Жакан

1 Башында Сөз* болгон,+ Сөз Кудай менен болгон+ жана Сөз Кудайдай болгон.+ 2 Ал башында Кудай менен болгон. 3 Бардыгы ал аркылуу жаратылган,+ ансыз эч нерсе жаратылган эмес.

4 Ал аркылуу өмүр пайда болгон. Өмүр* адамдар үчүн жарык болгон.+ 5 Жарык караңгылыкта жаркырап турат;+ караңгылык аны жеңе албайт.

6 Кудай өзүнүн өкүлү катары жиберген бир киши келди. Анын аты Жакан эле.+ 7 Ар кандай адамдар анын айткандарынын негизинде ишенип калышы үчүн, ал аларга жарык жөнүндө күбөлөндүргөнү келди.+ 8 Ал өзү жарык эмес болчу,+ бирок ошол жарык жөнүндө күбөлөндүрүшү керек эле.

9 Ар кандай адамдарга тийген чыныгы жарык дүйнөгө келгени жаткан.+ 10 Ал* дүйнөгө келген+ жана дүйнө ал аркылуу жаратылган,+ бирок дүйнө аны тааныган жок. 11 Ал өз элине келди, бирок алар аны кабыл алышкан жок. 12 Кабыл алгандарга болсо ал Кудайдын балдары болгонго укук берди,+ анткени алар ага* ишеништи.+ 13 Алар адамдан төрөлүшкөн жок, дененин каалоосу же пенденин эрки менен эмес, Кудайдын балдары катары төрөлүштү.+

14 Сөз адам болуп,+ арабызда жашады. Биз анын даңкын, жалгыз уул+ катары атасынан алган даңкын, көрдүк. Ал дайыма Кудайдын ырайымына* бөлөнүп турган жана чындыкты айткан*. 15 (Жакан ал жөнүндө күбөлөндүрүп: «Мен: „Артымдан келаткан менин алдыма чыкты, анткени ал мага чейин эле болгон“,— деп айткан киши — ушул»,— деп жар салган.)+ 16 Ал чексиз ырайымдуу болгондуктан, баарыбыз ырайым артынан ырайым көрүп келдик. 17 Анткени Кудай Муса аркылуу Мыйзам берсе,+ Иса Машаяк* аркылуу ырайым+ менен чындык эмне экенин айкын кылды.+ 18 Кудайды бир да адам көргөн эмес.+ Аны бизге Атасынын жанындагы*,+ табияты боюнча ага окшош болгон жалгыз Уулу+ таанытты.+

19 Жүйүттөр Иерусалимден дин кызматчылар менен лебилерди: «Сен кимсиң?» — деп Жакандан сураганы жиберишкенде,+ 20 Жакан жооп бергенден качпай: «Мен Машаяк эмесмин»,— деп ачык айтты. 21 Алар: «Анда кимсиң? Илияссыңбы?» — деп сурашты.+ «Жок»,— деди ал. «Анда келиши керек болгон пайгамбарсыңбы?»+ — деп сурашканда да, Жакан: «Жок!» — деп жооп берди. 22 Ошондо алар: «Анда кимсиң? Бизди жибергендерге жооп бергидей бололу. Өзүң жөнүндө эмне дейсиң?» — дешти. 23 Жакан: «Ышая пайгамбар айткандай, мен ээн талаада: „Жахабанын* жолун тегиздегиле“,— деп жар салып жүргөндүн өзүмүн»,+— деп айтты.+ 24 Ал кишилерди фарисейлер жиберген эле. 25 Алар Жакандан: «Эгер Машаяк да, Илияс да, келиши керек болгон пайгамбар да болбосоң, анда эмнеге элди чөмүлтүп* жатасың?» — деп сурашты. 26 Жакан аларга: «Мен сууга чөмүлдүрүп жатам. Бирок араңарда силер тааныбаган бирөө бар. 27 Ал менин артымдан келатат. Мен анын сандалынын боосун чечкенге да татыксызмын»,— деп жооп берди.+ 28 Бул окуя Жакан элди чөмүлдүргөн жерде, Иордан дарыясынын аркы өйүзүндөгү Бетанияда* болду.+

