Olembiwa na Mateyu

6 “Samalani ira kamupangenga vyongo vyachilungamo vamaso va athu na yolinga yoi kauoneni. Mwapanganga vyevi kamunaza muwachela mphoto yokumela wa Babinyu waudimu. 2 Mwapelekanga mphaso wa athu osauwa,* kamupangenga vyongo movioni-eda ngati mwemo athu achinyengo kanapangelaathu m’masunagoge na m’misewu na yolinga yoi athu kaaone. Ndithu ndinaauwandelani, athu anayo kanapanga vyevi kanakala ira kanaawachela mphotwiwa yetene. 3 Koma weyo wapelekanga mphaso wa athu osauwa, ndanda lawo lamazele kaliiziwe vyevyo ndanda lawo lodjana linapangaathu, 4 ira mphaso dawo dotonyi-eda chifundo dikale daisisi. Wapanga eno, Babawo waudimu unoyo unaona vyevyo unapanga we unoza auweli-ede.

5 Koma teto mwapempelanga, kamupangenga vyevyo athu achinyengo kanapangaathu. Chifukwa aluwa kanoomeliwa imela m’masunagoge na m’makakano a misewu dilukulu ira athu kaaone. Ndithu ndinaauwandelani, athu anayo kanapanga vyevi kanakala ira kanaawachela mphotwiwa yetene. 6 Koma weyo wapempelanga, uvolowenga usubi wawo no-eya isewo teto upempelenga wa Babawo waudimu. Babawo unoyo unaona vyevyo unapanga we ngakale ira weyo kunamuona, unoza auweli-ede. 7 Wapempelanga, kuongenga mawu amo-ive anayo moweli-edaweli-eda ngati mwemo athu o-omuiziwa Mulungu kanapangelaathu. Aluwa kanaganiza ira Mulungu unowavuruwana kaonga mawu oinjiva. 8 Eno nyo kamukale ngati aluwa, chifukwa Babinyu unoiziwa vyevyo munafuneya nyo mwaanamuvepe.

9 Koma nyo mwapempelanga muongenga ira:

‘Babi-u waudimu, zina linyu liweli-iwe.* 10 Umweninyu uze. Vyevyo munafuna nyo viireye vailambo yavati vano ngati mwemo vililiathu udimu. 11 Muniva-e yodja ya peeno. 12 Munikululukele vyolakwa vi-u chifukwa na-iyene niakululukela anayo kanichimwele. 13 Nikami-eni ira kanigonje naesiwanga,* koma muniteteze wa otakaloyo.’*

14 Mwaakululukelanga athu machimwiwa, nanyen’ne teto Babinyu waudimu unoza aukululukeleni. 15 Koma akala kamunaakululukela athu machimwiwa, Babinyu waudimu teto kanaza aukululukelani machimwinyu.

16 Mwasalanga dja, kamutonyi-edenga kove dachisoni ngati mwemo athu achinyengo kanapangelaathu. Aluwa katinasamalela kove* diwa na yolinga yoi athu amo-iwa kaiziwe ira aluwa kanaasala dja. Ndithu ndinaauwandelani, athu anayo kanapanga vyevi kanakala ira kanaawachela mphotwiwa yetene. 17 Koma weyo wasalanga dja, ususuulenga umaso wawo koma teto uzolenga makura m’muruni mwawo, 18 ira athu amo-iwa katiiziwe ira unaasala dja. Wapanga eno, Babawo unoyo unaona vyevyo unapanga we ngakale ira weyo kunamuona, unoza auweli-ede.

19 Kamuviunjikelenga chuma vailambo yavati, chifukwa njenjete* koma teto zimbili vinokoza ononga kapena oba kanokoza ba. 20 Koma sungani chuminyu udimu, chifukwa njenjete kapena zimbili kavinaononge koma teto oba katinabe. 21 Chifukwa wewo uli chumawo, murimawo unakala wewo.

22 Nyale ya thuthu ti liso. Eno akala liso lawo linaing’ana va yongo imo-i, thuthu lawo letene linoza likale lowala vinjinji. 23 Koma akala liso lawo kalinakutila, thuthu lawo letene linoza likale na dima. Eno akala m’maganizo mwawo muli dima, vyoira vyawo vyetene vinoza vikale vya dima.

24 Kavinawandeye ira muthu atumikelenga ambwiye ambin’li, chifukwa unokoza idana na m’mo-i nomuomeliwana m’mo-iwoyo, kapena unokoza kala ororomeleya wa m’mo-i nomunyoza m’mo-iwoyo. Kamunawande tumikela Mulungu na chuma thawi imo-ive.

25 Va chifukwa inela, ndinauwandelani ira: Kamukumbanyelenga vya moywinyu, ira munaza mudja n’ni kapena munaza mung’wa n’ni kapena teto ira munaza muwara n’ni. Kodi moyo kai ofuneya vinjinji kwaranya yodja, teto kodi thuthu kai lofuneya kwaranya vyowara? 26 Ing’anechechani mbalame damulengalenga, vale kadinafesa mbewu kapena anda koma teto sunga yodja vasanja. Koma Babinyu waudimu unodidji-a. Kodi nyo kamuli ofuneya vinjinji kwaranya mbalame? 27 Mbaani wa nyo unoyo unalapi-e malambo a moywae vang’ono voka chifukwa yokumbanya? 28 Koma teto chifukwa n’ni munakumbanyela khani ya vyowara? Funjedani na mwemo maluwa aukokolani kanaulukulelaathu. Katina-inda chito kapena sowa nguwo. 29 Koma ndinauwandelani ira ngakale Solomo mu ulemelelwae wetene kaawarilevo vyowara vyoriya ngati maluwa anala. 30 Ndiye akala Mulungu unasamalela maluwa aukokolani, anayo kanakeda kalavo wathawi yoyeva, kodi liye kanaza ausamalelani kwaranya vevo, athu oyeva iroromelo nyo? 31 Eno kamukumbanyenga noonganga ira, ‘Ninadja n’ni?’ kapena, ‘Ninang’wa n’ni?’ kapena teto, ‘Ninawara n’ni?’ 32 Chifukwa athu anayo katinamuiziwa Mulungu kanosaelasaela mwatindi vyongo vyetene vyevi. Koma Babinyu waudimu unoiziwa ira nyo munofuneya vyongo vyevi.

33 Eno thawi detene pitilizani ela vyongo vya Umwene na makundo olungama a Mulungu vamalo owambeela vamoywinyu, moi liye unoza auva-eni vyongo vyofuneya. 34 Kamukumbanyenga mwaganizela vyongo vya dambo lo-arela, chifukwa dambo lo-arelalo linoza likale teto na vyokumbanyi-a viwa. Chifukwa dambo lililetene linokaana mavutwiwa.”