Бийлер

6 Бирок ысрайыл эли кайрадан Жахабанын көз алдында жаман иштерди кыла баштады.+ Ошондуктан Жахаба аларды 7 жылга мидиандыктардын колуна салып берди.+ 2 Мидиандыктар үстөмдүк кылып, кысым көрсөткөндүктөн,+ ысрайылдыктар тоолорго, үңкүрлөргө, киши оңой менен жете албай турган жерлерге жашына турган жайларды* даярдашты.+ 3 Ысрайылдыктар эгин айдаганда, мидиандыктар, Амалыктын тукумдары+ менен Чыгышта+ жашаган элдер келип, аларга кол салышчу. 4 Алар Ысрайыл жерине кошуундарын жайгаштырып, тээ Газага чейинки жерлердеги түшүмдүн баарын жок кылып, ысрайылдыктарга азык-түлүк да, кой да, бодо мал да, эшек да калтырышчу эмес.+ 5 Чегирткелердей сансыз ал элдер малы, чатырлары менен келишчү.+ Алардын өздөрүнө да, төөлөрүнө да эсеп жетчү эмес.+ Алар Ысрайыл жерин кыйратыш үчүн келишчү. 6 Ысрайылдыктар мидиандыктардын айынан абдан жакырданып кетип, Жахабадан жардам сурай башташты.+

7 Алар Жахабага мидиандыктардан куткарышын сурап кайрылышканда,+ 8 Жахаба аларга бир пайгамбарды жөнөтүп: «Ысрайылдын Кудайы Жахаба мындай дейт: „Мен силерди Мисирден, силер кул болуп жүргөн жерден*, алып чыккам.+ 9 Мисирден алып чыгып, силерди эзгендердин баарынан куткаргам. Ошондой эле душмандарыңарды кууп чыгып, алардын жерин силерге бергем.+ 10 Анан: “Мен Жахаба Кудайыңармын.+ Өзүңөр жашаган жердеги аморлуктардын кудайларына сыйынбагыла*”,— деп айткам.+ Бирок мени укпай койгонсуңар“»,+— деп айттырып жиберди.

11 Кийинчерээк Жахабанын периштеси келип,+ Опрадагы бир чоң бактын түбүнө отурду. Ал бак Абиезердин тукуму Жоашка таандык болчу.+ Ошол учурда анын уулу Гидон+ мидиандыктардан катып коюш үчүн жашырынып жүзүм сыккычтын ичинде буудай бастырып жаткан эле. 12 Жахабанын периштеси ага көрүнүп: «Күчтүү жоокер, Жахаба сен тарапта+»,— деди. 13 Гидон ага: «Мырзам, эгер Жахаба биз тарапта болсо, анда эмнеге ушунун баары башыбызга түштү?+ Ата-бабаларыбыз бизге: „Жахаба бизди Мисирден алып чыккан“+ — деп, анын улуу иштери жөнүндө айтып беришкен эле, ошол улуу иштери кана?+ Эми минтип Жахаба бизди таштап койду,+ бизди мидиандыктардын колуна салып берди»,— деди. 14 Ошондо Жахаба* аны карап: «Бар да, ушу күчүң менен Ысрайылды мидиандыктардын колунан куткар,+ анткени сени мен жиберип жатам»,— деди. 15 Бирок Гидон: «Жахаба, мен Ысрайылды кантип куткармак элем? Биздин тукумубуз* Менаше уруусундагылардын эң карапайымы, өзүм да атамдын үйүндөгүлөрүнүн ичинен кадыр-барктуу деле киши эмесмин»,— деди. 16 Жахаба ага: «Мен сени менен болом.+ Сен мидиандыктарды бир кишини кыйраткандай кыйратасың»,— деди.

17 Гидон ага*: «Эгер көңүлүңө жаккан адам болсом, анда мени менен сүйлөшүп жаткан сен экениңди билдирген жышаан көрсөтчү. 18 Мен барып тамак-аш даярдап, алдыңа алып келгиче, ушул жерден кетпей турчу»,— деди.+ Ал: «Мейли, сен келгенче, ушул жерде туруп турам»,— деди. 19 Гидон барып, улак союп, этин бышырып, 11 килограммдай* ундан калама жасады.+ Анан этти себетке салып, сорпосун идишке куюп, чоң бактын түбүнө алып келип, ага берди.

