Vyoira Vya Anamarumiwa

21 Ningasazikanile na aluwa, noowambeela ulendwi-u wavanyanja. Nooenda dowa fiya wu Ko. Dambo lo-arela noofiya wu Rode moi ningakumile wewo noofiya wu Patara. 2 Wewo noofwanya ngalawa ineyo yadowa wu Foinike moi noogwela nomaruwa. 3 Ilumba ya Kupuro ingaambeele oneya, nooi-iya umazele* nopitiliza ulendwi-u volowela wu Siriya. Vanduli viwa nooimela wu Turo ira ngalawa ititi-e katundu. 4 Wewo noowasaela ofunjeda moi ningaafwanyile nookala na aluwa wa malambo 7. Koma mosogoleliwa na zimu owela, aluwa koomuwandela Paulo moweli-edaweli-eda ira kadowe wu Yelusalemu. 5 Dambo loi nimaruwe lingakwakwanile, noomaruwa ira nipitilize ulendwi-u. Abali etene koma teto a-iyana na a-ima, kooniveleela mpakana unde wa mzinda. Wewo nookokora m’mbali mwa nyanja moi noopempela. 6 Vanduli viwa noosazikana iyo gwela ngalawa, koma aluwa koowelela waniwa.

7 Eno noomaruwa wu Turo vangalawa dowa fiya wu Tolemayi. Wewo noopeleka moni wa abali moi nookala na aluwa dambo limo-i. 8 Dambo lo-arela noomaruwa dowa wu Kaisareya moi noodowa waniwa wa namalaleya m’mo-iwa zina lae Filipo. Liye ali m’mo-i wa alombwana 7 a mbili yapama, moi nookala na liye. 9 Filipo ookaana a-ima aa-iyana 4 o-oteliwa,* anayo kalosela. 10 Koma ningakalile wewo wa malambo anjinji, namaongela m’mo-iwa zina lae Agabo ooza kumela wu Yudeya. 11 Liye angafiile wa iyo oolanda lamba wa Paulo. Vanduli viwa oovimangana manyalo na mandae moi oowonga ira: “Zimu owela uongile ira, ‘Mwinyailo wa lambola, Ayuda kanoza kamumange eni wu Yelusalemu mupeleka wa athu a mitundu dimo-i.’” 12 Ningavwide vyevi, iyo limo-i na athu anayo kali wewo, noowambeela muchondelela Paulo ira kadowe wu Yelusalemu. 13 Koma Paulo oosomeda ira: “Chifukwa n’ni munaula koma teto munafuna ndifooki-a? Miyo ndili okozeya mangiwa, koma teto dowa khwela wu Yelusalemu chifukwa ya zina la Mbwiye Yesu.” 14 Ningalepelile muchenja maganizo, noo-iya muruni-a moi naongile ira: “Ifunelo ya Yehova* iireye.”

15 Vanduli viwa noomaruwa ambeela ulendo odowa wu Yelusalemu. 16 Koma ofunjeda amo-iwa awu Kaisareya kooniveleela mpakana waniwa wa Mnaso wawu Kupuro, ira nidowe nafiyede wewo. Muthu unola ali m’mo-i wa ofunjeda owambeela. 17 Ningafiile wu Yelusalemu abali kooniwachela mosangalala. 18 Koma dambo lo-arela, Paulo oodowa limo-i na iyo wa Yakobo, moi andimuwa etene kali wewo. 19 Koma Paulo oowava-a moni nowambeela afotokozela vyevyo Mulungu aapangele liye athu a mitundu dimo-i zela muchito yolaleela ineyo a-indile liye.

