Olembiwa na Mateyu
28 Dambo la Sabata lingamalile, mamawa a dambo lowambeela la Mulunguyo, Mariya wawu Magadala na Mariya m’mo-iwole koodowa ira kadowe kaone manda.
2 Kangafiile vakwikwi, aluwa koozindikila ira viireya ivomelezi yakopolo chifukwa ngelo wa Yehova ootita udimu, moi oofiya nochosa libwe vamandavo nogarati valibwevo. 3 Ngeloyo aoneya ngati vyerima wa zongwe, moi vyowara vyae vyali vyowela vinjinji. 4 Chifukwa yoova, alondale koowambeela ngurumeda vinjinji moi kakede uma gwaa ngati kere khwa.
5 Koma ngeloyo ooawandela a-iyanayo ira: “Nyo kamuove, chifukwa ndinoiziwa ira munamusaela Yesu unoyo aphiwe vopachikiwa vatengo. 6 Muno kalimo chifukwa uvenyi-iwa malinga na vyevyo aongile liye. Zani muone vevo agonati-iwe liye. 7 Moi dowani mombaraanya mwaawandele ofunjedae ira uvenyi-iwa wa okhwa, teto eniva usogola dowa wu Galileya. Munodowa mwamuone wewo. Unola ngu uthenga unoyo ndazilena miyo ira ndiuwandeleni.”
8 Eno aluwa koovenyawo umandawo mombaraanya kaovanga koma teto kangali osangalala vinjinji moi kootamanga dowa awandela ofunjedae. 9 Morurumucha Yesu oogumana na aluwa noonga ira: “Mucheliwe avi!” Ndiye aluwa koomuwandamela nomu-inda manyalwae moi koomukokorela mpakana kove diwa vati. 10 Koma Yesu ooawandela ira: “Kamuove! Dowani mwaawandele abalanga ira kadowe wu Galileya moi kanodowa kandione wewo.”
11 Vevo kadowaathu, alonda amo-iwa koodowa mu mzinda dowa awandela asembe alukulu vyetene vyevyo vyaireile. 12 Asembe alukulwayo kangagumanile na andimuwa nokambilana vya khanila, koogwilizana vyoi kapeleke ndalama dasiliva doinjiva wa asilikalayo 13 noawandela ira: “Muongenga ira, ‘Ofunjedae kooza ma-iyu za muba iyo nigonanga.’ 14 Akala Pilato unavwe vyevi, ninomufotokozela khani yetene* moi nyo kamunafuneya kumbanya.” 15 Eno alondayo koolanda ndalama dasilivado nopanga mogwilizana na vyevyo kawandeliweathu moi khani inela chiyofala vinjinji wa Ayuda mpakana vano.
16 Koma ofunjeda 11 koodowa wu Galileya, umwangoni wewo Yesu aawandelile liye ira kadowe kagumane. 17 Aluwa kangamuonile koomukokorela, koma amo-iwa kookaikela akala ali Yesu. 18 Sopano Yesu ooawandamela noawandela ira: “Miyo ndiva-iwa ulamulilo wetene udimu na vailambo yavati. 19 Eno dowani mwafunji-e athu a mitundu detene ira kakale ofunjedanga. Muwabatizenga muzina la Baba, la Mwana na la zimu owela, 20 teto muwafunji-enga ira kavwelenga vyongo vyetene vyevyo ndaulamulileni miyo. Moi iziwani ira miyo ndili limo-i na nyo malambo etene mpakana munyengo ya mapeto a thawiila.”*