Забур

Дөөтүнүн ыры.

101 Мен туруктуу сүйүү, акыйкаттык жөнүндө ырдайм.

Оо, Жахаба, сени даңктап ырдайм*.

2 Акыл менен иш кылам, кынтыксыз иш кылам.

Сен мага качан жардамга келесиң?

Мен үйүмдө жүргөндө да эч кандай жаман ишке барбайм.+

3 Пайдасы жок бир да нерсени карабайм.

Түз жолдон чыккандардын иштерин жек көрөм;+

Аларга такыр жолобойм*.

4 Жүрөгү бузук адамдан* алысмын,

Жаман нерсени четке кагам.

5 Ким жакынына жашыруун жалаа жапса,+

Анын үнүн басам*.

Ким текеберденип, өзүн көтөрсө,

Чыдап тура албайм.

6 Жер жүзүндөгү Кудайга берилген адамдарга назар салам,

Алар мени менен жашайт.

Түз жүргөн* адам мага кызмат кылат.

7 Бир да митаам киши үйүмдө жашабайт.

Бир да жалганчыны жаныма жолотпойм.

8 Күнүгө эртең менен жер жүзүндөгү ыймансыздардын жаагын жап кылам*,

Жахабанын шаарынан жамандык кылгандардын баарын жок кылам.+