29 Кийинки күнү Жакан өзүн көздөй келаткан Исаны көрүп: «Мына, Кудайдын Козусу!*+ Ал бул дүйнөнү+ күнөөдөн арылтат.+ 30 „Артымда келаткан бирөө менин алдыма чыкты, анткени ал мага чейин эле болгон“,— деп ушул жөнүндө айткам.+ 31 Мен аны таанычу эмесмин. Бирок ал ысрайыл элине таанылышы үчүн, сууга чөмүлдүргөнү келгем»,+— деди. 32 Анан сөзүн бышыктап: «Кудайдын ыйык рухунун* асмандан көгүчкөндөй болуп түшүп, ага конгонун көрдүм.+ 33 Мен аны таанычу эмесмин. Бирок мени элди сууга чөмүлдүргөнгө жибергендин өзү: „Кудайдын ыйык рухунун асмандан түшүп, кимге конгонун көрсөң,+ ыйык рухка чөмүлдүрө турган — ошол“,— деп айткан.+ 34 Мен ошону көрүп, мунун Кудайдын Уулу экенин күбөлөндүрүп жатам»,— деп да айтты.+

35 Эртеси күнү да Жакан эки шакирти менен ошол жерде турган эле. 36 Исанын келатканын көрүп, ал: «Мына, Кудайдын Козусу!»+ — деди. 37 Муну укканда эки шакирти тең Исаны ээрчип жөнөдү. 38 Иса артка бурулуп, алардын ээрчип келатканын көрүп: «Эмнени издеп жүрөсүңөр?» — деп сурады. Алар: «Рабби, кайсы жерде туруп жатасың?» — деп сурашты. («Рабби» деген сөз «устат» дегенди билдирет.) 39 Ал: «Жүргүлө, өзүңөр барып көргүлө»,— деди. Алар барып, анын кайсы жерде турарын көрүштү да, ошол күнү аны менен калышты. Бул күндүзгү саат төрттөрдө* болду. 40 Жакандын сөздөрүн угуп, Исанын артынан ээрчиген эки шакирттин бири Андрес+ эле. Ал Симон Петирдин бир тууганы болчу. 41 Андрес адегенде бир тууганы Симонго жолугуп, ага: «Биз Машаякты таптык»,+— деди. («Машаяк» деген сөз «майланган»* дегенди билдирет.) 42 Анан аны Исага ээрчитип келди. Иса аны карап: «Сен Жакандын уулу Симонсуң.+ Мындан ары атың Кейфа болот»,— деди. («Кейфа» — грекче «Петир»*.)+

43 Эртеси күнү Иса Галилеяга бармакчы болду. Ал Филипке+ жолугуп: «Менин жолдоочум бол»,— деди. 44 Филип да Андрес менен Петир жашаган Бетсаида шаарынан эле. 45 Ал Натанаелге+ жолугуп: «Биз Мусанын Мыйзамында жана пайгамбарлардын жазгандарында айтылган кишини — Жусуптун+ уулу назареттик Исаны — таптык»,— деп айтты. 46 Бирок Натанаел: «Назареттен жакшы бир нерсе чыкмак беле?» — деп койду. Филип ага: «Жүр, өзүң көрбөйсүңбү»,— деди. 47 Иса өзүн көздөй келаткан Натанаелди көрүп: «Куулугу жок, накта ысрайылдык мына ушул»,— деди.+ 48 Натанаел андан: «Сен мени кайдан билесиң?» — деп сурады. Иса: «Филип сени чакыра электе эле, мен сени анжирдин түбүнөн көргөм»,— деди. 49 Ошондо Натанаел: «Устат, сен чындап эле Кудайдын Уулу, Ысрайылдын Падышасы экенсиң»,— деп айтты.+ 50 Иса ага: «Сени анжирдин түбүнөн көргөнүмдү айтканым үчүн эле ишенип калдыңбы? Мындан да укмуш нерселерди көрөсүң»,— деди. 51 Анан: «Ишенип койгула, асмандын ачылганын, Кудайдын периштелеринин адам Уулуна* түшүп, кайра асманга көтөрүлүп жатканын көрөсүңөр»,+— деп айтты.