Olembiwa na Yohani

11 Sopano vookala muthu m’mo-iwa zina lae Lazalo, unoyo abulela. Liye ali wawu Betaniya, waniwa wa Mariya na dimbilae Marta. 2 Mariya unola ngunoyo amukutulele Mbwiye makhura onukela nopukuta manyalwayo na sisi lae. Lazalo unoyo abulelola ali murongolae. 3 Eno arongolayayo kootumiza uthenga wa Yesu ira: “Mbwiyeni! Fwinyu unoyo munamuomeliwana nyo unaabulela.” 4 Yesu angavwile vyevi aongile ira: “Yolinga ya marendala kai yoi akede khwana, koma yolinga choi Mulungu awachele ulemelelo koma teto ira Mwana wa Mulungu alemekezeye chifukwa ya marenda anala.”

5 Yesu oomuomeliwana Marta Mariya koma teto Lazalo. 6 Koma angavwile ira Lazalo unaabulela, ookalave wewo ali liye malambo amo-iwa men’li. 7 Malambo men’layo kangamalile, Yesu ooawandela ofunjedae ira: “Tiyemoni niwelele wu Yudeya.” 8 Ofunjedayo koomuwandela ira: “Mphunzisi, chineneveva athu a wu Yudeya kafuna kauvazeni na mabwe, ndiye munafuna ira muwelele wewo?” 9 Yesu oosomeda ira: “Kodi tana kunakala na maola 12? Muthu aendanga tana kanakwakwatuwa, chifukwa unoona wala wa ilambwela. 10 Koma muthu aendanga ma-iyu, unokwakwatuwa chifukwa mwa liye kamuli wala.”

11 Angaongile vyevi, ooawandela ofunjedayayo ira: “Fwi-u Lazalo unaagona, koma ndinadowa wewo ira ndamuvenyi-e.” 12 Ndiye ofunjedayayo kaongile ira: “Mbwiyeni, akala unagona unokala pama.” 13 Veva Yesu atapulela ira Lazalo ukhwa. Koma aluwa kaganiza ira unakeda gona. 14 Vanduli viwa Yesu ooawandela movweya pama ira: “Lazalo ukhwa, 15 moi miyo ndinosangalala chifukwa yoi kandali wewo, na yolinga yoi nyo muroromele. Koma tiyemoni nidowe wewo.” 16 Eno Tomasi, unoyo aiziweya teto ira Didimo, ooawandela ofunjeda afwae ira: “Na-iyene teto tiyemoni, ira nidowe nakhwele limo-i na Yesu.”

17 Yesu angafiile wewo, afwanyile ira vivira malambo 4 kumela vevo Lazalo a-eliwe liye m’manda.* 18 Mzinda wa Betaniya wali vakwikwi na Yelusalemu moi wali ulendo wa makilomita otamangela maralu.* 19 Sopano Ayuda anjinji koodowa wa Marta na Mariya dowa amiyali-a chifukwa yokhwa wa murongoliwa. 20 Eno Marta angavwile ira Yesu unaaza, oodowa muchingamela, koma Mariya oo-ala vande. 21 Marta oomuwandela Yesu ira: “Mbwiyeni, aakale ira mwali uno murongolanga kaakhwa. 22 Komave, ngakale vathawiila ndinoiziwa ira iliyetene ineyo munavepe nyo wa Mulungu, liye unoza auva-eni.” 23 Yesu oomuwandela ira: “Murongolawo unovenya.” 24 Marta oomuwandela ira: “Ndinoiziwa ira unoza avenye va dambo lomari-a.” 25 Yesu oomuwandela ira: “Miyo ndili venya na moyo. Muthu uliwetene ondiroromela, ngakale akhwe, unoza akaena teto moyo. 26 Koma teto muthu uliwetene unoyo un’na moyo moi unondiroromela kanaza akhwa. Kodi unororomela vyevi?” 27 Liye oosomeda ira: “Ee, Mbwiyeni. Ndinororomela ira nyo muli Kristu Mwana wa Mulungu, unoyo athu kamudedi-edaathu ira unoza aze vailambwela.” 28 Angaongile vyevi, oodowa muitana dimbilae Mariya nomuwandela mwaisisi ira: “Mphunzisi uza moi unaauitana.” 29 Mariya angavwile vyevi, oomaruwa mombaraanya dowa wewo wali Yesu.

