Некемия
9 Ошол айдын жыйырма төртүнчү күнү ысрайылдыктар чогулуп, таар* жамынып, баштарына топурак чачып, орозо кармашты.+ 2 Ысрайылдын тукумдары бөтөн жерликтерден бөлүнүп,+ алар менен мамилесин үзүп, өздөрүнүн жана ата-бабаларынын күнөөлөрүн мойнуна алышты.+ 3 Алар ордунан туруп, Жахаба Кудайынын Мыйзам китебинен+ 3 сааттай* үн чыгарып окушту. Анан дагы 3 сааттай күнөөлөрүн мойнуна алып, Жахаба Кудайына жүзтөмөндөп таазим кылып жатышты.
4 Жешуя, Бани, Кадмиел, Шебания, Буни, Шеребия,+ Бани, Кенанилер лебилер үчүн жасалган секичеге чыгып,+ үнүн бийик чыгарып Жахаба Кудайына кайрылышты. 5 Андан кийин Жешуя, Кадмиел, Бани, Хашабнея, Шеребия, Одия, Шебания, Петахия деген лебилер элге: «Туруп, Жахаба Кудайыңарды түбөлүктөн түбөлүккө даңктагыла»,+— дешти. Анан мындай дешти: «Оо, Кудай, сенин улуу ысмың даңктала берсин. Сени алкаганга, мактаганга сөз жетпейт.
6 Жахаба, сен жалгыз Кудайсың.+ Асманды, асмандын асманын жана андагынын баарын, жер менен деңизди жана алардагынын баарын сен жараткансың. Алардын бардыгы сенин аркаң менен бар болуп, жашап келет, асмандагынын баары сага таазим кылат. 7 Сен, Жахаба, Ыбрамды+ каздимдиктердин* Ур+ шаарынан алып чыгып, аны Ыбрайым+ деп атаган чыныгы Кудайсың. 8 Анын сага бүт жүрөгү менен берилгенин көрүп,+ ага канаандыктардын, Хеттин тукумдарынын, аморлуктардын, периздердин, жебустуктардын жана гиргаштардын жерин берем деп, аны менен келишим түзгөнсүң.+ Анан сөзүңө туруп, убадаларыңды аткаргансың, анткени сен адилсиң.
9 Сен ата-бабаларыбыздын Мисирде* тарткан азабын көрүп,+ Кызыл деңиздин жанында зарлаган үнүн уккансың. 10 Фараон менен анын кызматчыларынын, элинин текеберденип, ата-бабаларыбызды азапка салганын көргөндүктөн керемет-жышаандарды көрсөтүп,+ аларды жазалагансың. Ошентип, өз ысмыңды даңктагансың.+ Ысмың бүгүнкү күнгө чейин даңкталып келет.+ 11 Элиңдин алдында деңизди экиге бөлгөнүңдө, алар ортосундагы кургак жер менен өтүп кетишкен.+ Аларды кууп келаткандарды болсо ташкындаган сууга таш чөктүргөндөй чөктүргөнсүң.+ 12 Элиңе күндүзү булут мамы менен жол көрсөтүп, ал эми түнкүсүн от мамы менен жолун жарык кылып, жетектеп жүргөнсүң.+ 13 Синай тоосуна+ түшүп келип, аларга асмандан сүйлөп,+ адилеттүү жол-жоболоруңду, акыйкат* мыйзамдарыңды, пайдалуу көрсөтмөлөрүң менен осуяттарыңды бергенсиң.+ 14 Аларга дем алыш күндү* ыйык туткула+ деп буйрук кылгансың, кызматчың Муса аркылуу осуяттарың менен көрсөтмөлөрүңдү, мыйзамыңды бергенсиң. 15 Ачка болушканда, асмандан нан берип,+ суусашканда, аскадан суу чыгарып бергенсиң.+ Анан аларга берем деп ант берген жерди ээлеп алгыла деп буйрук кылгансың.
16 Бирок ата-бабаларыбыз текеберденип,+ тоң моюндук кылышты,+ осуяттарыңды аткарбай коюшту. 17 Сени угушкан жок,+ алардын көз алдында жасаган кереметтүү иштериңди эстешкен жок. Тоң моюндук кылып, мурун өздөрү кул болуп жүргөн Мисирге кайра барыш үчүн өздөрүнө башчы шайлап алышты.+ Бирок сен кечиримдүү, ырайымдуу, кайрымдуу, сабырдуу*, сүйүүсү* чексиз+ Кудай болгондуктан аларды таштап койгон жоксуң.+ 18 Куйма музоо жасап: „Бул — бизди Мисир жеринен алып чыккан Кудайыбыз“+ — деп, сени такыр урматтап-сыйлабай турганын көрсөтүшкөндө да, 19 чексиз ырайымдуу болгондуктан аларды чөлдө калтырган жоксуң.+ Аларга дайыма күндүзү булут мамы жол көрсөтүп, ал эми түнкүсүн от мамы жолун жарык кылып турду.+ 20 Акылдуу болушсун деп, аларга ыйык рухуңду берип турдуң.+ Маннадан өксүткөн жоксуң,+ суусунун кандырыш үчүн суу берип турдуң.+ 21 Аларды чөлдө 40 жыл бою тамак менен камсыз кылып турдуң.+ Алар эч нерседен кем болушкан жок. Кийимдери жыртылган жок,+ буттары да шишиген жок.
