Кудайдын кереметтүү иштерине көңүл бургула
«Теңир, Кудайым, Сен көп иштерди жасадың, Сенин бизге көрсөткөн кереметтериңди, биз жөнүндөгү ниеттериңди ким айтып бүтө алат? Ким тең келе алат Сага!» (Забур 39:6, «Ыйык Китеп»).
1, 2. Кудайдын кереметтүү иштерине кандай далилдер бар жана алар бизге эмне кылууга түрткү берет?
БИЗ Ыйык Китепти окуу менен Кудайдын байыркы эли Израилге кереметтүү нерселерди жасаганын оңой эле көрө алабыз (Иса Навин 3:5; Забур 105:7, 21, 22). Азыркы убакта Иегова адамдардын иштерине ошо маалдагыдай кийлигишпесе да, айлана-тегеректе анын кереметтүү иштерин далилдеп турган көп нерселер бар. Ошондуктан, забурчуга окшоп, биз да: «Сенин иштериң кандай көп, Теңир! Сен баарын акыл менен жасагансың; жер Сенин чыгармачылыгыңа толгон»,— деп айта алабыз (Забур 103:24; 148:1—5).
2 Жаратканга тиешелүү иштердин мындай айкын далилдерин бүгүн көптөр элес албайт же четке кагат (Римдиктер 1:20). Бирок биздин ал иштердин үстүнөн ой жүгүрткөнүбүз, ошондой эле Жаратуучубуздун алдындагы абалыбызга жана милдетибизге карата өз корутундубузду чыгарганыбыз абзел. Бул жагынан бизге Аюб китебинин 38ден 41ге чейинки баптары сонун жардам бере алат, анткени бул баптарда Иегова Аюбдун көңүлүн Өзүнүн кереметтүү иштеринин айрым бир жактарына бурган. Эмесе, Кудай көтөргөн ошол маанилүү суроолорду карап көрөлү.
Кубаттуу жана кереметтүү иштер
3. Аюб 38:22, 23, 25—29-аяттарга ылайык, Кудай Аюбдан эмнелер тууралуу сураган?
3 Алгач Кудай Аюбдан: «Сен кар сактагыч кампага кирдиң беле? Мөндүрлөр сакталган казнаны көрдүң беле? Мен аларды алаамат күндөргө, салгылаш менен кан майдан күндөрүнө сактап турам»,— деп сураган. Көп жерлерде кар менен мөндүр кадимки эле кубулуш болуп саналат. Андан ары Кудай мындай деген: «Суулардын нугун, чартылдаган чагылгандын жолун ким салып турат? Эл жашабаган жерлерге, адам жашабаган эрме чөлдөргө ким жамгыр жаадырып жатат? Чөлдөр менен талаалардын суусунун ким кандырып жатат? Ким чөптөрдүн тамырын жибитип, өскөнгө түрткү берип жатат? Жамгырдын атасы барбы? Же шүүдүрүмдүн тамчыларын ким жаратып жатат? Муз кимдин курсагынан чыгат, асман бубагын ким жаратып жатат?» (Аюб 38:22, 23, 25—29, «Ыйык Китеп»).
4—6. Адамдардын кар жөнүндөгү билими канчалык тайкы?
4 Агымы шар коомдо жашаган жана эки жакка көп каттаган айрым адамдар карды тоскоолдук катары эле көрүшү мүмкүн. Бирок көп сандаган башка адамдар карды кызыктуу көңүл ачууларга шарт түзгөн кышкы ажайыптардын бири катары көрүшөт. Кудайдын суроосу боюнча, биздин кар жөнүндө билимибиз тереңби же, жок дегенде, анын көрүнүшү кандай экенин билебизби? Албетте, үйүлгөн кардын көрүнүшү бизге белгилүү. Күрткүнү, мүмкүн, сүрөттөн же өз көзүбүз менен көргөн чыгарбыз. А кардын ар бир бүртүгүнчү? Алардын көрүнүшү кандай экенин билесиңерби? Аларды башатынан изилдедиңер беле?
