Жахаба бейиш жөнүндөгү убадасын аткарарына кандай кепилдик берет?

1. Ысрайылдыктар Ышая пайгамбардын сөздөрүн укканда эмнени айкын түшүнүшкөн?

ЫШАЯ пайгамбар Жахабаны «ишенимдүү Кудай» деп айткан. Бул жерде «ишенимдүү» деп которулган сөз түзмө-түз «оомийн» дегенди билдирет (Ыш. 65:16). «Оомийн» деген сөз болсо «ушундай болсун» же «туура» деген маанини туюнтат. Ыйык Китепте «оомийн» деген сөз Жахабага же Исага карата колдонулганда бул алар айткан нерсенин сөзсүз болоруна кепилдик берет. Ошондуктан Ышаянын сөздөрүн уккан ысрайылдыктар: «Жахаба эмнени алдын ала айтса, ошону сөзсүз аткарат»,— деп ишене алмак. Чын эле ушундай экенин Жахаба ар бир убадасын аткарып, көрсөткөн.

2. Жахабанын келечегибизге байланыштуу убадаларына эмне үчүн ишенсек болот жана кайсы суроолорго жооп алабыз?

² Жахаба келечек жөнүндө айткандарын аткарат деп биз да ишенсек болобу? Ышая пайгамбардын ушул сөздөрү жазылгандан 800 жылдай өткөндөн кийин, Пабыл Жахабанын убадаларына эмне үчүн ишенсек болорун түшүндүрүп берген. Ал: «Кудай калп айта албайт»,— деп айткан (Евр. 6:18). Бул тууралуу ойлонуп көрсөңөр: алманын дарагы бир эле учурда алма да, өрүк да байлай албайт. Ошо сыңары, чындыктын Булагы болгон Жахаба калп айта албайт. Ошондуктан Жахаба айткан нерселердин баарынын, анын ичинде келечекке байланыштуу убадаларынын аткарыларына да толугу менен ишенсек болот. Бул макалада мындай суроолорго жооп алабыз: Жахаба келечегибизге байланыштуу кандай убада берген? Алардын сөзсүз аткарыларына кандай кепилдик берген?

ЖАХАБА КАНДАЙ УБАДА БЕРГЕН?

3. а) Жахабанын Күбөлөрү Ыйык Китептеги кайсы убаданы жакшы көрөт? (Аян 21:3, 4). б) Айрымдар ушул убада тууралуу укканда эмне дешет?

³ Келгиле, азыр дүйнө жүзүндөгү Жахабанын Күбөлөрү жакшы көргөн бир убаданы талкуулайлы. (Окугула: Аян 21:3, 4.) Жахаба Ыйык Китепке: «Мындан ары өлүм болбойт, кайгы да, өкүрүк да, оору да болбойт»,— деген убадасын жаздырган. Көбүбүз ушул жүрөк жылыткан сөздөрдү башкаларга бейиш жөнүндө айтканда окуп беребиз. Айрымдар муну кандай кабыл алышат? Алар: «Мунуңар жомок го!» — дешет.

4. а) Жахаба эмнени алдын ала көрө билген? б) Убада бергенден тышкары, ал дагы эмне кылган?

⁴ Жахаба элчи Жаканга бул сөздөрдү жаздырып жатканда кийин биздин да башкаларга ушул жакшы кабарды айтарыбызды билген. Ал келечекте ушундай сонун өзгөрүү болоруна көптөрдүн ишенбей коёрун да билген (Ыш. 42:9; 60:2; 2 Кор. 4:3, 4). Анда башкаларды Аян 21:4төгү убаданын сөзсүз аткарыларына канткенде ынандыра алабыз? Өзүбүздүн да ишенимибизди кантип бекемдей алабыз? Белгилей кетчү нерсе, Жахаба ушундай жүрөк толкуткан убада берип эле койбой, анын аткарыларына эмне үчүн ишенсек болорунун себептерин да келтирген. Эмесе, кандай себептер бар экенине токтололу.

