Шемуелдин 2-китеби
5 Бир канча убакыттан кийин Ысрайылдын бардык уруулары Хебронго+ келип, Дөөтүгө: «Биз сенин бир бооруңбуз.+ 2 Мурун Шабул падыша болуп турган убакта эле ысрайыл элин согушка сен баштап барчусуң.+ Жахаба сага: „Сен ысрайыл элимди койчудай кайтарып, аларга жол башчы болосуң“,— деп айткан»,+— дешти. 3 Ошентип, Ысрайылдын бүт аксакалдары Хебронго, Дөөтү падышага келишти. Дөөтү Жахабанын алдында алар менен келишим түздү.+ Анан алар анын башына май куюп, Ысрайылга падыша кылып дайындашты.+
4 Дөөтү 30 жашында такка отуруп, 40 жыл бийлик жүргүздү.+ 5 Ал Хеброндо 7 жарым жыл Жүйүткө падышалык кылды, ал эми Иерусалимде+ 33 жыл бүт Ысрайыл менен Жүйүткө падышалык кылды. 6 Бир жолу ал кишилери менен Иерусалимге, ошол жакта жашаган жебустуктарга+ чабуул койгону чыкты. Алар: «Дөөтү бул жакка кирбейт»,— деп ойлоп, аны: «Сен бул жакка эч качан кирбейсиң! Сени атүгүл сокурлар менен аксактар кууп чыгышат»,— деп шылдыңдашты.+ 7 Бирок Дөөтү чептүү Сион шаарын басып алды. Ал азыр Дөөтүнүн шаары+ деп аталат. 8 Ошол күнү Дөөтү: «Жебустуктарга чабуул коё тургандар жердин астындагы суу аккан жол менен кирип, Дөөтү жек көргөн „аксактар менен сокурларды“ кырып таштасын!» — деди. «Сокур менен аксак эч качан үйгө кирбейт»,— деген сөз ошондон калган. 9 Дөөтү ошол чептүү шаарда жашап калгандыктан, ал Дөөтүнүн шаары деп аталып калды*. Ал Милодон*+ тартып шаардын борборуна чейин курулуш иштерин жүргүзө баштады.+ 10 Ошентип, Дөөтү барган сайын күчтөнө берди,+ асман аскерлеринин Кудайы Жахаба аны колдоп турду.+
11 Тирдин падышасы Хирам+ бал карагайларды+ жөнөтүп турууну сүйлөшүш үчүн Дөөтүгө кишилерин жиберди. Ошондой эле ага бал карагайларды жөнөттү, жыгач усталарды, таш тизген жумушчуларды жиберди. Алар Дөөтүгө үй* кура башташты.+ 12 Ошондо Дөөтү Жахабанын өз эли үчүн+ анын Ысрайылдын үстүнөн жүргүзгөн падышалык бийлигин чыңдап,+ падышалыгын даңазалуу кылганын+ түшүндү.
13 Хеброндон келгенден кийин Дөөтү Иерусалимде дагы бир нече аял алды. Ал аялдары менен токолдору+ да ага уул-кыздарды төрөп беришти.+ 14 Дөөтүнүн Иерусалимде төрөлгөн балдары булар: Шамуя, Шобап, Натан,+ Сулайман,+ 15 Ипхар, Элишуа, Непек, Жапиа, 16 Элишама, Элиада, Элипелет.
17 Дөөтүнүн Ысрайылга падыша болгонун+ укканда пелиштиликтердин баары аны менен согушканы чыгышты.+ Бул тууралуу билгенде Дөөтү жашыныш үчүн коопсуз жерге кетип калды.+ 18 Пелиштиликтер репаимдер жашаган өрөөнгө+ келип, кол салыш үчүн ошол жерде жүрүштү. 19 Дөөтү Жахабадан: «Пелиштиликтер менен согушканы барайынбы? Аларды колума салып бересиңби?» — деп сурады.+ Жахаба: «Бар, пелиштиликтерди колуңа салып берем»,— деп жооп берди.+ 20 Дөөтү Баал-Перасимге барып, пелиштиликтерге катуу сокку уруп: «Жахаба мени баштап барып, душмандарымды суу жарып кеткен тосмодой кылып кыйратты»,+— деди. Ошондон улам ал жерди Баал-Перасим*+ деп атады. 21 Пелиштиликтер буркандарын ошол жерге таштап кетишти. Дөөтү менен анын кишилери аларды алып кетип, жок кылып салышты.
22 Кийинчерээк пелиштиликтер репаимдер жашаган өрөөнгө+ кайра келип, кол салыш үчүн ошол жерде жүрүштү. 23 Дөөтү Жахабадан сураганда, ал: «Алардын алдынан түз чыкпа. Арт жагынан барып, бака* бадалдарынын тушунан кол сал. 24 Бака бадалдарынын үстү менен бирөө басып бараткандай дабышты угарың менен эч буйдалбай жөнө, анткени Жахаба пелиштиликтердин аскерин талкалаш үчүн алдыңда бараткан болот»,— деди. 25 Дөөтү бардыгын Жахаба буйругандай кылды. Ал пелиштиликтерди+ Гебадан*+ Гезерге+ чейин кууп, жолду карай кырып барды.