Периштелер жөнүндөгү чындык

Кудай рух болгондуктан, периштелер да көзгө көрүнбөгөн жаратуулар. Алардын «эти да, сөөгү да болбойт». Ишенимдүү периштелер асманда жашашат жана Кудайдын тактысы турган жерге бара алышат (Лука 24:39; Матай 18:10; Жакан 4:24).

Периштелер Кудайдын тапшырмасын аткарыш үчүн айрым учурларда адам кейпин кийип, жерге келишчү, ал эми тапшырмасын аткарып бүткөндөн кийин кайра периштеге айланып кетишчү (Бийлер 6:11—23; 13:15—20).

Ыйык Китепте периштелер эркек катары сүрөттөлсө да жана адам кейпин кийгенде эркек болуп көрүнүшсө да, алар эркек-аял болуп бөлүнбөйт. Периштелер үйлөнүшпөйт, тукум улашпайт. Андан тышкары, алар башында жерде адам болуп, мисалы, ымыркай, бала же чоң киши болуп жашап, өлгөндөн кийин периштеге айланып кетишкен эмес. Жахаба жараткандыктан, алар чыныгы Кудайдын уулдары деп аталышат (Аюп 1:6; Забур 148:2, 5).

Ыйык Китепте «адамдардын жана периштелердин тили» жөнүндө айтылат. Мындан рухий жаратуулардын өздөрүнүн тили бар экенин, сүйлөшө аларын билүүгө болот. Кудай адамдар менен байланышуу үчүн периштелерин колдонсо да, аларга сыйынууга же тиленүүгө тыюу салат (1 Корунттуктар 13:1; Аян 22:8, 9).

Периштелер миң-түмөндөп, сыягы, миллиарддап саналатa (Даниел 7:10; Аян 5:11).

Периштелер адамдардан алда канча күчтүү жана акылдуу. Алардын ылдамдыгы ушунчалык тез болгондуктан, биз аны элестете да албайбыз (Забур 103:20; Даниел 9:20—23).

Абдан акылдуу, күчтүү болсо да, периштелердин мүмкүнчүлүгү чектелүү. Алар айрым нерселерди билишпейт (Матай 24:36; 1 Петир 1:12).

Периштелер аң-сезим менен, Кудайдын сапаттарын чагылдырууга жана өз алдынча чечим чыгарууга жөндөмдүү болуп жаратылган. Ошол себептен адамдардай эле алар да туура же туура эмес иш кылууну тандай алышат. Өкүнүчтүүсү, айрым периштелер Кудайга каршы чыгышкан (Жүйүт 6).