Vyoira Vya Anamarumiwa
16 Vanduli viwa Paulo oofiya wu Debe koma teto wu Lusitara. Wewo ookala ofunjeda m’mo-iwa zina lae Timoteyu, moi m’mae ali Muyuda koma babae ali Mgiriki. 2 Abali awu Lusitara na wu Ikoniyo koopeleka umboni wapama oonga vya liye. 3 Paulo oofunechecha mulanda Timoteyu vaulendwae. Eno oomulanda mupanga mdulidwe chifukwa ya Ayuda anayo kali wewo, voi etene kooiziwa ira babae wa Timoteyu ali Mgiriki. 4 M’mizinda detene dedo kaviraathu, koowava-a ofunjeda a wewo malamulo ofuneya a-arela, mogwilizana na vyevyo anamarumiwa koma teto andimuwa awu Yelusalemu kagamulileathu. 5 Eno athu m’mipingo koopitiliza kaana iroromelo yolimba moi iwelengelo yooenjedeleya dambo na dambo.
6 Vanduli viwa aluwa koodowa wu Fulugiya koma teto muilambo ya Galatiya, chifukwa zimu owela oowaruni-a onga mawu a Mulungu muigawo ya Asia. 7 Kangafiile wu Musiya koofunechecha ira kadowe wu Bituniya, koma Yesu oo-indi-eda chito zimu owela vowakoondi-a ira katidowewo. 8 Eno kakede virela wu Musiya dowa fiya wu Torowa. 9 Ndiye ma-iyu Paulo oowona masomphenya. Oomuona muthu m’mo-iwa wawu Makedoniya angaimelile nomuwandela ira: “Lambuwelani wu Makedoniya uno ira muze munikami-e.” 10 Angaonile masomphenyayo, nooganiza vyodowa wu Makedoniya. Noozindikila ira Mulungu uniitana ira nidowe nalengeze uthenga wapama wa athu a wewo.
11 Eno noomaruwa ulendo wavanyanja kumela wu Torowa dowa wu Samatirake. Koma dambo lo-arela noofiya wu Neapoli. 12 Ningakumile wewo noofiya wu Filipi, mzinda unoyo walamuliwa na Aroma, moi mzinda unola teto wali likulu la igawo ya Makedoniya. Nookala mu mzinda unola wa malambo mangasene. 13 Dambo la sabata nookuma va mulango ulukulu dowa m’mbali mwa inje, moi naganiza ira wewo ukala malo opempelela. Ningafiile noogarati moi noowambeela onga na a-iyana anayo kasonkanile wewo. 14 Vaguluvo vookala iyana m’mo-iwa oova Mulungu zina lae Lidiya. Liye ali wawu Tiyatira moi ooguli-a nguwo na vyowara vyofiila. Liye oovuruwana mwachidwi, moi Yehova* oo-ula vinjinji murimae ira avuruwane vyevyo Paulo aonga liye. 15 Liye na athu a m’banja lae kangabatiziwe oonivepa ira: “Abalanga, akala muonile ira ndili ororomeleya wa Yehova,* tiyemoni mudowe mwakale wani-u.” Moi oonidowana waniwa.
16 Ndiye vevo nadowa iyo wu malo opempelela, noogumana na sikana m’mo-iwa wachito unoyo an’na iwanda, ineyo yapangi-a ira aloselenga vyausogolo. Liye oopangi-a ira mabwanae kapindulenga vinjinji chifukwa ya vyevyo alosela liye. 17 Sikana unola oopitiliza mu-arela Paulo limo-i na iyo moi ookuwa ira: “Athwala mba akapolo a Mulungu Wamudimu Vinjinji moi kanalengeza vya ndila yaipulumuso wa nyo.” 18 Sikanoyo oopanga vyevi wa malambo anjinji. Vanduli viwa Paulo oogoma na vyevyo apanga liye moi ootembenuwa nowandela iwandeyo ira: “Ndinaulamula muzina la Yesu Kristu ira ukume mwa sikanola.” Thawi ineyo zimuyo ookuma.
