Olembiwa na Mateyu
16 Vanduli viwa Afarisi na Asaduki koofiya wa Yesu moi vofuna muesa, koomuvepa ira aaoni-e izindikilo yokumela udimu. 2 Koma Yesu oowasomeda ira: “Unde wadimbanga munaonga ira, ‘Nyengo inokala pama, chifukwa udimu ufiila ngati mulo.’ 3 Koma mamawa munaonga ira, ‘Peeno zongwe unorumbwa, chifukwa udimu ufiila teto ukala mirambo.’ Munoiziwa tapulela mwemo udimu unaoneelaathu, koma munolepela tapulela vizindikilo vya thawiila. 4 M’bado otakala koma teto waigololo* unofunechecha izindikilo, koma kunaza uva-iwa izindikilo iliyetene koma izindikilo ya Yona yoka.” Angaongile vyevi, oovenyavo nowa-iya.
5 Vanduli viwa ofunjedae koolambuwela ukombela imo-iwa ya nyanja koma aluwa koodiwala landa mikate. 6 Ndiye Yesu ooawandela ira: “Kalani maso teto musamale na yofufumi-a ya Afarisi na Asaduki.” 7 Koma aluwa koowambeela kambilana ira: “Kanitukulile mikate vevo naza iyo uno.” 8 Yesu angavwile vyevi aongile ira: “Athu a iroromelo yoyeva nyo, chifukwa n’ni munakambilana ira kamun’na mikate? 9 Kodi likundo liwa kamunalivwechechave? Kapena kodi kamunaumbuwela athu 5 000 anayo kadjile mikate 5, koma teto kamunaumbuwela injiva wa madengo a vyodja vyo-ala vyevyo mwadodelile nyo? 10 Kapena kodi kamunaumbuwela athu 4 000 anayo kadjile mikate 7, koma teto kamunaumbuwela injiva wa madengo alukulu alukulu a vyodja vyo-ala vyevyo mwadodelile nyo? 11 Nanga chifukwa n’ni kamunazindikila ira kandinaonga vya mikate? Koma ndinaonga vyoi musamale na vyofufumi-a vya Afarisi na Asaduki.” 12 Angapangile eno aluwa koozindikila ira liye kanaonga vyoi aluwa kasamale na vyofufumi-a vya mikate, koma ira kasamale na vyevyo Afarisi na Asaduki kanafunji-aathu.
13 Angafiile muigawo ya Kaisareya wawu Filipi, Yesu oowafuka ofunjedae ira: “Kodi athu kanaonga ira Mwana wa muthu ngu mbaani?” 14 Aluwa koosomeda ira: “Athu amo-iwa kanaonga ira muli Yohani M’batizi, amo-iwa kanaonga ira muli Eliya, koma amo-iwa teto kanaonga ira muli Yeremiya kapena m’mo-i mwa anamaongela.” 15 Ndiye liye oowafuka ira: “Nanga nyo munaganiza ira miyo ndili mbaani?” 16 Simoni Petulo oosomeda ira: “Muli Kristu, Mwana wa Mulungu wamoyo.” 17 Yesu oomuwandela ira: “Uli osangalala Simoni mwana wa Yona, chifukwa kai muthu unoyo uululile vyongo vyevi wa weyo, koma Babanga unoyo uli udimu ngunoyo upangile vyevi. 18 Eno ndinauwandela ira: Weyo uli Petulo moi va libweli ndinoza ndimangevo pingwanga. Teto kopolo yokhwa* kinaza iugonji-a. 19 Miyo ndinoza ndiuva-e makiyi a Umwene waudimu. Iliyetene ineyo unaze we umange vailambo yavati inaza ikala ingamangiwe wale udimu, teto iliyetene ineyo unaze we umasule vailambo yavati inaza ikala ingamasuliwe wale udimu.” 20 Ndiye oowachenjeza mwakopolo ofunjedayo ira katimuwandele muthu uliwetene ira liye ngu Kristu.
21 Ambeela thawi ineyo, Yesu oowambeela awandela ofunjedae ira liye unafuneya adowe wu Yelusalemu. Wewo unodowa azuzumi-iwe vinjinji na andimuwa, asembe alukulu na alembi teto unodowa aphiwe, koma va dambo lanaralu unoza avenyi-iwe. 22 Ndiye Petulo oomulandela Yesu vambali nowambeela musumulula ira: “Viomeleni murima Mbwiyeni. Kamulole ira vyevi viuireeleni ngakale vang’ono.” 23 Koma liye ootembenuwa nomuwandela Petulo ira: “Dowa unduli wanga, Satana! Weyo uli libwe lokwakwatuwi-a wa miyo chifukwa vyevyo unaganiza we kai maganizo a Mulungu, koma maganizo a athu.”
24 Vanduli viwa Yesu ooawandela ofunjedae ira: “Akala muthu unafuna ndi-arela, avikoonde ekave teto atukule tengwae ozuzumelavo* nopitiliza ndi-arela. 25 Chifukwa muthu uliwetene unoyo unafuna vulumucha moywae unoza autatile, koma uliwetene unoyo unatatila moywae chifukwa ya miyo unoza aufwanye.* 26 Kodi muthu unapindule n’ni akala unafwanye vyongo vyetene vya muilambwela koma tatila moywae? Kapena kodi muthu unapeleke n’ni ira agule moywae? 27 Chifukwa Mwana wa muthu unoza aze mu ulemelelo wa Babae limo-i na angelwae. Vathawi ineyo unoza apeleke mphoto wa muthu uliwetene mogwilizana na makalelwae. 28 Ndithu ndinaauwandelani ira amo-iwa mwa athu anayo kaimelile vano katinaza kakhwa mpakana kangamuonile Mwana wa muthu azanga monga Mwene.”