Адилеттүүлүк менен акыйкаттык көрсөтүүдө Иегованы туурагыла
«Мен жер үстүндө кайрымдуулукту, калыстыкты жана адилеттүүлүктү аткарган Теңир... » (ИЕРЕМИЯ 9:24).
1. Иегова кандай сонун келечек камдап койгон?
ИЕГОВА аны баары тааный турган күндүн келерин убада кылган. Исаия пайгамбар аркылуу ал: «Менин бүт ыйык тоомдун үстүндө жамандык да, зыян да кылышпайт: анткени, суулар деңизди толтургандай, жер Теңирди билип-таанууга толот»,— деген (Исаия 11:9). Кандай гана сонун келечек!
2. Иегованы билип-таануу деген эмнени билдирет? Эмне себептен?
2 Иегованы билип-таануу деген эмнени билдирет? Бул эмнени билдирерин Иегова Иеремия пайгамбарга: «Мактана турган Мени түшүнүп билгени менен мактансын. Мен калыстыкты [«акыйкаттыкты», ЖД] адилеттикти аткарган Теңир экенимди билип мактансын»,— деп айгинелеген (Иеремия 9:24). Демек, Иегованы билип-таануу анын адилеттүүлүк менен акыйкаттык көрсөтүүсүнүн жолун билүүнү камтыйт. Биз да ушул сапаттарды көрсөтсөк, бул ага жагымдуу болот. Бул сапаттарды канткенде көрсөтө алабыз? Өзүнүн Сөзүндө, Ыйык Китепте, Иегова жылдар бою жеткилең эмес адамдарга кандай мамиле жасап келгендиги жөнүндө билдирүүлөрдү сактап келген. Ал билдирүүлөр менен таанышканыбыздын аркасында Иегованын адилеттүүлүк менен акыйкаттык көрсөтүүсүнүн жолун билип аны туурай алабыз (Римдиктер 15:4).
Адил, ошону менен бирге ырайымдуу
3, 4. Иегованын Содом менен Гоморраны жок кылганы эмне себептен адил иш эле?
3 Содом жана Гоморра шаарларына келген Кудайдын жазасы — Иегованын адилеттүүлүгүнүн көп кырдуулугуна эң сонун мисал. Иегова адилеттүүлүгүн жазалаганда гана эмес, татыктууларды куткарганда да көрсөтүүдө. Ошол шаарлардын жок кылынышы чынында эле адилет иш беле? Ибрайым Содомдо кылынып жаткан жаман иштер тууралуу аз билгендиктен, адегенде андай ойдо эмес болчу. Иегова Ибрайымга ал жактан жок дегенде 10 адил адам чыкса, ал шаарларды талкалабай турганын убада кылган. Иегова адилеттүүлүгүнөн эч убакта шашылыш же ырайымсыз жыйынтык чыгарбай турганы айкын (1 Муса 18:20—32).
4 Эки периштенин чалгындоосу Содомдогу адеп-ахлактык эң эле төмөнкү чегине жеткенин айкын кылган. Лоттун үйүнө эки киши келгенин билгенде, шаардын эркектери «жашынан карысына чейин» алар менен гомосексуалдык мамилелерге умтулушуп, үйүн курчап алышат. Алар чындап эле бузукулуктун туу чокусуна жетишкен болчу! Ооба, бул шаарларга карата Иегованын чыгарган өкүмү адил болгону шексиз (1 Муса 19:1—5, 24, 25).
5. Лотту жана анын үй-бүлөсүн Кудай Содомдон кантип куткарган?
5 Содом жана Гоморра менен болгонду эскертүүчү мисал катары келтиргенден кийин, апостол Пётр: «Такыбаларды сыноодон кандайча куткарууну... Теңир билет»,— деп жазган (2 Пётр 2:6—9). Эгерде Лот үй-бүлөсү менен Содомдогу кудайсыз адамдар менен кошо жок кылынса, бул адилетсиздик болмок. Ошондуктан Иегованын периштелери Лотту жакындап калган жок кылуу тууралуу кабардар кылышкан. Лот дагы эле шашылбай жатканынан, «Теңир ага ырайым кылып», периштелер анын аялынын жана кыздарынын колдорунан кармап, шаардын сыртына алып чыгышкан (1 Муса 19:12—16). Бул каардуу түзүлүш үчүн жакындап келе жаткан жок кылуусунда да Иегова акыйкаттуулар тууралуу ушуга окшогон камкордук көрө турганына толук ишенсек болот.