19 Koma mabwanale kangaonile ira katinapindula yongo, koomu-inda Paulo na Sila moi koowakokela musika, vamalo vevo vakala asogoleliwa. 20 Kangaafiilena wa andimuwa a vyamalamulo, kaongile ira: “Athwala kanosokoneza vinjinji mu mzindi-u, moi aluwa mba Ayuda. 21 Kanofunji-a miyambo dedo wa iyo kai dololeya di-arela kapena dipanga, voi iyo nili Aroma.” 22 Vanduli viwa gulu letene lelo loomaruwa nowaukela anamarumiwayo. Moi andimuwa a vyamalamulwayo, koowakurula anamarumiwayo malaiwa voira ang’ambela moi koolamula ira aluwa kawashuliwe na imwiri. 23 Kangaawashulile vinjinji, koowa-eela mundende moi koomulamula oing’anela ndendeyo ira aaing’anelenga ira katitawe. 24 Voi oing’anela ndendeyo oolamuliwa vyevi, liye oowa-ela musubi la muwari mwa ndendeyo moi oomanga manyalwiwa m’matangaza.
25 Koma vaari va ma-iyu, Paulo na Sila koowambeela pempela koma teto tamanda Mulungu voimba nyimbo, moi akaidi amo-iwa koowavwa. 26 Morurumucha vooireya ivomelezi yakopolo, moi ndendeyo yootekenyeya. Thawi ineyo visewo vyetene vyoo-uleya, moi maunyolo anayo kamangiwenaathu koomasuwa. 27 Oing’anela ndendeyo angavenyile noona ira visewo vya ndendeyo pivyo-uleya, ookumi-a supada lae ira aviphe, chifukwa aganiza ira akaidayo kootawa. 28 Koma Paulo ookuwa ira: “Kuviporeche, etene nili mwemuno!” 29 Oing’anela ndendeyo oovepa ira kamuva-e nyale moi mombaraanya oovolowa muwarimo angurumedanga chifukwa yoova, teto ookokora vakwikwi na Paulo na Sila. 30 Vanduli viwa oowakumi-ela vande moi oowandela ira: “Alombwana nyo, ndipange n’ni ira ndize ndivulumuwe?” 31 Aluwa koomusomeda ira: “Roromela Mbwiye Yesu, moi weyo unoza uvulumuwe limo-i na athu a m’banja lawo.” 32 Vanduli viwa aluwa koomuwandela mawu a Yehova* liye limo-i na athu etene a m’banja lae. 33 Ma-iyu a dambo lelo, liye oowalanda moi oo-uwa mabaliwa. Vangavirile thawi yoyeva, liye limo-i na athu etene a m’banja lae koobatiziwa. 34 Vanduli viwa oowadowana waniwa nowava-a yodja. Moi liye limo-i na athu etene a m’banja lae, koosangalala vinjinji chifukwa yoi koororomela Mulungu.
35 Unde ungachile, andimuwa a vyamalamulo kootumiza asilikali dowa onga ira: “Amasuleni athwayo.” 36 Eno oing’anela ndendeyo oomuwandela Paulo uthengoyo ira: “Andimuwa a vyamalamulo kotumiza athu za onga ira nyo mumasuliwe. Moi mudowenga mwamurendele.” 37 Koma Paulo ooawandela ira: “Aluwa kooniwashula vamaso va athu moi kooni-eela mundende ka-anaweluze mulandwi-u, ngakale ira nili Aroma. Ndiye kodi kananikumi-a mobisa? Naari, vyevyo kavinawandeya! Kaze ekiwa ira kaze kanikumi-e.” 38 Ndiye asilikalayo koodowa onga vyevi wa andimuwa a vyamalamulwale. Andimuwa a vyamalamulwayo koowova vinjinji kangavwide ira athwayo mba Aroma. 39 Eno aluwa kooza nowachondelela, moi kangaakumi-ile koowavepa ira kakumemo mu mzindamo. 40 Koma aluwa kangakumile mundendemo koodowa waniwa wa Lidiya. Kangaaonile abali koowalimbikisa, moi vanduli viwa koomaruwa dowanga.