Жахабанын Сөзү тирүү
Тесалоникалыктарга жана Тиметейге жазылган каттардагы урунттуу ойлор
ЭЛЧИ Пабыл барганда уюшулган Тесалоникадагы жыйналыш башынан эле куугунтукка кабылып келген. Ошондуктан, жашы 20дан өтүп калган Тиметей ал жактан жакшы кабар алып келгенде, Пабыл тесалоникалыктарды мактап жана бекемдеп кат жазууга түрткү алган. Болжолу б.з. 50-жылынын аягында рух аркылуу жазылган ал кат Пабылдын биринчи каты болгон. Андан көп өтпөй ал Исанын Тесалоникадагы жолдоочуларына экинчи катын жазган. Ошол экинчи катында ал айрымдардын туура эмес көзкарашын оңдоп, биртуугандарды ишенимде бек турууга чакырган.
Арадан 10 жылдай өткөндө Пабыл — Македонияда, ал эми Тиметей Эфесте болчу. Ошол кезде Пабыл Тиметейге кат жазат. Ал катында Пабыл Тиметейди Эфесте калууга жана жыйналыштагы жалган окутуучуларга каршы рухий күрөш жүргүзүүгө чакырат. Б.з. 64-жылы Рим өрттөнгөндөн кийин, Исанын жолдоочулары катуу куугунтукка алына баштайт. Пабыл Тиметейге экинчи катын ошондо жазат. Ал Пабылдын ыйык рух аркылуу жазган акыркы каты болгон. Пабылдын ошол төрт катында жазган сергитерлик сөздөрүнөн жана кеңештеринен биз да пайда ала алабыз (Эвр. 4:12).
«СЕРГЕК... БОЛОЛУ»
Пабыл тесалоникалыктарды ишеним менен аткарып жаткан иши, сүйүү менен кылып жаткан эмгеги жана туруктуулугу үчүн мактаган. Ал алардын өзүнүн үмүтү, кубанычы жана шаттанар таажысы экенин да айткан (1 Тес. 1:3; 2:19).
Исанын Тесалоникадагы жолдоочуларын бири-бирин тирилүүгө болгон үмүт менен жубатууга чакыргандан кийин, Пабыл «Жахабанын күнү түн жамынган уурудай болуп келерин» айткан. Ошондуктан аларга «сергек жана сак болууну» кеңеш кылган (1 Тес. 4:16—18; 5:2, 6).
Ыйык китептик суроолорго жооптор:
1 Тес. 4:15—17 — «Мырзабыз менен абада жолугуу үчүн булут ичинде алынып кете» тургандар кимдер жана алар кандайча алынып кетет? Алар Исанын Падыша катары катышып жаткан учурунда жерде тирүү жүргөн майлангандарды билдирет. Майлангандар Мырзабыз менен асманда көзгө көрүнбөгөн түрдө жолугушат. Бирок ан үчүн алар алгач өлүп, кайра рухий жаратуу катары тирилиши керек (Рим. 6:3—5; 1 Кор. 15:35, 44). Исанын катышуусу эчак башталгандыктан, анын бүгүнкү күндөгү майланган жолдоочулары өлгөндөн кийин дароо эле асманга «алынып кетет», башкача айтканда, тирилтилет (1 Кор. 15:51, 52).
1 Тес. 5:23 — Пабыл: «Рухуңар, жаныңар жана денеңер... кынтыксыз болсун»,— деп тиленгенде эмнени айткысы келген? Пабыл Исанын майланган жолдоочуларынан турган жыйналыштын руху, жаны жана денеси жөнүндө айткан. Ал жыйналыштын «руху» — маанайы — үчүн тиленген. Ошондой эле жыйналыштын «жаны», башкача айтканда, анын жок болуп кетпеши үчүн жана «денеси» — Исанын жыйналышты түзгөн майланган жолдоочуларынын тобу — үчүн тиленген (1 Кор. 12:12, 13). Пабылдын бул тиленүүсүнөн анын жыйналыш үчүн абдан тынчсызданганы көрүнүп турат.
Биз алчу сабактар:
1 Тес. 1:3, 7; 2:13; 4:1—12; 5:15. Кеңеш берүүнүн эң мыкты жолу — кеңеш алып жаткан биртууганды чын ниеттен мактап, андан ары да жакшыра берүүгө үндөө.
1 Тес. 4:1, 9, 10. Жахабанын кызматчылары рухий жактан ийгилик жасай бериши керек.
1 Тес. 5:1—3, 8, 20, 21. Жахабанын күнү жакындап келаткандыктан, биз сак болуп, «ишеним менен сүйүүнү соот кылып, куткарылуу үмүтүн туулга кылып кийишибиз» керек. Ошондой эле Кудайдын пайгамбарлык Сөзүнө, Ыйык Китепке, тийиштүү түрдө көңүл бурушубуз зарыл.
