Olembiwa na Luka

8 Vangavirile thawi yoyeva, Yesu oowambeela enda mu mzinda na mzinda koma teto m’mavande etene nolaleelanga uthenga wapama wa Umwene wa Mulungu. Moi anamarumiwae 12 kali limo-i na liye. 2 Ali limo-i teto na a-iyana amo-iwa anayo aakumi-ile liye mizimu dotakala koma teto achili-a marendiwa. Amo-iwa mwa aluwa ali Mariya unoyo teto aromoliwa ira Magadala, unoyo amukumi-ile liye viwanda 7. 3 Jowana iyanae wa Kuza unoyo aing’anela nyumba ya Herodi, Suzana na a-iyana amo-iwa anjinji, anayo kamukami-a Yesu na anamarumiwae vo-indi-eda chito vyongo viwa.

4 Ndiye gulu lilukulu la athu lingasonkanile, limo-i na athu anayo kazide kumela m’mizinda do-iyana-iyana, Yesu oowambeela afunji-a vo-indi-eda chito fanizo loi: 5 “Muthu m’mo-iwa oodowa fesa mbewu. Vevo afesa liye mbewudo, mbewu dimo-i doomorela m’mbali mwa sewu moi athu koodinyingala koma teto doodjiwa na mbalame damulengalenga. 6 Mbewu dimo-i doomorela valibwe. Koma dingamelile, doouma chifukwa vakede kala teya yoyeva. 7 Mbewu dimo-i doomorela vaminga moi mingado dingaulukulile doolepeli-a ira mbewudo diulukule. 8 Koma mbewu dimo-i doomorela vateya yapama, moi dingaulukulile, doobala vipaso weli-eda maulendo 100.” Angaongile vyevi, oowonga mogweli-a mawu ira: “Muthu unoyo un’na mabaru, avwe.”

9 Koma ofunjedae koomufuka vyevyo fanizolo latapulelaathu. 10 Liye aongile ira: “Nyo muva-iwa mwai ira muvwecheche visisi vyopatuleya vya Umwene wa Mulungu. Koma wa athu amo-iwa, vyongo vyetene vinaongiwa vo-indi-eda chito mafanizo. Vyevi vili eno ira aluwa kaing’anenga, koma kationenga, kavwenga, koma kativwechechenga vyevyo vinaongiwa. 11 Sopano fanizoli tapulela uwa ku wu: Mbewudo mba mawu a Mulungu. 12 Mbewu dedo damorele m’mbali mwa sewu mba athu anayo kanavwa mawu a Mulungu. Vanduli viwa Mdjerekezi unoza nochosa mawu anayo kafesiwe m’murimani mwiwa ira katiroromele koma teto vulumuwa. 13 Mbewu dedo damorele valibwe mba athu oyi kavwa mawu a Mulungu, kanoawachela mosangalala, koma katin’na michichi. Kanororomela wathawi yoyeva, koma kagumana na maesero kanofooka. 14 Mbewu dedo damorele vaminga, mba athu anayo kavwile mawu a Mulungu koma chifukwa yokaana nkhawa, koma teto chifukwa yosaela chuma na vyosangalasa vya moyo wa muthawiila, kanolepela ulukula pamapama moi katinabala vipaso. 15 Koma mbewu dedo damorele vateya yapama, mba athu oyi kavwa mawu a Mulungu kanoawachela na murima wapama vinjinji, kanowa-indechecha koma teto kanobala vipaso movilela.

16 Kavali muthu unoyo unakari-a nyale, noikuneela na yongo kapena i-ela vati va bedi. Koma unoi-ela vamalo o-elavo nyale ira athu anayo kanavolowa m’mbamo kaone wala. 17 Chifukwa kavali yongo yobiseya ineyo kinaza iululeya. Moi vyongo vyetene vyosungiwa mwaisisi vinjinji vinoza viiziweye, kavinaza vibiseya mpakana walewale. 18 Eno muvuruwanenga mwachelu vinjinji. Chifukwa muthu unoyo un’na vyongo, unoza ava-iwe vyoinjiva, koma muthu unoyo kan’na vyongo, unoza awakiwe ngakale vyevyo unaganiza liye ira ukaana.”

