Башталыш
39 Ысмайылдын тукумдары+ Жусупту Мисирге алып барышты.+ Аны алардан Мисир падышасынын ак сарайында кызмат кылган мисирлик Потипар,+ падышанын сакчыларынын башчысы, сатып алды. 2 Бирок Жахаба Жусупту дайыма колдоп тургандыктан,+ ал бардык иштеринде ийгиликке жетип жатты. Ошон үчүн мисирлик мырзасы аны өзүнүн үйүндө кызмат кылганга дайындады. 3 Мырзасы Жахабанын Жусупту колдоп турарын, Жахабанын анын бардык иштерине батасын берип жатканын көрдү.
4 Ошентип, Жусуп мырзасына жагып, анын жеке кызматчысы болуп калды. Мырзасы аны өз үйүнө башкаруучу кылып дайындап, өзүнө таандык нерсенин баарын ага тапшырды. 5 Ошондон тартып Жахаба Жусуп үчүн мисирлик кишинин үйүнө батасын бере баштады. Жахаба анын үйүндөгүлөрүнө, талаасындагы бардык нерсесине батасын берип жатты.+ 6 Акыры, Потипар өзүнө таандык болгондун баарын Жусупка тапшырып койду. Өзү болсо эмне жей турганын гана айтып турчу. Андан башка эч нерседен кам саначу эмес. Арадан убакыт өтүп, Жусуп келишимдүү, сулуу жигит болду.
7 Мырзасынын аялынын ага көңүлү түшүп: «Мени менен жат»,— деп асыла баштады. 8 Бирок Жусуп макул болбой: «Мен барда, мырзам үйүндөгү эч нерсесинен кам санабайт, баарын мага тапшырган. 9 Бул үйдө менден жогору турган эч ким жок. Мырзам сизден башканын баарын менин колума тапшырган, сиз болсо анын аялысыз да. Анан кантип ушундай жаман ишке барып, Кудайдын алдында күнөө кылайын?» — деди.+
10 Аял Жусупка күн сайын ошентип жабыша берсе да, ал аны менен жатканга, аны менен жалгыз калганга макул болгон жок. 11 Бир күнү Жусуп адаттагысындай эле иштери менен үйгө кирди. Үйдө кызматчылардын эч кимиси жок болчу. 12 Ошондо аял аны кийиминен тартып: «Кел, мени менен жат»,— деди. Бирок Жусуп үйдөн чыга качты, кийими болсо аялдын колунда калып калды. 13 Жусуп кийимин калтырган бойдон качып чыгары менен, 14 аял кызматчыларын чакырды да: «Карагылачы, күйөөм алып келген бул еврей бизди маскара кылайын дептир. Ал үйгө кирип, мени зордуктайын дегенде, катуу кыйкырып жибердим. 15 Кыйкырганымды угуп, кийимин калтырган бойдон үйдөн качып чыкты»,— деди. 16 Анан Жусуптун кийимин күйөөсү келгенде көрсөтүш үчүн коюп койду.
17 Күйөөсү келгенде: «Сен алып келген еврей кулуң мени маскара кылайын деп келиптир. 18 Бирок мен кыйкырып жибердим. Ошондо кийимин калтырган бойдон качып кетти»,— деди. 19 Жусуптун мырзасы аялынын: «Кулуң ушинтти»,— деген сөздөрүн укканда, каары кайнап чыкты. 20 Ошондуктан Жусупту падыша каматкан кишилер жаткан түрмөгө каматып койду. Ошентип, Жусуп түрмөгө түшүп калды.+
21 Бирок Жахаба Жусупка ал жактан да жардам берип, аны колдоп жатты*. Ал түрмө башчысынын жүрөгүн жибиткендиктен, Жусуп ага жагып калды.+ 22 Ошон үчүн ал Жусупту камакта жаткандардын баарына башчы кылып койду. Жусуп эмне десе, алар ошонун баарын аткарышчу.+ 23 Жахаба Жусупту колдоп жатты. Ал эмне иш кылбасын, Жахаба батасын берип жатты. Ошон үчүн түрмө башчысы ага тапшырган нерселеринен такыр кам саначу эмес.+