«БЕКЕМ ТУРГУЛА»
Жыйналыштын айрым мүчөлөрү Пабылдын биринчи катындагы айткандарын бурмалашып, «Машаяктын катышуусу» башталды деп ырасташса керек. Пабыл, ошол туура эмес көзкарашты оңдоо үчүн, «Машаяктын катышуусу» башталганга чейин кандай окуялар болуп өтүшү керектигин айткан (2 Тес. 2:1—3).
Пабыл аларга: «Бекем тургула... үйрөнгөн нерселериңерге кармангыла»,— деп кеңеш кылган. Ал аларга «тартипти бузуп жаткан ар бир биртуугандан алыс болууну» да буйруган (2 Тес. 2:15; 3:6).
Ыйык китептик суроолорго жооптор:
2 Тес. 2:3, 8 — «Мыйзамсыздыктын кишиси» деген ким жана ал кандайча жок кылынат? Ал христиан дүйнөсүндөгү диний жетекчилердин тобун билдирет. Кудайдын ыймансыздарга чыгарган өкүмүн ишке ашырууга жана аларды жок кылууга «Сөз», башкача айтканда, Кудайдын башкы өкүлү болгон Иса Машаяк дайындалган (Жкн. 1:1). Демек, Иса мыйзамсыздыктын кишисин «оозунан чыккан дем» менен жок кылат деп айтууга болот.
2 Тес. 2:13, 14 — Исанын майланган жолдоочулары куткарылуу үчүн кандайча «башынан эле... тандалып» алынган? Жахаба аялдан Шайтандын башын жанча турган тукум чыгарын айтканда, Анын майлангандардын тобун тандап алууну чечип койгону айкын болгон (Башт. 3:15). Андан тышкары, Жахаба алар кандай талаптарга жооп бериши керектигин, кандай иш аткарышы керектигин жана кандай сыноолорго кабылышарын айткан. Аларды жерде ушундай жашоо күтүп турган.
Биз алчу сабактар:
2 Тес. 1:6—9. Жахаба адилдерди адилетсиздер менен бирге жок кылбайт.
2 Тес. 3:8—12. Биз Жахабанын күнүнүн жакын калгандыгын шылтоолоп, өзүбүздү өзүбүз камсыз кылбай, иштебей койбошубуз керек. Анткени бекерчиликтен улам жалкоо болуп, «башкалардын ишине кийлигише» башташыбыз мүмкүн (1 Пет. 4:15).
«ӨЗҮҢӨ ИШЕНИП ТАПШЫРЫЛГАНДЫ САКТА»
Пабыл Тиметейди «ийгиликтүү салгылашууга» жана ишенимин жоготпой, абийирин таза сактоого чакырат. Ошондой эле жыйналыштагы дайындалган эркектерге коюлган талаптарды айтып өтөт. Андан сырткары, Тиметейге «ыйык нерселерди арамдаган куру жомокторду» четке кагуу керектигин айтат (1 Тим. 1:18, 19; 3:1—10, 12, 13; 4:7).
«Улуу кишини катуу жемелебе»,— деп жазат Пабыл. Ошондой эле: «Өзүңө ишенип тапшырылганды сакта жана ыйык нерселерди арамдаган куру сөздөрдөн, жалган билимдин карама-каршылыктарынан алыс бол»,— дейт (1 Тим. 5:1; 6:20).
Ыйык китептик суроолорго жооптор:
1 Тим. 1:18; 4:14 — Тиметейге байланыштуу кандай «пайгамбарлык» айтылган? Ал пайгамбарлык Тиметейдин келечекте жыйналышта аткара турган милдетине байланыштуу болушу мүмкүн. Аны миссионердик сапары менен Листрада жүргөндө рухтун жетеги менен Пабыл айтса керек (Элч. 16:1, 2). Ошол пайгамбарлыктын негизинде жыйналыштагы аксакалдар жаш Тиметейдин үстүнө колдорун коюп, аны өзгөчө кызматка дайындашкан.
1 Тим. 2:15 — Аялды «бала төрөгөнү» кандайча коргойт? Бала төрөө, балага кам көрүү жана үй иштери менен алек болуу аялды бекер жүрүп, башкаларды ушактоодон жана ар кимдин ишине кийлигишүүдөн сакташы мүмкүн (1 Тим. 5:11—15).
1 Тим. 3:16 — «Кудайга берилгендиктин ыйык сыры» деген эмне? Жахабанын эгедерлигине адамдар толук баш ие алабы, жокпу, кылымдар бою жашыруун сыр болуп келген. Адамдардын Кудайдын эгедерлигине толук баш ие аларын Иса актыгын өмүрүнүн акырына чейин жеткилең түрдө сактоо менен көрсөткөн.