6. Бул каардуу түзүлүшкө келе жаткан жок кылуудан коркуунун эмне себептен кереги жок?
6 Бул түзүлүш жок кылына турган убак «өч алуу [«адилет», ЖД] күндөрү» боло тургандыктан, өтө эле коркуунун кереги жок (Лука 21:22). Армагеддондогу Кудайдын жазасынын «бардыгы туура» болот (Забур 18:10). Ибрайымга окшоп, биз да Иегованын адилеттүүлүгүнө толугу менен таянсак болот, анткени анын адилеттүүлүгү адамдардыкынан алда канча күчтүү. Ибрайым: «Бүткүл жер жүзүнүн Калысы калыссыздык кылабы?» — деп сураган (1 Муса 18:25; салыштыргыла Аюб 34:10). Же Исаия айткандай, «акыйкат жолуна салып, Ага [Иеговага] ким насыят айтат?» (Исаия 40:14).
Адамзатты куткаруу үчүн жасалган акыйкат иштер
7. Кудайдын адилеттүүлүгү менен ырайымынын ортосунда кандай байланыш бар?
7 Кудайдын адилеттүүлүгү жазалоо менен эле чектелбейт. «Куткара турган, адилеттүү Кудай» деп Иегова өзүн сүрөттөйт (Исаия 45:21). Кудайдын адилеттүүлүгү же акыйкаттыгы менен анын күнөөлүү адамзатты куткарууну каалоосунун ортосунда тыгыз байланыш бар. Жогорку аятка түшүндүрмө берилген бир энциклопедияда: «Кудайдын адилеттүүлүгү Анын ырайымдуулугун көрсөтүүгө жана Анын куткаруусун орундатууга туура жолдорду издейт»,— деп айтылган («The International Standard Bible Encyclopedia», 1982). Бирок бул Кудайдын адилеттүүлүгү ырайым аркылуу жеңилдетилиши керек дегенди билдирбейт, себеби ырайымдуулук — Кудайдын адилеттүүлүгүнүн көрсөтүлүшү. Адамзатты куткаруу үчүн Кудайдын берген курмандыгы — анын адилеттүүлүгүнүн ушул жагынын эң зор мисалы.
8, 9. а) Кайсы иштер «адилеттик» делген? Эмнеликтен? б) Иегова бизден эмнени күтөт?
8 Курмандык баанын өзү — Кудайдын сүйүктүү жалгыз Уулу Ыйса Христостун асыл өмүрү — эң эле кымбат баа болгон, себеби Кудайдын нормалары түрдүү жактуу жана Кудай өзү ошол нормаларга туруктуу түрдө карманат (Матфей 20:28). Адам Ата жеткилең өмүрдөн айрылгандыктан, анын тукумдарына өмүрдү сатып алуу үчүн жеткилең өмүр керек болчу (Римдиктер 5:19—21). Расул Павел Ыйсанын айыпсыздыгын сактаганын, аны менен бирге кунду төдөгөнүн ‘адилеттик’ деген (Римдиктерге 5:18). Эмне себептен? Анткени Иегованын көз карашы боюнча, адамзатты куткаруу туура жана адил иш болуп эсептелген, а түгүл муну орундатуу ага кымбатка турса да. Адам Атанын тукуму Кудай сындыргысы келбеген ‘чала сынган камыш таяк’ же өчүргүсү келбеген ‘араң эле түтөп күйгөн билик’ сыяктуу болгон (Матфей 12:20). Кудай Адам Атанын тукумунан көптөгөн ишенимдүү эркектер жана аялдар чыгарына күмөн болгон эмес. (Салыштыргыла Матфей 25:34.)
9 Сүйүү менен адилеттүүлүктүн мындай эбегейсиз зор көрсөтүлүшүнө кандай мамиле кылышыбыз керек? Иегованын бизден күткөн нерселеринин бири — ‘адилеттүү аракеттенүү’ (Михей 6:8). Муну канткенде жасай алабыз?
Адилеттүүлүк издеп, акыйкаттыкка умтул
10. а) Адилеттүүлүк көрсөтүүнүн бир жолу кайсы? б) Канткенде баарынан мурда Кудайдын адилеттигин издеген болобуз?
