Olembiwa na Luka

12 Vathawi inela, athu masauzande anjinji koosonkana vamo-i, moi koonyingalana. Ndiye Yesu oowambeela onga na ofunjedae ira: “Samalani na vyofufumi-a vya Afarisi, anayo mba chinyengo. 2 Chifukwa yongo iliyetene yobiseya vinjinji inoza iululeye koma teto yongo iliyetene yaisisi inoza iiziweye. 3 Eno yongo iliyetene ineyo munaonga nyo mudima inoza ivweye vowela moi vyevyo munanong’ona nyo m’mba mwinyu vinoza vilaleiwe vadimu va nyumba. 4 Koma teto abalanga ndinauwandelani ira, kamuovenga anayo kanapha thuthu loka, anayo katinawande panga vyokwaranya veva. 5 Koma ndinouwandelani unoyo munafuneya nyo muova: Mumuovenga unoyo uni apha, unokaana teto kopolo domuvocheda muthuyo mu Gehena.* Ndithu ndinaauwandelani, mumuovenga unola. 6 Kodi vale mbalame 5 kai kanodiguli-a ndalama mbin’li doyeva kopolo?* Ngakale vili eno Mulungu kanadiwala mbalame dedi.* 7 Ngakale sisi letene la m’muru mwinyu unoliwelenga. Kamuove, nyo muli ofuneya vinjinji kwaranya mbalame doinjiva.

8 Ndinaauwandelani ira, muthu uliwetene unoyo unasomedela vamaso va athu ira ngofunjedanga, Mwana wa muthu teto unoza amusomedele vamaso va angelo a Mulungu ira ngofunjedae. 9 Koma muthu uliwetene unoyo unaze andikoonde vamaso va athu, unoza akoondiwe teto vamaso va angelo a Mulungu. 10 Teto muthu uliwetene unoyo uongile mawu onyoza Mwana wa muthu, unoza akululukiwe. Koma muthu uliwetene unoyo unyozile zimu owela, kanaza akululukiwa. 11 Aluwa kaudowanani umakhoti,* wa andimuwa aboma koma teto wa olamulela, kamukumbanye ira munadowa mwaviteteze avi kapena munadowa mwaonge n’ni, 12 chifukwa vathawi ineyo zimu owela unoza uufunji-eni vyevyo munafuneya nyo onga.”

13 Vanduli viwa muthu m’mo-iwa mugululo oomuwandela Yesu ira: “Mphunzisi, mumuwandele nchimwenanga ira andigawele cholowa.” 14 Liye oomuwandela muthuyo ira: “Mbaani unoyo andisakulile ira ndikale oweluzinyu kapena ogawa chuminyu?” 15 Vanduli viwa ooawandela athwayo ira: “Kalani maso teto enjelani na djela,* chifukwa ngakale muthu angan’na vyongo vinjinji, moywae kunakumela mu vyongo vyevyo un’na liye.” 16 Angapangile eno ooawandela fanizo loi: “Muthu m’mo-iwa wachuma oo-anda vyongo vinjinji m’munda mwae. 17 Eno oowambeela vifuka ira, ‘Kodi ndipange n’ni sopano, voi kandin’na malo osungelamo vyo-anda vyangavi?’ 18 Ndiye aongile ira, ‘Ndinogumula nyumba danga dosungelamo vyongo nomanga nyumba dilukulu, moi tirigwanga wetene na vyongo vyanga vyetene ndinaza ndivi-ela mwemo, 19 ndiye ndinoza ndiviwandele mekave ira: “Ukaana vyongo vinjinji vyapama moi vinosungeya wachaka dinjinji. Garati-a murima m’malo, udje, ung’we nosangalala.”’ 20 Koma Mulungu oomuwandela ira, ‘Muthu ookaana zeluwe, ma-iyu vano unokhwa. Nanga vyongo vyevyo usungileweevi vinaza vikala vya mbaani?’ 21 Vyevi pivyevyo vinamuireela muthu unoyo uviunjikele chuma, koma wa Mulungu angali osauwa.”