5 Ондогон жылдар бою кар бүртүктөрүн сүрөткө тартып, изилдеп жүргөн адамдар бар. Кардын бир бүртүгү ар кандай формадагы кипкичинекей, кооз 100 муз кристалчасынан турушу мүмкүн. «Атмосфера» деген китепте мындай делет: «Кар бүртүктөрүнүн чексиз ар түрдүүлүгү жалпыга белгилүү. Илимпоздор андай бүртүктөрдүн бири-бирин кайталашына табияттын эч бир мыйзамы жолтоо эмес деп ырасташса да, эки окшош бүртүктү эч ким көргөн эмес. Эбегейсиз зор изилдөө жүргүзгөндөрдүн бири — Уилсон Бентли. Ал 40 жылдан ашык убакыт бою микроскоп аркылуу кар бүртүктөрүн сүрөткө тартып, изилдеп келген, бирок бири-бирине опокшош бүртүктөрдү тапкан эмес» («Atmosphere»). Табылган күндө да, бул кар бүртүктөрүнүн таң калыштуу түрлүү-түркүндүгүн, кереметтүүлүгүн өзгөртмөкпү?
6 Кудайдын: «Сен кар сактагыч кампага кирдиң беле?» — деген суроосун эстесеңер. Көптөр булуттарды кар сактагыч кампалар деп ойлошот. Сансыз кар бүртүктөрүн тизмеге алуу үчүн жана алардын кантип пайда болгонун изилдөө үчүн ошол «кампаларга» баратканыңарды элестете аласыңарбы? Бир илимий энциклопедияда: «Цельсий шкаласы боюнча болжол менен минус 40 градуста булуттардагы кичинекей суу тамчыларын тоңдуруучу муз кристалл-түйүлдүктөрүнүн табияты жана жаралышы алигече белгисиз»,— деп айтылат (Забур 147:5, 6; Исаия 55:9, 10).
7. Адамдардын жамгыр жөнүндөгү билими канчалык кеңири?
7 Ал эми жамгыр жөнүндө эмне айтууга болот? Кудай Аюбдан: «Жамгырдын атасы барбы? Же шүүдүрүмдүн тамчыларын ким жаратып жатат?» — деп сураган. Ошол эле энциклопедияда: «Атмосферадагы абанын жылып жүрүшүнүн татаалдыгынан жана абадагы буу менен бөлүкчөлөрдүн өзгөргүчтүгүнөн улам, булуттарды жана жаан-чачындарды пайда кыла турган мындай универсалдык теорияны ойлоп табуу мүмкүн эместей көрүнөт»,— деп айтылат. Жөнөкөйлөтүп айтканда, илимпоздор көптөгөн теорияларды сунуш кылышса да, чындыгында, жамгырды толугу менен түшүндүрө алышпайт. Ошентсе да биз жамгырдын өтө зарыл экенин, анын жерди, өсүмдүктөрдү сугарып, тиричиликтин улана беришин жана жагымдуу болушун камсыз кылып жатканын билебиз.
8. Павелдин Расул 14:17де жазылган сөздөрү эмне үчүн орундуу?
8 Расул Павелдин чыгарган тыянагын ким четке какмак? Ал башкаларды бул кереметтүү иштерден аларды Жаратуучуга тийиштүү далилдерди көрүүгө чакырган. Иегова Кудай жөнүндө Павел: «Ал жакшылык менен Өзү жөнүндө күбөлөндүргөнүн таштабады [«токтоткон эмес», СК]; Ал бизге асмандан жамгырларды, жемиштүү замандарды берип, жүрөктөрүбүздү азыктандырып, сүйүнүчкө толтурду»,— деген (Расул 14:17; Забур 146:8).
9. Кандайча Кудайдын кереметтүү иштери анын зор күч-кубатын чагылдырып турат?
