Olembiwa na Luka
24 Koma va dambo lowambeela la mulungu, a-iyanale koobe-a mamawa vinjinji dowa umandawo,* kangatukulile vyonukeli-a vyevyo kapangileathu. 2 Koma kafwanyile ira libwe lichosiwavo vamandavo,* 3 moi kangavolowile m’mandamo, katafwanyilemo mtembo wa Mbwiye Yesu. 4 Vevo kadabwaathu na vyevi, koowaona alombwana ambin’li owara vyowara vyovyerimela kangaimelile vambali viwa. 5 A-iyanayo koowova moi kooworamela vati. Ndiye alombwanayo koowafuka ira: “Chifukwa n’ni munamusaela muthu wamoyo vari va athu okhwa? 6 Liye kali uno, uvenyi-iwa. Umbuwelani vyevyo auwandelileni liye vathawi ineyo ali liye wu Galileya. 7 Vale aongile ira Mwana wa muthu unafuneya pelekiwa m’mandani mwa athu ochimwa koma teto unafuneya phiwa vomupachika vatengo, koma va dambo lanaralu unoza avenyi-iwe wa okhwa.” 8 Eno aluwa kooumbuwela mawu anayo Yesu aongile liye 9 moi koovenyawo umandawo* dowa onga vyongo vyetene vyevi wa ofunjeda 11 na wa athu amo-iwa etene. 10 A-iyanala ali Mariya wawu Magadala, Jowana na Mariya m’mae wa Yakobo. Koma teto a-iyana amo-iwa etene anayo kali limo-i na aluwa, kooawandela anamarumiwa vyongo vyevi. 11 Koma anamarumiwayo kataroromele vyevyo a-iyanayo kaongaathu, moi aluwa kaganiza ira a-iyanayo kaonga vya m’muruni mwiwa.
12 Koma Petulo oomaruwa notamangela umandawo,* moi angasudumele muwari, akede fwanyamo nguwo doka. Eno oowelela waniwa angali odabwa vinjinji na vyevyo vyaireile.
13 Va dambo leli, ofunjeda ambin’li kali va ulendo odowa wu mzinda umo-iwa oromoliwa ira Emau, ulendo wa makilomita otamangela 11* kumela wu Yelusalemu. 14 Aluwa kakambilana vyokuza vyongo vyetene vyevyo vyaireile.
15 Ndiye kangali muwari mokambilana vya vyongo vyevi, Yesu oofiya nowambeela enda limo-i na aluwa. 16 Koma aluwa katawandile muzindikila. 17 Liye oowafuka ira: “Kodi ti khani doi avi dedo munakambilana nyo muendanga?” Aluwa kakede imela moi khove diwa daoneya dachisoni. 18 Vosomeda, m’mo-i wa aluwa zina lae Keleopa, oomufuka ira: “Kodi weyo unakala wekave mu Yelusalemu monga mulendo, moi kunaiziwa vyongo vyevyo viireile m’malambo anala?” 19 Liye oowafuka ira: “Vyongo viwa viivi?” Aluwa koomuwandela ira: “Vyongo vyokuza Yesu Mnazareti, unoyo ali namaongela wakopolo muvyoira koma teto m’mawu vamaso va Mulungu na athu etene. 20 Koma teto vyokuza mwemo asembi-u alukulu na olamulela kamupelekeleathu wa athu anayo kamuweluzile ira aphiwe moi koomukomela vatengo. 21 Koma iyo nadedi-eda ira muthu unola ngunoyo unaze avulumuche Isaraeli. Enjedela vevo, peeno ti dambo lanaralu kumela vevo vyongo vyevi vyaireileathu. 22 Koma teto a-iyana amo-iwa mugulu li-u koonidabwi-a vinjinji. Aluwa koobe-a mamawa vinjinji dowa umandawo,* 23 koma kangaonile ira mtembwae kulimo, aluwa kooza za onga ira koowona masomphenya a angelo, anayo kaawandelile ira Yesu uvenyi-iwa. 24 Vanduli viwa amo-iwa a iyo koodowa umandawo,* moi kafwanyile ira m’mandamo kamuli uliwetene, mogwilizana na vyevyo a-iyanale kaongileathu, moi katamuonile Yesu.”
