Ыйсанын жолдоочуларынын акыркы күндөрдө бейтараптуулук сакташы
«Мен сыяктуу эле, алар да бул дүйнөдөн эмес» (Жакан 17:16).
1, 2. Ыйса өзүнүн жолдоочуларынын дүйнөгө карата мамилеси тууралуу эмне деген жана анын сөздөрү кандай суроолорду көтөрүүдө?
ЖЕТКИЛЕҢ адам Ыйса өмүрүнүн акыркы түнүндө шакирттерине угуза көпкө тиленген. Тиленип жатып ал бардык чыныгы жолдоочуларынын жашоосун айырмалай турган нерсени айткан. Ыйса өзүнүн жолдоочулары жөнүндө сөз кылып мындай деген: «Аларга Сенин сөзүңдү айттым. Мен сыяктуу эле, алар да бул дүйнөдөн эмес, ошондуктан бул дүйнө аларды жек көрүп калды. Мен Сенден аларды бул дүйнөдөн алып кетүүңдү өтүнбөйм, шайтандан сактооңду өтүнөм. Мен сыяктуу эле, алар да бул дүйнөдөн эмес» (Жакан 17:14—16).
2 Ыйса өзүнүн жолдоочуларынын бул дүйнөдөн эмес экендигин эки жолу айткан. Дүйнөдөн оолак болуу менен анын шакирттери дүйнөнүн каршылыгына, жек көрүүсүнө дуушар болушмак. Бирок Ыйсанын жолдоочуларына коркуунун зарылдыгы жок эле — аларды Жахаба өзү сактамак (Накыл сөздөр 18:10; Матай 24:9, 13). Ыйсанын сөздөрүн эске алып, биз өзүбүзгө: «Эмне себептен Ыйсанын чыныгы жолдоочулары дүйнөдөн эмес? Дүйнөдөн болбоо деген эмнени билдирет? Эгер Ыйсанын жолдоочуларын дүйнө жек көрсө, анда алар дүйнөгө карата кандай көз карашта? Айрыкча, өкмөттөргө кандай карашат?» — деген суроолорду берип көрсөк болот. Бул суроолорго Ыйык Жазмадан жооп алганыбыз маанилүү, анткени ал суроолордун баарыбызга тең тиешеси бар.
«Биз Кудайданбыз»
3. а) Дүйнөдөн бизди эмне бөлүп турат? б) Дүйнө Шайтандын «бийлиги астында» экендигин эмне далилдеп турат?
3 Жахаба менен тыгыз мамиледе болгонубуз дүйнөдөн болбогонубуздун бир себеби болуп саналат. Элчи Жакан: «Биз Кудайдан экенибизди, ал эми бүт дүйнө амалкөйдүн бийлиги астында экенин билебиз»,— деп жазган (1 Жакан 5:19). Жакандын дүйнө жөнүндөгү сөздөрү шексиз чындык. Бүгүн кеңири кулач жайган согуштар, кылмышкерлик, мыкаачылык, кысымчылык, чынчыл эместик, адеп-ахлаксыздык дүйнөгө Кудай эмес, Шайтан таасир этип жатканын далилдеп турат (Жакан 12:31; 2 Корунттуктарга 4:4; Эфестиктерге 6:12). Жахабанын Күбөсү болгон адам мындай жаман иштерге барбайт жана аларды колдобойт — ал дүйнөдөн эмес (Римдиктерге 12:2; 13:12—14; 1 Корунттуктарга 6:9—11; 1 Жакан 3:10—12).
4. Биз Жахабага таандык экенибизди кантип көрсөтөбүз?
