Бийлер

4 Бирок Эут өлгөндөн кийин, ысрайыл эли Жахабанын көз алдында кайрадан жаман иштерди кыла баштады.+ 2 Ошондуктан Жахаба аларды Хазордо бийлик кылган Канаан падышасы Жабиндин колуна салып берди*.+ Анын аскер башчысы Харошет-Гоимде+ жашаган Сисера эле. 3 Анын чалгылары бар 900 согуш арабасы бар болчу.+ Ал ысрайыл элин 20 жыл аёосуз эзгендиктен,+ алар Жахабага жардам сурап жалынышты.+

4 Ошол убакта Дебора деген пайгамбар аял+ Кудайдын чечимдерин ысрайыл элине билдирип турчу. Ал Лапидоттун аялы эле. 5 Дебора Эпрайым уруусуна караштуу тоолуу аймактагы Бейтел+ менен Раманын+ ортосунда жайгашкан Деборанын курма дарагынын түбүндө отурчу. Ысрайылдыктар ага Кудайдын чечимдерин билиш үчүн келип турушчу. 6 Дебора Кедеш-Напталыдан+ Абынаамдын уулу Баракты+ чакыртканы киши жөнөтүп, ага: «Ысрайылдын Кудайы Жахаба мындай деп буйрук берди: „Өзүң менен кошо Напталы уруусу менен Забулун уруусунан 10 000 киши алып, Табор тоосуна бар. 7 Мен Жабиндин аскер башчысы Сисераны согуш арабалары, аскерлери менен кошо Кишон өзөнүнө*+ алып келип, колуңа салып берем“»,+— деп айттырып жиберди.

8 Барак ага: «Эгер мени менен барсаң, барам. Барбасаң, барбайм»,— деди. 9 Дебора: «Мен сени менен барам. Бирок бул согушта даңкка сен ээ болбойсуң, анткени Жахаба Сисераны аялдын колуна салып берет»,— деди.+ Анан туруп, Барак менен чогуу Кедешке жөнөдү.+ 10 Барак Забулун менен Напталы уруусундагыларды+ Кедешке чакырды. Ошентип, анын артынан 10 000 киши жөнөдү. Аны менен кошо Дебора да жөнөдү.

11 Кейнилик Хебер башка кейниликтерден,+ тактап айтканда, Мусанын кайнатасы+ Хобаптын урпактарынан бөлүнүп, чатырын Кедеште жайгашкан Заананимдеги чоң дарактын жанына тиккен эле.

12 Абынаамдын уулу Барактын Табор тоосуна+ чыкканын Сисерага билдиришти. 13 Сисера ошо замат чалгылары бар 900 согуш арабасы менен жоокерлеринин баарын чогултуп, Харошет-Гоимден Кишон өзөнүнүн жанына барды.+ 14 Дебора Баракка: «Жөнө, анткени Жахаба бүгүн Сисераны колуңа салып берет. Жахаба сенин алдыңда баратат»,— деди. Барак Табор тоосунан түштү, аны менен кошо 10 000 кишиси түштү. 15 Ошондо Жахаба Сисераны, анын согуш арабалары менен бүт аскерин дүрбөлөңгө түшүрүп,+ Барактын кылычы менен кыра баштады. Сисера болсо арабасынан түшүп, качып жөнөдү. 16 Барак анын согуш арабалары менен аскерин Харошет-Гоимге чейин кууп барды. Ошентип, Сисеранын бүт аскери кылычтан кырылды, бири да аман калган жок.+

17 Сисера болсо качып, кейнилик Хебердин+ аялы Жаелдин+ чатырына чуркап барды, анткени Хазордун падышасы Жабин+ менен Хебердин үй-бүлөсү кас эмес болчу. 18 Жаел сыртка чыгып, Сисерага: «Мырзам, ичкери кириңиз, коркпоңуз»,— деди. Ал чатырга кирди. Аял анын үстүнө жууркан жаап койду. 19 Анан Сисера: «Таңдайым кургап кетти, бир аз суу берчи»,— деди. Аял чаначтын оозун ачып, ага сүт куюп берди да,+ кайра үстүн жаап койду. 20 Сисера ага: «Чатырдын оозуна тур да, бирөө келип: „Чатырда бирөө барбы?“ — деп сураса, „Эч ким жок!“ — деп кой»,— деди.

21 Бирок Хебердин аялы Жаел чатырдын казыгы менен балканы алып, чарчаганынан катуу уктап калган Сисеранын жанына акырын басып барды да, казыкты чыкыйына коюп, жерге житире какты. Ал өлүп калды.+

22 Бир убакта Сисераны кууп келаткан Барак келип калды. Жаел сыртка чыгып, ага: «Кир, издеп жүргөн кишиңди көрсөтөйүн»,— деди. Ал аялдын чатырына кирип, чыкыйына казык кагылып өлүп жаткан Сисераны көрдү.

23 Ошентип, Кудай ошол күнү Канаан падышасы Жабинди ысрайылдыктарга багындырып берди.+ 24 Ысрайылдыктар Канаан+ падышасы Жабинден барган сайын күчтүү боло беришти. Акыры алар аны өлтүрүштү.+