20 Чыныгы Кудайдын периштеси ага: «Эт менен каламаны алып, тетиги чоң таштын үстүнө кой да, сорпону төк»,— деди. Ал ошондой кылды. 21 Жахабанын периштеси колундагы таягын сунуп, учун эт менен каламага тийгизгенде, таштан от чыгып, аларды жалмап кетти.+ Жахабанын периштеси болсо көздөн кайым болду. 22 Ошондо Гидон анын Жахабанын периштеси+ экенин түшүнүп: «Оо, Эгедер Теңир Жахаба, эми мен өлөм! Анткени Жахабанын периштесин бетме-бет көрдүм!» — деди.+ 23 Бирок Жахаба ага: «Тынчсызданба*. Коркпо,+ өлбөйсүң»,— деди. 24 Гидон ал жерге Жахабага арнап курмандык жайын курду. Ал ушул күнгө чейин Жахаба-Шалом*+ деп аталат жана Абиезердин тукумдары жашаган Опрада турат.

25 Ошол түнү Жахаба Гидонго: «Атаңдын жаш букасын, жети жашар букасын* ал да, анын Баалга арналып курулган курмандык жайын талкалап, жанындагы ыйык мамыны кыйып ташта.+ 26 Анан ошол коопсуз бийик жерге таштарды кыдырата коюп, Жахаба Кудайыңа арнап курмандык жайын кур да, үстүнө жаш буканы* курмандыкка чал. Өзүң кыйган ыйык мамыны болсо отун кылып жак»,— деди. 27 Гидон жанына кызматчыларынын арасынан 10 кишини алып, баарын Жахаба айткандай кылды. Бирок атасынын үйүндөгүлөрүнөн жана шаардын тургундарынан корккондуктан муну күндүз эмес, түнкүсүн кылды.

28 Шаардын тургундары таң эрте туруп, Баалдын курмандык жайынын талкаланып жатканын, жанындагы ыйык мамынын кыйылганын, жаңы курулган курмандык жайында болсо жаш буканын* курмандыкка чалынганын көрүштү. 29 Алар бири-биринен: «Муну ким кылды?» — деп сурай башташты. Териштирип көргөндөн кийин: «Муну Жоаштын уулу Гидон кылыптыр»,— дешти. 30 Анан Жоашка: «Уулуңду бери чыгар. Баалдын курмандык жайын талкалап, жанындагы ыйык мамыны кыйып салганы үчүн ал өлүшү керек»,— дешти. 31 Жоаш+ өзүн тегеректеп алгандардын баарына: «Баалды коргой турган силерсиңерби? Аны силер куткарасыңарбы? Ким аны коргой турган болсо, ал ушул таңдан калбай өлтүрүлсүн.+ Эгер кимдир бирөө Баалдын курмандык жайын талкалап салса, анда кудай экен, өзүн өзү коргоп албайбы!»+ — деди. 32 Ошол күнү ал: «Кимдир бирөө Баалдын курмандык жайын талкалап салса, өзүн өзү коргобойбу» — деп, Гидонго Жерубаал* деген ат койду.

33 Мидиандыктар,+ Амалыктын тукумдары+ менен Чыгышта жашагандардын баары биригип,+ дарыядан өтүштү да, Изреил өрөөнүнө келип жайгашышты. 34 Ошондо Гидонго Жахабанын ыйык руху таасир этти.+ Ал мүйүз сурнай тартканда,+ Абиезердин тукумдары+ ага колдоо көрсөткөнү келишти. 35 Анан ал Менаше уруусундагылардын баарына кабарчыларды жиберди, алар да колдоо көрсөткөнү келишти. Ошондой эле Ашыр, Забулун, Напталы уруусундагыларга да кабарчыларды жиберди, алар да келишти.

36 Анан Гидон чыныгы Кудайга: «Эгер сен, өзүң убада кылгандай, Ысрайылды мен аркылуу куткара турган болсоң,+ 37 анда кырманга кыркылган жүндү төшөйүн. Эгер шүүдүрүм жүнгө эле түшүп, калган жердин баары кургак болсо, анда чын эле, өзүң убада кылгандай, Ысрайылды мен аркылуу куткарасың»,— деди. 38 Анан так ошондой болду. Эртеси күнү ал эрте туруп, жүндү сыкса, бир чоң табак толгудай суу чыкты. 39 Бирок Гидон кайрадан Кудайга кайрылып: «Мага каардана көрбө, дагы бир нерсе өтүнөйүн, уруксат эт. Жүндү колдонуп дагы бир жолу сынап көрөйүн. Бул жолкусунда жердин баарына шүүдүрүм түшүп, жүн эле кургак бойдон калсын»,— деди. 40 Кудай ошол түнү так ошондой кылды: жердин баарына шүүдүрүм түшүп, жүн эле кургак бойдон калды.