4 Жакан Ыйсанын жолдоочуларынын, дүйнөдөн айырмаланып, «Кудайдан экенин» айткан. Жахабага арналгандардын баары ага таандык. Элчи Пабыл: «Жашасак, Теңир үчүн жашайбыз. Өлсөк, Теңир үчүн өлөбүз. Ошондуктан жашасак да, өлсөк да Теңирдикибиз»,— деген (Римдиктерге 14:8; Забур 115:6). Биз Жахабага таандык болгондуктан, ага толук берилгендикте кызмат кылабыз (Чыгуу 20:4—6). Андыктан Ыйсанын чыныгы жолдоочусу өзүнүн жашоосун дүйнөнүн кызыкчылыктарына арнабайт. Ал мамлекеттик символдорду урматтаса да, аларга иши менен да, жүрөгү менен да таазим кылбайт. Ошондой эле ал спорт жылдыздарын же азыркы учурдагы башка буркандарды аздектебейт. Албетте, ал башкалардын өздөрү каалагандай сыйынуу укугун сыйлайт, бирок өзү Жаратканга гана табынат (Матай 4:10; Аян 19:10). Бул да анын дүйнөдөн обочо турарын көрсөтүп турат.
«Менин Падышачылыгым бул дүйнөдөн эмес»
5, 6. Кудайдын Падышалыгына баш ийүү кандайча дүйнөдөн обочо турушубузга өбөлгө түзөт?
5 Ыйсанын жолдоочулары анын жолун жолдошот жана Кудайдын Падышалыгына баш ийишет. Бул дагы алардын дүйнөдөн эмес экенин көрсөтүп турат. Ыйса Понтий Пилаттын алдында суракка алынып жатканда мындай деген: «Менин Падышачылыгым бул дүйнөдөн эмес. Эгерде Менин Падышачылыгым бул дүйнөдөн болсо, анда кызматчыларым Мени жүйүттөрдүн колуна түшүрбөө үчүн күрөшүшмөк. Менин Падышачылыгым бул дүйнөдөн эмес» (Жакан 18:36). Падышачылык — бул Жахабанын ысмынын ыйык тутулушун, эгедерлигинин акталышын жана анын эркинин асмандагыдай эле жерде да болушун камсыздай турган курал (Матай 6:9, 10). Жерде кызмат кылып жүргөндө Ыйса ошол Падышалык тууралуу жакшы кабар айткан жана ал кабарды анын жолдоочулары дүйнөнүн акырына чейин жарыялай турганын билдирген (Матай 4:23; 24:14). 1914-жылы Аян 11:15теги: «Бул дүйнөнүн үстүнөн болгон падышачылык биздин Теңирдин жана Анын Машайагынын колуна өттү, Ал түбөлүккө падышачылык кылат»,— деген пайгамбарлык сөздөр аткарылган. Аз күндө ошол асман Падышалыгы адамзатты башкарган жападан жалгыз өкмөт болот (Даниел 2:44). Кези келгенде жадагалса дүйнөнүн башкаруучулары да ошол бийликти таанууга аргасыз болушат (Забур 2:6—12).
6 Ушунун баарын эске алып, Ыйсанын чыныгы жолдоочулары бүгүн Кудайдын Падышалыгына баш ийип, Ыйсанын: «Баарынан мурда Кудайдын Падышачылыгын жана адилеттигин издегиле»,— деген кеңеши боюнча жашашат (Матай 6:33). Бирок алар ушуну бетке кармап, өздөрү жашап жаткан өлкөдөгү бийликтерге баш ийбей коюшпайт — алар дүйнөдөн рухий жактан обочо турушат. Биринчи кылымдагыдай эле, бүгүн Ыйсанын жолдоочуларынын негизги тапшырмасы — «Кудайдын Падышачылыгы жөнүндө күбөлөндүрүү» (Элчилер 28:23). Кудай берген бул ишке бут тосууга эч бир өкмөттүн укугу жок.
7. Ыйсанын жолдоочулары эмне үчүн бейтараптуулук сакташат жана аны кантип көрсөтүп келишет?
7 Жахабага таандык болушканына, Ыйсанын жолдоочулары жана Кудайдын Падышалыгынын букара эли болушканына жараша Жахабанын Күбөлөрү XX жана XXI кылымдардагы атуулдук жана эл аралык кагылышууларда бейтараптуулук сактап келишет. Алар эч кайсы тарапты жакташпайт, бирөөгө каршы колдоруна курал алышпайт жана дүйнөнүн кызыкчылыктары үчүн үгүт таратышпайт. Туруштук берүү мүмкүн эместей көрүнгөн каршылыкка карабай эбегейсиз зор ишеним көрсөтүп, алар 1934-жылы Германиянын нацисттик жетекчилерине билдирилген төмөнкү принциптерге карманышат: «Биз саясый иштерге кызыкпайбыз, тескерисинче, Падышасы Машайак болгон Кудайдын Падышалыгына карата толук берилгендигибизди сактайбыз. Биз эч кимге жаракат же зыян келтирбейбиз. Биз тынчтыкта жашап, мүмкүнчүлүккө жараша бардык адамдарга жакшылык кылгыбыз келет».
