Olembiwa na Maliko

12 Vanduli viwa oowambeela onga na aluwa vo-indi-eda chito mafanizo ira: “Muthu m’mo-iwa oolima munda wa mphesa nomanga mpanda rungunuwa mundoyo. Koma teto ootimba zenje lonyingalelamo mphesa nomanga sanja. Angapangile eno oou-iya mundoyo m’mandani mwa alimi dowa uilambo imo-iwa. 2 Ndiye thawi yo-anda ingakwakwanile, liye oomuruma kapolwae wa alimayo ira adowe alande vimo-i mwa vipaso vya m’mundae wa mphesoyo. 3 Koma aluwa koomu-inda nomuvaza moi koomuweli-a ookaana yongo. 4 Liye oomuruma teto kapolo m’mo-iwa wa aluwa koma unola teto koomuvaza muru koma teto mupangela vyaibewe. 5 Liye oomuruma teto kapolo m’mo-iwa koma unola koomupha. Vanduli viwa teto oomuruma akapolo amo-iwa anjinji. Amo-iwa koowavaza moi amo-iwa koowapha. 6 Liye akede ala na m’mo-i eka oyi amurume, mwanae unoyo amuomeliwana liye. Eno oomuruma noonga ira, ‘Mwananga eka unola kanodowa kamulemekeze.’ 7 Koma alimayo koowambeela kambilana ira, ‘Eyaa! ula ngunoyo unaze awachele cholowa. Zani, tiyemoni nimuphe ira cholowae ikale yee-u.’ 8 Eno koomu-inda nomupha moi koomukumi-ela unde wa munda wa mphesoyo. 9 Kodi mwinyailo wa mundoyo unaza aapangana n’ni? Liye unoza aphe alimayo moi munda wa mphesoyo unoza aupeleke wa alimi amo-iwa. 10 Kodi kamuwelengilevo vyevyo malemba kanaongaathu? Vale kanaonga ira: ‘Libwe lelo omanga nyumba kalikoondileathu, likala libwe lavakona lofuneya vinjinji. 11 Libwe leli tilokumela wa Yehova* moi tilodabwi-a m’maso mwi-u.’”

12 Aluwa kangavwile vyevyo koofuna mu-inda ira kam’mange, koma koowova gulu la athu, chifukwa kooiziwa ira liye aongile fanizolo voganizela vya aluwa. Eno kakede mu-iya novenyavo.

13 Vanduli viwa koomutumizela Afarisi amo-iwa limo-i na athu anayo kamu-arela Herodi, ira kadowe kamufwanyele vifukwa va vyevyo unaonge liye. 14 Aluwa kangafiile, koomuwandela ira: “Mphunzisi, ninoiziwa ira nyo munoonga vyoona moi kamunapanga vyongo vokeda funa asangalasa athu, chifukwa kamunaing’ana mwemo athu kanaoneelaathu, koma munofunji-a ndila ya Mulungu mogwilizana na choonadi. Kodi pivyololeya* peleka sonkho wa Kaisara kapena kai vyololeya? 15 Kodi nipelekenga kapena kanipelekenga?” Yesu oozindikila chinyengo iwa moi oowafuka ira: “Chifukwa n’ni munandiesa? Zanani uno ndalama ya dinari* ndiione.” 16 Aluwa koomuzelana ndalama ya dinariyo moi liye oowafuka ira: “Kodi kovela koma teto mawala pivya mbaani?” Aluwa koosomeda ira: “Pivya Kaisara.” 17 Eno Yesu ooawandela ira: “Pelekani vyongo vya Kaisara wa Kaisara, koma vya Mulungu vipelekeni wa Mulungu.” Moi aluwa koodabwa vinjinji na vyevyo aongile liye.

18 Vanduli viwa Asaduki anayo kataroromela ira okhwa kanoza kavenyi-iwe, kooza wa Yesu nomufuka ira: 19 “Mphunzisi, Mose oonilembela ira akala lombwana ukhwile nomu-iya iyanae aanamubalele mwana, nchimwenae wa lombwanoyo unafuneya mutela iyana wamasiyeyo nomubalela a-ima nchimwenae unoyo ukhwileyo. 20 Ndiye vookala alombwana 7 avaibali. Owambeela ootela iyana, koma liye ookhwa aanabale a-ima na iyanoyo. 21 Wanambili oomutela iyanoyo, koma naliyene teto ookhwa aanabale a-ima na iyanoyo. Vyooireya teto chimozimozi na wanaralu. 22 Moi alombwana etene 7 kookhwa kaanabale a-ima na iyanoyo. Vogomi-eda viwa, naliyene teto iyanoyo ookhwa. 23 Kodi alombwanala kaza kavenyi-iwa, iyanola unaza akala wa mbaani? Voi etene 7 koomutela.” 24 Yesu oowasomeda ira: “Munolakwi-a. Chifukwa yoi kamunaiziwa Malemba koma teto kamunaiziwa kopolo ya Mulungu. 25 Chifukwa okhwa kaza kavenyi-iwa, alombwana katinaza katela, teto a-iyana katinaza kateliwa, koma kanaza kakala ngati angelo audimu. 26 Koma va likundo loi okhwa kanoza kavenyi-iwe, kodi nyo kamuwelengile m’buku la Mose mukhani ya takuru la minga, ira Mulungu oomuwandela ira: ‘Miyo ndili Mulungu wa Aburahamu, Mulungu wa Isaki na Mulungu wa Yakobo’? 27 Liye ngu Mulungu wa athu amoyo, o-okala okhwa. Nyo munolakwi-a vinjinji.”

