Римдиктерге

8 Ошондуктан Машаяк Иса менен биримдикте болгондорду Кудай айыптуу деп эсептебейт. 2 Анткени Кудайдын өмүр берген ыйык рухунун мыйзамы* Машаяк Иса менен биримдикте болгон силерди күнөө менен өлүмдүн мыйзамынан бошотту.+ 3 Адамдар алсыз,+ күнөөлүү болгондуктан, Мусанын Мыйзамы силерди эркиндикке чыгара алган жок.+ Кудай болсо күнөөнү жок кылыш үчүн өзүнүн Уулун күнөөкөр адамдарга+ окшош кылып жөнөтүп, силерди эркиндикке чыгарды.+ Ошентип, денедеги күнөөгө өкүм чыгарды. 4 Биз дененин каалоосу боюнча эмес, Кудайдын ыйык рухунун жетеги боюнча+ жашап, Мыйзамдын адил талабын аткара алышыбыз үчүн ошентти.+ 5 Дененин каалоосуна жетеленгендер дайыма денеге жаккан нерселерди ойлошот,+ ал эми Кудайдын ыйык рухуна жетектелгендер, ал эмнеге түрткү берсе, дайыма ошол нерселерди ойлошот.+ 6 Денеге жаккан нерселерди ойлоо өлүмгө алып барат,+ ал эми Кудайдын ыйык руху түрткү берген нерселерди ойлоо өмүр менен тынчтыкка жеткирет.+ 7 Денеге жаккан нерселерди ойлосок, Кудайга душман болуп калабыз.+ Себеби күнөөкөр дене Кудайдын мыйзамына баш ийбейт, баш ие да албайт. 8 Демек, дененин каалоосу боюнча жашагандар Кудайга жага албайт.

9 Бирок силер күнөөкөр дененин каалоосу боюнча жашаган жоксуңар. Эгер силерде Кудайдын ыйык руху чынында эле бар болсо*, анда анын жетеги менен жашап жатасыңар.+ Ким Машаяктай ой жүгүртпөсө*, ал Машаякка таандык эмес. 10 Эгерде силер Машаяк менен биримдикте болсоңор,+ денеңер күнөөнүн айынан өлүк болсо да, адил деп эсептелгениңер үчүн Кудай ыйык руху аркылуу силерге өмүр берет. 11 Эгер силерде Исаны тирилткен Кудайдын ыйык руху бар болсо, анда Машаяк Исаны тирилткен+ Кудай силердин да өлө турган денеңерди ошол ыйык руху аркылуу жандандырат.+

12 Ошондуктан, бир туугандарым, денебиздин каалоолорунун бизди бийлеп алышына жол бербешибиз керек, аларды аткарбашыбыз керек.+ 13 Анткени дененин каалоосу боюнча жашасаңар, анда сөзсүз өлөсүңөр. Ал эми дененин иштерин Кудайдын ыйык рухунун жардамы менен өлтүрсөңөр,+ анда жашайсыңар.+ 14 Себеби Кудайдын ыйык рухуна жетектелгендердин баары, чындап эле, Кудайдын балдары.+ 15 Биз кайрадан корккудай, Кудай ыйык руху аркылуу бизди кул кылган жок, кайра, балдары катары асырап алды. Ошол ыйык руху ага: «Абба*, Ата!» — деп кайрылышыбызга түрткү берип жатат.+ 16 Кудайдын ыйык руху бизди анын балдары+ экенибизге ынандырып турат.+ 17 Эгер балдары болсок, анда мурасчыларбыз, тактап айтканда, Кудайдан мурас алабыз.+ Ошондой эле Машаяк менен мурасташпыз. Эгер аны менен бирге азап тартсак,+ аны менен бирге даңкталабыз.+