19 Ndiye m’mae na achimwenae kooza wewo, koma chifukwa yoinjiva wa athu, koolepela fiya vevo vali liye. 20 Koma athu amo-iwa koomuwandela ira: “M’minyu na achimweninyu kali vandeva kanafuna kauoneni.” 21 Yesu oowasomeda ira: “M’manga na achimwenanga mbala anayo kanavuruwana mawu a Mulungu nowa-indi-edanga chito.”

22 Dambo limo-i Yesu na ofunjedae koogwela ngalawa moi liye ooawandela ira: “Tiyemoni nilambuwele ukombela imo-iwa ya nyanja.” Eno aluwa koowambeela palasa. 23 Koma vevo kadowaathu, Yesu oogona. Vanduli viwa vanyanjavo voowambeela lipevo lakopolo, teto ma-inje koowambeela zaala mungalawamo moi kakede ala vang’ono bwina. 24 Vanduli viwa aluwa koomuvenyi-a moi koomuwandela ira: “Mphunzisi, Mphunzisi, ninokhwa!” Liye angavwile vyevi oovenya nosumulula lipevo na mafunde akopolwayo, teto vyoo-iya, moi vanyanjavo voofaaseya. 25 Ndiye liye oowafuka ira: “Kodi iroromelwinyu ili waani?” Koma aluwa koowova vinjinji moi koomaliwa zelu, moi koowambeela fukana ekiwa ira: “Kodi muthu unola ngu mbaani kwenikweni? Liye unowanda lamula lipevo na ma-inje moi vinomuvwela.”

26 Ndiye kooimecha ngalawele mudela la Agerasa, ukombela imo-iwa, ya nyanja ya Galileya. 27 Yesu angatitile mungalawamo, oogumana na muthu m’mo-iwa o-indiwa na iwanda okumela mu mzindamo. Wathawi indendai, muthuyo kaawara yongo, koma teto kaakala vande, koma akala umanda.* 28 Muthuyo angamuonile Yesu, ookuwa vinjinji novigwi-a vati vamaso vae. Vanduli viwa ookuwa mwakopolo ira: “Kodi munafuna n’ni wa miyo, Yesu, Mwana wa Mulungu Wamudimu Vinjinji? Pepani ndinaauvepani, kamundizuzumi-e.” 29 (Chifukwa Yesu oowandela zimu otakaloyo ira ukume mwa muthuyo. Zimu unola oomu-inda mwakopolo maulendo anjinji.* Moweli-edaweli-eda koomumanga na maunyolo koma teto matangaza nomuing’anelanga. Koma chifukwa ya kopolo ya iwandeyo, oopaza maunyolwayo notawela umalo ookala athu.) 30 Yesu oomufuka ira: “Zina lawo uli mbaani?” Liye oosomeda ira: “Ndili khamu,” chifukwa mwa liye moovolowa viwanda vinjinji. 31 Viwandavyo vyoopitiliza muchondelela moweli-edaweli-eda ira kavitumize uzenje lodii-a vinjinji. 32 Ndiye vakwikwi na malo anayo vookala khumba dinjinji dedo dadja. Eno viwandavyo vyoomuchondelela ira vidowe vyavolowe mwa khumbado moi liye ooviloli-a. 33 Vanduli viwa viwandavyo vyookuma mwa muthuyo dowa volowa mwa khumbado. Khumba detene dedo dootamangela uphedi dowa lupela munyanja moi dookhwela mwemo. 34 Abusa anayo kaweta khumbado kangaonile vyevi, kootawa dowa onga vyevi mu mzinda na m’mavande.