ЖАХАБА УБАДАСЫНЫН АТКАРЫЛАРЫНА КЕПИЛДИК БЕРЕТ

5. Жахабанын бейиш жөнүндөгү убадасына ишенгенге кандай себептер бар жана аларды каяктан окуй алабыз?

⁵ Жахабанын бейиш жөнүндөгү убадасына ишенгенге кандай себептер бар экенин төмөнкү аяттардан окуй алабыз. Ал жакта мындай делет: «Тактыда отурган: „Мына, мен бардыгын жаңы жаратып жатам“,— деди. Анан: „Жаз, анткени бул сөздөр ишенүүгө татыктуу, бул сөздөр чын“,— деп кошумчалады. Андан соң мындай деди: „Бул сөздөр аткарылды! Мен Альфамын жана Омегамын, башымын жана аягымын“» (Аян 21:5, 6а).

6. Аян 21:5, 6га ылайык, Жахабанын убадаларын аткарарына эмне үчүн бекем ишенсек болот?

⁶ Бул сөздөр Кудай өз убадасын аткарарына болгон ишенимибизди эмне үчүн бекемдейт? Анткени бул аяттарда жазылгандарды Жахабанын бизди ынандырыш үчүн документке кол коюп бышыктаганына салыштырса болот. Андыктан Аян 21:3, 4тө Кудайдын убадасы жазылган болсо, 5, 6-аяттарда анын колу, мындайча айтканда, айткандарын аткарам деген кепилдиги турат десе болот. Келгиле анда, Жахабанын эмне деп кепилдик бергенине токтололу.

7. 5-аяттагы сөздөрдү ким айткан жана алар эмне үчүн көңүлгө аларлык?

⁷ 5-аяттын кандай сөздөр менен башталганына көңүл бурсаңар. Ал жерде: «„Тактыда отурган...“ — деди»,— деп айтылат (Аян 21:5а). Бул сөздөр өзгөчө көңүлгө аларлык. Анткени Аян китебинде Жахабанын өзү сүйлөгөнү 3 эле жолу айтылат. Бул — алардын бирөөсү. Ооба, бизге кубаттуу периште, атүгүл Иса эмес, Жахаба өзү кепилдик берген! Бул андан кийинки сөздөрдүн чындык экенин баса белгилеп турат. Эмне үчүн минтип айта алабыз? Себеби Жахаба «жалган сүйлөй албайт» (Тит 1:2). Бул Аян 21:5, 6да айтылгандардын толугу менен ишенүүгө татыктуу экенин көрсөтүп турат.

«МЫНА, МЕН БАРДЫГЫН ЖАҢЫ ЖАРАТЫП ЖАТАМ»

8. Жахаба убадасын сөзсүз аткарарын кантип баса белгилеген? (Ышая 46:10).

⁸ Эмесе: «Мына»,— деген сөзгө токтололу (Аян 21:5). Аян китебинде грек тилинен которулган «мына» деген сөз көп жолу колдонулат. Бир эмгекте бул сөздүн «окурмандарды андан кийин айтыла турган сөздөргө көңүл бурганга чакырыш үчүн» колдонулары айтылган. Кудай: «Мына»,— деп айткандан кийин: «Мен бардыгын жаңы жаратып жатам»,— деген. Жахаба бул жерде келечектеги өзгөрүүлөр жөнүндө сөз кылса да, аларды азыр кылып жаткандай айткан. Анткени ал убадасын сөзсүз ишке ашыра алат. (Окугула: Ышая 46:10.)

9. а) «Бардыгын жаңы жаратып жатам»,— деген сөздөр Жахабанын кайсы эки иш-аракетине карата айтылат? б) Учурдагы «асман» менен «жер» эмне болот?

