Vyoira Vya Anamarumiwa
6 Vathawi ineyo ofunjedayo kapitilizaathu enjedeleya, Ayuda anayo kaonga Igiriki koowambeela adandaula Ayuda anayo kaonga Iheberi. Chifukwa a-iyana amasiye a Igiriki koonyalanyaziwa vakhani yogawa yodja ya dambo na dambo. 2 Eno anamarumiwa 12 koowaitani-a ofunjeda etene moi kooawandela ira: “Kai vyofwanelela ira iyo ni-iye chito yofunji-a mawu a Mulungu ira niambeele gawa yodja. 3 Eno abali, asaeleni alombwana 7 vagulu li-uli amakalelo apama, anayo kanasogoleliwa na zimu owela koma teto azelu, ira iyo niava-e udindo oing’anela chito yofuneya inela. 4 Koma iyo ninopitilizave pempela koma teto funji-a mawu a Mulungu.” 5 Athu etene anayo kangavwile mawu anala koosangalala vinjinji moi koomusakula Sitefano, muthu unoyo an’na iroromelo yolimba koma teto unoyo asogoleliwa na zimu owela. Koomusakula teto Filipo, Purokoro, Nikanora, Timoni, Paremena na Nikolao wawu Antiokeya unoyo avolowile Iyuda. 6 Ndiye koowazana athwayo wa anamarumiwa, moi kangapempelile, anamarumiwayo koowa-inda vamuru na mandiwa, votonyi-eda ira kowava-a udindo.
7 Eno mawu a Mulungu koopitiliza falikela. Moi ofunjeda koopitiliza enjedeleya vinjinji mu Yelusalemu. Teto asembe anjinji koowambeela roromela.
8 Sitefano ookaana kopolo moi Mulungu ali na liye. Chifukwa ya vyevi liye oopanga vyodabwi-a na vizindikilo vilukulu vaari va athu. 9 Koma athu amo-iwa a mugulu loromoliwa ira Sunagoge wa Athu Omasuliwa koofiya limo-i na athu awu Kurene, awu Alekizandiriya, awu Kilikiya koma teto athu awu Asia ira kaze karuni-ane na Sitefano. 10 Koma aluwa katawandile limbana na zelu dae koma teto zimu owela unoyo wamusogolela aonganga. 11 Vanduli viwa kooawandela alombwana amo-iwa mwaisisi ira kadowe kaonge ira: “Iyo nimuvwa muthula aonganga vyongo vyonyoza Mose koma teto Mulungu.” 12 Vyevi vyoopangi-a ira andimuwa, alembi koma teto athu amo-iwa kalunduwe vinjinji. Ndiye kooza mombaraanya za mu-inda moi koomudowana wu Khoti Lilukulu la Ayuda. 13 Aluwa koozana mboni donama, dedo daonga ira: “Muthula unakeda onga mawu onyoza kachisi wa Mulungu koma teto Ilamulo. 14 Mwaisazo, iyo nimuvwa aonganga ira Yesu wawu Nazareti unoza aononge kachisi wa Mulungu koma teto unoza achenje miyambo dedo Mose aniva-ile liye.”
15 Athu etene anayo kali Mukhoti Lilukulu la Ayuda kangamuing’anechechile Sitefano, koowona ira kovae inaoneya ngati ya ngelo.