Петирдин 2-каты
3 Сүйүктүү бир туугандарым, ушуну менен силерге экинчи катымды жазып отурам. Тунук ой жүгүртө бергенге түрткү бериш үчүн, биринчи катымдагыдай эле, өзүңөр билген нерселерди эскертип жатам.+ 2 Анткени ыйык пайгамбарлар айтып кеткен сөздөрдү, ошондой эле Мырзабыздын жана Куткаруучубуздун араңардагы элчилер аркылуу берген осуятын унутпашыңарды каалайм. 3 Баарынан мурда, муну билишиңерди каалаар элем: акыркы күндөрдө шылдың сөздөрдү айтып, өздөрү каалагандай иш кыла турган шылдыңчылдар чыгат.+ 4 Алар: «Ал кайра келем* деп убада кылбады беле. Кана келгени?+ Адам баласы жаратылганда кандай болсо, ата-бабаларыбыздын көзү өтүп кеткенден бери* баары ошол эле бойдон, эч нерсе өзгөргөн жок»,— дешет.+
5 Алар баарын билип туруп бул чындыкты көз жаздымында калтырып жатышат: асман тээ мурун эле болгон, ошондой эле Кудайдын сөзү боюнча жер катуу болуп суудан чыгып турган жана суунун ортосунда болгон.+ 6 Ошол убактагы дүйнө бүт жер бетин суу каптаганда кыйратылып жок болгон.+ 7 Ал эми азыркы асман менен жер, ошол эле Кудайдын сөзү боюнча, от менен жок кылынышы үчүн ыймансыз адамдар жок боло турган сот күнүнө сакталып турат.+
8 Сүйүктүү боордошторум, Жахабанын көз алдында бир күн миң жылдай, миң жыл бир күндөй экенин эсиңерден чыгарбагыла.+ 9 Кээ бирөөлөр ойлогондой, Жахаба убадасын аткарбай создуктуруп жаткан жок,+ ал силер үчүн сабыр кылып жатат. Себеби ал эч кимдин өлүшүн каалабайт, баарынын өкүнүшүн каалайт.+ 10 Жахабанын күнү*+ ууру сыяктуу келет.+ Ал күнү асман шуу деп заматта жок болот.+ Асман менен жерди түзгөн нерселер катуу кызып, кыйратылат, ал эми жер жана анда жасалып жаткан иштер ашкереленет.+
11 Баары ушинтип кыйратыла турган болсо, анда кандай адам болушуңар керектиги жөнүндө ойлонуп көргүлө. Жүрүм-туруму ыйык адамдардан болуп, иштериңерден Кудайга берилген экениңер көрүнүп турсун. 12 Жахабанын күнүнүн келишин* күтүп,+ аны эсиңерде бек сактап жатып* силер ошондой адамдардан болушуңар керек эмеспи! Анткени ошол күнү асман алоолонуп жок болот,+ ал эми асман менен жерди түзгөн нерселер катуу кызып, эрип кетет! 13 Бирок биз, Кудайдын убадасы боюнча, адилдик өкүм сүрө турган+ жаңы асман менен жаңы жерди күтүп жатабыз.+
14 Ошондуктан, сүйүктүү бир туугандарым, ушуларды күтүп жатып, акырында Кудай силерди таза, кемчиликсиз, тынчтыкта жашаган адамдар деп табышы үчүн, бүт күчүңөрдү жумшагыла.+ 15 Андан тышкары, Теңирибиздин сабырдуулугун куткарылганга мүмкүнчүлүк катары көргүлө. Бул тууралуу силерге сүйүктүү бир тууганыбыз Пабыл да Кудай берген акылмандыгы менен жазып,+ 16 бардык каттарында айтып өткөн. Бирок анын каттарында түшүнгөнгө кыйын нерселер да бар. Түркөй, ишеними алсыз* адамдар аларды Ыйык Жазманын башка бөлүктөрүн бурмалашкандай эле бурмалап, өздөрүн өздөрү кыйратканы жатышат.
17 Демек, сүйүктүү боордошторум, муну алдын ала билгендиктен, ал ыймансыздар силерди өздөрүнүн жалган окуулары менен азгырып кетпеши үчүн жана туруктуулугуңардан жазбашыңар үчүн сак болгула.+ 18 Мырзабыз жана Куткаруучубуз Иса Машаяк жөнүндөгү билимиңер артып, мындан ары да анын ырайымына ээ боло бергиле. Ал азыр жана түбөлүктөн түбөлүккө даңкталсын. Оомийн*.