9 Мындай кереметтүү жана пайдалуу иштердин Жаратуучусунун акылмандыгы чексиз жана күч-кубаты зор экенинде эч шек жок. Анын күч-кубаты кандай экенин ойлоп көрсөңөр: күн сайын 45 000дей, жылына 16 миллиондон ашык чагылгандуу жаан жаайт экен. Демек, азыркы мүнөттө дүйнө жүзү боюнча 2 000ге жакын чагылгандуу жаан жаап жатат. Бир эле чагылгандуу жаандын топ булуттарындагы энергия Экинчи дүйнөлүк согушта ташталган он же андан көп ядролук бомбадагы энергияга теңдеш. Ал энергиянын кайсы бир бөлүгү бизге чагылган түрүндө көрүнөт. Чагылган үрөйдү учургандан тышкары, азоттун ар кандай түрлөрүнүн пайда болушуна шарт түзөт. Ал эми ал азот топуракка сиңип, өсүмдүктөр үчүн табигый жер семирткич болуп берет. Ооба, чагылган энергиянын күч-аракетин эле көрсөтпөстөн, пайда да алып келет (Забур 103:14, 15).
Кандай жыйынтыкка келесиңер?
10. Аюб 38:33—38-аяттардагы суроолорго эмне деп жооп бермексиңер?
10 Өзүңөрдү Аюбдун ордуна коюп, Кудурети Күчтүү Кудайдын силерге суроо берип жатканын элестетсеңер. Адамдардын көбү Кудайдын кереметтүү иштерине анча көңүл бура беришпейт дегенге силер макул болсоңор керек. Аюб 38:33—38-аяттардагы суроолорду Иегова бизге берип жатат. «Асман эрежесин билесиңби, жер жүзүнө анын үстөмдүгүн орното аласыңбы? Сенин үстүңө нөшөрлөп жамгыр куюш үчүн, үнүңдү булуттарга жеткире аласыңбы? Чагылгандарды багыттай аласыңбы, алар сага баш ийип: „биз мына“ деп айтабы? Жүрөккө акылмандыкты ким салды, же болбосо акылга маанини ким берди? Өз акылы менен булуттарды ким эсептеп, асман түтүктөрүн ким токтото алат? Топурак чылага айланып, баткак жабышып кесек болуп жатканда, нөшөрдү ким тыя алат?»
11, 12. Кудай кереметтүү иштердин Жаратуучусу экенин эмнелер далилдеп турат?
11 Биз Елиуйдун Аюбга айткан ойлорунун кээ бирлерине гана токтолуп, Иегова тарабынан «эркек сыяктуу» жооп бериши үчүн Аюбга коюлган айрым суроолорду карап чыктык (Аюб 38:3). «Айрым» дегенибиздин себеби 38, 39-баптарда Кудай өз жаратууларынын көңүл бурарлык башка жактары жөнүндө да сөз кылган. Мисалы, асмандагы топ жылдыздар жөнүндө. Алардын бүт мыйзамдарын, эрежелерин ким билет? (Аюб 38:31—33). Иегова Аюбдун назарын жан-жаныбарлардын кээ бир түрлөрүнө: арстан менен каргага, жапайы эчки менен зебрага (ЖД), жапайы өгүз менен төө кушка, күчтүү ат менен бүркүткө бурган. Негизинен, Кудайдын Аюбга берген суроосунун маңызы: «Бул түркүн жаныбарларга мүнөздүү өзгөчөлүктөрдү берген, алардын жашашына шарт түзгөн сенсиңби?» — дегендей. Бул баптарды изилдөө силер үчүн да жагымдуу болушу мүмкүн, айрыкча, эгер аттарды же дагы башка жаныбарларды жакшы көрсөңөр (Забур 49:10, 11).
12 Ошондой эле Аюб китебинин 40, 41-баптарын да талдап чыксаңар болот. Ал жерде Иегова кайрадан Аюбга кайрылып, эки өзгөчө жаныбар жөнүндө сураган. Сыягы, сөз килейген күчтүү гиппопотам (бегемот) жана жүрөктүн үшүн алчу Нил крокодили (левиафан) жөнүндө жүрүп жатат. Ар бири — жаратылыштын көңүл буруубузга татыган өзүнчө бир керемети. Келгиле эми, кандай тыянак чыгарышыбыз керектигин карап көрөлү.
13. Кудайдын суроолору Аюбга кандай таасир эткен жана бизге кандай таасир этиши керек?