Ыйсага элчи жана өкүл болгондор
8, 9. Кандайча Жахабанын Күбөлөрү бүгүн элчилер жана өкүлдөр болуп саналышат жана бул алардын өлкөлөр менен болгон байланышына кандай таасир этет?
8 Пабыл өзүн жана башка майлангандарды «Машайактын атынан келген элчилер» деп атап: «Кудай Өзү биз аркылуу адамдарга кайрылып жатат»,— деген (2 Корунттуктарга 5:20; Эфестиктерге 6:20). Ыйсанын рух менен майланган жолдоочуларын 1914-жылдан бери Кудайдын Падышалыгынын элчилери деп атоого болот. Алар Падышалыктын уулдары да болуп саналышат (Матай 13:38; Филипиликтерге 3:20; Аян 5:9, 10). Ошондой эле Жахаба элдердин арасынан «башка койлор» тобуна кирген «эбегейсиз көп адамдарды», жерде жашоого үмүттөнгөн Ыйсанын жолдоочуларын, майланган уулдарга элчилик ишинде колдоо көрсөтүүгө «алып келген» (Аян 7:9; Жакан 10:16). Бул «башка койлорду» Кудайдын Падышалыгынын «өкүлдөрү» деп атоого болот.
9 Мамлекеттик элчи менен анын карамагындагы кызматкерлер өздөрү иштеп жаткан өлкөнүн иштерине кийлигишпейт. Ошо сыяктуу эле, Ыйсанын жолдоочулары дүйнө өлкөлөрүнүн саясый иштеринде бейтараптуу. Алар кайсы бир улуттук, расалык, социалдык же экономикалык топтун тарабына өтүшпөйт же ал топко каршы чыгышпайт (Элчилер 10:34, 35). Тескерисинче, «бардыгына... жакшылык кылышат» (Галаттыктарга 6:10). Жахабанын Күбөлөрү бейтараптуу болгондуктан, эч ким аларды бөлөк бир расалык, улуттук же уруулук жамааттын тарабын ээлейт деп ырастап, алар тараткан кабарды адилеттүү түрдө четке кага албайт.
Өздөрүнүн сүйүүсү менен айырмаланышат
10. Сүйүү Ыйсанын жолдоочусу үчүн канчалык маанилүү?
10 Жогоруда айтылгандардан тышкары, Ыйсанын жолдоочулары өздөрүнүн ишенимдеш бир туугандары менен болгон мамилесинен улам да бейтараптуу. Ыйса өз жолдоочуларына: «Эгерде бири-бириңерди сүйсөңөр, башкалар силердин Менин шакирттерим экениңерди билишет»,— деп айткан (Жакан 13:35). Ооба, Ыйсанын жолдоочусу болуунун ачкычы бир туугандык сүйүүдө (1 Жакан 3:14). Ыйсаны жолдогон адамдын Жахаба жана Ыйса менен болгон мамилесине байланышы бар дагы бир абдан жакын мамиле — рухий бир туугандары менен болгон мамиле. Ал өзүнүн жыйналышындагыларды эле эмес, «дүйнөнүн ар тарабындагы бир туугандарын» да сүйөт (1 Петир 5:9).
11. Жахабанын Күбөлөрүнүн бири-бирине көрсөткөн сүйүүсү ортолорундагы мамилеге кандай таасир тийгизет?