10 Биринчиден, Кудайдын адеп-ахлактык нормаларына кармануу керек. Кудайдын нормалары адил жана акыйкат болгондуктан, аларга ылайык жашасак, адилеттүүлүк көрсөткөн болобуз. Ушуну Иегова өзүнүн элинен күтөт. Израиль элине ал: «Жакшылык кылууга үйрөнгүлө, чындыкты [«адилеттүүлүктү», ЖД] издегиле»,— деген (Исаия 1:17). Ушу сыяктуу кеңешти Ыйса угуучуларына Тоодогу насаатында: «Баарынан мурда Кудайдын Падышалыгын жана Анын адилеттигин издегиле»,— деп берген (Матфей 6:33). Павел: «Адилеттикте... ийгиликке жетиш»,— деп Тимофейге демилге берген (1 Тимофей 6:11). Кудайдын нормаларына ылайык жашап, жаңы адамга кийинсек, чыныгы адилеттүүлүк менен акыйкаттыкты көрсөтө алабыз (Ефесалыктар 4:23, 24). Башкача айтканда, Кудай жактыргандай иш кылсак, адилеттүүлүктү издеген болобуз.
11. Күнөөнүн бийлигине эмне себептен жана кантип каршы чыгышыбыз керек?
11 Жеткилең эмес болгонубуздан улам, адил жана акыйкат иштерди жасоо дайыма эле оңой боло бербешин жакшы билебиз (Римдиктер 7:14—20). Павел Ыйсанын Римдеги жолдоочуларын, денелерин «адилеттиктин куралы» катары Кудайдын ниетин аткарууга тапшырып, күнөөгө каршы турууга чакырган (Римдиктер 6:12—14). Биз да Кудайдын Сөзүн үзгүлтүксүз окуп изилдөөнүн жана колдонуунун аркасында ‘Теңирдин насыят айткан үйрөтүүсүнө’ жана ‘адилеттикке үйрөнө’ алабыз (Ефесалыктар 6:4; 2 Тимофей 3:16, 17).
12. Биз Иеговадан күткөн мамилени башкаларга жасоодо эмнеден алыс болууга тийишпиз?
12 Экинчиден, биз Иеговадан күткөн мамилени башкаларга да жасасак, адилеттүүлүк көрсөткөн болобуз. Өзүбүзгө келгенде жумшак, башкаларга болсо катуу болуп, эки жүздүү жашоо өткөрүү оңой. Өзүбүз кетирген каталарыбызды кечүрүүгө даяр болуп, а башкалардын жаңылыштыктарын дароо эле сынга алышыбыз мүмкүн, ал эми алардын кетирген каталары, балким, биздикине салыштырганда анча чоң эместир. Ыйса: «Сен өз көзүңдөгү устунду сезбестен, тууганыңдын көзүндөгү бутакты эмнеге көрөсүң?» — деп таамай суроо берген (Матфей 7:1—3). Эгерде Иегова каталарыбызды кылдаттык менен карай турган болсо, эч бир адам аман калбай турганын эсибизден чыгарбашыбыз керек (Забур 129:3, 4). Иегова адилеттүүлүгүнөн бир туугандарыбыздын кемчиликтерин көңүлгө албаса, аларды соттогондой биз кимбиз? (Римдиктер 14:4, 10).
13. Эмне себептен адил адам Падышалык тууралуу жакшы кабарды таратууга милдеттүү экенин түшүнө билет?
13 Үчүнчүдөн, кабар айтуу ишине дилгирлүү катышканыбыз менен Кудайдын адилеттүүлүгүн көрсөткөн болобуз. Иегова бизге: «Колуңда мүмкүнчүлүк барда, муктаж болгонго жакшылыгыңды аяба»,— деп кеңеш берүүдө (Аңгемелер 3:27). Кудайдын бизге марттыгынан тартуулаган өмүр берүүчү билимин өзүбүз эле билип алганыбыз туура эмес болмок. Ырас, көптөр биздин кабарыбызды кабыл албашы мүмкүн, бирок Кудай аларга ырайым көрсөтүп жаткан кезде, биз аларга ‘тобо келтирүүгө’ мүмкүндүк берүүгө даяр болушубуз керек (2 Пётр 3:9). Кимдир бирөөгө адилеттүүлүккө жана акыйкаттыкка кайрылууга жардам бере алсак, Ыйсага окшоп, биз да кубана алабыз (Лука 15:7). Азыр ‘акыйкаттыкка үрөн себүү’ үчүн сонун убак (Осия 10:12, ЖД).
