Сүйлөгөн сөздөрүң Жахабага жаккандай болсун

Жахаба бизди жаратканда кереметтүү белек берген. Ал — сүйлөө жөндөмү. Аны кантип колдонуп жатканыбыз Жахаба үчүн маанилүүбү? Ооба. (Оку: Жакып 1:26.) Анда сүйлөө жөндөмүбүздү канткенде Жахабага жаккандай колдоно алабыз?

1. Жахаба берген белекти кантип колдонушубуз керек?

Ыйык Китепте: «Бири-бириңерди кубаттандырып, бекемдей бергиле»,— делет (1 Тесалоникалыктар 5:11). Жылуу сөзгө муктаж кимдир бирөөнү билесиңби? Аны кантип бекемдесең болот? Балким, анын сага жаккан жактарын жана аны жогору баалаарыңды айтаттырсың. Тааныштарыңа дем-күч бере турган кайсы бир аятты эстей аласыңбы? Ыйык Китепте андай аяттар көп. Туура сөздөрдү тандагандан тышкары, аларды кантип айтарың да башкаларга күчтүү таасир этерин унутпа. Ошон үчүн дайыма жылуу-жумшак сүйлөгөнгө аракет кыл (Накыл сөздөр 15:1).

2. Кандай сөздөрдөн качышыбыз керек?

Ыйык Китепте: «Оозуңардан бир да чириген сөз чыкпасын»,— деп жазылган. (Оку: Эфестиктер 4:29.) Бул жаман сөздөрдү же катуу тийген, таарынта турган сөздөрдү айтпашыбыз керектигин билдирет. Ошондой эле ушактан, жалаа жапкандан да алыс болушубуз кажет. (Оку: Накыл сөздөр 16:28.)

3. Башкаларга күч-кайрат бере тургандай сөздөрдү сүйлөгөнгө эмне жардам берет?

Сүйлөгөн сөздөрүбүздөн жүрөгүбүз менен оюбузда эмне бар экенин билүүгө болот (Лука 6:45). Ошон үчүн жакшы нерселерге, мисалы, эмне адил, эмне таза болсо, эмне сүйүүгө, мактоого татыктуу болсо, ошолорго көңүл топтогонду үйрөнгөнүбүз маанилүү (Филипиликтер 4:8). Ушундай кылыш үчүн досторду жана көңүл ачуунун түрлөрүн туура тандашыбыз зарыл (Накыл сөздөр 13:20). Ошондой эле ойлонуп сүйлөгөнүң да жакшы. Айта турган сөздөрүң башкаларга кандай таасир этери жөнүндө ойлонуп көр. Ыйык Китепте: «Кай бирөө ойлонбой сүйлөп, кылычтай жаралайт, ал эми акылдуулардын тили айыктырат»,— деп айтылган (Накыл сөздөр 12:18).

ТЕРЕҢИРЭЭК КАЗ

4. Тилди тыя билүү маанилүү

Баарыбыз эле кээде кийин өкүнүп кала турган сөздөрдү айтып алабыз (Жакып 3:2). Окугула: Галатиялыктар 5:22, 23. Анан бул суроолорду талкуулагыла:

• Тилди тыя билиш үчүн Кудайдан ушул сапаттардын кайсынысын өрчүткөнгө жардам беришин сурап тиленсең болот? Бул сапаттар сага кандайча жардам бериши мүмкүн?

Окугула: 1 Корунттуктар 15:33. Анан төмөнкү суроону талкуулагыла:

• Досторуң жана тандаган көңүл ачууң сүйлөгөн сөздөрүңө кандайча таасир этиши мүмкүн?

Окугула: Насаатчы 3:1, 7. Анан төмөнкү суроону талкуулагыла:

• Кандай учурларда унчукпай эле койгонуң же сүйлөй турган убакты күтө билгениң акылдуулукка жатышы мүмкүн?

5. Башкалар жөнүндө дайыма жакшы сөздөрдү сүйлө

ВИДЕО: «Башкаларды „бекемдей турган сөздөрдү“ сүйлөгүлө» (4:07)

• Видеодогу ишенимдешибиз эмне үчүн өзгөрүүнү чечкен?

• Өзгөрүш үчүн ал эмне кылган?

Окугула: Насаатчы 7:16. Анан төмөнкү суроону талкуулагыла:

• Башкаларды жамандагыбыз келгенде эмнени эсибизден чыгарбашыбыз керек?

Окугула: Насаатчы 7:21, 22. Анан бул суроону талкуулагыла:

• Кимдир бирөөнүн сени жамандаганын угуп калсаң, бул аяттарда жазылгандар сага ачууланбаганга кандайча жардам берет?

6. Үйдөгүлөрүң менен сүйлөшүп жатканда сылык-сыпаа бол

ВИДЕО: «Сүйүү жана урмат-сый үй-бүлө түйүнүн бекемдейт» (3:08)

• Үйдөгүлөрүң менен сүйлөшүп жатканда сылык-сыпаа болгонго эмне жардам берет?

Окугула: Эфестиктер 4:31, 32. Анан бул суроону талкуулагыла:

• Сүйлөгөн сөздөрүбүз үйдөгүлөргө жагымдуу болушу үчүн эмне кылсак болот?

Жахаба Уулу Исаны жакшы көрөрүн айткан. Окугула: Матай 17:5. Анан төмөнкү суроону талкуулагыла:

• Үйдөгүлөрүң менен сүйлөшүп жатканда Жахабаны кантип туурай аласың?

НЕГИЗГИ ОЙ

Сөз зор күчкө ээ. Андыктан эмнени, качан, кантип айтарыбызды кылдат ойлонушубуз керек.

Кайталоо

• Сүйлөгөн сөздөрүң менен башкаларды кантип бекемдесең болот?

• Кандай сөздөрдөн качкың келет?

• Дайыма жылуу-жумшак, бекемдээрлик сөздөрдү сүйлөгөнгө эмне жардам берет?

КӨБҮРӨӨК БИЛ

Башкаларды бекемдей турган сөздөрдү сүйлөгөнгө эмне жардам берет?

«Тилди акылдуулук менен колдонгонду үйрөн» (8:04)

Канткенде жаман сөздөрдү сүйлөгөндөн кача алабыз?

«Сөгүнүп-сагынуунун жаман жери жокпу?» (jw.org/ky сайтындагы макала)

Ушактан качканга эмне жардам берет?

«Ушакчы болуп калба» (2:36)

Оозуна ак ит кирип, кара ит чыккан киши Жахабанын жардамы менен ушул жаман адатынан кантип арыла алган?

«Жашоом жөнүндө тереңирээк ойлоно баштадым» («Күзөт мунарасы», 1-август, 2013)