⁹ Эми Аян 21:5теги: «Бардыгын жаңы жаратып жатам»,— деген сөздөрдү талдап көрөлү. Бул бөлүмдө ушул сөздөр Жахабанын эки иш-аракетине карата колдонулат. Алар — алмаштыруу жана калыбына келтирүү. Жахаба эң алгач эмнени алмаштырат? Аян 21:1ден: «Мурунку асман менен мурунку жер жок болду»,— дегенди окуйбуз. «Мурунку асман» Шайтан менен анын жин-перилеринин таасири астындагы өкмөттөрдү билдирет (Мт. 4:8, 9; 1 Жкн. 5:19). Ыйык Китепке ылайык, «жер» деген сөз адамдарга карата айтылат (Заб. 96:1). Ошондуктан «мурунку жер» бүгүнкү күндөгү ыймансыздыкка белчесинен баткан адамзат коомун билдирет. Жахаба азыркы «асман» менен «жерди» оңдоп же жакшыртып эле койбойт. Ал аларды толугу менен «жаңы асман менен жаңы жерге» алмаштырат. Тагыраак айтканда, жерди жаңы өкмөт башкарып, анда адил адамдар жашайт.

10. Жахаба эмнелерди жаңыртат?

¹⁰ Жахаба дагы эмнелерди жаңыртат? (Аян 21:5). Жер менен адамзатты. Ал жерди калыбына келтирип, адамзатты жеткилеңдикке жеткирет. Ошол убак келгенде, Ышая пайгамбар алдын ала айткандай, Жахаба бүтүндөй жер бетин Эйден багына окшогон кооз бакка айлантат. Ошондой эле ар бир адамды жаңыртат, башкача айтканда, толугу менен калыбына келтирет. Ошондо аксактар, көзү көрбөгөндөр, кулагы укпагандар оорусунан айыгат. Атүгүл өлүм уйкусунда жаткандар тирилет (Ыш. 25:8; 35:1—7).

«БУЛ СӨЗДӨР ИШЕНҮҮГӨ ТАТЫКТУУ, БУЛ СӨЗДӨР ЧЫН»

11. Жахаба Жаканга кандай буйрук берген жана анын себебин кантип түшүндүргөн?

¹¹ Кудай анын айткандарына ишенсек болоруна ынандырыш үчүн дагы эмне деген? Жахаба Жаканга: «Жаз, анткени бул сөздөр ишенүүгө татыктуу, бул сөздөр чын»,— деп айткан (Аян 21:5). Жахаба: «Жаз!» — деп буйрук берип эле койбой, андан ары себебин түшүндүрүп: «Анткени бул сөздөр ишенүүгө татыктуу, бул сөздөр чын»,— деген. Биз Жакандын Жахабанын буйругуна баш ийип, баарын жазып алганына кандай гана ыраазыбыз! Анын ошенткенинин аркасында Кудайдын бейишке байланыштуу убадасын окуй алабыз. Ошондой эле кандай баталарды аларыбыз тууралуу ой жүгүртө алабыз.

12. Эмне үчүн Жахаба: «Бул сөздөр аткарылды!» — деп айта алат?

¹² Андан ары Кудай эмне деген? Ал: «Бул сөздөр аткарылды!» — деп айткан (Аян 21:6). Бул жерде Жахаба бейиш жөнүндөгү убадасы аткарылгандай кылып айткан. Ал ушинтип ишенимдүү түрдө айта алат. Себеби ага ой-ниетин аткарганга эч нерсе тоскоолдук кыла албайт. Андан соң Жахаба убадаларын сөзсүз аткарарын көрсөткөн дагы бир күчтүү сөздөрдү айткан. Ал эмне деген?

«МЕН АЛЬФАМЫН ЖАНА ОМЕГАМЫН»

13. Эмне үчүн Жахаба: «Мен Альфамын жана Омегамын»,— деген?