28 M’mo-i mwa alembi anayo kafiile noavwa karuni-ananga, ooiziwa ira Yesu uwasomeda pama. Eno oomufuka Yesu ira: “Kodi va malamulo etene, lamulo lowambeela* tiivi?” 29 Yesu oosomeda ira: “Lamulo lowambeela ti loi, ‘Kavuruwanani nyo Aisaraeli, Yehova* Mulungwi-u ngu Yehova* m’mo-i. 30 Umuomeliwengana Yehova* Mulungwawo na murimawo wetene, moywawo wetene, maganizwawo etene na kopolo dawo detene.’ 31 Lamulo lanambili ti li, ‘Umuomeliwengana fwawo monga mwemo unaviomeliwana we wekave.’ Kavali lamulo limo-iliwa lilukulu kwaranya malamulo anala.” 32 Mulembiyo aongile ira: “Mphunzisi, muonga pama mogwilizana na choonadi, ‘Liye ngu m’mo-i, moi kalivo teto Mulungu m’mo-iwa patulavo liye.’ 33 Moi muomeliwana Mulungu na murima wetene, maganizo etene, kopolo detene koma teto muomeliwana fwawo monga mwemo unaviomeliwana we wekave, pivyofuneya vinjinji kwaranya sembe detene dotumeya datuta na sembe detene.” 34 Yesu angazindikilile ira mulembiyo usomeda mwazelu, oomuwandela ira: “Weyo kuli undendai na Umwene wa Mulungu.” Moi kalivo muthu unoyo alimbile murima mufuka nawili.

35 Komave, vevo Yesu apitiliza liye funji-a mukachisi, oofuka ira: “Chifukwa n’ni alembi kanaonga ira Kristu ngu mwana wa Davide? 36 Mosogoleliwa na zimu owela, Davideyo aongile ira, ‘Yehova* oomuwandela Mbwiyanga ira: “Kala undanda langa lodjana mpakana ndinga-elile adanawo vati va manyalwawo.”’ 37 Davideyo oomuromola ira Mbwiye, ndiye vinawandeye avi ira akale mwanae?”

Moi gulu lilukulu la athu loomuvuruwana mosangalala. 38 Vevo Yesu afunji-a liye oowonga teto ira: “Enjelani na alembi anayo kanaomeliwa endaenda kangawarile mikanjo koma teto kanoomeliwa va-iwa moni m’misika. 39 M’masunagoge, aluwa kanoomeliwa garati m’mipando dausogolo* koma teto m’maphwando aluwa kanoomeliwa garati vamalo olemekezeya vinjinji. 40 Aluwa kanowaka chuma ya a-iyana amasiye, teto kanopeleka mapempelo olapa vinjinji vofuna ira athu kaaone.* Athu anala kanoza kawachele ilango yovoreya vinjinji.”*

41 Ndiye Yesu oogarati vakwikwi na mabokosi o-elamo vyopeleka moi oowambeela ona mwemo gulu la athu lapelekelaathu ndalama m’mabokosimo. Oowona athu anjinji olemela ka-elangamo ndalama dinjinji. 42 Vanduli viwa voofiya iyana wamasiye osauwa moi oo-elamo ndalama mbin’li ding’onong’ono, doyeva kopolo vinjinji.* 43 Ndiye Yesu oowaitana ofunjedae noawandela ira: “Ndithu ndinauwandelani ira iyana wamasiye osauwola upeleka vyoinjiva kwaranya athu etene anayo kapelekile ndalama diwa mu bokosi la vyopelekamu. 44 Vili eno chifukwa yoi athu etene anala koopeleka vyevyo katapileathu va chuma ineyo kan’naathu, koma iyanola mu umphawae, upeleka vyetene vyevyo an’na liye, vyetene vyevyo vyamukami-e vamoywae.”