Vyoira Vya Anamarumiwa
13 Mupingo wawu Antiokeya mookala anamaongela na aphunzisi ala: Barnaba, Sumiyoni oromoliwa Nigeri, Lukiyo wawu Kurene, Saulo koma teto Manayeni unoyo afunjedile limo-i na Herodi olamulela igawo. 2 Vevo aluwa katumikelaathu Yehova* koma teto sala dja, zimu owela ooawandela ira: “Vagulu la athu anala mundipatulelevo Barnaba na Saulo ira ka-inde chito ineyo ndaaitanele miyo.” 3 Kangamari-ile sala dja koma teto pempela, aluwa koowa-inda na mandiwa vamuru moi koowalola ira kadowe.
4 Eno athu anala, anayo katumiziwe na zimu owela, koodowa wu Selukeya moi kangakumile wewo kooenda ulendo wavanyanja dowa fiya wu Kupuro. 5 Kangafiile mu mzinda wa Salami koowambeela laleela mawu a Mulungu m’masunagoge a Ayuda. Aluwa kali teto limo-i na Yohani unoyo aakami-a.
6 Aluwa kooenda vailumba yetene ya Kupuro mpakana dowa fiya wu Pafo. Wewo koogumana na Muyuda m’mo-iwa wamasenga zina lae Bara-Yesu, unoyo ali namaongela onama. 7 Liye ali limo-i na bwanamkubwa Sergiu Paulo, unoyo ali muthu wazelu. Bwanamkubwa unola oomuitana Barnaba na Saulo, chifukwa yoi oofunechecha vwa mawu a Mulungu. 8 Koma Elima, (zina leli linatapulela wamasenga) oowambeela runi-ana na aluwa. Liye ooesaesa pangi-a ira bwanamkuboyo karoromele Mbwiye. 9 Koma Saulo, oromoliwa teto ira Paulo, angazaaliwe na zimu owela, oomuing’anechecha 10 moi oomuwandela ira: “We muthu ozaala na chinyengo ya tundu uliwetene na vyotakala, mwana wa Mdjelekezi koma teto mudani wa yongo iliyetene yolungama, kodi unaza u-iya alini koti-a ndila doongowa da Yehova?* 11 Sopano kavuruwana! Ndanda la Yehova* lili va weyo moi unokala o-oona. Wathawi yoyeva, kunawande ona wala wa zuwa.” Thawi ineyo liye oowona ifunga yakopolo m’maso mwae koma teto dima ilukulu, moi oowambeela saela athu oyi kamu-inde ndanda ira kamusogolelenga. 12 Bwanamkubole angaonile vyevi, ookala ororomela, chifukwa oodabwa vinjinji na vyevyo afunjedile liye vyokuza Yehova.*
13 Vanduli viwa Paulo na afwayayo, koowambeela ulendo wavanyanja kumela wu Pafo, moi koodowa fiya wu Pega, muilambo ya Pamfuliya. Koma Yohani oowa-iya welela wu Yelusalemu. 14 Kangakumile wu Pega koodowa fiya wu Antiokeya wawu Pisidiya. Wewo aluwa koovolowa musunagoge va dambo la Sabata moi koogarati. 15 Kangamari-ile welenga vamaso va athu etene Ilamulo koma teto vyevyo anamaongela kalembileathu, asogoleli a sunagoge koomuruma muthu dowa muwandela Paulo na Barnaba ira: “Abali, akala mun’na mawu oyi kalimbikise athwala, ongani.” 16 Eno Paulo ooimela moi oogweli-a ndanda lae noonga ira:
“Nyo Aisaraeli, koma teto nyo athu etene anayo munaova Mulungu, kavuruwanani. 17 Mulungu wa athwala Aisaraeli, oowasakula makolwi-u awale. Vevo aluwa kakalaathu muilambo ya Iguputo, liye oopangi-a ira kakale tundu wakopolo, moi oowakumi-a muilambweyo na ndanda lae lakopolo. 18 Wachaka dotamangela 40, liye ookala avilelanga chifukwa ya makalelwiwa muipululu. 19 Moi angaonongile mitundu 7 da athu muilambo ya Kanani, oopeleka ilambweyo wa Aisaraeli ira ikale cholowa iwa. 20 Vyetene vyevi vyooireya muchaka dotamangela 450.
Vyevi vingamalile, Mulungu oowava-a oweluza mpakana za fiya muthawi ya namaongela Samueli. 21 Koma vanduli viwa athwayo koofunechecha ira kakaena mwene. Eno Mulungu oowava-a Sauli mwana wa Kisi, wafuko la Benjamini, moi liye ookala mweniwa wachaka 40. 22 Mulungu angamuchosile Sauli, oowava-a Davide ira akale mweniwa. Mulungu oomupangela umboni voonga ira, ‘Ndimufwanya Davide mwana wa Jese, muthu wavamurimani vanga. Liye unoza apange vyetene vyevyo ndinafuna miyo.’ 23 Mogwilizana na lonjezo lae, zela mwa a-ima a muthu unola, Mulungu umuzana mpulumusi mu Isaraeli, unoyo ngu Yesu. 24 Mpulumusi Yesu aanafiye, Yohani oolaleela wa athu etene awu Isaraeli vya ubatizo, monga izindikilo yolapa. 25 Koma vevo Yohani amari-a liye utumikae, aongile ira, ‘Kodi munaganiza ira ndili mbaani? Unoyo munamuganizela nyo kai miyo. Koma muthu m’mo-iwa unaaza munduli mwangamu, moi miyo kandili ofwanelela masula migo-i da sapato dae.’