1 Тим. 6:15, 16 — Бул аяттардагы сөздөр кимге тиешелүү: Жахабагабы же Исагабы? Бул сөздөр Иса Машаякка тиешелүү (1 Тим. 6:14). Ал, бийликке ээ адамдардан айырмаланып, өлбөстүккө ээ «жалгыз Өкүмдар» (Дан. 7:14; Рим. 6:9). Асманга көтөрүлүп кеткенинен бери аны жердегилердин эч кимиси «көрө... албайт».
Биз алчу сабактар:
1 Тим. 4:15. Исанын жолдоочусу болгонубуздан канча убакыт өтпөсүн, биз рухий жактан өсүп, ийгилик жасай беришибиз керек.
1 Тим. 6:2. Жумуш берүүчүбүз биздин ишенимдешибиз болсо, андан кандайдыр бир жол менен пайда көрүүгө умтулуунун ордуна, ага ишенимдеш эмес кимдир бирөөгө иштегенден да жакшыраак иштеп беришибиз керек.
«КУДАЙДЫН СӨЗҮН КИЙИНКИГЕ КАЛТЫРБАЙ КАБАРЛА»
Тиметейди алдыдагы оор күндөргө даярдоо үчүн Пабыл: «Кудай бизге коркоктуктун эмес, күчтүн, сүйүүнүн жана акыл-эстүүлүктүн рухун берген»,— деп жазган. Ошондой эле: «Теңирдин кулу чатакташпашы керек, тескерисинче, баарына жумшак мамиле кылышы, окутууга жөндөмдүү болушу... керек»,— деп кеңеш берген (2 Тим. 1:7; 2:24, 25).
Пабыл Тиметейди: «Эмнеге үйрөнүп, эмнеге ынансаң, ошого бек карман»,— деп үндөйт. Чындыктан четтегендердин окуулары кеңири жайылгандыктан, Пабыл ага мындай деп кеңеш берет: «Кудайдын сөзүн кийинкиге калтырбай кабарла... ашкереле, эскерт, үндө» (2 Тим. 3:14; 4:2).
Ыйык китептик суроолорго жооптор:
2 Тим. 1:13 — «Туура сөздөрдүн үлгүсү» деген эмнени билдирет? «Туура сөздөр» — бул «Мырзабыз Иса Машаяктын сөздөрү», башкача айтканда, Исанын чыныгы жолдоочулары карманган окуулар (1 Тим. 6:3). Иса Кудайдын Сөзүндө жазылгандарга ылайык окуткандыктан жана иш кылгандыктан, «туура сөздөр», жалпы жонунан, Ыйык Китептин бардык окууларын билдирет. Ал эми «туура сөздөрдүн үлгүсү» — Жахабанын бизден эмнени талап кыларын ачып берген ыйык китептик негизги окуулар. Ыйык Китептен үйрөнгөндөрүбүздү жашоодо колдонуу менен биз «туура сөздөрдүн үлгүсүнө» карманабыз.
2 Тим. 4:13 — Бул жерде эмне болгон «түрмөктөр» жөнүндө сөз жүрүүдө? Түрмөктөр жаныбардын терисинен жасалып, жазуу ишинде колдонулчу. Элчи Пабыл Римде камакта жатканда Эврей Жазмалары жазылган түрмөктөрдүн айрым бөлүктөрүн, окуп-изилдеш үчүн, суратып жиберген көрүнөт. Андай түрмөктөрдүн кээси булгаарыдан, кээси папирустан жасалчу.
Биз алчу сабактар:
2 Тим. 1:5; 3:15. Тиметей ымыркай кезинен эле Ыйык Китеп боюнча тарбиялангандыктан, Иса Машаякка болгон бекем ишеним өрчүтө алган. Анын ишеними бардык иш-аракетине таасир эткен. Ата-энелердин Кудайдын жана балдарынын алдындагы милдеттерине олуттуу мамиле кылышы кандай гана маанилүү!
2 Тим. 1:16—18. Ишенимдештерибиз сыноолорго туш болушканда, куугунтукталып жатышканда жана камакка алынышканда, алар үчүн тиленип, бардык жагынан жардам берүүгө аракет кылалы (Накыл 3:27; 1 Тес. 5:25).
2 Тим. 2:22. Исанын жолдоочуларынын, өзгөчө, жаштардын культуризмге, спортко, музыкага, көңүл ачууга, кызыккан кайсы бир ишине, саякатка, маңызсыз пикирлешүүгө жана башка ушу сыяктуу нерселерге рухий иштерге убакыт калбай калганчалык убакыт бөлүүдөн сак болушу зарыл.
[31-беттеги сүрөт]
Пабылдын жазган каттарынын акыркысы кайсы?