25 Ndiye liye ooawandela ira: “Nyo athu ookaana zelu koma teto oororomela vyongo vyetene vyevyo anamaongela kaongileathu! 26 Kodi kavyali vyofwanelela ira Kristu avuteye novolowa mu ulemelelwae?” 27 Eno liye oowambeela afotokozela vyongo vyetene vyokuza liye m’Malemba etene, ambeela na Vyolemba vya Mose koma teto vyetene vyevyo anamaongela kalembileathu.
28 Kangaandamele mudela lelo kadowaathu,Yesu ookala ngati unaapitilizave ulendwae. 29 Koma aluwa koomukanyi-eda ira: “Tiyemoni nikaleve limo-i, chifukwa unde uwambeela dimba moi dambo likede ala vang’ono mala.” Liye angavwile vyevi oovolowa m’mba moi ookala limo-i na aluwa. 30 Vevo ali liye limo-i na aluwa ira kadje, liye oolanda mkate nopempela, vanduli viwa ooumeyameya nowava-a. 31 Kangaonile vyevi, maswiwa koo-uleya moi koomuzindikila, koma liye oodimeelavo. 32 Aluwa koowambeela wandelana ira: “Kodi ndesanga vale nookuziwa murima vinjinji vevo aonga liye na iyo musewu nonifotokozelanga Malemba movweya pama?” 33 Vathawi ineyo aluwa koomaruwa welela wu Yelusalemu. Wewo koowafwanya ofunjeda 11 koma teto athu amo-iwa anayo kasonkanile vamo-i. 34 Aluwa kooawandela ira: “Vyoona, Mbwiye uvenyi-iwa wa okhwa moi uoneela wa Simoni!” 35 Vanduli viwa aluwa koofotokoza vyevyo vyaireile vasewu koma teto mwemo kamuzindikileleathu vevo ameile liye mkate.
36 Vathawi ineyo kaongaathu vyongo vyevi, Yesu oowoneela vaari viwa noawandela ira: “Murendele ukale na nyo.” 37 Koma chifukwa yoi aluwa koorurumuwa vinjinji koma teto ova, kaganiza ira kanaona zimu. 38 Eno liye oowafuka ira: “Chifukwa n’ni munavuteya maganizo koma teto kaikela m’murimani mwinyu? 39 Onani manda na manyalwangala, musimikizele ira ngu miyo. Ndi-indeni ira muone, chifukwa zimu kun’na munoku na makuva monga mwemo munandiwonela nyo. 40 Vevo aonga liye vyevi, oowaoni-a manda na manyalwae. 41 Koma voi aluwa kataroromela chifukwa ya imwemwe nodabwa, liye oowafuka ira: “Kodi mukaana yodja iliyetene vano?” 42 Eno aluwa koomuva-a pisi ya somba yoocha, 43 moi liye oowachela nodja athu etene kaonanga.
44 Ndiye liye ooawandela ira: “Vevo ndali miyo limo-i na nyo ndoouwandelani mawu oyi, vyetene vyokuza miyo vyevyo vyalembiwe mu Ilamulo ya Mose, vyevyo anamaongela kalembileathu koma teto vyevyo vyalembiwe m’Masalimo, vinafuneya kwakwaneli-ediwa.” 45 Eno liye oowakami-a ira kavwecheche pama tapulela wa Malemba 46 moi ooawandela ira, “Malemba kanaonga ira: Kristu unoza azuzume moi va dambo lanaralu unoza avenyi-iwe wa okhwa, 47 moi muzina lae, uthenga oyi athu kanafuneya lapa machimwiwa ira kakululukiwe unoza ulaleiwe wa athu a mitundu detene, ambeela wu Yelusalemu. 48 Nyo munoza mukale mboni da vyongo vyevi. 49 Moi miyo ndinoza ndiutumizeleni yongo ineyo Babanga aulonjezileni liye. Koma nyo mukaleve mu mzinda unola mpakana mungawachelile kopolo dokumela udimu.”
50 Vanduli viwa oowasogolela mpakana dowa fiya wu Betaniya moi wewo oogweli-a mandae nowadalisa. 51 Vevo aadalisa liye, oowa-iya moi Mulungu oomutukula mudowana udimu. 52 Aluwa koomukokorela* moi koowelela wu Yelusalemu kasangalalanga vinjinji. 53 Thawi detene aluwa kakala mukachisi nomutamandanga Mulungu.