Аян
21 Анан жаңы асман менен жаңы жерди+ көрдүм. Анткени мурунку асман менен мурунку жер жок болду,+ деңиз+ да жок болду. 2 Ошондой эле ыйык шаарды — Жаңы Иерусалимди — көрдүм. Ал күйөөсү үчүн жасанган колуктудай даярдалып,+ асмандан, Кудайдан түшүп келатты.+ 3 Ошондо тактыдан мындай деген катуу үндүн чыкканын уктум: «Мына, Кудайдын чатыры адамдардын арасында турат. Кудай алар менен жашайт, алар анын эли болушат. Ошентип, Кудай өзү адамдар менен чогуу болот.+ 4 Кудай адамдардын көз жашынын баарын аарчыйт.+ Ошондон кийин өлүм болбойт,+ кайгы да, өкүрүк да, оору да болбойт.+ Азапка салган мурунку нерселер жок болду*».
5 Тактыда отурган+ Кудай: «Мына, мен бардыгын жаңы кылып жасап жатам*»,+— деди. Анан: «Жаз, себеби бул сөздөр чын, толук ишенсе болот»,— деп кошумчалады. 6 Андан кийин: «Бул сөздөр аткарылды! Мен Альфамын жана Омегамын*, башымын жана аягымын.+ Ким суусаса, ага өмүр суусунун башатынан бекер суу берем.+ 7 Ким жеңүүчү болсо, ал ушуларды мураска алат. Мен анын Кудайы болом, ал менин уулум болот. 8 Ал эми коркоктордун, ишеними жоктордун,+ жийиркеничтүү иштерди кылган таза эмес адамдардын, киши өлтүргүчтөрдүн,+ жыныстык адеп-ахлаксыздыкка+ жаткан иштерди кылгандардын, жиндер менен байланышкандардын*, бурканга табынгандардын жана бардык жалганчылардын+ барар жери — от жана күкүрт менен күйгөн көл.+ Бул экинчи өлүмдү билдирет»,— деди.+
9 Анан акыркы 7 балээ+ толтурулган 7 чөйчөгү бар 7 периштенин бири келип, мага: «Кел, сага колуктуну, Козунун аялын,+ көрсөтөм»,— деди. 10 Ал мени Кудайдын ыйык руху аркылуу чоң бийик тоого алып барып, асмандан, Кудайдан түшүп келаткан+ ыйык Иерусалим шаарын көрсөттү. 11 Ал шаар Кудайдын даңкына+ толгон эле. Ал абдан кымбат таштай, тунук хрусталдай жаркыраган яшма ташындай жаркырап турду.+ 12 Шаардын чоң бийик дубалы, 12 дарбазасы бар экен. Дарбазалардын оозунда 12 периште туруптур. Ал дарбазаларда Ысрайылдын 12 уруусунун аттары жазылуу экен. 13 Чыгыш тарапта 3 дарбаза, түндүк тарапта 3 дарбаза, түштүк тарапта 3 дарбаза, батыш тарапта 3 дарбаза+ бар экен. 14 Шаарды курчап турган дубалдын пайдубалы 12 таштан турат экен, аларга Козунун 12 элчисинин+ 12 ысмы жазылыптыр.
15 Мени менен сүйлөшкөн периште шаарды, анын дарбазалары менен дубалын+ ченеш үчүн колуна алтын таяк* кармап туруптур. 16 Шаар төрт чарчы келип, узундугу менен туурасы бирдей экен. Периште ошол таяк менен шаарды ченегенде, бардык жагын кошкондо, 2 220 чакырымдай* болду. Анын узундугу, туурасы, бийиктиги бирдей экен. 17 Периште шаардын дубалынын бийиктигин адамдар колдонгон чен-өлчөм боюнча ченегенде, 144 чыканак* болду. 18 Дубалы яшма ташынан,+ ал эми шаардын өзү тунук айнектей болгон таза алтындан тургузулуптур. 19 Шаардын дубалынын пайдубалы ар кандай баалуу таштардан экен: биринчи ташы яшма, экинчиси сапфир, үчүнчүсү халцедон, төртүнчүсү зымырыт, 20 бешинчиси сардоникс, алтынчысы сердолик, жетинчиси хризолит, сегизинчиси берилл, тогузунчусу топаз, онунчусу хризопраз, он биринчиси гиацинт, он экинчиси аметист экен. 21 Он эки дарбазасы 12 бермет экен, ар бир дарбазасы өзүнчө 1 берметтен жасалыптыр. Шаардын чоң көчөсү тунук айнектей болгон таза алтындан экен.
22 Шаардын ичинен ибадаткана көргөн жокмун, анткени анын ибадатканасы — Кудурети Чексиз+ Жахаба Кудай менен Козу. 23 Шаарга күндүн же айдын жарыгынын кереги жок экен, себеби аны Кудайдын даңкы жарык кылып турду,+ Козу болсо шаардын чырагы болду.+ 24 Шаардын жарыгы элдердин жолун жарык кылат,+ жер жүзүнүн падышалары ал шаарды өздөрүнүн даңкы менен ого бетер даңктуу кылышат. 25 Анын дарбазалары эч качан жабылбайт, анткени ал жерде дайыма күн болот, түн болбойт.+ 26 Ал элдердин атак-даңкына, урмат-сыйына бөлөнөт.+ 27 Ал шаарга арам нерселердин, жийиркеничтүү иш кылгандардын жана жалганчылардын бири да киргизилбейт.+ Ага Козунун өмүр түрмөгүнө жазылгандар гана кирет.+