11 Бүгүнкү күндө Жахабанын Күбөлөрү өздөрүнүн бир туугандык сүйүүсүн Ышайа 2:4төгү: «[Алар] кылычтарын соко кылып, найзаларын орок кылып жаңыдан иштеп чыгышат. Бир эл бир элге кылыч көтөрбөйт, ошондон кийин согушууга үйрөнүшпөйт»,— деген сөздөрдү аткаруу менен көрсөтүшөт. Ыйсанын чыныгы жолдоочулары, Жахаба үйрөткөндөй, Аны менен жана бири-бири менен тынчтыкта жашашат (Ышайа 54:13). Алар Кудайды жана бир туугандарын сүйгөндүктөн, башка өлкөдөгү ишенимдештерине же дагы башкаларга каршы колдоруна курал алуу алардын оюна да келбейт. Ортолорундагы тынчтык менен биримдик — алардын сыйынуусунун ажырагыс бөлүгү жана Кудайдын руху чынында эле аларда экенинин далили (Забур 132:1; Михей 2:12; Матай 22:37—39; Колостуктарга 3:14). Алар «Теңирдин көздөрү адил адамдарга буруларын» билип, «тынчтыкты издеп, анын артынан түшүшөт» (Забур 33:15, 16).
Ыйсанын жолдоочуларынын дүйнөгө карата көз карашы
12. Жахабанын Күбөлөрү Жахабанын дүйнөдөгү адамдарга жасаган кандай мамилесин туурашат жана кантип?
12 Жахаба бул дүйнөгө катуу өкүм чыгарган, бирок ал дүйнөдөгү адамдардын баарын али жазалай элек. Кудай ал өкүмүн өзү белгилеген убакта Ыйса аркылуу ишке ашырат (Забур 66:4, 5; Матай 25:31—46; 2 Петир 3:10). Ага чейин ал адамзатка зор сүйүү көрсөтүүдө. Ар бир адамдын түбөлүк өмүр алууга мүмкүнчүлүгү болушу үчүн, Жахаба атүгүл өзүнүн жалгыз өзү жараткан Уулун берген (Жакан 3:16). Жасаган күч-аракеттерибиз көп учурда колдоого алынбаса да, Ыйсанын жолдоочулары катары биз Кудайдын куткаруу үчүн кандай чараларды караштырганын жарыялоо менен анын сүйүүсүн туурайбыз.
13. Дүйнө башкаруучуларына карата кандай көз карашта болушубуз керек?
13 Дүйнө башкаруучуларына карата биз кандай көз карашта болушубуз керек? Бул суроого Пабыл: «Ар бир адам жогорку бийликтегилерге баш ийсин. Анткени Кудайдан болбогон бийлик жок, бийликтин баарын Кудай орноткон»,— деп жооп берген (Римдиктерге 13:1, 2). Кудурети Күчтүү жол берип жаткандыктан, адамдар салыштырмалуу бийликке ээ; алардын бийлиги бири-бириникинен жогорураак же төмөнүрөөк, бирок Жахабаныкынан дайым төмөн. Ыйсанын жолдоочусу дүйнөдөгү бийликке баш иет, анткени бул — Жахабага тил алчаактык көрсөтүүнүн бир жолу. Ал эми Кудайдын талаптары менен өкмөттүн талаптары кайчылаш келген учурда эмне кылыш керек?
Кудайдын жана падышанын мыйзамы
14, 15. а) Даниел баш ийүүгө байланыштуу маселеде кантип кыйынчылыктан кача алган? б) Баш ийүүгө байланыштуу маселеде кыйынчылыктан качуу мүмкүн эмес болгон учурда үч эврей кандай позицияны ээлешкен?
14 Өкмөттөргө баш ийүүнү Кудайдын бийлигине баш ийүү менен кантип тең салмакташтырса болорун Даниел менен анын үч жолдошу өздөрүнүн сонун үлгүсү менен көрсөтүшкөн. Бул төрт жаш эврей Бабылда туткунда жүргөндө, ошол өлкөнүн мыйзамдарына баш ийишкен, ошондуктан өзгөчө окутууга ошол замат тандалып алынышкан. Ал окутуунун Жахабанын Мыйзамына кайчы келиши мүмкүн экенин сезген Даниел маселени жооптуу жетекчи менен талкуулаган. Натыйжада ошол төрт эврейдин абийири эске алынып, өзгөчө иш-чаралар караштырылган (Даниел 1:8—17). Жахабанын Күбөлөрү Даниелден үлгү алышат жана ашыкча көйгөйлөрдөн качуу максатында жетекчилерине өздөрүнүн көз карашын сылыктык менен түшүндүрүшөт.
