Olembiwa na Yohani
18 Yesu angamari-ile onga vyongo vyevi, ookuma limo-i na ofunjedae nolambuwa iphediphedi ya Kidironi dowa wewo wali munda. Liye na ofunjedae koovolowa m’mundamo. 2 Yudasi unoyo amupelekile Yesu, oowaiziwa malwayo chifukwa thawi dinjinji Yesu limo-i na ofunjedae koogumana vamalo anayo. 3 Eno Yudasi ooza na gulu lilukulu la asilikali koma teto alonda kumela wa asembe alukulu na Afarisi. Aluwa koofiya wewo kangatukulile vyomoneela, nyale na vida. 4 Voi Yesu ooiziwa vyongo vyetene vyevyo vyafuna muireela, ooawandamela athwayo nowafuka ira: “Kodi munamufuna mbaani?” 5 Aluwa koomusomeda ira: “Yesu Mnazareti.” Liye aongile ira: “Ngu miyo.” Yudasi unoyo amupelekile, ali teto vevo.
6 Koma vevo aawandelile liye ira: “Ngu miyo,” aluwa koowelela munduli nogwa vati. 7 Vanduli viwa oowafuka nawili ira: “Kodi munamufuna mbaani?” Aluwa kaongile ira: “Yesu Mnazareti.” 8 Yesu aongile ira: “Ndiuwandelani wale ira ngu miyo. Eno akala munandifuna miyo, a-iyeni ala kadowenga.” 9 Vyevi vyooireya ira mawu anayo aongile liye kakwakwaneli-ediwe. Liye aongile ira: “Va athu etene anayo mwandiva-ile nyo, kalivo ngakale m’mo-i unoyo uwonongeile.”
10 Vanduli viwa Simoni Petulo, ookumi-a supada lae, nopaza libaru la kapolo wa ndimuwa wa asembe. Kapoloyo zina lae ali Makasi. 11 Koma Yesu oomuwandela Petulo ira: “Weli-eda supadalo m’malomwiwa. Kodi kandinafuneya ng’wa vya mukapu ineyo Babanga undiva-ile liye?”
12 Vanduli viwa asilikalayo, limo-i na ndimuwa wa asilikali koma teto alonda a Ayuda koomu-inda Yesu nomumanga. 13 Yowambeela aluwa koomudowana wa Anasi, chifukwa ali mpongozae wa Kayafa, unoyo ali ndimuwa wa asembe muchaka ineyo. 14 Kayafa unola ngunoyo aalangizile Ayuda ira vyali vyokami-a wa aluwa ira muthu m’mo-i akhwele athu etene.
15 Ndiye Simoni Petulo koma teto ofunjeda m’mo-iwa koomu-arela Yesu. Ofunjeda m’mo-iwoyo ooiziwana na ndimuwa wa asembe, eno oovolowa muwari limo-i na Yesu va nyumba ya ndimuwa wa asembeyo. 16 Koma Petulo ooimela unde vamulango. Eno ofunjeda unoyo aiziwana na ndimuwa wa asembele, oodowa onga na mulonda wa vamulangoyo moi oomuvolochi-a Petulo. 17 Sikana wachito unoyo ali mulonda wa vandevo oomufuka Petulo ira: “Kodi nawen’ne teto kuli m’mo-i wa ofunjeda a muthu unola?” Liye aongile ira: “Naari kai miyo.” 18 Ndiye akapolo na alonda kali kaothanga mulo unoyo katumbanyileathu, chifukwa yoi unde woodidila vinjinji. Naliyene teto Petulo ali aothanga muloyo limo-i na aluwa.