22 Сен падышалыктар менен элдерди алардын колуна салып берип, жерлерин бөлүп бердиң.+ Ошентип, алар Хешпон+ падышасы Сихондун+ жана Башан падышасы Октун+ жерлерин ээлеп алышты. 23 Алардын балдарын асмандагы жылдыздардай көбөйттүң.+ Анан ата-бабаларына убада кылган жерге, өздөрү ээлеши керек болгон жерге, алып бардың.+ 24 Алар барып, ошол жерди ээлешти.+ Сен ал жерде жашаган канаандыктарды багындырып бердиң.+ Ал жердин падышалары менен элдерин өздөрү каалагандай кылышы үчүн, аларды да колдоруна салып бердиң. 25 Алар чептүү шаарлар+ менен түшүмдүү* жерлерди басып алып,+ ар кандай мүлккө жык толгон үйлөрдү, суу сакталчу чуңкурларды, жүзүмзарларды, зайтун бактарын+ жана башка көптөгөн мөмөлүү дарактарды тартып алышты. Тойгончо ичип-жешти, семиришти, сенин көп жакшылыгыңды көрүп жыргашты.
26 Бирок тилиңди албай, сага каршы чыгышты,+ Мыйзамыңды четке кагышты. Аларды сага кайрып келиш үчүн жөнөткөн пайгамбарларыңды өлтүрүштү, сени такыр урматтап-сыйлабай турганын көрсөтүштү.+ 27 Ошондуктан аларды душмандарынын колуна салып бердиң.+ Алар элиңди далай азапка салышты.+ Бирок элиң башына мүшкүл түшүп, сага жалбарганда, асмандан аларды угуп, улуу ырайымыңдан улам душмандарынын колунан куткарган куткаруучуларды жиберип турдуң.+
28 Бирок бир аз тынчып, бейкут жашап калышканда кайрадан көз алдыңда жаман иштерди кыла башташчу.+ Ошондо кайрадан аларды эзген душмандарынын колуна салып берчүсүң.+ Ал эми кайра сага кайрылып, жардам сурап жалбарышканда,+ асмандан угуп, улуу ырайымыңдан улам куткарчусуң.+ 29 Алар кайрадан Мыйзамыңа баш ийиши үчүн эскертсең да, менменсинип, осуяттарыңды аткарышкан эмес.+ Аткарган адамга өмүр бере турган мыйзамдарыңды бузуп, күнөө кылышкан.+ Өжөрлөнүп, тескери бурулуп, тоң моюндук кылышчу, тил алышчу эмес. 30 Аларга көп жыл бою чыдадың,+ пайгамбарларыңа ыйык рухуңду берип, алар аркылуу эскертчүсүң, бирок кулак салышчу эмес. Акыр-аягы, бөтөн жерликтердин колуна салып бердиң.+ 31 Бирок улуу ырайымыңдан улам аларды кырып салган жоксуң,+ таштаган жоксуң. Анткени сен боорукер, кайрымдуу Кудайсың.+
32 Оо, Кудайыбыз, келишимин бузбаган, сүйүүсү туруктуу,+ адам баласы сестенип, кастарлап турган күчтүү, улуу Кудайыбыз, биздин, падышаларыбыздын, төрөлөрүбүздүн,+ дин кызматчыларыбыздын,+ пайгамбарларыбыздын,+ ата-бабаларыбыздын жана бүт элиңдин Ашур*+ падышаларынын күндөрүнөн бүгүнкү күнгө чейин тарткан азабы сага аз болуп көрүнбөсө экен. 33 Башыбызга кандай кыйынчылык түшсө да, сен адилдик кылдың, анткени айткандарыңды аткарып келдиң. Биз болсо жаман иштерди кыла бердик.+ 34 Падышаларыбыз, төрөлөрүбүз, дин кызматчыларыбыз, ата-бабаларыбыз Мыйзамыңды аткарышкан жок, осуяттарыңа, эскертүүлөрүңө көңүл бурушкан жок. 35 Алар падышаларынын убагында бүт жакшылыктарыңды көрүп, сен берген кенен, семиз жерде жашашса да, сага кызмат кылышкан жок,+ жаман иштерин ташташкан жок. 36 Мына, эми минтип кул болуп жүрөбүз,+ сен ата-бабаларыбызга жемишинен, түшүмүнөн жесин деп берген жерде кул болуп жүрөбүз. 37 Бул жердин мол түшүмүн сен бизди күнөөлөрүбүз үчүн багындырып берген бөтөн жерлик падышалар жеп жатат.+ Алар бизге да, малыбызга да өздөрү каалагандай ээлик кылып, бизди азапка салып жатышат.
38 Ошон үчүн биз жазуу түрүндө салтанаттуу убада берип,+ аны төрөлөрүбүздүн, лебилерибиз менен дин кызматчыларыбыздын мөөрү менен бекитип жатабыз».+