Императордун сакчылары жакшы кабарды угушкан

Б.з. 59-жылы. Узак жол жүрүп чарчаган жоокерлердин коштоосу менен камакта жаткан бир канча киши Капена дарбазасы аркылуу Римге кирип келишет. Шаардагы Палатин дөңсөөсүндө император Нерондун ак сарайы жайгашкан. Аны сакчылар кайтарышкан. Алар кылычтарын аскер кийиминин астына жашырып алышчуa. Жүз башы Улий абактагыларды Виминал дөңсөөсүнө алып баратып, Рим форуму деп аталган аянттын жанынан өтөт. Алар Рим кудайларына багышталган курмандык жайлары орнотулган бактын жана аскерлер машыккан, параддар өтүп турган аянттын жанынан да өтүшөт.

Абактагылардын арасында элчи Пабыл да бар. Андан бир ай мурун кеме кырсыгына учураганда, Кудайдын периштеси ага: «Сен цезардын алдына барышың керек»,— деп айткан (Элч. 27:24). Пабыл ага жакында барар-барбасын ойлоп тынчсыздангандыр. Шаарга киргенде эки жагын каранып, Иса Машаяктын Иерусалимдеги Антония чебинде айткан: «Кайраттуу бол! Иерусалимде мен жөнүндө кандай кылдат күбөлөндүрсөң, Римде да ошондой күбөлөндүрүшүң керек»,— деген сөздөрүн эстеген чыгар (Элч. 23:10, 11).

Сыягы, Пабыл бир азга токтоп, Кастра Преторияга — кызыл кыштан курулган, дубалдары тиштүү, мунаралуу бийик сепилге — көз чаптырса керек. Ал сепилдин ичинде императордун жан сакчылары жана шаардын тартип сакчылары катары кызмат кылгандар жашашкан. Ал сепилде императордун сакчыларынан турган 12 когортаb жана шаардын тартип сакчыларынан турган бир нече когорта, анын ичинде атчан аскерлер — баары биригип бир нече миң жоокер жашачу. Кастра Претория сепили императордун канчалык кубаттуу экенинен кабар берип турган. Императордун сакчылары Рим империясынын провинцияларында абакта отургандар үчүн жооптуу болгондуктан, император сакчысы Улий абактагыларды Римдин төрт негизги дарбазасынын бири аркылуу алып өтөт. Бир нече айга созулган опурталдуу сапардан кийин акыры ал абактагыларды көздөгөн жерине, Римге, алып келет (Элч. 27:1—3, 43, 44).

ЭЛЧИ ПАБЫЛ «ЭЧ ТОСКООЛДУКСУЗ» КАБАР АЙТАТ

Кемеде баратканда Пабыл өзү жана жанындагы кишилердин бардыгы кеме кыйроодон аман калары жөнүндө Кудайдан аян алган. Мальта аралында аны уулуу жылан чакканда да, зыян тарткан эмес. Ошондой эле ал ошол аралдагы оорукчан адамдарды айыктырган. Ошондуктан ал жактагы адамдар аны кудай тута башташкан. Ушул окуялар тууралуу уу-дуу кептер ырым-жырымга ишенген императордун сакчыларынын арасында да жүрсө керек.

Римдеги бир туугандар элчи Пабылдын келатканын угуп, «Апий базары» жана «Үч мейманкана» деп аталган жерге барып, аны менен көрүшкөн (Элч. 28:15). Пабыл Римде кабар айтууга дилгир болгон. Бирок өзү абакта отурса, максатын кантип ишке ашыра алат эле? (Рим. 1:14, 15). Айрымдар абактагыларды алгач сакчылардын башчысына алып барышкан дешет. Эгер ошондой болсо, аны, сыягы, императордон кийинки эле орунду ээлеген, сакчылардын башчысы Афраниус Бурруска алып барышканc. Пабыл Римге келгенде, аны эми жүз башылар эмес, императордун бир эле жоокери кайтарган. Пабылга өзүнчө жашаганга үй табууга жана ага келгендерди кабыл алып, аларга «эч тоскоолдуксуз» кабар айтууга мүмкүнчүлүк берилген (Элч. 28:16, 30, 31).