15 Бирок кийинчерээк баш ийүүгө байланыштуу кыйынчылыктан качуу мүмкүн эмес болгон. Бабыл падышасы Дур талаасына чоң буркан орнотуп, бийлик башында тургандарга, анын ичинде дубан башчыларына буркандын салтанаттуу ачылышына чогулууга буйрук берген. А кезде Даниелдин үч досу Бабыл аймагынын башчылары болгондуктан, буйрук аларга да тиешелүү болгон. Аземдин белгилүү бир учурунда чогулгандардын баары сөлөкөткө таазим кылууга тийиш эле. Бирок эврей уландар мунун Кудайдын мыйзамына туура келбесин билишкен (Мыйзам 5:8—10). Ошондуктан башкалар таазим кылса да, алар тизе бүгүшкөн эмес. Алар Падышанын буйругуна тил албай, үрөй учурарлык өлүмгө дуушар болуудан кайра тартышкан эмес жана керемет жолу менен гана аман калышкан. Алар Жахабанын тилин албай коюудан өлүмгө дуушар болууну ылайык көрүшкөн (Даниел 2:49—3:29).
16, 17. Кабар айтууга тыюу салынганда элчилер эмне дешкен жана эмне үчүн?
16 Биринчи кылымда Иерусалимдеги жүйүт дин башчылары Ыйса Машайактын элчилерин чакыртышып, анын атынан кабар айтууга тыюу салышкан. Ошондо элчилер эмне кылышкан? Ыйса аларга бардык элдерден, анын ичинде жүйүттөрдөн шакирт даярдоо тапшырмасын берген болчу. Ал алардын Иерусалимде жана дүйнөнүн калган бөлүктөрүндө анын күбөлөрү болорун да айткан (Матай 28:19, 20; Элчилер 1:8). Элчилер Ыйсанын буйруктары Кудайдын аларга карата болгон эрки экенин билишкен (Жакан 5:30; 8:28). Андыктан алар: «Адамдарга караганда, Кудайга көбүрөөк баш ийүү керек»,— деп айтышкан (Элчилер 4:19, 20; 5:29).
17 Элчилер козголоңчул болушкан эмес (Накыл сөздөр 24:21). Ошентсе да, адамдык башкаруучулар Кудайдын эркин аткарууга тыюу салганда, алар: «Биз адамга эмес, Кудайга баш ийишибиз керек»,— деп гана коё алышмак. Ыйса «падышага тиешелүүнү падышага, Кудайга тиешелүүнү Кудайга беришибиз» керектигин айткан (Марк 12:17). Эгер биз адам айткандыктан эле Кудайдын буйругуна баш ийбей койсок, анда Кудайга тиешелүүнү адамга берген болобуз. Ошондуктан биз падышанын алдындагы бардык милдеттерибизди аткарсак да, биринчи кезекте Жахабанын жогорку бийлигин урматтайбыз. Ал — Ааламдын Эгедери, Жараткан, бийликтин Булагы (Аян 4:11).
Бекем турабыз
18, 19. Көптөгөн бир туугандарыбыз кандай позицияны ээлешкен жана алардан эмнеге үйрөнсөк болот?
18 Азыркы убакта өкмөттөрдүн көбү Жахабанын Күбөлөрүнүн бейтараптуулук сакташканына түшүнүктүүлүк менен карашат. Бул үчүн биз ыраазыбыз. Бирок кээ бир өлкөлөрдө Күбөлөр катуу каршылыкка дуушар болуп келишет. XX кылымда жана ушу күнгө дейре айрым бир туугандарыбыз көрсөтүлгөн кысымга карабай бекем туруп, рухий мааниде «ишеним үчүн болгон жакшы күрөштө тырышчаактык менен күрөшүп» келишти (1 Тиметейге 6:12).