‘Адилеттүүлүк менен башкарууга тийиш’
14. Адилеттүүлүк көрсөтүүдө насаатчы агалар кандай роль ойнойт?
14 Баарыбыз акыйкаттыктын жолу менен жүрүүгө тийишпиз, өзгөчө насаатчы агалар. Ыйсанын падышалык бийлиги «адилеттик жана акыйкаттык» аркылуу түбөлүккө бекемделген. Ошо сыяктуу эле насаатчы агалар карманган нормалар Кудайдын адилеттүүлүгүнө негизделет (Исаия 9:7). Алар Исаия 32:1де жазылганды дайыма эстеп жүрүшөт: «Мына, падыша акыйкат менен бийлик жүргүзүп, төрөлөр мыйзам боюнча башкаруучулук кылышат». Рух аркылуу дайындалган көзөмөлчүлөр же ‘Кудай үйүндө башкаруучулук кылуучулар’ катары насаатчы агалар иш жүргүзүүдө Кудайды туурашы керек (Тит 1:7).
15, 16. а) Насаатчы агалар Ыйсанын ишенимдүү койчу тууралуу аңгемесиндеги койчуну кантип туурай алышат? б) Насаатчы агалар рухий жактан адашып жүргөндөргө карата кандай сезимдерди туюшат?
15 Ыйса Иегованын адилеттүүлүгү кайрымдуулукту, ырайымдуулукту жана акылдуулукту камтый турганын айкын кылган. Биринчи ирээтте, ал көйгөйлөр менен күрөшүп жаткандарга жардам берүү үчүн, «жоголгонду издөө үчүн жана куткаруу үчүн» аракет кылган (Лука 19:10). Ыйсанын аңгемесинде айтылган жоголгон коюн тапмайынча издей берген койчуга окшоп, насаатчы агалар рухий жактан адашып жүргөндөрдү издеп, аларды үйүргө кошууга умтулушууда (Матфей 18:12, 13).
16 Насаатчы агалар олуттуу күнөө жасагандарды айыптоонун ордуна, аларга рухий жактан сакаюуга, мүмкүн болсо, өкүнүүгө жардам беришет. Адашып жүргөнгө жардам бере алгыдай болушса, алар кубанат. Ал эми күнөөкөр туура эмес жолунан кайрылгысы келбесе, алар санаа тартышат. Мындай учурда, Кудайдын акыйкат нормалары талап кылгандай, өкүнбөгөн адамды пикир алышуудан четтетүү керек. А бирок, ысырапчыл баланын атасына окшоп, алар ката кетирген адам «өзүнө келет» деп үмүттөнүшөт (Лука 15:17, 18, СК). Ушундан улам, пикир алышуудан четтетилгендерге Иегованын уюмуна канткенде кайрыла алыша турганын түшүндүрүү үчүн насаатчы агалар демилгени колго алышатa.
17. Жаңылган адам менен сүйлөшүп жатканда, насаатчы агалар кандай максатты көздөшү керек жана ошол максатка жетүү үчүн кайсы сапат жардам кылат?
17 Жаңылган адам менен сүйлөшкөндө насаатчы агалар Иегованын адилеттүүлүгүн өзгөчө түрдө көрсөтүшү керек. Күнөөкөрлөр Ыйсанын ‘алдына келген’, себеби Ыйсанын аларды түшүнөрүн жана жардам берерин сезишкен (Лука 15:1; Матфей 9:12, 13). Албетте, Ыйса туура эмес иштерге көз жумуп койчу эмес. Бир жолу Ыйса менен чоогуу тамак ичкенден кийин, салык жыйноочу Закхей өкүнүп, башкаларга кылган жамандыктарын мойнуна алган дагы, карыздарын төлөп берген (Лука 19:8—10). Бүгүн да, күнөөкөр адамдын иши каралып жатканда, насаатчы агалардын максаты — андай адамга өкүнүүгө жардам берүү. Эгерде, Ыйсага окшоп, насаатчы агалар биринчи кадам шилтешсе, туура эмес иш жасагандардын көбү алардан жардам алууну издейт.
18. «Шамалдан коргоочудай» болууга насаатчы агаларга эмне жардам берет?
