Olembiwa na Maliko
8 M’malambo anayo, gulu la athu loosonkana nawili koma kalan’na yodja. Ndiye Yesu ooitana ofunjedae noawandela ira: 2 “Gulu la athuli linondivwi-a chisoni, chifukwa athwala kookala na miyo wa malambo maralu moi katin’na yodja. 3 Ndaawandela ira kadowenga waniwa kangan’na ndala,* kanokoza komuwa vandila. Teto athu amo-iwa kakumele undendai vinjinji.” 4 Koma ofunjedae koomusomeda ira: “Uno kuundendai na athu, nanga muthu unafwanye waani mikate dokwakwanela athu etene anala?” 5 Ndiye Yesu oowafuka ira: “Mun’na mikate dingasi?” Aluwa koosomeda ira: “Nin’na mikate 7.” 6 Ndiye ooawandela athwayo ira kagarati. Vanduli viwa, oolanda mikate 7 dile nopempela. Angapangile eno oodimeyameya nowambeela ava-a ofunjedae ira kagawele athwayo, moi aluwa koowagawela. 7 Ofunjedayo kookaana teto somba doyeva moi Yesu angadalisile sombado, ooawandela ira kagawele athwayo. 8 Eno athu etene koodja norumbala, moi vyo-ala vyevyo kadodelileathu vyoozaala madengo alukulu alukulu 7. 9 Alombwana anayo kadjile kalivo otamangela 4 000. Vanduli viwa ooawandela ira kadowenga.
10 Thawi ineyo liye oogwela ngalawa limo-i na ofunjedae dowa fiya muigawo ya Dalamanuta. 11 Wewo Afarisi kooza wa liye moi koowambeela muruni-a. Aluwa kafuna ira aawoni-e izindikilo yokumela udimu, vofuna muyesa. 12 Eno oovuma mwakopolo noonga ira: “Chifukwa n’ni m’bado unola unafunechecha izindikilo? Ndithu ndinaauwandelani, m’bado unola kunaza uva-iwa izindikilo iliyetene.” 13 Angaongile vyevi oowa-iya dowa gwela ngalawa dowa ukombela imo-iwa ya nyanja.
14 Koma aluwa koodiwala landa mikate, eno katan’na iliyetene mungalawamo koma mkate umo-i oka. 15 Moi liye oowachenjeza mwakopolo ira: “Kalani maso! Teto enjelani na yofufumi-a ya Afarisi na ya Herodi.” 16 Eno ofunjedayo koowambeela kangana chifukwa yoi katalandile mikate. 17 Yesu angaonile vyevi, oowafuka ira: “Chifukwa n’ni munakangana vakhani yoi kamulandile mikate? Kodi kamunazindikila novwechecha likundo liwa mpakana vano? Kodi mirima dinyu dinopitilizave kala do-ozindikila? 18 ‘Ngakale ira mukaana maso, kamunaona. Moi ngakale ira mukaana mabaru, kamunavwa.’ Kodi kamunaumbuwela 19 vyevyo vyaireile vevo ndameile miyo mikate 5 nodji-a alombwana 5 000? Kodi mwadodelile madengo angasi a mikate dedo da-alile?” Aluwa koosomeda ira: “Kali madengo 12.” 20 “Vevo ndameile miyo mikate 7 nodji-a alombwana 4 000, kodi mwadodelile madengo alukulu alukulu angasi a mikate dedo da-alile?” Aluwa koomusomeda ira: “Kalivo 7.” 21 Ndiye liye oowafuka ira: “Kodi kamunavwechechave likundo liwa?”
22 Sopano aluwa koofiya wu Betisaida. Wewo athu koomuzelana muthu unoyo an’na vuto lo-oona. Athwayo koomuchondelela ira akede mu-inda muthuyo. 23 Liye oo-inda ndanda la muthu o-oonoyo nomudowana unde wa mzinda. Wewo liye oo-ela mare m’maso mwa muthuyo teto oo-ela mandae va muthuyo moi oomufuka ira: “Kodi unoona yongo iliyetene?” 24 Muthuyo ooing’ana udimu noonga ira: “Ndinoona athu, koma kanaoneya ngati mitengo dedo dinaendaenda.” 25 Liye oo-inda nawili m’maso mwa muthuyo moi oowambeela ona pamapama. Muthuyo oochila moi oowambeela ona yongo iliyetene pamapama. 26 Vanduli viwa oomuwandela ira adowenga waniwa koma teto oomuwandela ira: “Kuvolowe mu mzindamu.”
27 Ndiye Yesu na ofunjedae koomaruwa dowa umavande awu Kaisareya wawu Filipi. Kangali mundila, liye oowambeela afuka ofunjedae ira: “Kodi athu kanaonga ira miyo ndili mbaani?” 28 Aluwa koomusomeda ira: “Kanaonga ira ngu Yohani M’batizi, amo-iwa kanaonga ira ngu Eliya, koma athu amo-iwa kanaonga ira ngu m’mo-i wa anamaongela.” 29 Ndiye oowafuka ofunjedayo ira: “Nanga nyo munaganiza ira miyo ndili mbaani?” Petulo oosomeda ira: “Muli Kristu.” 30 Angaongile vyevi, oowalamula mwakopolo ira katimuwandele muthu uliwetene vyokuza liye. 31 Koma teto oowambeela afunji-a ira Mwana wa muthu unafuneya gumana na mavuto anjinji koma teto koondiwa na andimuwa, asembe alukulu na alembi. Moi vanduli viwa unoza aphiwe koma unoza avenyi-iwe vaza vavira malambo maralu. 32 Liye oowonga mawu anala vowela. Koma Petulo oomulandela Yesu vambali nowambeela musumulula. 33 Angavwile vyevi, Yesu ootembenuwa nowaing’ana ofunjedae, vanduli viwa oomusumulula Petulo ira: “Dowa unduli wanga, Satana! Chifukwa vyevyo unaganiza we kai maganizo a Mulungu, koma maganizo a athu.”
34 Vanduli viwa liye ooitana gulu la athu limo-i na ofunjedae noawandela ira: “Akala muthu unafuna ndi-arela, avikoonde ekave teto atukule tengwae ozuzumelavo* nopitiliza ndi-arela. 35 Chifukwa muthu uliwetene unoyo unafuna vulumucha moywae unoza autatile. Koma uliwetene unoyo unatatila moywae chifukwa ya miyo koma teto chifukwa ya uthenga wapama, unoza auvulumuche. 36 Kodi muthu unapindule n’ni akala unafwanye vyongo vyetene vya muilambwela koma tatila moywae? 37 Kapena kodi muthu unapeleke n’ni ira agule moywae? 38 Chifukwa muthu uliwetene opanga manyazi na miyo koma teto mawanga mu m’bado waigololo* na ochimola, Mwana wa muthu teto unoza apange manyazi na liye aza azanga mu ulemelelo wa Babae limo-i na angelo owela.”