Тиметейге 1-кат
1 Куткаруучубуз Кудайдын жана үмүтүбүз болгон Машаяк* Исанын+ буйругу менен Машаяк Исанын элчиси болгон Пабылдан 2 өз уулумдай эле болуп калган+ боордошум Тиметейге*:+
Асмандагы Атабыз Кудай менен Мырзабыз Машаяк Иса сага ырайымын төгүп, кайрымдуулук кылып, тынчтык берсин.
3 Македонияга кетип баратканымда сенден Эфесте калышыңды суранганымдай эле, азыр да ошол жерде калышыңды суранам. Ал жакта калып, жалган окууларды тараткандарга тыюу сал. 4 Алар ойдон чыгарылган окуяларды угушпасын,+ санжыраларга кызыга беришпесин. Андай нерселер ар кандай божомолдорду жараткандан башка эч кандай пайда алып келбейт,+ Кудай ишенимибизди бекемдеш үчүн берген нерселерге да эч кандай тиешеси жок. 5 Муну* бири-бириңерди сүйүшүңөр үчүн айтып жатам.+ Андай сүйүү чын жүрөктөн чыгышы керек, ага таза абийир менен чыныгы* ишеним түрткү бериши керек.+ 6 Айрымдар ушул нерселерге маани бербей, куру сөздөргө берилип кетишти.+ 7 Алар Кудайдын мыйзамын үйрөткөн окутуучу болгусу келет,+ бирок эмнени айтып, эмнени көшөрө далилдеп жатышканын өздөрү түшүнбөйт.
8 Баарыбыз билгендей, Мыйзамда* кеп жок, болгону, аны туура колдонуш керек. 9 Анткени мыйзамдар адил адамдар үчүн берилбейт. Алар мыйзамды бузуп жүргөн,+ баш ийбес, ыймансыз, күнөөкөр, ишеничтүү эмес*, ыйык нерсени арамдаган, атасын же энесин, же башка бирөөнү өлтүргөн адамдар үчүн, 10 жыныстык адеп-ахлаксыздык* кылып жүргөндөр, эркектер менен жатып жүргөн эркектер, киши уурдагандар, калпычылар, жалган күбөлөр* үчүн жана Кудайдын туура* окууларына каршы келген дагы башка нерселерди кылгандар үчүн берилет.+ 11 Ал туура окуулар бактылуу Кудайдын мага тапшырган кереметтүү жакшы кабарына* шайкеш келет.+
12 Мага күч берген Мырзабыз Машаяк Исага мени ишеничтүү деп эсептеп, ыйык кызматка дайындаганы үчүн ыраазымын.+ 13 Мурун акарат кылган, Машаяктын жолдоочуларын куугунтуктаган уяты жок киши болсом да, ошентти. Ал мага ырайым кылды, себеби ошол иштерди билбестиктен жана чыныгы Кудайга ишенбегендиктен кылгам.+ 14 Бирок Теңирибиз мага ырайымын мол төктү, Машаяк Исанын жолдоочусу болгонумдун аркасында менде ишеним, сүйүү пайда болду. 15 Машаяк Исанын бул дүйнөгө күнөөкөрлөрдү куткарыш үчүн келгени жөнүндөгү сөздөр чындык, аларга толук ишенсе болот.+ Күнөөкөрлөрдүн ичинен эң күнөөкөрү менмин.+ 16 Бирок Машаяк эң күнөөкөр болгон мен аркылуу өзүнүн канчалык чыдамдуу экенин көрсөтүш үчүн мага ырайым кылды. Ошентип, ага ишенгенинин аркасында түбөлүк өмүргө ээ боло тургандарга+ мени мисал кылды.
17 Түбөлүктүктүн Падышасы+ — өлбөс,+ көрүнбөс+ жалгыз Кудай+ — түбөлүктөн түбөлүккө урматталып, даңктала берсин. Оомийн*.
18 Уулум Тиметей, жогоруда айткандарымды* сен жөнүндө айтылган пайгамбарлык сөздөргө ылайык айтып жатам. Ал сөздөр сага ийгиликтүү салгылашып,+ 19 ишенимиңди бек сактап, абийириңди таза сактаганга жардам берет.+ Айрымдар абийирин таза сактабай, ишеними кеме сыяктуу кыйрады. 20 Алардын арасында Именей+ менен Искендер да бар. Мен аларды жазаланып, Кудайга акарат кылбаганга үйрөнүшсүн деп Шайтанга тапшырдым*.+