16 Адам сүйлөөрдөн мурун ойлонот,
Бирок анын берер жообу Жахабадан.+
2 Адамдын жолдорунун баары өзүнө туура көрүнөт,+
Бирок Жахаба анын ниетин текшерет.+
3 Эмне иш кылба, аны Жахабага тапшыр,+
Ошондо ой-максатың жүзөгө ашат.
4 Жахаба бардыгын өз ой-ниетин ишке ашырыш үчүн жасайт,
Атүгүл ыймансыздарды да алаамат күнү жок болгудай кылат.+
5 Бой көтөргөн кишиден Жахаба жийиркенет;+
Ишенип кой: ал жазасыз калбайт.
6 Туруктуу сүйүү менен берилгендиктин аркасында айып кечирилет,+
Жахабадан корккондуктан киши жаман иштен оолак болот.+
7 Жахаба кишинин жүргөн жолун көрүп ыраазы болсо,
Ал аны атүгүл душмандары менен да элдештирет.+
8 Көп нерсеге ээ болуп, бирок туура эмес иш кылгандан көрө,+
Аз эле нерсең болуп, туура иш кылган артык.+
9 Адам эмне кыларын ойлонуштурушу мүмкүн,
Бирок кадамын Жахаба багыттайт.+
10 Падыша ар бир чечимин Кудайдын жетегине ылайык чыгарышы керек,+
Ал акыйкаттыкты эч качан бурмалабашы керек.+
11 Так тараза Жахабадан,
Баштыктагы тараза таштар да андан.+
12 Падышалар кыянат иштерди жек көрүшү керек,+
Себеби тактысы адилдиктин аркасы менен бекем болот.+
13 Падышаларга туура сөз жагат,
Алар чындыкты сүйлөгөндөрдү жакшы көрөт.+
14 Падышанын каары — өлүмдүн жарчысы,+
Бирок акылдуу киши анын каарын басат.+
15 Падыша ырайым кылган киши жакшы өмүр сүрөт,
Падышанын ырайымы жазгы жамгырдан кабар берген булуттай.+
16 Алтынга караганда акылмандыкка ээ болуу алда канча артык!+
Күмүшкө караганда түшүнүккө ээ болуу алда канча жакшы.+
17 Чынчылдар жаман жолдон оолак жүрөт.
Баскан жолун байкап жүргөн өмүрүн сактап калат.+
18 Текебердене баштаган акыры кыйрайт,
Менменсине баштаган кулайт.+
19 Көөдөнүн көтөргөндөр менен олжо бөлүшкөнчө,
Мүнөзү жумшактардын арасында болуп, момун болгон жакшы.+
20 Иштин жөнүн жакшы түшүнгөн ийгиликке жетет,
Жахабага таянган киши бактылуу.
21 Акылдуу кишини түшүнүктүү деп аташат,+
Жылуу-жумшак сүйлөгөндүн сөзү ынанымдуу болот.+
22 Терең түшүнүк — ага ээ болгондор үчүн өмүр булагы,
Ал эми акылсыздарды өздөрүнүн акылсыздыгы жазалайт.
23 Акылман киши сөз тандап сүйлөйт,+
Анын сөзү ынанымдуу болот.
24 Жагымдуу сөз — аарынын уюгундагы бал,
Ал жанга ширин, сөөккө даба.+
25 Кайсы бир жол кишиге түз болуп көрүнөт,
Бирок акырында ал өлүмгө алып барат.+
26 Адам кекиртеги үчүн мээнет кылат,
Буга аны ач курсагы мажбур кылат.+
27 Начар киши жамандык чукуп табат,+
Анын сөзү куйкалаган оттой.+
28 Бузуку ортого от коёт,+
Жалаачы жакын досторду ажыратат.+
29 Ырайымсыз киши башканы азгырып,
Тескери жолго салат.
30 Ал жамандык кылышты ойлонуп жатып көзүн ымдайт,
Оозун кымтып алып, арам ишин кылат.
31 Адилдик жолунда жүрүп+ агарган чач — сулуулуктун таажысы.+
32 Ачууланбай, сабыр сактаган киши+ эр жүрөктөн артык,
Өзүн башкара билген шаарды басып алган кишиден артык.+
33 Адамдар өкчөмө ташты этекке салып өкчөшөт,+
Бирок ал аркылуу чыгарылган чечимдердин баары Жахабадан.+