Эфестиктерге
1 Кудайдын эрки менен Машаяк* Исанын элчиси болгон Пабылдан Эфестеги+ боордошторубузга*, Машаяк Исанын ишенимдүү шакирттерине:
2 Асмандагы Атабыз Кудай менен Мырзабыз Иса Машаяк силерге ырайымын төгүп, тынчтык берсин.
3 Мырзабыз Иса Машаяктын Кудайы жана Атасы даңкталсын, анткени ал Машаяк менен биримдикте болгон бизге өзүнүн ыйык руху* аркылуу асман чөйрөсүндө мол бата берди.+ 4 Кудай бизди Машаяк менен биримдикте болушубуз үчүн, аны сүйүп, анын алдында ыйык, кемтиксиз болушубуз үчүн,+ адамзат дүйнөсү жаралганга* чейин эле тандап алган. 5 Ал өзү туура көрүп, өзү каалагандыктан+ бизди Иса Машаяк аркылуу балдары кылып асырап алыш үчүн+ алдын ала тандап алган.+ 6 Бизге сүйүктүү Уулу аркылуу+ айкөлдүк кылып, улуу ырайымын көрсөткөнүнүн аркасында+ адамдар аны мактап-даңкташы үчүн ошондой кылган. 7 Кудайдын улуу ырайымынан улам биз анын Уулу аркылуу боштондукка чыктык. Ооба, анын төгүлгөн каны аркылуу+ төлөнгөн кундун негизинде күнөөлөрүбүз кечирилди.+
8 Кудай бизге ошол ырайымын мол төгүп, терең акылмандык, түшүнүк берип, 9 өзүнүн эркине байланышкан ыйык сырды+ ачып берди. Ал сыр анын каалоосуна, ой-ниетине шайкеш келет. 10 Ага ылайык, Кудай белгиленген мезгилдердин соңунда иш алып баруунун тартибин түзүп, асмандагы менен жердегинин баарын кайрадан Машаяк аркылуу бириктирет.+ Ооба, бардыгы ал аркылуу биригет. 11 Биз аны менен биримдиктебиз жана аны менен чогуу мурасчы болуп дайындалдык.+ Себеби бардыгын өзүнүн эркине ылайык кылган Кудай бизди ой-ниети боюнча алдын ала тандап алган. 12 Биз, Машаякка биринчилерден болуп ишеним арткандар, Кудайды даңктап-макташыбыз үчүн ушундай болду. 13 Чындык сөзүн, куткарылышыңар жөнүндөгү жакшы кабарды, уккандан кийин силер да Машаякка ишеним арта баштадыңар. Ошонун аркасында ал аркылуу силер да Кудайдын убада кылынган ыйык руху менен мөөрлөндүңөр.+ 14 Ыйык рух — мурастын бизге бериле турганына кепилдик*.+ Кудай өз элин төлөнгөн кундун негизинде+ боштондукка чыгарып,+ ошондон улам өзү даңкталышы үчүн, ошол ыйык рух менен мөөрлөндүңөр.
15 Ошондуктан силердин Мырзабыз Исага болгон ишенимиңер, бардык бир туугандарыбызга* болгон сүйүүңөр жөнүндө уккандан бери 16 Кудайга силерди айтып ар дайым ыраазычылык билдирем. Тиленгенде дайыма силер жөнүндө айтып, 17 Мырзабыз Иса Машаяктын Кудайы, даңкка бөлөнгөн Атабыз силерге акылмандык берип, өзү жөнүндөгү так билимди ачып бере беришин суранам.+ 18 Ал силердин көзүңөрдү* ачты. Ошонун аркасында силер кандай үмүткө ээ болгонуңарды, анын ыйык кызматчыларына теңдешсиз байлыкты мурас катары сактап турганын,+ 19 бизге — ишенгендерге — таасир эткен күчүнүн кудуретин билдиңер.+ Анын күчүнүн канчалык зор экени кылган ишинен көрүнүп турат: 20 Кудай ошол кудуреттүү күчү менен Машаякты тирилтип, аны асманда өзүнүн оң жагына отургузган.+ 21 Ошондуктан Машаяк азыркы эле эмес, келечектеги заманда* да бардык өкмөттөрдөн, бийликтерден, күчтөрдөн, башкаруучулардан, дегеле даражасы бийик ким болбосун, баарынан жогору турат.+ 22 Ошондой эле Кудай баарын анын бут алдына жыгып,+ ага баш ийдирген жана аны өзүнүн бүт жыйналышына башчы кылып койгон.+ 23 Жыйналыш — Машаяктын денеси,+ Машаяк аны бардык жагынан толуктап, толтуруп турат.