19 Кантип биз ошолордой бекем тура алабыз? Биринчиден, каршылыкка дуушар болорубузду эстен чыгарбайлы. Каршылык пайда болгондо, кооптонбошубуз, ал тургай, таң калбашыбыз керек. Пабыл Тиметейди: «Машайак Ыйса жолунда такыбаа жашагысы келгендердин бардыгы куугунтукка алынат»,— деп эскерткен (2 Тиметейге 3:12; 1 Петир 4:12). Шайтандын таасири өкүм сүрүп турган дүйнөдө каршылыкка дуушар болбой коёбузбу? (Аян 12:17). Арийне, ишенимдүү бойдон жүргөнүбүздө «таң калып, бизди жамандаган» адамдар болбой койбойт (1 Петир 4:4).
20. Биздин эсибизге кубаттандырарлык кайсы чындыктар салынат?
20 Экинчиден, биз Жахаба менен анын периштелеринин колдоо көрсөтөрүнө бекем ишенебиз. Байыркы убакта Элиша айткандай, «тигилердикине караганда, биздикилер көп» (2 Падышалар 6:16; Забур 33:8). Жахаба өзүнүн ой-ниети боюнча каршылаштардын кысымынын уланышына убактылуу жол бериши мүмкүн. Бирок туруштук бере алышыбыз үчүн ал бизге дайыма күч-кубат берет (Ышайа 41:9, 10). Кээ бирөөлөр өмүрүнөн айрылат, бирок бул бизди чочутпайт. «Денени өлтүрүп, бирок жанды өлтүрө албагандардан коркпогула. Жанды да, денени да тозокто [«гееннада», СК] өлтүрө ала тургандан корккула»,— деген Ыйса (Матай 10:16—23, 28). Биз бул дүйнөдө «келгин» элебиз. Ошондуктан убактыбызды Кудайдын жаңы дүйнөсүндөгү «түбөлүк өмүргө ээ болуу» үчүн жумшайбыз (1 Петир 2:11; 1 Тиметейге 6:19). Кудайга мындан ары да ишенимдүү болсок, бизди келечектеги сыйлыктан эч ким ажырата албайт.
21. Эмнени эсибизден чыгарбашыбыз керек?
21 Ошондуктан, келгиле, Жахаба Кудай менен баа жеткис мамилеге ээ экенибизди эстей жүрөлү. Машайактын жолдоочулары жана Падышалыктын букаралары болуу артыкчылыгы үчүн ар дайым ыраазы бололу. Келгиле, бир туугандарыбызды чын жүрөгүбүздөн сүйөлү жана алардын бизге көрсөткөн сүйүүсүнө ар убак кубаналы. Баарынан мурда, забурчунун: «Теңирден үмүттөн, кайраттуу бол, жүрөгүң бекем болсун, Теңирден үмүттөн»,— деген сөздөрүнө кулак кагалы (Забур 26:14; Ышайа 54:17). Ошондо биз, көп сандаган ишенимдеш бир туугандарыбызга окшоп, бейтараптуулук сактаган, дүйнөдөн эмес Ыйсанын ишенимдүү жолдоочулары катары үмүт менен бекем турабыз.
Түшүндүрө аласыңарбы?
• Кандайча Жахаба менен болгон мамилебиз бизди бул дүйнөдөн бөлөт?
• Кудайдын Падышалыгына баш ийүү менен бул дүйнөдө кантип бейтараптуулугубузду сактайбыз?
• Бир туугандарыбызга болгон сүйүүбүз кандайча дүйнөдөн обочо жана бейтараптуу болушубузду шарттайт?
[25-беттеги сүрөт]
Кудайдын Падышалыгына баш ийгенибиз дүйнө менен болгон мамилебизге кандай таасир этет?
[26-беттеги сүрөт]
Хуту жана тутси кубанычта кызматташат.
[27-беттеги сүрөт]
Жүйүт менен араб — рухий бир туугандар.
Сербиялык, босниялык жана хорватиялык Ыйсанын жолдоочулары бири-бири менен жакшы мамиледе.
[28-беттеги сүрөт]
Бийлик башындагылар Кудайдын мыйзамын бузууга буйрук бергенде, эмне кылганыбыз туура?