эмнеге мага ишенбейсиңер? 47 Кимдин атасы Кудай болсо, ал анын сөзүн угат.+ Силердин атаңар Кудай эмес, ошон үчүн укпай жатасыңар»,+— деди.

48 Ошондо жүйүттөр: «„Сен самариялыксың,+ ичиңде жин бар“,+— деп жөн жерден айтып жатыптырбызбы?» — дешти. 49 Иса аларга: «Менин ичимде жин жок. Мен Атамды урматтайм, силер болсо мени кордоп жатасыңар. 50 Бирок мен өзүмө даңк издебейм,+ мени даңкка бөлөй турган бирөө бар. Соттой турган да ошол. 51 Силерге чындыкты айтып коёюн, ким менин сөзүмдү аткарса, ал эч качан өлбөйт»,+— деди. 52 Жүйүттөр: «Ичиңде жин бар экенине эми көзүбүз жетти. Ыбрайым өлгөн, пайгамбарлар да өлүшкөн. Сен болсо: „Ким менин сөзүмдү аткарса, ал эч качан өлбөйт“,— деп жатасың. 53 Эмне, сен атабыз Ыбрайымдан да улуксуңбу? Ал да өлгөн, пайгамбарлар да өлүшкөн. Өзүңдү деги ким деп эсептейсиң?» — дешти. 54 Иса: «Эгерде мен өзүмдү өзүм даңктасам, даңкым эч нерсеге татыбайт. Мени Атам даңктап жатат.+ Силер аны Кудайыбыз дейсиңер. 55 Бирок, чындыгында, аны билбейсиңер.+ Мен болсо билем.+ Эгер билбейм десем, силердей жалганчы болуп калмакмын. Мен аны билем жана анын сөздөрүн аткарып жатам. 56 Атаңар Ыбрайым мен келе турган күндү көрөм деп аябай кубанып жүргөн. Ал ошол күндү көз алдына тартып көрүп*, кубанган»,+— деди. 57 Буга жүйүттөр: «Сен элүүгө да чыга элексиң, анан Ыбрайымды каяктан көрмөк элең?» — дешти. 58 Иса: «Силерге чындыкты айтып коёюн, мен Ыбрайым төрөлгөнгө чейин эле бар болгом»,+— деп жооп берди. 59 Ошондо алар таш алып, Исаны урмакчы болушту. Бирок ал жашынып калды да, ибадатканадан чыгып кетти.