Olembiwa na Mateyu
2 Yesu angabaliwe wu Betelehemu wawu Yudeya, vathawi ya ulamulilo wa Mwene Herodi,* ororomela nyenyedi okumela umamawa koodowa wu Yelusalemu. 2 Aluwa koofuka ira: “Kodi mwene wa Ayuda unoyo ubaliwe chineneveva uli waani? Chifukwa vevo nali iyo umamawa, niona nyenyedae moi nizile ira nimukokorele.” 3 Mwene Herodi koma teto athu etene a mu Yelusalemu kangavwile vyevi, koovuteya m’murimani. 4 Eno Herodi oosonkani-a andimuwa a asembe na alembi etene, nowafuka vya wewo Kristu* unaze liye abaliwele. 5 Aluwa koomusomeda ira: “Unaza abaliwela wu Betelehemu wawu Yudeya, chifukwa namaongela alembile ira: 6 ‘We Betelehemu wa muilambo ya Yuda, kuli mzinda ung’onong’ono vinjinji wa olamulela a Yuda, chifukwa mwa weyo munoza mukume olamulela unoyo unaze awetenga athwanga, Aisaraeli.’”
7 Vanduli viwa Herodi oowaitana mwaisisi ororomela nyenyedale moi angaafukile mosamala, ooiziwa thawi ineyo nyenyediyo yaoneeleathu. 8 Ndiye vowaruma wu Betelehemu, liye ooawandela ira: “Dowani mwamusaelesaele mwanoyo mosamala. Mwamufwanya muze mundiwandele ira namiyene ndidowe ndamukokorele.” 9 Aluwa kangavwile vyevyo mwenoyo aongile liye, koopitiliza ulendwiwa. Vanduli viwa nyenyedi ineyo kaionileathu kangali umamawa yoowasogolela mpakana dowa imela vadimu va nyumba ineyo mwali mwanoyo. 10 Kangaonile ira nyenyediyo iimela, aluwa koosangalala vinjinji. 11 Kangavolowile m’mbamo, koomuona mwanoyo na m’mae Mariya moi koomukokorela. Vanduli viwa kookumi-a chuma ineyo kan’naathu nomuva-a mwanoyo golide, lubani na mule monga mphaso. 12 Koma chifukwa yoi Mulungu oowachenjeza zela moro-a ira katiwelele wa Herodi, aluwa koodowa uilambo ya waniwa vovira ndila imo-iwa.
13 Ororomela nyenyedale kangadowile, ngelo wa Yehova ooneela wa Yosefe moro-a nomuwandela ira: “Maruwa, mulande mwanola na m’mae utawele wu Iguputo. Udowe wakale wewo mpakana vevo ndinaze miyo ndiuwandele, chifukwa Herodi unafuna aambeele musaelasaela mwanola ira amuphe.” 14 Eno Yosefe oovenya ma-iyu anayo nomulanda mwanole na m’mae moi koodowa wu Iguputo. 15 Liye ookala wewo mpakana Herodi angakhwile. Vyevi vyookwakwaneli-eda vyevyo Yehova aongile liye zela mwa namaongelae ira: “Ndoomuitana mwanangola ira akumemo mu Iguputo.”
16 Ndiye Herodi angaonile ira ororomela nyenyedale komupusi-a oolunduwa vinjinji. Eno ooruma athu dowa pha a-ima aalombwana etene m’Betelehemu na m’madela etene, ambeela a chaka mbin’li tita mpedi. Oosakula pha a-ima a chaka dedi mogwilizana na vyevyo ororomela nyenyedale kamuwandelileathu. 17 Vyevi vyookwakwaneli-eda mawu anayo Mulungu aongile liye zela mwa namaongela Yeremiya ira: 18 “Wu Rama uvweya mawu oula mokuwa koma teto movwi-a chisoni. Ali Rakele unoyo aulela a-imae moi kaavwile miyali-iwa, chifukwa a-imayo kataliwo.”
19 Herodi angakhwile, ngelo wa Yehova ooneela wa Yosefe moro-a wu Iguputo 20 nomuwandela ira: “Maruwa, mulande mwanola na m’mae, udowe muilambo ya Isaraeli, chifukwa unoyo afuna mupha mwanola ukhwa.” 21 Eno Yosefe oomaruwa nomulanda mwanoyo na m’mae dowa muilambo ya Isaraeli. 22 Koma angavwile ira Arikelao ngunoyo unalamulela m’malo mwa babae Herodi wu Yudeya, oowova dowa wewo. Koma teto chifukwa yoi Mulungu oomuchenjeza zela moro-a, liye oodowa udela la Galileya. 23 Angafiile wewo ookala mu mzinda wa Nazareti ira akwakwaneli-ede mawu anayo Mulungu aongile liye zela mwa anamaongela ira: “Liye unoza aromoliwe Mnazareti.”*