35 Vanduli viwa athu koodowa ira kaone vyevyo vyaireile. Aluwa kangafiile wa Yesu koomufwanya muthu unoyo amukumi-ile liye viwandole angagaratile vakwikwi na Yesu. Muthuyo ali angawarile pama koma teto maganizwae kali pama moi athwayo koowova vinjinji. 36 Athu anayo kaonile vyevyo Yesu apangile liye koowafotokozela athwayo vyevyo Yesu apangile liye vomuchili-a muthu wa viwandoyo. 37 Vanduli viwa athu anjinji okumela m’mandela avakwikwi na Agerasa koomuvepa ira avenyewo waniwawo, chifukwa yoi koowova vinjinji. Vingairile eno liye oogwela ngalawa ira adowenga. 38 Ndiye muthu unoyo amukumi-ile liye viwandole oomuvepa moweli-edaweli-eda ira aendenga na liye. Koma Yesu oomuwandela muthuyo ira adowenga waniwa. Liye aongile ira: 39 “Dowa waninyu teto udowe wafotokoze vyevyo Mulungu uupangele liye.” Eno muthule oodowa moi oowonga mu mzinda wetene unoyo vyevyo Yesu amupangele liye.

40 Yesu angawelele wu Galileya, gulu la athu loomuwachela pama, chifukwa athu etene koomudedi-edela. 41 Vanduli viwa voofiya muthu m’mo-iwa zina lae Yairo. Muthu unola ali msogoleli wa sunagoge. Ndiye ookokora vakwikwi na manyalo a Yesu nowambeela muchondelela ira adowe waniwa. 42 Yairo apangile vyevi chifukwa yoi mwanae wa-iyana unoyo an’na chaka dotamangela 12, ali anga-alile vang’ono khwa.

Vevo Yesu adowa liye wewo, athu anjinji koomu-arela moi koomupanikiza. 43 Ndiye vookala iyana m’mo-iwa unoyo abulela marenda otatila magazi wachaka 12, moi kavali muthu uliwetene unoyo akwakwani-ile muchili-a. 44 Iyanoyo oomuwandamela Yesu unduli no-inda ulusi oluwa wa m’mbali mwa malayae aunde. Thawi ineyo marendae otatila magazi koomala. 45 Ndiye Yesu oofuka ira: “Mbaani unoyo undi-indile?” Athu etene kangakoondile, Petulo aongile ira: “Mphunzisi, kodi kamunaona ira athu etene anala kourungunuwani moi kanoupanikizani?” 46 Koma Yesu aongile ira: “Ukalavo muthu unoyo undi-indile, chifukwa kopolo ikuma mwa miyo.” 47 Iyanoyo angaonile ira vyevyo upangile liyevyo viiziweya, oodowa wa Yesu angurumedanga moi ookokora noulula vamaso va athu etene ineyo yamupangi-ile ira amu-inde, koma teto mwemo mwachilele liye thawi ineyo. 48 Koma liye oomuwandela iyanoyo ira: “Mwananga, iroromelwawo iuchili-a. Dowa mwamurendele.”

49 Aanamari-e onga, voofiya muthu m’mo-iwa kumela waniwa wa Yairo, moi oomuwandela Yairoyo ira: “Mwaninyule ukhwa. Mu-iyeni Mphunzisila kamumuvuti-e.” 50 Yesu angavwile vyevi, oomuwandela Yairo ira: “Kuove, koma ukaena iroromelo, moi mwanawoyo unovenyi-iwa.”* 51 Angafiile waniwa wa Yairo kaalolile ira muthu uliwetene avolowe m’mbamo koma avolowile na Petulo, Yohani na Yakobo koma teto baba na m’mae wa sikanoyo. 52 Koma athu etene kooula koma teto vivaza vamirimani chifukwa ya chisoni. Eno Yesu ooawandela ira: “Miyalani, chifukwa mwanola kakhwile, koma unaagona.” 53 Angaongile vyevi, athwayo koowambeela muteya monyoza, chifukwa kooiziwa ira mwanoyo ukhwa. 54 Koma liye oomu-inda ndanda moi liye aongile ira: “Sikanawe, venya!” 55 Thawi ineyo sikanoyo oovenya.* Ndiye Yesu ooawandela ira kamuva-e yodja. 56 Makolwae a sikanoyo koosangalala vinjinji, koma Yesu ooawandela ira katimuwandele muthu uliwetene vyevyo vyaireile.