Olembiwa na Maliko
7 Sopano Afarisi na alembi amo-iwa anayo kakumele wu Yelusalemu kooza wa Yesu. 2 Ndiye aluwa koowaona ofunjedae kadjanga yodja m’mandani mwiwa mungali motakala, kapena ira kaana-ambemo m’mandani.* 3 (Chifukwa Afarisi na Ayuda etene katinadja kaana-ambe m’mandani mpakana muviguguno. Aluwa kanapanga vyevi chifukwa yo-arela miyambo da makolwiwa awale. 4 Moi kaza kumela usika, katinadja mpakana kanga-ambile. Aluwa kookaana teto miyambo dinjinji dedo kava-iweathu moi kanodi-arela, miyambo monga kutucha makapu m’ma-inje, kutucha misuwo na viwiya vya kopa.*) 5 Eno Afarisi na alembi anala koomufuka Yesu ira: “Chifukwa n’ni ofunjedinyu katina-arela miyambo da makolwi-u awale, koma kanadja yodja m’mandani mwiwa mungali motakala?” 6 Liye oowasomeda ira: “Yesaya oolosela vyolondola vyokuza athu achinyengo nyo, mogwilizana na vyevyo Malemba kanaongaathu ira, ‘Athwala kanandilemekeza na milomo doka, koma mirima diwa dili undendai na miyo. 7 Iliyetene ineyo kanapangaathu vondilambela chiyo-okaana chito, chifukwa kanofunji-a malamulo a athu kalanga ngati mba malamulo a Mulungu.’ 8 Munonyalanyaza malamulo a Mulungu koma munokaamela miyambo da athu.”
9 Koma teto ooawandela ira: “Nyo munonyalanyaza malamulo a Mulungu, ira mu-arele miyambo da makolwinyu. 10 Mwaisazo, Mose aongile ira, ‘Mulemekezenga babinyu na m’minyu,’ koma teto aongile ira, ‘Muthu uliwetene omuongela babae kapena m’mae mawu aibewe unafuneya phiwa.’ 11 Koma nyo munaonga ira, ‘Muthu amuwandela babae kapena m’mae ira: “Iliyetene ineyo ndin’na miyo ineyo ndinafuna miyo ukami-anani ngu khobani (tapulela ira, mphaso yoi ndipeleke wa Mulungu,”’ 12 nyo kamunalola ira muthuyo amupangele babae kapena m’mae yongo iliyetene. 13 Mwapanganga vyevi, munopangi-a ira mawu a Mulungu kakale o-okaana chito chifukwa ya miyambo dinyu dedo mwadigarati-ile nyo. Moi munopanga vyongo vinjinji vyokala ngati vyevi.” 14 Angapangile eno, ooitana gulu la athulo ira lize wa liye moi ooawandela ira: “Ndivuruwaneni etene nyen’ne, teto muvwecheche tapulela wa vyevyo ndinaonge miyo. 15 Yongo ineyo inavolowa muwano mwa muthu kai ineyo inamutakali-a. Koma ineyo inakuma muwano mwae chineyo inamutakali-a.” 16* ——
17 Sopano kangavolowile munyumba imo-iwa undendai na gulu la athulo, ofunjedae koowambeela mufuka vyevyo fanizolo latapulelaathu. 18 Eno liye oowafuka ira: “Kodi nanyen’ne kamulivwechechile ngati aluwa? Kodi kamunaiziwa ira kavali iliyetene yokumela unde wathuthu novolowa muthuthu mwa muthu ineyo inamutakali-a? 19 Vili eno chifukwa yoi kinavira m’murimani mwae koma inavira m’marumbo mwae, moi inodowa tatiliwa uchimbuzi.” Na mawu anala Yesu oogamula ira vyodja vyetene pivyowela. 20 Liye oowonga teto ira: “Yongo ineyo inakuma muthuthu mwa muthu chineyo inamutakali-a. 21 Chifukwa m’murimani mwa athu pumwemo munakuma maganizo otakala monga vyaiwerewere,* vyoba, vyopha athu, 22 vyaigololo, djera, panga vyongo vyotakala, vyachinyengo, ikalelo yo-okaana manyazi,* liso la sanje, mawu onyoza, vikuza, koma teto panga vyongo mo-okaana zelu. 23 Vyotakala vyetene vyevi vinakuma m’murimani mwa muthu moi pivyevyo vinamutakali-a.”
24 Angakumile wewo oodowa muigawo ya Turo na Sidoni. Wewo liye oovolowa munyumba imo-iwa moi kaafunile ira muthu uliwetene aiziwe ira liye uli wewo. Komave athu kooiziwa. 25 Thawi ineyo, iyana m’mo-iwa unoyo mwanae wa iyana a-indiwe na zimu otakala oovwa vya Yesu moi ooza za kokora vamanyalwae. 26 Iyanola ali Mgiriki, wawu Surofoinike. Liye oomuvepa Yesu moweli-edaweli-eda ira akumi-e iwanda mwa mwanaeyo. 27 Koma Yesu oomuwandela iyanoyo ira: “Yowambeela, a-ima kanafuneya rumbala, chifukwa kai paama landa yodja ya a-ima vocheda anambwa ang’onong’ono.” 28 Koma iyanoyo oomusomeda ira: “Vyoona mbwiyeni, koma anambwa ang’onong’ono kanodja vinyenyeswa vyevyo a-imayo kanamori-aathu vatebulo.” 29 Yesu angavwile vyevyo oomuwandela iyanoyo ira: “Chifukwa yoi uonga mawu anala, dowa, iwandeyo ikuma mwa mwanawo.” 30 Eno iyanoyo oodowa waniwa moi amufwanyile mwanaeyo angagonatile va bedi iwandeyo ingakumile mwa liye.
31 Vevo Yesu akuma liye muigawo ya Turo dowa wu nyanja ya Galileya, avirile wu Sidoni koma teto muigawo ya Dekapoli.* 32 Wewo athu koomuzelana muthu unoyo an’na vuto lo-ovwa koma teto oonga movuteela. Aluwa koomuvepa ira a-ele ndanda lae va muthuyo. 33 Koma liye oomulanda muthuyo vagululo nomudowana vambali. Angairile eno oo-inda m’mabaru mwa muthuyo na nyala dae, teto angatapede vanyala dae oo-inda lumi la muthuyo. 34 Angapangile eno ooing’ana udimu novuma mwakopolo, vanduli viwa oomuwandela muthuyo ira: “Efata,” tapulela ira, “Uleya.” 35 Angapangile eno, mabarwae koo-uleya moi vuto lae lo-ovwalo loomala moi oowambeela onga pamapama. 36 Ndiye oowalamula athwayo ira katimuwandele muthu uliwetene vyevyo vyaireile. Koma vevo aawandela liye ira katimuwandele muthu uliwetene vyevi, pavevo aluwa kasimbwaathu falisa vinjinji khani inela. 37 Aluwa koodabwa vinjinji moi kaongile ira: “Upanga vyongo vyetene pamapama. Ngakale athu anayo kan’na vuto lo-ovwa kanovwa koma teto anayo kan’na vuto lo-oonga kanoonga.”