19 Ndiye wasembe mulukulu oomufuka Yesu vya ofunjedae koma teto vyevyo afunji-a liye. 20 Yesu oomusomeda ira: “Miyo ndionga vowela wa athu etene. Thawi detene ndoofunji-a m’masunagoge na mukachisi, mwemo Ayuda etene kasonkanaathu, moi kandiongilevo yongo iliyetene mobisa. 21 Chifukwa n’ni munandifuka miyo? Afukeni athu anayo kavwile vyevyo ndaawandela miyo. Athu etene anala kooiziwa vyevyo ndaongile miyo.” 22 Yesu angaongile vyevi, m’mo-i wa alonda unoyo aimelile vakwikwi oomuvaza Yesu likhofi noonga ira: “Unamusomeda eno wasembe mulukulu?” 23 Yesu oomusomeda ira: “Akala ndiongile yongo iliyetene yolakweya, peleka umboni wa yongo ineyo ndilakwi-ile miyo. Koma akala vyevyo ndiongile miyovi pivyoona, chifukwa n’ni undivazile?” 24 Vanduli viwa Anasi oomutumiza Yesu wa Kayafa ndimuwa wa asembe moi kali kangamumangile.
25 Vathawila Simoni Petulo ali angaimelile vevo aothanga mulo. Ndiye aluwa komufuka ira: “Kodi nawen’ne teto kuli m’mo-i wa ofunjedae?” Liye ookoonda noonga ira: “Naari kai miyo.” 26 M’mo-i wa akapolo a ndimuwa wa asembeyo, unoyo teto ali balae wa muthu unoyo Petulo amuphazile liye libarule, aongile ira: “Miyo ndoouona m’munda mule ungali limo-i na liye, ndinaanama?” 27 Koma Petulo ookoonda ulendo wanaralu moi thawi ineyo tambala ooula.
28 Ndiye mamawa vinjinji aluwa koomulanda Yesu kuma wa Kayafa mudowana wu nyumba ya Pilato. Koma voi aluwa kafuna kadje Pasika, katavolowile m’mba mwa Pilatoyo voova takali-iwa. 29 Eno Pilato ookuma moi oowafuka ira: “Kodi muthula uchimwile n’ni?” 30 Aluwa koomusomeda ira: “Aakale ira muthula kapangile vyotakala,* kanamuzana wa nyo.” 31 Ndiye Pilato ooawandela ira: “Mulandeni mudowe mwamuweluze ekinyu mogwilizana na ilamulo inyu.” Ayudayo koomuwandela ira: “Kanin’na ulamulilo opha muthu uliwetene.” 32 Vyevi vyookwakwaneli-eda mawu anayo Yesu aongile liye, otonyi-eda mwemo unaze liye akhwele.
33 Eno Pilato oovolowa nawili mu nyumbae yoweluzela milandu nomuitana Yesu moi oomufuka ira: “Kodi uli mwene wa Ayuda?” 34 Yesu oosomeda ira: “Kodi munandifuka vyevi na yolinga yoi munafuna muiziwe, kapena chifukwa yoi athu amo-iwa koouwandelani vya miyo?” 35 Pilato oosomeda ira: “Kodi miyo ndili Muyuda? Athu a tundwawo koma teto asembe alukulu mbanayo kaupelekile wa miyo. Kodi wapangile n’ni?” 36 Yesu oosomeda ira: “Umwenanga kuli mbali ya ilambo. Aakale ira Umwenanga uli mbali yailambo, atumikanga koovaza kondo ira kandipelekiwe wa Ayuda. Koma Umwenanga kuli mbali yailambo.” 37 Pilato oomufuka ira: “Chabwino, koma kodi uli mwene?” Yesu oosomeda ira: “Munaonga ekinyu ira ndili mwene. Ndoobaliwa koma teto ndooza muilambo ira ndize ndipangele umboni choonadi. Uliwetene unoyo uli umbali ya choonadi unovuruwana mawanga.” 38 Pilato oomufuka ira: “Kodi choonadi chin’ni?”
Angafukile yofuka inela ookuma dowa wewo wali Ayuda, moi ooawandela ira: “Miyo kandinafwanya yolakwa iliyetene mwa muthu unola. 39 Vale mukaana mwambo oyi ndiumasulelengani muthu m’mo-i va Pasika. Ndiye kodi munafuna ira ndiumasuleleni Mwene wa Ayuda?” 40 Athwayo kookuwa nawili ira: “Muthu unoyo kaninamufuna, koma ninamufuna Baraba!” Koma Baraba unola ali wachifamba.