20 Aluwa kangavwide vyevi koowambeela tamanda Mulungu, komave koomuwandela ira: “M’bali, vikala Ayuda anjinji ororomeleya moi etene mbovipeleka vakhani yo-arela Ilamulo. 21 Koma aluwa koovwa ira weyo ukala ufunji-anga Ayuda etene anayo kali vaari va athu a mitundu dimo-i ira ka-iye arela Ilamulo ya Mose. Ava unaawandela ira katipangenga mdulidwe wa a-imiwa koma teto ira kati-arelenga miyambo dedo nikalile iyo nidi-arelanga ambeela wale. 22 Ndiye nipange avi veva? Chifukwa kaninakaikela ira aluwa kanoza kavwe ira weyo uza. 23 Eno upange vyevyo ninauwandele iyo: Nikaana alombwana 4 anayo kalumbelile wa Mulungu. 24 Uwalande alombwana anala moi udowe wapange mwambo oviweli-a limo-i na aluwa. Uwalivelele vyetene vyofuneya, ira kainge sisi liwa. Wapanga eno, uliwetene unoza aiziwe ira vyongo vyetene vyevyo kavwideathu vyokuza weyo vyali vyonama. Kanoza kaone ira unopanga vyongo mwadongosolo koma teto ira unovwela Ilamulo. 25 Koma ororomela okumela m’mitundu dimo-idiwa, noowatumizela kalata yoonga vya igamulwi-u ira kapitilize pewa vyongo vyopelekiwa sembe wa mafano koma teto magazi nyama do-osiga* na iwerewere.”*

26 Eno dambo lo-arela, Paulo oowalanda alombwanayo dowa panga mwambo oviweli-a limo-i na aluwa. Vanduli viwa oovolowa mukachisi, dowa onga vevo malambwiwa a mwambo oviweli-a kanazeathu kamalele teto dambo lelo kanazeathu kapeleke sembe ya muthu uliwetene.

27 Malambo 7 kanga-alile vang’ono mala, Ayuda okumela wu Asia koomuona Paulo angali mukachisi. Eno koopangi-a ira vagulu letene la athu vaambeele isokonezo moi koomu-inda Paulo. 28 Aluwa kakuwa ira: “Nyo Aisaraeli, nikami-eni! Muthula unafunji-a vyoruni-ana na athu a tundwi-u uliwetene. Liye unafunji-a vyoruni-ana na Ilamulo koma teto malwala. Enjedela vevo, uwalanda Agiriki avolochi-a mukachisi moi utakali-a malo owela.” 29 Aluwa kaongile vyevi chifukwa dambo limo-i koomuona Terofimo wawu Ifeso angali limo-i na Paulo mu mzindoyo moi kaganiza ira Paulo umuvolochi-a Terofimo mukachisi. 30 Eno mu mzinda wetene unoyo mookala isokonezo moi athu kootamangela wu kachisiwo. Vanduli viwa koomu-inda Paulo mukokela unde wakachisi. Thawi ineyo visewo vyoo-eiwa. 31 Vevo kafunaathu mupha, uthenga oofiya wa ndimuwa wa asilikali ira mu mzinda wetene wa Yelusalemu mukala isokonezo. 32 Thawi ineyo, liye oowalanda asilikali na asogoleliwa moi kootamangela wewo. Athwayo kangamuonile ndimuwa wa asilikaliyo limo-i na asilikalae, koo-iya muvaza Paulo.

33 Vingairile eno ndimuwa wa asilikaliyo oofiya vakwikwi nomu-inda moi oolamula ira kamumange na maunyolo men’li. Vanduli viwa oowafuka athwayo vyokuza liye koma teto vyevyo apangile liye. 34 Koma athu amo-iwa vaguluvo koowambeela kuwa onganga vyongo vimo-i, koma teto athu amo-iwa kaonga vyongo vimo-i. Eno angalepelile vwechecha ineyo yaambeeli-ile ipoloweyo chifukwa ya phokoso, oolamula ira kamudowena wu mpanda wa asilikali. 35 Kangafiile vamasitepe, asilikalayo keere mutukula chifukwa gulu la athulo loofuna muvaza. 36 Athwayo koowa-arela, kakuwanga ira: “Aphiwe unoyo!”

37 Koma kanga-alile vang’ono volowa wu mpanda wa asilikali, Paulo oomuvepa ndimuwa wa asilikaliyo ira: “Kodi munokoza ndilola ira ndionge na nyo vang’ono?” Liye oosomeda ira: “Kodi unoonga Igiriki? 38 Kodi weyo kai muthu wawu Iguputo unoyo malambo kavirile aambeeli-ile ipolowe youkela boma koma teto unoyo asogolele vigawenga 4 000 vidowana muipululu?” 39 Paulo oosomeda ira: “Miyo ndili Muyuda wawu Tariso, mzinda ochuka wawu Kilikiya. Chonde ndinaauvepani, ndiloleni ira ndionge na athwala.” 40 Eno kangamulolile, Paulo ooimela vamasitepe moi oowagweli-ela ndanda athwayo. Etene kangamiyalile, oowambeela onga na aluwa mu Iheberi ira: