Olembiwa na Luka
13 Vathawi ineyo, athu amo-iwa anayo kali vevo koomufotokozela Yesu vya athu a wu Galileya, anayo Pilato aaphile liye vathawi ineyo apeleka liye sembe. 2 Yesu oowasomeda ira: “Kodi munaganiza ira athu a wu Galileya anala kali ochimwa vinjinji kwaranya athu amo-iwa a wu Galileya chifukwa yoi vyevi vyoowaireela? 3 Naari. Eno ndinauwandelani ira akala kamunalapa, etene nyen’ne munoza muonongiwe mofwanafwana na aluwa. 4 Nanga bwanji vya athu 18, anayo sanja yaagumuwele wu Siloamu nowapha? Kodi munaganiza ira aluwa kali ochimwa vinjinji kwaranya athu amo-iwa etene anayo kanakala mu Yelusalemu? 5 Naari. Eno ndinauwandelani ira, akala kamunalapa, etene nyen’ne munoza muonongiwe ngati mwemo aluwa kaonongiweleathu.”
6 Eno oowambeela afotokozela fanizo li: “Muthu m’mo-iwa ookaana tengo wa nankuyu m’mundae wa mphesa, moi oodowa saela ipaso mutengomo, koma kaafwanyilemo ipaso iliyetene. 7 Ndiye liye oomuwandela muthu osamalela munda wa mphesoyo ira, ‘Wachaka taaru ndikala ndizanga ira ndize ndiche vipaso mutengo wa nankuyula, koma kandinafwanyemo ipaso ngakale imo-i. Uduleni tengola! Unakeda ononga teya.’ 8 Muthu osamalela mundoyo oomusomeda ira, ‘Mbwiyeni, bwanji muu-iye chaka ila yoka. Miyo ndinotimba rungunuwa tengola moi ndino-elavo manyowa. 9 Waza ubali-a vipaso usogolo, vinokala pama, koma akala ira kunaza ubali-a vipaso muze muudule.’”
10 Sopano vathawi imo-iwa Yesu ali afunji-anga musunagoge m’mo-iwa va dambo la Sabata. 11 Ndiye mwemo mookala iyana m’mo-iwa unoyo an’na zimu otakala* unoyo wapangi-ile ira abulele wachaka 18. Liye ali ovindeya tana moi kaawanda chilikuwa. 12 Yesu angamuonile iyanoyo, oomuwandela ira: “M’mani, marendinyu komala.” 13 Ndiye Yesu oomu-inda na mandae, moi thawi ineyo iyanoyo oochilikuwa nowambeela tamanda Mulungu. 14 Koma msogoleli wa sunagoge angaonile vyevi, oolunduwa chifukwa yoi Yesu oomuchili-a muthu va dambo la Sabata. Eno liye oowandela gulu la athu ira: “Vikala malambo 6 anayo ninafuneya iyo inda chito. Muzenga malambo anayo ira muchili-iwe, koma kamuzenga dambo la Sabata.” 15 Koma Mbwiye oomusomeda ira: “Athu achinyengo nyo, kodi nyo kamunamasula ng’ombe dinyu kapena abulwinyu mukola va dambo la Sabata nowadowana ira mwaang’wi-e ma-inje? 16 Naliyene teto iyanola ngu mwana wa Aburahamu, moi Satana oomumanga wachaka 18, ndiye kodi kai vyofwanelela ira liye amasuliwe m’maunyolo anala va dambo la Sabata?” 17 Angaongile vyevi, athu etene anayo kamuruni-a koonyaswa. Koma gulu letene la athu loowambeela sangalala chifukwa ya vyodabwi-a vyetene vyevyo apangile liye.
18 Eno liye oopitiliza onga ira: “Kodi Umwene wa Mulungu uli ngati n’ni, nanga kodi ndiufwanafwani-ede na n’ni? 19 Uli ngati kongolo ya mpilu* ineyo muthu aizalile liye m’munda mwae. Vanduli viwa yoomela nokala tengo, moi mbalame damulengalenga doomanga thunji muthambi diwa.”
20 Liye oowonga teto ira: “Kodi Umwene wa Mulungu ndiufwanafwani-ede na n’ni? 21 Uli ngati vyofufumi-a vyevyo iyana m’mo-iwa avitangani-ile liye na uthu okwakwana mbale taaru dilukulu doezela,* moi uthu wetene unoyo oofufuma.”
22 Yesu ooenda mu mzinda na mzinda koma teto m’madela etene a m’mavande. Liye oofunji-a nopitilizanga ulendwae odowa wu Yelusalemu. 23 Ndiye muthu m’mo-iwa oomufuka ira: “Mbwiyeni, kodi pivyoona ira athu anayo kanaze kavulumuwe mboyeva?” Yesu oosomeda ira: 24 “Esaesani mwakopolo ira muvolowe vamulango ung’onong’ono. Chifukwa ndithu ndinaauwandelani, athu anjinji kanoza kafunecheche volowamo koma katinaza kawanda. 25 Mwinyailo wa nyumba aza afungavo vamulango, nyo munoza muimele vande gogodanga isewo, moi munoza muonge ira, ‘Mbwiyeni ni-uleleni.’ Koma liye unoza ausomedeni ira: ‘Miyo kandinauiziwani.’ 26 Ndiye munoza muwambeele onga ira, ‘Iyo noodja koma teto noong’wa vamaso vinyu moi nyo moofunji-a m’misewu da mu mzindi-u.’ 27 Koma liye unoza auwandeleni ira, ‘Miyo kandinauiziwani. Venyavoni vamaso vanga, nyo athu etene opanga vyongo vyoolungama!’ 28 Moi munoza mumuone Aburahamu, Isaki na Yakobo koma teto anamaongela etene kangali mu Umwene wa Mulungu, koma nyo munoza muvochediwe unde, moi wewo munoza muule nokukuta mano. 29 Koma teto, athu kanoza kaze kumela umamawani, umazulo, umpoto na um’mwela moi kanoza kagarati vatebulo mu Umwene wa Mulungu. 30 Kavuruwanani! Athu anayo kali ogomi-eda kanaza kakala owambeela, moi anayo kali owambeela kanaza kakala ogomi-eda.”
31 Vathawi ineyo voofiya Afarisi amo-iwa moi koomuwandela ira: “Venyawoni uno, chifukwa Herodi unafuna aupheni.” 32 Liye oowasomeda ira: “Dowani mwaiwandele nkhandweyo ira, ‘Miyo ndinakumi-a viwanda koma teto chili-a athu peeno na mechelo, moi ndinamari-a dambo lanaralu.’ 33 Komave ndinafuneya pitiliza ulendwanga peeno, mechelo na dambo lanaralu, chifukwa kai vyofwanelela ira namaongela apheliwe unde wa Yelusalemu. 34 Yelusalemu, Yelusalemu, we opha anamaongela na ovocha mabwe athu anayo katumiziwe wa weyo. Moweli-edaweli-eda ndoofunechecha ira ndisonkani-e a-imawo vamo-i, ngati mwemo mwanakhu unasonkani-ela liye a-imae m’mapepelu mwae. Koma nyo kamwafunile. 35 Sopano kavuruwanani! Mulungu uu-iyedani nyumbela. Ndithu ndinaauwandelani, kamunaza mundiona nawili mpakana vevo munaze nyo muonge ira: ‘Odalisiwa ngunoyo unaza muzina la Yehova!’”*