22 Vanduli viwa ooawandela ofunjedae ira: “Chichifukwa iwa ndinauwandelani ira, kamukumbanyelenga vya moywinyu ira munaza mudja n’ni kapena teto kumbanyela vya mathuthwinyu ira munaza muwara n’ni. 23 Chifukwa moyo ngofuneya vinjinji kwaranya yodja moi thuthu tilofuneya vinjinji kwaranya yowara. 24 Ganizelani vya anakhungu: Aluwa katinafesa mbewu kapena anda. Katin’na sanja kapena nyumba yosungelamo vyongo, koma Mulungu unowadji-a. Kodi nyo kamuli ofuneya vinjinji kwaranya mbalame? 25 Mbaani wa nyo unoyo unalapi-e malambo a moywae vang’ono voka* chifukwa yokumbanya? 26 Eno akala nyo kamunawande panga vyevi, chifukwa n’ni munakumbanya na vyongo vimo-i? 27 Ganizelani mwemo maluwa aukokolani kanaulukulelaathu: Katina-inda chito kapena sowa nguwo. Koma ndinauwandelani ira ngakale Solomo mu ulemelelwae wetene kaawarilevo vyowara vyoriya ngati maluwa anala. 28 Ndiye akala Mulungu unasamalela maluwa aukokolani, anayo kanakeda kalavo wathawi yoyeva, kodi liye kanaza ausamalelani kwaranya vevo, athu oyeva iroromelo nyo? 29 Eno kamukumbanyenga ira munaza mudja n’ni kapena munaza mung’wa n’ni moi iyani vuteya m’murimani. 30 Chifukwa athu anayo katinamuiziwa Mulungu kanosaelasaela mwatindi vyongo vyetene vyevi, koma Babinyu waudimu unoiziwa ira nyo munofuneya vyongo vyevi. 31 M’malomwiwa thawi detene mu-elenga vyongo vya Umwene vamalo owambeela, moi liye unoza auva-eni vyongo vyofuneya.

32 Kamuove, nyo gulu ling’onong’ono la khosa, chifukwa Babinyu usomedela uva-ani Umwene. 33 Guli-ani vyongo vinyu nopeleka mphaso dachifundo.* Pangani vikwama vya ndalama vyevyo kavinamale, tapulela chuma yoomala udimu, wewo oba katinafiyewo koma teto njenjete* kadinaononge. 34 Chifukwa wewo uli chuminyu, mirima dinyu teto dinakala wewo.

35 Warani teto mukale okozeya.* Nyale dinyu dikarenga 36 teto mukale ngati athu anayo kanadedi-edela ira mbwiiwa aze kumela uukwati, ira afiya nogogoda vaisewo kamu-ulele mombaraanya. 37 Osangalala mba akapolo anayo mbwiiwa voza unaze aafwanye kamudedi-edelanga! Ndithu ndinaauwandelani, liye unoza aware vyowara ira a-inde chito moi unoza aagarati-e vatebulo nowava-a yodja. 38 Aluwa kanoza kakale osangalala akala mbwiiwa unaze aafwanye kamudedi-edelangave ngakale angafiile va ulonda wanambili* kapena wanaralu.* 39 Koma iziwani ira, akala mwinyailo wa nyumba unaiziwe thawi ineyo oba unaze liye, kanalole ira oboyo akotole m’mba mwae novolowa. 40 Nyo teto kalani okozeya, chifukwa Mwana wa muthu unoza afiye vathawi ineyo kamunaiganizela.”