26 Abalanga, nyo a-ima a Aburahamu, limo-i na nyo athu etene oova Mulungu, mawu aipulumuso inela kootumiziwa wa iyo. 27 Chifukwa athu awu Yelusalemu na olamuleliwa katamuzindikilile. Koma vevo kamuweluzaathu, kookwakwaneli-eda vyevyo anamaongela kalembileathu vyevyo vinawelengiwa mogweli-a mawu dambo la sabata lililetene. 28 Ngakale ira katafwanyile mulandu uliwetene omuphela, aluwa koomukanyi-eda Pilato ira muthu unola aphiwe. 29 Ndiye kangakwakwaneli-ede vyongo vyetene vyevyo vyalembiwe vyokuza liye, koomutiti-a vatengo nomu-ela m’manda.* 30 Koma Mulungu oomuvenyi-a. 31 Moi wa malambo anjinji oowoneela wa athu anayo kaendile limo-i na liye kumela wu Galileya dowa wu Yelusalemu. Vathawiila athu anala ti mboni dae wa athu.
32 Eno iyo ninolengeza wa nyo uthenga wapama oonga vya vyongo vyevyo makolwi-u kalonjeziweathu. 33 Uthengiwa ngoi Mulungu ukwakwaneli-eda wa iyo a-ima vyongo vyetene vyevyo alonjezile liye wa makolwi-u vomuvenyi-a Yesu, mogwilizana na vyevyo vyalembiwe mu salimo lanambili ira: ‘Weyo uli mwananga. Peeno miyo ndikala babawo.’ 34 Mulungu oomuvenyi-a wa okhwa ira kakaena thuthu lelo linavunda, moi va likundo leli Mulungu aongile ira: ‘Miyo ndinoza ndiutonyi-edeni chikondi yororomeleya ineyo ndamulonjezile miyo Davide. Lonjezo leli ti lororomeleya.’ 35 Moi salimo limo-iliwa linaonga teto ira, ‘Kamunaza mulola ira thuthu la mtumikinyu ororomeleya livunde.’ 36 Davide oopanga ifunelo ya Mulungu vathawi ya athu a tundwae, moi vanduli viwa ookhwa no-eliwa m’manda a makolwae moi thuthu lae loovunda. 37 Koma unoyo avenyi-iwe na Mulungule thuthu lae kalavundile.
38 Sopano iziwani abali ira, iyo ninolaleela wa nyo vyokululukiwa wa machimo zela mwa Yesu. 39 Iziwani teto ira muthu unoyo unamuroromela Yesuyo, Mulungu unomuona kala olungama. Koma Ilamulo ya Mose, kinaupangi-eni ira muoniwe kala olungama. 40 Eno samalani ira vyevyo anamaongela kalembileathu kaviireye wa nyo. Aluwa kalembile ira: 41 ‘Nyo athu onyoza, onani vyevyo ndinapanga miyo moi mudabwe chifukwa ya vyongo vyevyo. Vanduli viwa munoza mukhwe, chifukwa yoi kamunaza muroromela ngakale vang’ono vyevyo ndinaze miyo ndipange m’malambwinyu, ngakale muthu m’mo-iwa angaufotokozeleni movweya pama.’”
42 Sopano vevo Paulo na Barnaba kakumaathu, athu koowachondelela ira kaze kaafotokozele nawili khani dedi dambo la Sabata lo-arela. 43 Eno sonkanoyo ungamalile, Ayuda limo-i na athu anjinji anayo kavolowile Iyuda anayo kalambela Mulungu koomu-arela Paulo na Barnaba. Moi aluwa kooawandela athwayo ira kapitilize kala ofwanelela wachela oma murima ulukulu wa Mulungu.
44 Dambo la Sabata lo-arela, athu etene a mu mzinda koosonkana ira kavuruwane mawu a Yehova.* 45 Ayuda kangaonile gulu la athulo, kookaana sanje moi koowambeela runi-a mwaibewe vyevyo Paulo aonga liye. 46 Eno Paulo na Barnaba koowonga molimba murima ira: “Nyo mwali ofwanelela ira muwambeele iziwa mawu a Mulungu. Koma voi muwakoonda mawayo moi muviweluza ekinyu ira kamuli ofwanelela wachela moyo oomala, iyo ninadowa wa athu a mitundu dimo-i. 47 Moi Yehova* unilamula ira, ‘Ndiuva-ani udindo oyi mukale wala wa athu a mitundu dimo-i, ira mukale ipulumuso mpakana umagomi-edo wailambo yavati.’”
48 Athu a mitundu dimo-i kangavwile vyevi, koosangalala moi kootamanda mawu a Yehova.* Athu etene anayo kan’na maganizo apama ofuna za kaana moyo oomala kookala ororomela. 49 Koma teto, mawu a Yehova* koopitiliza laleeliwa muilambo yetene. 50 Koma Ayuda kooawandela vyotakala a-iyana ochuka oova Mulungu koma teto alombwana olemekezeya a mu mzindoyo. Eno aluwa koopangi-a ira Paulo na Barnaba kaambeele zuzumi-iwa moi koowakumi-eda unde wa mzindoyo. 51 Koma Paulo na Barnaba kootata tumbulu umanyalwiwa ira ukale umboni moi koovenyawo dowa wu Ikoniyo. 52 Ofunjedayo koopitiliza kala osangalala koma teto zimu owela oowakami-a vinjinji.