13 Аюб китебинин 42-бабынан Кудайдын суроолору Аюбга кандай таасир эткенин көрүүгө болот. Мурун Аюб өзүнө жана башкаларга өтө эле көп көңүл бурар эле. Бирок Кудайдын суроолорунда камтылган оңдоп-түзөөнү кабыл алып, Аюб ой жүгүртүүсүн өзгөрткөн. Ал: «Билем, Сен баарын жасай аласың жана Сенин ниетиңди эч ким токтото албайт. Эчтемени баамдабаган, Кудайдын чечимин караңгылаган ким бул? — Мен эмнени туюнбасам, ошол жөнүндө, мен билбеген, мен үчүн укмуштуу иштер жөнүндө айткам»,— деген (Аюб 42:2, 3). Ооба, Кудайдын иштерине көңүл бурган соң, Аюб ага бул нерселер да укмуштуу болгонун айткан. Бул жаратылыш укмуштарын карап чыккандан кийин, биз да Кудайдын акылмандыгы менен күч-кубатына тан беришибиз керек. Канчалык деңгээлде? Биз Иегованын эбегейсиз күч-кубаты менен жөндөмүнө таасирленип эле тим болушубуз керекпи? Же дагы башка нерсеге түрткү алууга тийишпизби?
14. Дөөт Кудайдын кереметтүү иштерине карата кандай сезимде болгон?
14 «Кудайдын даңкын асман далилдеп жатат, Анын колдору жасаган иштерди аалам кабарлап жатат. Күн күнгө сүйлөп, түн түнгө илим ачат»,— деп эле тим болбостон, Дөөт Забур 85-бапта Аюбдун сөздөрүнө окшош сөздөрдү айткан (Забур 18:2, 3). Забур 85:10, 11-аяттарда: «Сен улуусуң да укмуштарды жаратасың, — Сен, Кудай, жалгыз Сен Өзүң. Мени Өз жолуңа сал, Теңир; Сенин чындыгыңда, ак жолуңда басайын; менин жүрөгүмдү бекит, Сенин ысмыңдан корксун»,— деп айтылат. Дөөт укмуштарды жасаган Жараткандын алдында тийиштүү деңгээлде коркуу жана ардактоо сезимин туйган. Эмне үчүн экени түшүнүктүү. Дөөт мындай кереметтүү иштерди кылууга кудурети бар Кудайдын жактыруусунан айрылгысы келген эмес. Андайды биз да өзүбүзгө каалабайбыз.
15. Дөөттүн Кудайдын алдында ардактоо менен коркуу сезимин туйганы эмне үчүн жөндүү эле?
15 Кудай өзүндөгү эбегейсиз зор күч-кубатты башкара алгандан кийин, аны Өзүнүн жактыруусуна татыбагандарга каршы багыттай аларын Дөөт түшүнсө керек. Иегованын мындай иш-аракети ал адамдар үчүн кесепеттүү. Кудай Аюбдан мындай деп сураган: «Сен кар сактагыч кампага кирдиң беле? Мөндүрлөр сакталган казнаны көрдүң беле? Мен аларды алаамат күндөргө, салгылаш менен кан майдан күндөрүнө сактап турам». Кар, мөндүр, катуу нөшөрлүү алай-дүлөй, шамал жана чагылган — баары Кудайдын колунда. Бул табият кубулуштарында кандай зор кубат бар! (Аюб 38:22, 23).
16, 17. Кудайдын коркуу сезимин туудурган күч-кубаты эмнеден көрүнүп турат жана байыркы убакта ал андай күч-кубатты кантип колдонгон?
16 Силердин эсиңерге куюн, тайфун, чоң добул, мөндүр же суу ташкыны сыяктуу кээ бир жергиликтүү табият кырсыктары түшсө керек. Алсак, 2000-жылдын башында Европанын түштүк-батышын аябай катуу шамал каптаган. Буга атүгүл аба ырайы жаатындагы адистер да айран-таң болушкан. Саатына 200 километр жүргөн бул шамал миңдеген үйлөрдүн чатырын учуруп, электр зым мамыларын оңкоруп, жүк ташуучу машиналарды оодарып салды. Элестетип көрсөңөр, мунун кесепетинен 270 миллиондой бак-дарактын айрымдары тамыры менен жулунса, айрымдары сынган, алардын 10 000и эле — Париждин чет жакасындагы Версаль багындагы дарактар. Миллиондогон үй-бүлөлөр электр жарыгы жок отуруп калды. Жүзгө жакын адам набыт болду. Ушунун баары кыска эле убакыттын ичинде болуп өттү. Бул эмне деген күч-кубат!