18 Ошон үчүн азыркы азаптарыбыз келечекте көрсөтүлө турган даңкыбызга салыштырмалуу эч нерсеге арзыбайт деп ойлойм.+ 19 Себеби жаратылгандардын баары* Кудайдын балдарынын даңкы көрүнө турган убакты эңсеп күтүп жатат.+ 20 Анткени жаратылгандар маңызсыз жашоого өз эрки менен моюн сунуп калышкан эмес,+ буга Кудай жол берген. Бирок ошол эле учурда ал бизге үмүт берген, 21 башкача айтканда, жаратылгандар күнөө менен өлүмдүн* кулчулугунан бошонуп, Кудайдын балдары катары даңктуу эркиндикке чыгарына үмүт берген.+ 22 Биз жаратылгандын баары ушул убакка чейин онтоп, кыйналып жатканын билебиз. 23 Бирок Кудайдын ыйык рухун, келечектеги мурасыбыздын белгисин*, алган биз да онтоп,+ Кудайдын бизди балдары катары асырап алышын,+ Машаяк төлөгөн кундун аркасында денебизден бошотулушубузду чыдамсыздык менен күтүп жатабыз. 24 Кудай бизди күнөөдөн куткарып, ушул үмүттү берди. Бирок үмүттөнгөн нерсебизди көрүп турсак, анда үмүтүбүз үмүт эмес. Анткени адам көрүп турган нерсесине үмүттөнмөк беле? 25 Ал эми көрүнбөгөн+ нерсеге үмүттөнсөк,+ аны туруктуулук менен күтө беребиз.+

26 Ошондой эле алсыз болгонубузда, Кудай ыйык руху аркылуу бизге жардам берет.+ Анткени Кудайдан тилениш керектигин билсек да, эмне деп тилениш керектигин билбей калганыбызда, сөз менен айтып жеткире албай жүрөгүбүз сыздаганда, Кудайдын ыйык руху биз үчүн суранат. 27 Жүрөктөрдү изилдеген Кудай+ ыйык рухунун эмнени суранып жатканын билет, анткени анын ыйыктар үчүн суранган нерселери Кудайдын эркине ылайык келет.

28 Биз билгендей, Кудай бардык иштерин аны сүйгөндөргө — анын ой-ниетине ылайык тандалгандарга — пайда алып келгидей жол менен кылат*.+ 29 Ал аларды башында эле тандап алган жана алардын өз Уулундай болорун алдын ала чечип койгон.+ Ошентип, Уулу көптөгөн бир туугандарынын+ арасында туңгучу+ болмок. 30 Кудай кимдердин Уулундай болушун чечип койсо,+ ошолорду тандап алды;+ кимдерди тандап алса, ошолорду адил деп эсептеди;+ кимдерди адил деп эсептесе, ошолорду даңктады.+

31 Буга эмне демекчибиз? Эгер Кудай биз тарапта болсо, бизге ким каршы чыгып, жеңе алат?+ 32 Ал атүгүл өз Уулун аябай, баарыбыз үчүн берген болсо,+ анда кантип аны менен кошо башка нерселерди да бербесин? 33 Кудай тандап алгандарды ким айыптайт?+ Эч ким, анткени Кудай өзү аларды адил деп жарыялайт.+ 34 Аларга каршы ким өкүм чыгарат? Эч ким, анткени өлүп, кайра тирилген жана Кудайдын оң жагында отурган+ Машаяк Иса өзү биз үчүн арачылык кылат.+

35 Бизди Машаяктын сүйүүсүнөн ким ажырата алат?+ Кыйынчылыкпы, азаппы, куугунтукпу, ачкачылыкпы, жылаңачтыкпы, коркунучпу же кылычпы?+ 36 Бул жөнүндө Ыйык Жазмада: «Сага кызмат кылганыбыз үчүн күн сайын өлүм менен беттешебиз, башкалар үчүн биз союла турган койдойбуз»,— деп жазылган эмеспи.+ 37 Бирок бизди сүйгөндүн жардамы менен ушулардын баарын жеңип келатабыз.+ 38 Мен өлүм да, өмүр да, периштелер да, өкмөттөр да, азыркы нерселер да, келечектеги нерселер да, күчтөр да,+ 39 бийиктик да*, төмөндүк да*, деги эле жаратылган эч бир нерсе бизди Кудайдын Мырзабыз Машаяк Иса аркылуу көрсөткөн сүйүүсүнөн ажырата албасына толук ишенем.