30 Vathawi inela Yesu ali aanafiye mu mzindamo. Liye ali vamalo anayo agumanile liye na Marta. 31 Ayuda anayo kali m’mbamo limo-i na Mariya, anayo kamumiyali-a, kangamuonile ira unaamaruwa mombaraanya kuma vande, koomu-arela. Aluwa kaganiza ira unadowa umanda* dowa ula wewo. 32 Mariya angafiile wewo wali Yesu nomuona, ookokora mpakana kovae vati vakwikwi na manyalo a Yesu. Vanduli viwa oomuwandela ira: “Mbwiyeni, aakale ira mwali uno murongolanga kaakhwa.” 33 Yesu angamuonile Mariya aulanga koma teto Ayuda anayo kazide limo-i na liye kaulanga, vyoomuvoreya vinjinji m’murimani moi ookaana chisoni. 34 Vanduli viwa oowafuka ira: “Mumu-elile waani?” Aluwa koomusomeda ira: “Mbwiyeni, tiyemoni mwaone.” 35 Eno Yesu oowambeela ula. 36 Ayudayo kangaonile vyevi koowambeela onga ira: “Kaonani, oomuomeliwana vinjinji!” 37 Koma amo-iwa mwa aluwa kaongile ira: “Akala muthula akwakwani-ile ula maso a muthu o-oona, kaawande panga yongo imo-iwene ira fwaela kakhwe?”

38 Vanduli viwa Yesu angavuteile nawili m’murimani, oofiya umandawo.* Manda anala kali uphanga, moi vamulango viwa ka-eilevo na libwe. 39 Yesu aongile ira: “Chosavoni libweli.” Marta, murongolae wa muthu unoyo akhwileyo oomuwandela Yesu ira: “Mbwiyeni, vano uwambeela nukha, chifukwa peeno ti dambo la 4 kumela vevo a-eliwe liye m’manda.” 40 Yesu oomuwandela ira: “Kodi kandiuwandelile ira akala unaroromele unoza uone ulemelelo wa Mulungu?” 41 Eno koochosavo libwelo. Vanduli viwa Yesu ooing’ana udimu noonga ira: “Babani, ndinouyamikelani chifukwa yoi mundivuruwana. 42 Onga vyoona, ndinoiziwa ira munondivuruwana thawi detene, koma ndinaonga vyevi chifukwa ya gulu la athu anayo kaimelile vevala, ira karoromele ira nyo moondiruma.” 43 Angaongile vyevi, ookuwa mogweli-a mawu ira: “Lazalo, kuma!” 44 Muthu unoyo akhwileyo ookuma. Manyalo na mandae vyapotiwe na nguwo da malilo, kovae teto yoopotiwa na nguwo. Ndiye Yesu ooawandela ira: “M’masuleni ira akwakwani-e enda.”

45 Eno Ayuda anjinji anayo kazide waniwa wa Mariya noona vyevyo Yesu apangile liye koomuroromela. 46 Koma amo-iwa mwa aluwa koodowa wa Afarisi dowa awandela vyevyo Yesu apangile liye. 47 Vingairile eno asembe alukulu na Afarisi koosonkani-a Khoti Lilukulu la Ayuda* noonga ira: “Nipange n’ni sopano? Chifukwa muthula unopanga vizindikilo vyoinjiva. 48 Namulekelela ira apitilize panga vyevi, athu etene kanoza kamuroromele moi Aroma kanoza kaze za landa malwi-u* na tundwi-u.” 49 Koma m’mo-i wa aluwa, zina lae Kayafa, unoyo ali ndimuwa wa asembe muchaka ineyo, aongile ira: “Kamunaiziwa yongo nyo, 50 moi kamunaona ira pivyokami-a wa nyo ira muthu m’mo-i akhwele athu etene m’malo moi tundu wetene uonongeye.” 51 Liye kaaongile vyevi mokeda ganiza ekave, koma chifukwa yoi ali ndimuwa wa asembe chaka ineyo, Mulungu oomu-indi-eda chito ira alosele vyoi Yesu unoza akhwele tunduyo. 52 O-okala keda khwela tundu ba-i, koma teto ira asonkani-e vamo-i a-ima a Mulungu anayo kabalaleile. 53 Moi ambeela dambo lelo koopangana vyoi kamuphe.

54 Eno, Yesu kaaenda mooneela wa Ayuda. Koma oovenyawo wewo dowa udela limo-iliwa la vakwikwi na ipululu, mu mzinda unoyo waromoliwa ira Efuraimu. Moi ookala wewo limo-i na ofunjedae. 55 Sopano Pasika wa Ayuda ali angaandamele moi athu anjinji koodowa wu Yelusalemu Pasikoyo aanafiye, ira kadowe kapange mwambo oviweli-a. 56 Aluwa koomusaela Yesu moi kooimela vamalo amo-iwa mukachisimo nofukananga ekiwa ira: “Munaona avi? Kodi muthule kanaza vaikondwelelova?” 57 Koma asembe alukulu na Afarisi koolamula ira muthu uliwetene unoyo unaiziwe wewo uli Yesu, aawandele ira aluwa kadowe kamu-inde.