17 Кимдир бирөө андай шамалдарды кубулма, ээ-жаа бербеген, ооздукталбаган кубулуштар деп аташы мүмкүн. А бирок эгер кереметтүү иштерди кылган Кудуреттүү Кудай табият кубулуштарын багыттуу түрдө колдонсо, аларды ооздуктаса, эмне болмок? Ибрайымдын күндөрүндө Кудай ошо сыяктуу нерсе жасаган. Ибрайым өзү күбө болгондой, бүт жердин Соту Содом жана Гоморра аттуу эки шаардын мыйзамсыздыгын таразага тарткан. Ал шаарлар ушунчалык бузулуп кеткендиктен, адилеттүүлөрдүн ыйы Кудайга жеткен. Ошондуктан ал ошол адилеттүүлөрдүн өкүм чыгарылган шаарлардан чыгып кетишине жардам берген. Тарыхый билдирүүдө: «Теңир Содом менен Гоморрага асмандан күкүрттүү, жамгыр сыяктуу Теңирдин отун жаадырган»,— деп жазылган. Кудайдын бул кереметинин аркасында адил адамдар куткарылып, оңолбос мыйзамсыздар жок кылынган (1 Муса 19:24).
18. Исаия китебинин 25-бабында кайсы укмуштар жөнүндө айтылган?
18 Кийинчерээк болсо Кудай байыркы Вавилон шаарына каршы өкүм чыгарган. Исаия китебинин 25-бабында сөз ошол шаар тууралуу жүрсө керек. Кудай ал шаардын урандыга айланарын: «Сен шаарды үйүлгөн таштарга, бекем чепти додологон урандыларга айланттың; шаарда бөтөн уруулардын заңгыраган үйлөрү калган жок; ал түбөлүк калыбына келтирилбейт»,— деп алдын ала айткан (Исаия 25:2). Мунун чынында эле ишке ашканын Вавилондун азыркы ордун көрүп келгендер бышыктай алат. Вавилондун талкаланышы кокустук болгонбу? Жок. Биз Исаиянын: «О Теңир! Сен — менин Кудайымсың; Сенин ысмыңды мактайм, Сени даңазалайм, анткени Сен укмуштарды жараттың; эзелки белгиленген ниеттерди жүзөгө ашырдың»,— деген сөздөрүнө кошулабыз (Исаия 25:1).
Келечектеги кереметтүү иштер
19, 20. Биз Исаия 25:6—8-аяттардын кантип аткарылышын күтө алабыз?
19 Кудай байыркы убакта жогорудагы пайгамбарлыкты аткаргандай, келечекте да укмуштарды жаратат. Исаия Кудайдын «укмуштарын» сөз кылган бапта али келечекте аткарылышы керек болгон ишеничтүү пайгамбарлык бар. Ал пайгамбарлык Вавилонго чыгарылган өкүм сыяктуу эле аткарылат. Кандай «укмуш» нерсе убадаланган? Исаия 25:6да («Ыйык Китеп»): «Теңир бардык эл үчүн ушул тоонун үстүндө майлуу тамактардан дасторкон жасайт, таза шараптан, сөөктүн майынан, эң таза шараптан дасторкон жасайт»,— деп айтылат.
20 Бул пайгамбарлык Кудай убадалаган жаңы дүйнөдө сөзсүз аткарылат. Биз ал дүйнөнүн босогосун аттаганы калдык. Ал заман келгенде, адамзат бүгүн көптөрдү ушунчалык азапка салып жаткан кыйынчылыктардан арылат. Исаия 25:7, 8-аяттардагы пайгамбарлыкта Кудай эң кереметтүү иштердин бирин аткаруу үчүн өзүнүн жаратуучулук кудуретин колдоноруна кепилдик берилет: «Ажал биротоло жок болот, Кудай Теңир бардык беттердеги көз жашты сүртөт жана бүт жер жүзүндөгү Өз элине болгон кордоону жоёт, анткени Теңир ушундай деген». Кийинчерээк расул Павел бул аяттардан цитата келтирип, Кудайдын өлгөндөрдү тирилтүү аркылуу аларга кайрадан өмүр берерин көрсөткөн. Бул кандай кереметтүү иш болот! (1 Коринфтиктер 15:51—54).