¹³ Жогорудан билгенибиздей, Жаканга берилген аянда Жахаба өзү үч жолу сүйлөгөн (Аян 1:8; 21:5, 6; 22:13). Үчөөндө тең Жахаба: «Мен Альфамын жана Омегамын»,— деп айткан. Грек тилинин алфавити альфа тамгасы менен башталып, омега тамгасы менен бүтөт. «Мен Альфамын жана Омегамын»,— дегенде Жахаба кайсы бир нерсени баштаса, сөзсүз аягына чыгарарын айкын кылган.

14. а) Жахабанын качан «Альфа» деп айтканын жана качан «Омега» деп айтарын айтып бергиле. б) Башталыш 2:1—3-аяттарда Жахаба кандай кепилдик берген?

¹⁴ Жахаба Адам ата менен Обо энени жараткандан кийин адамзатка жана жерге карата кандай ой-ниети бар экенин айткан. Ыйык Китепте ал тууралуу: «„Укумдап-тукумдагыла, жер бетин толтургула, аны иштеткиле...“ — деп батасын берди»,— делет (Башт. 1:28). Ошол учурда Жахаба: «Альфа»,— деп айткандай болгон. Ал Адам ата менен Обо эненин Кудайга баш ийген, жеткилең урпактары бара-бара жер бетин толтуруп, жерди бейишке айлантышын каалаган. Анан, акыры, Жахаба: «Омега»,— деп айтмак. «Асман менен жер жана алардагынын бардыгын» жаратып бүткөндөн кийин Жахаба ниет кылган нерселерин аткарарына кепилдик берген. Бул тууралуу Башталыш 2:1—3-аяттарда жазылган. (Окугула.) Эң акырында Жахаба жетинчи күндү өзүнчө бөлүп, ыйыктаган. Бул эмнени билдирет? Муну менен Жахаба адамзатка жана жерге карата ой-ниетинин сөзсүз ишке ашарына кепилдик берген. Жетинчи күндүн аягында анын ой-максаты толугу менен ишке ашат.

15. Эмне үчүн Шайтанга Кудайдын ой-ниетин бузуп салгандай сезилген?

¹⁵ Адам ата менен Обо эне Кудайга каршы чыккандан кийин күнөөкөр болуп калышкан жана күнөө менен өлүмдү өздөрүнүн урпактарына өткөрүп беришкен (Рим. 5:12). Ошонун айынан Шайтан Кудайдын жер бетинде ага баш ийген жеткилең адамдар жашайт деген ниетин бузуп салгандай көрүнгөн. Эми Жахаба эч качан: «Омега»,— деп айта албай калат беле? Шайтан: «Жахаба убадасын аткара албай калды»,— деп ойлогон чыгар. Мүмкүн, ал: «Адамзатка карата ой-ниетин аткарыш үчүн Адам ата менен Обо энени жок кылып, алардын ордуна башка жеткилең түгөйлөрдү жаратат»,— деп ойлогондур. Эгер Кудай ушинте турган болсо, Ибилис аны жалганчы деп айыптамак. Анткени Башталыш 1:28де Жахаба Адам ата менен Обо энеге алардын тукуму жер бетин толтурарын айткан эле.

16. Шайтан Жахабаны эмне деп айыптай алам деп ойлошу мүмкүн эле?

¹⁶ Шайтан: «Кудай дагы эмне кылышы мүмкүн?» — деп ойлошу ыктымал эле. Балким: «Жахаба Адам ата менен Обо энеге жеткилең эмес балдарды жарыкка алып келгенге жол берет. Алар болсо эч качан жеткилеңдикке жете албайт»,— деп ойлогондур (Нас. 7:20; Рим. 3:23). Эгер Жахаба ошондой кылса, Ибилис аны: «Ой-ниетиңди ишке ашыра алган жоксуң»,— деп сөзсүз айыптап чыкмак. Себеп дегенде, Жахабанын ой-ниети боюнча, жер бетиндеги бейиште Адам ата менен Обо энеден төрөлгөн жеткилең, Жахабага баш ийген адамдар жашамак. Ошол ой-ниети болсо аткарылбай калмак.

