Olembiwa na Maliko

9 Ndiye ooawandela teto ira: “Ndithu ndinaauwandelani ira amo-iwa mwa athu anayo kaimelile vano katinaza kakhwa mpakana yowambeela kangaonile Umwene wa Mulungu ungazile na kopolo.” 2 Vangavirile malambo 6, Yesu oomulanda Petulo, Yakobo na Yohani noagwelana m’mwango olapa dowa kala waekiwa. Ndiye wewo liye oochenja maoneelwae vamaso viwa. 3 Malayae aunde koowambeela vyerimela nowela vinjinji kwaranya mwemo muthu uliwetene ochapa vyowara vailambo yavati unaweli-ele liye vyowara. 4 Koma teto aluwa koomuona Eliya na Mose kakambilananga na Yesu. 5 Ndiye Petulo oomuwandela Yesu ira: “Rabi, vinokala pama ira iyo nikalenga vano. Eno tiyemoni nimange matenti maralu vano, imo-i yeenyu, imo-iwa ya Mose na imo-iwa ya Eliya.” 6 Onga vyoona Petulo oosauwela yoonga, chifukwa etene aralu koowova vinjinji. 7 Ndiye ooza murambo unoyo waapimbile. Vanduli viwa voovweya mawu okumela m’murambomo oonga oyi: “Ula ngu Mwananga unoyo ndinamuomeliwana miyo. Mumuvwelenga.” 8 Vanduli viwa aluwa kooing’ana mbali na mbali moi kakede ona ira kavali muthu uliwetene koma Yesu eka ba-i.

9 Vevo katitaathu m’mwangomo, Yesu oowalamula mwakopolo ira katimuwandele muthu uliwetene vyevyo kaonileathu, mpakana Mwana wa muthu angavenyi-iwe wa okhwa. 10 Aluwa koosunga mawu anala m’murimani mwiwa,* koma koowambeela kambilana mwaekiwa vyevyo venyi-iwa wa okhwa unatapulelaathu. 11 Ndiye aluwa koowambeela mufuka ira: “Chifukwa n’ni alembi kanaonga ira Eliya unafuneya za yowambeela?” 12 Liye oowasomeda ira: “Eliya unoza aze yowambeela moi unoza aweli-ede vyongo vyetene. Koma chifukwa n’ni Malemba kanaonga ira Mwana wa muthu unafuneya gumana na mavuto anjinji koma teto mupangela vyongo vyaibewe? 13 Koma miyo ndinauwandelani ira Eliya ooza wale moi aluwa koomupangela vyongo vyetene vyevyo kafunaathu, mogwilizana na vyevyo Malemba kanaongaathu vyokuza liye.”

14 Aluwa kangafiile wewo ofunjeda amo-iwale kaliathu, koowona gulu lilukulu la athu lingaarungunuwile moi vookala teto alembi anayo kakangana na ofunjedayo. 15 Sopano vevo athu etene anayo kamuonileathu Yesu, koodabwa vinjinji moi koomutamangela ira kadowe kamuva-e moni. 16 Ndiye liye oowafuka athwayo ira: “Kodi munakangana chifukwa n’ni?” 17 Muthu m’mo-iwa unoyo ali mugululo oomusomeda ira: “Mphunzisi, miyo ndimuzana mwananga walombwana wa nyo chifukwa ukaana zimu unoyo unamulepeli-a onga. 18 Zimuyo wamu-inda, unomugwi-ela vati. Era eno unokaana lipweru muwano koma teto unokukuta mano moi unofooka. Ndoowavepa ofunjedinyu ira kakumi-e zimuyo koma koolepela.” 19 Liye oosomeda ira: “Nyo athu ookaana iroromelo, kodi ndinakalave na nyo mpakana alini? Ndipitilizeve uvilelani mpakana alini? Muzenani uno.” 20 Eno aluwa koomudowana wa Yesu. Koma zimuyo ungamuonile, thawi ineyo oopangi-a ira mwanoyo aphuphe. Liye oogwa vati nogubuduwa moi ookaana lipweru muwano. 21 Ndiye Yesu oomufuka babae ira: “Vyevi vikalile vimuireelanga wathawi yolapa moi avi?” Baba wa mwanoyo oosomeda ira: “Ambeela angali mwana 22 moi thawi dinjinji unomupangi-a ira amorele vamulo koma teto mwiko ira umuphe. Koma akala munawande muchili-a, nipangeleni chifundo nonikami-a.” 23 Yesu oomufuka baboyo ira: “Chifukwa n’ni munaonga ira ‘Akala munawande’? Iliyetene chiyowandeya wa muthu unoyo un’na iroromelo.” 24 Thawi ineyo baba wa mwanoyo ookuwa noonga ira: “Iroromelo ndikaana! Limbi-ani iroromelo yanga!”