18 Насаатчы агалар сезимтал жүрөктүү болушса, Кудайдын катуулук же ырайымсыздык таандык болбогон адилеттүүлүгүн көрсөтө алышат. Кызык, Ездра израиль элин үйрөтүүнүн алдында акылын эле даярдабастан, жүрөгүн да даярдаган (Ездра 7:10). Насаатчы агалар түшүнүктүү жүрөккө ээ болушса, бул аларга Жазмалардагы принциптерди колдонууга жана ар бир адамдын шартын эске алууга жардам берет. Ыйса кан агуудан кыйналып жүргөн аялды айыктырганда, Иегованын адилеттүүлүгү мыйзамды сөзмө-сөз эмес, а анын рухун түшүнүүнү билдирерин көрсөткөн (Лука 8:43—48). Жазалоо чараларын ырайымдуулук менен көргөн насаатчы агалар бул каардуу түзүлүш менен же өз кемчиликтери менен күрөшүп жүргөндөр үчүн, чынында эле, «шамалдан коргоочудай» боло алышат (Исаия 32:2).
19. Кудайдын адилеттүүлүгү менен мамиле жасоо бир тууганыбызга кандай таасир кылган?
19 Олуттуу күнөө жасаган бир тууганыбыз Кудайдын адилеттүүлүгү эмне экенин өз тажрыйбасынан билген. Ал муну мындай деп айтып берген: «Чынымды айтсам, насаатчы агаларга баргандан коркуп жүрдүм. Бирок алар мага ырайымдуу жана сый мамиле жасашты. Алар зулум соттоочулардай болбостон, атадай мамиле кылышты. Эгерде мен чечкиндүү түрдө оңоло турган болсом, Иегова мени четке какпай турганын түшүнгөнгө жардам кылышты. Жазалаганда Кудай бизди мээримдүү Ата катары тартипке саларын өз тажрыйбамдан билдим. Жүрөгүмдү Иеговага ачып бере алдым, анын тиленүүлөрүмдү уга турганына күмөн санаган жокмун. Өткөндү эстеп, насаатчы агалар менен 7 жыл мурун болгон бул жолугушуумду Иегованын батасы деп айта алам. Анткени ошондон тартып аны менен болгон өз ара мамилелерим бир топ бекемирээк боло баштады».
Адилеттүүлүктү сактагыла жана акыйкаттыкты кармагыла
20. Адилеттүүлүк менен акыйкаттык деген эмне экенин түшүнүүдөн жана бул сапаттарды көрсөтүүдөн кандай пайда алабыз?
20 Бактыбызга жараша, Кудайдын адилеттүүлүгү ар бир адамга татыктуусун берүүдөн көптү камтыйт. Иегованын адилеттүүлүгү ага ишеним көрсөткөндөргө түбөлүк өмүр тартуулоого түрткү берди (Забур 102:10; Римдиктер 5:15, 18). Кудайдын бизге ошондой мамиле жасаганынын себеби анын адилеттүүлүгү биздин шарттарыбызды көңүлгө алат жана айыптоонун ордуна куткарууну каалайт. Чынында эле, Иегованын адилеттүүлүгүнүн кеңдигин түшүнгөнүбүздүн аркасында ага жакыныраак болобуз. Кудайдын сапаттарынын арасынан ушул сапатын да чагылдырууга умтулсак, башкалар менен бирге өзүбүз да мол баталарды ала алабыз. Адилеттүүлүк издегенибизди Асмандагы Атабыз көрбөй койбойт. Иегова: «Укукту [«адилеттүүлүктү», ЖД] сактагыла жана чындыкты [«акыйкаттыкты», ЖД] кармагыла; анткени Мен куткара турган учур да, Менин чындыгымдын аяны да жакын калды. Муну кылган... бактылуу»,— деп убадалоодо (Исаия 56:1, 2).
[Шилтеме]
a «Күзөтчү мунаранын» 1991-жылдын 15-апрелиндеги санын карагыла, 22, 23-б., орус.
Эстей аласыңарбы?
Содом жана Гоморранын жок кылынышы Кудайдын адилеттүүлүгүнө байланыштуу бизди эмнеге үйрөтөт?
Эмне себептен кун Кудайдын адилеттүүлүгүнүн жана сүйүүсүнүн эбегейсиз зор көрсөтүлүшү болуп саналат?
Адилеттүүлүктү кандай үч жол менен көрсөтө алабыз?
Насаатчы агалар кандай өзгөчө жолдор менен Кудайдын адилеттүүлүгүн туурай алышат?
[25-беттеги сүрөт]
Жакшы кабарды айтып, Кудайдын адилеттүүлүгүн көрсөтөбүз.