41 Vanduli viwa Petulo oofuka ira: “Mbwiyeni, kodi fanizoli munaniwandela iyo eki-u kapena teto munaawandela athu etene anala?” 42 Ndiye Mbwiye oowonga ira: “Ngu mbaani kwenikweni unoyo ngu kapolo oing’anela nyumba ororomeleya koma teto wazelu, unoyo mbwiyae unaze liye amu-ele ira aing’anelenga gulu la achitwae,* ira aava-enga yodja yokwakwanela vathawi yofwanelela? 43 Kapolo unola unoza akale osangalala, akala mbwiyae voza unaze amufwanye apanganga vyongo vyevi! 44 Ndithu ndinaauwandelani, liye unoza amu-ele ira aing’anelenga vyongo vyae vyetene. 45 Koma akala kapolo unola unaonge m’murimani mwae ira, ‘Mbwiyanga unaadimbeliwa za.’ Ndiye ambeela vaza achito afwae aalombwana na aa-iyana koma teto dja, ng’wa nolezela, 46 mbwiyae wa kapoloyo unoza aze va dambo loi liye kanaliganizela koma teto vathawi ineyo kanaiiziwa, moi unoza amuva-e ilango yoopi-a limo-i na athu oororomeleya. 47 Ndiye kapolo unola, unoyo aiziwile vyevyo mbwiyaeyo unafuna liye koma o-okozeela za wae kapena panga vyevyo amuwandelile liye,* unoza avaziwe vinjinji. 48 Koma muthu unoyo upangile vyongo vyolakweya koma mo-oiziwa, unoza avaziwe vang’ono. Muthu uliwetene unoyo ava-iwe chito doinjiva, unafuneya kwakwaneli-eda chito detene. Moi muthu uliwetene unoyo a-eliwe ira aing’anelenga vyongo vyoinjiva, athu kanoza kafune teto vyongo vinjinji kumela wa liye.

49 Ndazide za kari-a mulo vailambo yavati, ndiye akala muloyo ukarile wale, chin’ni teto imo-iwa ineyo ndinafune miyo? 50 Vikala ubatizo unoyo ndinafuneya miyo batiziwa, moi ndinovuteya vinjinji m’murimani mwanga mpakana ungaireile! 51 Kodi munaganiza ira ndazide vailambo yavati za garati-a murendele? Naari, koma ndazide za gawani-a athu. 52 Chifukwa ambeela vathawiila dowa usogolo, nyumba imo-i munoza mukale athu 5 o-iyana maganizo, athu aralu kanoza karuni-ane na athu ambin’li, koma teto athu ambin’li kanoza karuni-ane na athu aralu. 53 Aluwa kanoza kagawaneye, baba unoza aruni-ane na mwanae walombwana moi mwana walombwana unoza aruni-ane na babae. M’ma unoza aruni-ane na mwanae wa-iyana moi mwana wa-iyana unoza aruni-ane na m’mae. Mpongozi unoza aruni-ane na iyana wa mwanae moi iyana oteliwa unoza aruni-ane na apongozae aa-iyana.”

54 Vanduli viwa oowandela gulu la athulo ira: “Mwaona murambo umazulo, thawi ineyo munaonga ira, ‘Unoza zongwe,’ moi zongweyo unoza. 55 Teto mwaona lipevo likumelanga mbali ya um’mwela, munaonga ira, ‘Peeno unovi-a vinjinji,’ moi vinoireya. 56 Athu achinyengo nyo! Munowanda zindikila mwemo udimu na ilambo yavati munaoneelaathu. Nanga chifukwa n’ni vinauruchani zindikila tapulela wa vyongo vyevyo vinaireya vathawiila? 57 Chifukwa n’ni vaekinyu kamunawanda zindikila vyongo vyevyo pivyolungama? 58 Wadowanga ukhoti na muthu unoyo unauimba mulandu, mungali mundila uesaesenga pangavo yongo ira umali-e mulanduyo. Upangenga vyevi ira ouimba mulanduyo kaudowi-e wa oweluza, ira oweluzoyo kaupeleke wa silikali waukhoti, koma teto ira silikaliyo kau-ele mundende. 59 Ndithu ndinaauwandela, mundendemo kunaza ukumamo mpakana ungalivele ndalama detene dedo kanafunaathu.”*