25 Sopano Yesu angaonile ira gulu la athulo linatamangela wa liye, oosumulula zimu otakaloyo voonga ira: “We zimu olepeli-a muthu onga koma teto vwa, ndinaaulamula ira kuma mwa mwanola teto kuze uvolowe nawili mwa liye.” 26 Mwanoyo ookuwa koma teto phupha vinjinji, moi zimuyo ookuma. Koma mwanoyo aoneya ngati ukhwa, moi athu anjinji kaonga ira: “Ukhwa!” 27 Koma Yesu oomu-inda ndanda nomuvenyi-a moi mwanoyo ooimela. 28 Ndiye kangavolowile m’mba, ofunjedae koomufuka vambali ira: “Chifukwa n’ni iyo nalepelile kumi-a iwandele?” 29 Liye oowasomeda ira: “Zimu wa tundu unola kunawande kuma na mawu aliyetene, koma pempelo ba-i.”

30 Kangakumile wewo aluwa koopitiliza ulendwiwa vovirela wu Galileya, koma liye kaafunile ira muthu uliwetene aiziwe ira liye uli wewo. 31 Chifukwa liye oowafunji-a ofunjedae noawandela ira: “Mwana wa muthu unoza apelekiwe m’mandani mwa athu moi kanoza kamuphe. Koma ngakale ira kanoza kamuphe, liye unoza avenyi-iwe vaza vamala malambo maralu.” 32 Komave ofunjedayo katavwechechile vyevyo aawandelile liye moi koowova ira kamufuke.

33 Vanduli viwa koofiya wu Kaperenao. Ndiye vevo kaliathu m’mba liye oowafuka ira: “Kodi mwakangana chifukwa n’ni mundila mule?” 34 Koma aluwa katasomedile iliyetene, chifukwa mundilamo aluwa kakangana vakhani yoi mbaani unoyo ali mulukulu vaari viwa. 35 Eno liye oowaitana ofunjedae 12 noawandela ira: “Akala muthu uliwetene unafuna kala owambeela, unafuneya kala ogomi-eda va athu etene koma teto unafuneya kala mtumiki wa athu etene.” 36 Vanduli viwa oomulanda mwana n’ng’onong’ono nomuimecha vaari viwa moi oomukumbarela noawandela ira: 37 “Muthu uliwetene unoyo umuwachelile mwana n’ng’onong’ono unola muzina langa, undiwachela teto miyo. Teto muthu uliwetene unoyo undiwachelile miyo, kandiwachelile miyo mekave, koma umuwachela teto Mulungu unoyo andirumile.”

38 Vanduli viwa Yohani oomuwandela Yesu ira: “Mphunzisi, iyo noomuona muthu m’mo-iwa akumi-anga viwanda muzina linyu ndiye noomuwandela ira a-iye, chifukwa yoi kanaenda na iyo.” 39 Koma Yesu aongile ira: “Kamumuruni-e, chifukwa kalivo muthu unoyo unapange chito da kopolo muzina langa, thawi imo-ive ineyo andiongelenga vyaibewe. 40 Chifukwa muthu unoyo kanaruni-ana na iyo uli umbali-u. 41 Koma teto muthu uliwetene unoyo uuva-ileni kapu ya ma-inje ong’wa chifukwa yoi muli ofunjeda a Kristu, ndithu ndinaauwandelani, muthu unoyo mphotwae kinaza idiwaleya. 42 Koma muthu uliwetene okumudwi-a m’mo-i mwa a-ima ang’onong’ono anala anayo kan’na iroromelo, vinokala pama vinjinji mumangelela libwe lilukulu muliko-i mwae ngati lelo bulu unaendi-a liye nomuvocheda munyanja.

43 Akala ndanda lawo linauchimwi-a,* ulidule. Chipama ira udowe wafwanye moyo ungan’na iwalo imo-i, iyana noi uvochiwe mu Gehena* umulo unoyo kunaza utimi-eya, ungan’na manda etene men’li. 44* —— 45 Teto akala nyalo lawo linaukwakwatuwi-a, ulidule. Chipama ira udowe wafwanye moyo wangali orangala, iyana noi uvochiwe mu Gehena* ungan’na manyalo etene men’li. 46* —— 47 Akala liso lawo linauchimwi-a,* ulitatile. Chipama ira udowe wavolowe mu Umwene wa Mulungu ungan’na liso limo-i, iyana noi uvochiwe mu Gehena* ungan’na maso etene men’li, 48 umalo wewo mingu kadinakhwa teto mulo kunatima.

49 Chifukwa uliwetene unafuneya kutuleliwa mwinyu unoyo unaimelela mulo. 50 Mwinyu ngwapama, koma akala mwinyuyo umalile kopolo, kodi kopolweyo munaiweli-ede avi? Kalani na mwinyu teto pitilizani kala mwamurendele vaari vinyu.”