Жакан
16 Бул сөздөрдү силерге ишенимден тайбашыңар үчүн айттым. 2 Силерди сыйынуу жайларынан чыгарып салышат*.+ Ал тургай, силерди өлтүрүп жаткандар+ ошентип Кудайга ыйык кызмат кылып жатам деп ойлошот. Ооба, ошондой убак келет. 3 Алар Атамды да, мени да таанып-билбегендиктен ошентишет.+ 4 Ошол убак келгенде, айтып-эскерткенимди эстешиңер үчүн, ушунун баарын алдын ала айтып жатам.+
Араңарда жүргөндүктөн буларды башында айткан эмесмин. 5 Эми болсо мени жибергенге баратам.+ Бирок азыр эч кимиңер менден: „Каякка баратасың?“ — деп сураган жоксуңар. 6 Ошентсе да айткан сөздөрүмдөн улам жүрөгүңөрдү кайгы басты.+ 7 Силерге чындыкты айтып жатам: менин кеткеним силер үчүн жакшы. Анткени кетпесем, жардамчы+ келбейт. Ал эми кетсем, аны силерге жиберем. 8 Ал келгенде дүйнөгө күнөө, адилдик, Кудайдын соту деген эмне экенин айкын көрсөтөт. 9 Адегенде күнөө деген эмне экенин көрсөтөт,+ анткени адамдар мага ишенбей жатышат.+ 10 Анан адилдик деген эмне экенин көрсөтөт, анткени мен Атама баратам. Мени эми мындан ары көрбөйсүңөр. 11 Андан кийин болсо Кудайдын соту деген эмне экенин көрсөтөт, анткени бул дүйнөнүн башкаруучусуна өкүм чыгарылды.+
12 Силерге дагы көп нерсе айткым келет, бирок азыр анын баарын түшүнө албайсыңар. 13 Ал эми жардамчы — чындыкты ачып бере турган ыйык рух+ — берилгенде, чындыкты толук түшүнүшүңөр үчүн, ал силерди жетектейт. Себеби ал өз атынан сүйлөбөйт, эмнени укса, ошону гана айтат жана алдыда эмне болорун билдирет.+ 14 Ал мени даңктайт,+ анткени менден уккандарын силерге түшүндүрөт.+ 15 Атам өзү билген нерселердин баарын мага айткан.+ Ошон үчүн: „Менден уккандарын силерге түшүндүрөт“,— деп айтып жатам. 16 Бир аздан кийин мени көрбөйсүңөр,+ анан дагы бир аздан кийин кайра көрөсүңөр».
17 Ошондо кээ бир шакирттери: «„Бир аздан кийин мени көрбөйсүңөр, анан дагы бир аздан кийин кайра көрөсүңөр“, „Анткени мен Атама баратам“,— деген сөздөрүн кандай түшүнсө болот?» — деп өз ара сүйлөшө башташты. 18 Алар: «„Бир аздан кийин“ дегени эмнеси? Эмне жөнүндө айтып жатканын түшүнгөн жокпуз»,— деп жатышты. 19 Иса алардын бул жөнүндө сурагысы келип жатканын билип, мындай деди: «„Бир аздан кийин мени көрбөйсүңөр, анан дагы бир аздан кийин кайра көрөсүңөр“,— дегенимди түшүнбөй, бири-бириңерден сурап жатасыңарбы? 20 Силерге чындыкты айтып коёюн, силер боздоп ыйлайсыңар, дүйнө болсо кубанат. Кайгырасыңар, бирок кайгыңар кубанычка айланат.+ 21 Ай-күнү жетип, төрөп жатканда аял кыйналат. Бирок төрөгөндөн кийин жарык дүйнөгө наристе келгенине кубанып, кыйналганын унутуп коёт. 22 Силер да азыр кайгырып жатасыңар, бирок мен силерди кайрадан көргөндө, жүрөгүңөр кубанычка толот,+ ал кубанычыңарды эч ким тартып ала албайт. 23 Ошол күнү менден эч нерсе тууралуу сурабайсыңар. Силерге чындыкты айтып коёюн, Атамдан мен аркылуу* эмне сурабагыла,+ ал берет.+ 24 Ушу кезге чейин мен аркылуу эч нерсе сураган эмессиңер. Эми сурагыла — аласыңар. Ошондо чексиз кубанычка бөлөнөсүңөр.
25 Буларды салыштырып, мисалдарды колдонуп айтып жатам. Бирок мисалдарды колдонбой, Атам жөнүндө ачык айтып бере турган убак келатат. 26 Ошол күнү Атамдан мен аркылуу сурайсыңар. Бирок бул силер үчүн мен суранарымды билдирбейт. 27 Себеби мени жакшы көрүп,+ Атамдын* өкүлү катары келгениме ишенгениңер үчүн,+ Атам да силерди жакшы көрөт. 28 Мен дүйнөгө Атамдын өкүлү катары келгем. Азыр болсо дүйнөнү калтырып, Атама баратам».+
29 Ошондо шакирттери: «Эми мисалдарды колдонбой, ачык сүйлөп жатасың. 30 Азыр биз сенин баарын билериңди, сага суроо бериштин зарылдыгы жок экенин билдик, анткени адамдын эмне деп ойлоп жатканын суроо бере электе эле билет экенсиң. Ошондуктан Кудайдан келгениңе ишенебиз»,— дешти. 31 Иса аларга: «Азыр чын эле ишенип жатасыңарбы? 32 Айтып коёюн, ар кимиңер өз үйүңөргө качып, мени жалгыз калтырып кете турган убак келатат, атүгүл келип да калды.+ Бирок мен жалгыз эмесмин, анткени Атам мени менен.+ 33 Мунун баарын мен аркылуу тынчтыкка ээ болушуңар үчүн айттым.+ Дүйнөдө азап чегесиңер, бирок кайраттуу болгула! Анткени мен дүйнөнү жеңдим»,+— деди.