17. Шайтан жана алгачкы түгөйлөр козголоң чыгарганда, Жахаба эмне кылган? (Сүрөттү да карагыла.)

¹⁷ Жахаба чырмалышкан жагдайды укмуштуудай жол менен чечип койгон. Ошондой болору Шайтандын оюна да келген эмес (Заб. 92:5). Жахаба Адам ата менен Обо энеге балалуу болгонго мүмкүнчүлүк берип, өзүнүн калпычы эмес экенин далилдеген. Ошондой эле эмнени ойлосо, ошону ишке ашырганга эч ким, эч нерсе тоскоолдук кыла албай турганын айкын кылган. Көздөгөн максатына жетиш үчүн ал Адам ата менен Обо эненин урпактарын сактап кала турган «тукум» чыгарган. Ал «тукум» адамзатты күнөө менен өлүмдүн кулчулугунан бошотуш үчүн өз өмүрүн кун катары бермек (Башт. 3:15; 22:18). Мындай болору Шайтандын үч уктаса да түшүнө кирген эмес. Эмне үчүн? Анткени кун жан аябастыкты чагылдырган сүйүүгө негизделген (Мт. 20:28; Жкн. 3:16). Ал эми бул сапат өзүмчүл Шайтанда таптакыр жок. Адамзат үчүн төлөнгөн кундун аркасында эмнелерге жол ачылган? Миң жылдыктын аягында, Жахаба башында ниет кылгандай, Адам ата менен Обо эненин Жахабага баш ийген, жеткилең урпактары жер бетиндеги бейиште жашашат. Мына ошондо Жахаба: «Омега»,— деп айтат.

ЖАХАБАНЫН БЕЙИШ ЖӨНҮНДӨГҮ УБАДАСЫНА БОЛГОН ИШЕНИМИБИЗДИ КАНТИП ЧЫҢДАЙ АЛАБЫЗ?

18. Жахаба бизди убадаларын аткара аларына кантип ынандырган? («Жахабанын убадасына ишенсек болорунун үч себеби» деген кутучаны карагыла.)

¹⁸ Бул макаладан Жахабанын жер бетине бейиш орноторуна эмне үчүн ишенсек болорун карадык. Башкаларга да буга ишенгенге жардам бериш үчүн эмнелерди айтсак болот? Биринчиден, бул убаданы Жахаба өзү берген. Буга Аян китебиндеги: «Тактыда отурган: „Мына, мен бардыгын жаңы жаратып жатам“,— деди»,— деген сөздөр далил. Жахабада убадасын аткарганга акылмандык да, күч да, каалоо да бар. Экинчиден, Жахаба убадаларынын аткарыларына толук көзү жеткендиктен, аларга аткарылгандай эле карайт. Ошон үчүн ал: «Бул сөздөр ишенүүгө татыктуу, бул сөздөр чын... Мурункунун баары өтүп кетти»,— деген. Үчүнчүдөн, Жахаба бир нерсени баштаса, аны сөзсүз аягына чыгарат. Ошондуктан: «Мен Альфамын жана Омегамын»,— деп айтат. Жахаба Шайтандын жалганчы экенин жана анын ой-ниетин аткарганга бут тосо албаарын далилдей аларынан кымындай да шектенбесек болот.

19. Башкалар Кудайдын бейиш жөнүндөгү убадасына шектенсе, эмне деп айтасыңар?

¹⁹ Башкаларга Кудайдын убадаларын аткарарына кандай кепилдик бергенин айткан сайын өзүңөрдүн да ишенимиңер бекемделерин эсиңерден чыгарбагыла. Кимдир бирөөгө Аян 21:4тү окуп бергениңерде, ал: «Бул жомок го!» — десе, эмне деп жооп бересиңер? Ага 5, 6-аяттарды окуп, түшүндүрүп берсеңер болот. Анан сөзсүз түрдө Жахабанын өз убадасын аткарарына кепилдик берип, кол койгонун да көрсөтүп бергиле (Ыш. 65:16).