ПАБЫЛ ЖОГОРКУ ДАРАЖАЛУУЛАРГА ДА, КАРАПАЙЫМДАРГА ДА КҮБӨЛӨНДҮРӨТ

Буррус Пабылдын ишин Неронго өткөрүп бергенге чейин аны, сыягы, ак сарайда же император сакчыларынын лагеринде суракка алган. Пабыл ошондой сонун мүмкүнчүлүктөн пайдаланып, «жогорку даражалууларга да, карапайымдарга да» кабар айткан (Элч. 26:19—23). Буррус кандай чечим чыгарганы белгисиз. Кандай болбосун, Пабыл император сакчыларынын лагерине жөнөтүлгөн эмесd.

Пабыл ижарага алган чоң үйүндө «жүйүттөрдүн арасынан таасирдүү кишилерди» жана «мурдагыдан да көп болуп келген» кишилерди кабыл алып, аларга кабар айткан. Жүйүттөргө «эртеден кечке» Кудайдын Падышалыгы жана Иса жөнүндө «кылдат күбөлөндүргөндө», анын айткан кабарын император сакчылары да угушкан (Элч. 28:17, 23).

Императордун ак сарайын кайтарган сакчылар күнүгө сегиз саат сайын алмашып турушкан. Пабылды кайтарган сакчылар да кезектешип турушкан. Ал эки жылдай камакта отурган убакта, аны кайтарган жоокерлер анын эфестик, филипилик, колосалык жана еврей ишенимдештерине жолдоп кат жаздырып жатканда айткандарын угушкан, ошондой эле Филемон деген бир тууганга кат жазып жатканын көрүшкөн. Абакта отурганда Пабыл баласындай болуп калган Онесимге, Филемондун качып кеткен кулуна, көңүл бөлгөн жана аны кожоюнуна жөнөткөн (Флм. 10). Анын сакчыларга да жекече көңүл бурганы шексиз (1 Кор. 9:22). Мисалы, ал бир жоокерден курал-жарактардын кандай максатта колдонулары жөнүндө сураса керек. Кийин аны мисал катары колдонгон (Эф. 6:13—17).

«КУДАЙДЫН СӨЗҮН... КОРКПОЙ АЙТ»

Пабылдын камакта отурганы императордун сакчыларына жана башкаларга «жакшы кабардын таратылышына шарт түзгөн» (Флп. 1:12, 13). Кастра Преторияда жашагандар бүткүл Рим империясынын тургундары менен, анын ичинде императордун өзү, үй-бүлөсү, кызматчылары жана кулдары менен тыгыз байланышып турушчу. Алардын айрымдары Машаяктын жолдоочусу болгон (Флп. 4:22). Пабылдын тайманбастык менен кабар айтканы Римдеги бир туугандарга «Кудайдын сөзүн... кайраттуулук менен коркпой айтууга» түрткү берген (Флп. 1:14).

Пабылдын Римде кабар айтканы бизге да «ыңгайлуу убакта да, ыңгайсыз убакта да» кабар айтууга түрткү берет (2 Тим. 4:2). Айрымдарыбыз үйдөн чыга албайттырбыз, карылар үйүндө жашайттырбыз, ооруканада жататтырбыз же ишенимибиз үчүн эркибизден ажыратылгандырбыз. Жагдай-шартыбыз кандай болбосун, бизге келгендерге, кам көргөндөргө же кандайдыр бир тейлөө кызматын аткаргандарга кабар айта алабыз. Ар бир мүмкүнчүлүктү колдонуп, тайманбастык менен кабар айтсак, «Кудайдын сөзү кишенделбей» турганын далилдейбиз (2 Тим. 2:8, 9).