21. Өлгөндөр үчүн Кудай кандай кереметтүү иштерди кылат?
21 Кайгы-кападан жаш төгүү болбой турганынын дагы бир себеби — адамдар оору-сыркоого чалдыкпайт. Жерде жүргөн кезинде Ыйса көп адамдарды сакайткан: сокурлар көрүп, дүлөйлөр угуп, майыптар түзөлгөн. Иоанн 5:5—9-аяттарда Ыйсанын 38 жыл бою бутунан майып болуп жүргөн кишини айыктырганы айтылат. Бул окуяга күбө болгондор муну укмуштуу нерсе, кереметтүү иш катары кабыл алышкан. Бул керемет чын эле укмуш болгон! Бирок Ыйса мындан да укмуш нерсе өлгөндөрдүн тирилүүсү болору тууралуу: «Буга таң калбагыла, анткени мүрзөлөр ичинде жаткандардын баары Кудай Уулунун үнүн уга турган учур келет жана жакшылык кылгандар өмүргө тирилишет, жамандык кылгандар болсо айыпталуу үчүн тирилишет»,— деп айткан (Иоанн 5:28, 29).
22. Эмне себептен жакырлар менен эзилгендер келечекке үмүт менен карай алышат?
22 Мунун аткарылары шексиз, анткени убаданы берген — Иегова өзү. Ал кайра калыбына келтирүүчү зор күчүн багыттуу колдонгондо, мунун натыйжалары сонун болоруна бекем ишенгиле. Забур 71-бапта Кудайдын өзүнүн Падыша Уулу аркылуу эмнелерди жүзөгө ашырары көрсөтүлгөн. Ал кезде адил адам гүлдөйт. Тынчтык мол болот. Кудай жакырлар менен эзилгендерди куткарат. Ал: «Нан деген жерде да, тоодо да мол болот; анын жемиштери Ливан тоосунун токоюндай шуудурайт, шаарларда эл деген жердеги чөптөй жайнайт»,— деген убада берет (Забур 71:16).
23. Кудайдын кереметтүү иштери бизге эмне кылууга түрткү бериши керек?
23 Ооба, Иегованын бардык кереметтүү иштерине — анын өткөн замандарда кылган, азыр кылып жаткан жана жакын арада кыла турган иштерине — көңүл бурууга негиз бар. «Кудай Теңир, Израил Кудайы, укмуш кереметтерди жасаган жалгыз Өзү, мартабасы арта берсин! Жана Анын даңктуу ысмы берекелүү, парасаты түбөлүккө көтөрүлө берсин, Анын даңкына бүт жер жүзү толсун. Оомийин жана оомийин!» (Забур 71:18, 19). Бул жөнүндө биз дайыма жакындарыбызга жана башкаларга жан-дилден билдире беришибиз керек. Ооба, келгиле, «элдер арасына Анын даңкын жарыя кылалы, бардык уруу-уруктарда Анын кереметтерин даңаза кылалы!» (Забур 77:3, 4; 95:3, 4).
Эмне деп жооп бермексиңер?
• Аюбга берилген суроолор адамдардын билиминин тайкылыгын кандайча баса көрсөтүп турат?
• Силерди Аюб китебинин 37—41-баптарында кеп кылынган Кудайдын кереметтүү иштеринин кайсылары таасирлентти?
• Кудайдын кереметтүү иштеринин айрымдарын карап чыккандан кийин, биз эмне кылууга түрткү алышыбыз керек?
[10-беттеги сүрөт]
Кар бүртүктөрүнүн таң калыштуу ар түрдүүлүгүнө жана чагылгандын үрөйдү учурарлык кубатына байланыштуу кандай корутунду чыгарасыңар?
snowcrystals.net
[13-беттеги сүрөт]
Кудайдын кереметтүү иштерин башкаларга билдире берели.