Olembiwa na Maliko
2 Koma vangavirile malambo oyeva, Yesu oovolowa mu mzinda wa Kaperenao moi athu anjinji koovwa vyevi. 2 Eno athu anjinji koosonkana vande vevo ali liye moi kavali malo ogarati, chifukwa athu koozaala mpakana vamulango moi liye oowambeela awandela uthenga wapama. 3 Ndiye athu amo-iwa koomuzelana muthu okhwa viwalo angatukuliwe na athu 4. 4 Koma chifukwa yoinjiva wa athu, aluwa katakwakwani-ile mufiyana vevo Yesu agaratile liye. Moi koopasula vadimu va nyumbeyo, novolochi-elavo machila anayo muthu okhwa viwaloyo agonatile liye. 5 Yesu angaonile iroromelo iwa, oomuwandela muthu okhwa viwaloyo ira: “Mwananga, machimwawo kookululukiwa.” 6 Vathawi inela, alembi amo-iwa anayo kali vevo, koowambeela ganiza m’murimani mwiwa ira: 7 “Chifukwa n’ni muthula unaonga eni? Unola unonyoza Mulungu. Ngu mbaani teto m’mo-iwa unoyo unakululukele machimo, kai Mulungu eka ba-i?” 8 Koma thawi ineyo Yesu oozindikila vyevyo aluwa kaganizaathu, moi oowafuka ira: “Chifukwa n’ni munaganiza vyongo vyevi m’murimani mwinyu? 9 Yokweya chiivi, muwandela muthu okhwa viwalola ira, ‘Machimwawo kookululukiwa,’ kapena muwandela ira, ‘Maruwa, tukula machilawo uwambeele enda’? 10 Koma ira muiziwe ira Mwana wa muthu ukaana kopolo dokululukela athu machimo vailambo yavati—” ndiye oomuwandela muthu okhwa viwaloyo ira: 11 “Ndinaonga na weyo: Maruwa, tukula machilawo udowenga waninyu.” 12 Thawi ineyo muthuyo oomaruwa moi ootukula machilae nowambeela enda vamaso va athu etene. Eno athu etene anayo koodabwa vinjinji moi koowambeela tamanda Mulungu ira: “Vyongo ngati vyevi kavinaireyevo.”
13 Vanduli viwa liye oodowa m’mbali mwa nyanja. Gulu letene la athu loopitiliza dowa wa liye moi oowambeela afunji-a. 14 Aviranga oomuona Levi mwana wa Alifeyo angagaratile mu ofesi yokomelamo misonkho moi oomuwandela ira: “Za ukale o-arelanga.” Thawi ineyo liye oowambeela mu-arela. 15 Vathawi imo-iwa, Yesu adja m’mba mwa Levi limo-i na athu anjinji okomi-a misonkho na ochimwa koma teto ofunjedae. Wewo ookala athu anjinji anayo kamu-arela. 16 Koma alembi a Afarisi, kangaonile ira Yesu unadja limo-i na athu ochimwa koma teto okomi-a misonkho, koowambeela afuka ofunjedae ira: “Chifukwa n’ni mphunzisinyu unadja limo-i na okomi-a misonkho koma teto athu ochimwa?” 17 Yesu angavwile vyevi oowasomeda ira: “Athu apama katinafuneya dokotala, koma obulela mbanayo kanamufuna. Miyo kandazide za itana athu olungama, koma ochimwa.”
18 Ofunjeda a Yohani na Afarisi koosala dja. Eno alembi na Afarisi kooza wa Yesu nomufuka ira: “Chifukwa n’ni ofunjeda a Yohani na ofunjeda a Afarisi kanasala dja, koma ofunjedinyu katinasala dja?” 19 Yesu oowasomeda ira: “Kodi afwae a malimba tela kanosala dja akala malimba teloyo uli limo-i na aluwa? Vathawi ineyo malimba teloyo uli liye limo-i na aluwa katinafuneya sala dja. 20 Koma inoza ifiye thawi vevo malimba teloyo unaze liye achosiwe vaari viwa, moi vathawi ineyo aluwa kanoza kasale dja. 21 Kavali muthu unoyo unasowela igamba ya nguwo isha va malaya aunde awale. Apanga vyevyo, igamba isheyo inokoka koma teto ng’amba malaya awalayo moi vong’ambeyavo vanoulukula vinjinji. 22 Teto kavali muthu unoyo una-ela vinyu musha m’matumba aikopa awale. Apanga vyevyo, vinyuyo unopuli-a matumbayo. Vanduli viwa vinyuyo unotatiya moi matumbayo kanoonongeya. Koma athu kano-ela vinyu musha m’matumba aikopa asha.”
23 Vevo Yesu avira liye m’munda wa tirigu va dambo la Sabata, ofunjedae koowambeela vurula tirigu nodjanga. 24 Eno Afarisi koomufuka Yesu ira: “Chifukwa n’ni ofunjedinyu kanapanga vyongo vyevyo kai vyofwanelela vipanga va dambo la Sabata?” 25 Koma liye oowasomeda ira: “Kodi kamuwelengile vyevyo Davide limo-i na alombwana anayo kali limo-i na liye kapangileathu kangan’na ndala? 26 Khani yoonga vya Abiyatara wasembe mulukulu inaonga ira, Davide oovolowa munyumba ya Mulungu moi oodja mikate dopelekiwa sembe wa Mulungu, dedo kadafuneya djiwa na muthu uliwetene malinga na malamulo, koma dafuneya djiwa na asembe oka. Liye oolanda mikatedo nowava-a alombwana anayo kali limo-i na liye. Kodi nyo kamuwelengile khani inela?” 27 Vanduli viwa liye ooawandela ira: “Sabata lookalavo chifukwa ya muthu, o-okala ira muthu akalilevo chifukwa ya Sabata. 28 Eno Mwana wa muthu ngu Mbwiye wa Sabata.”