Olembiwa na Maliko

6 Vanduli viwa angakumile wewo oofiya udela lawaniwa moi ofunjedae koomu-arela. 2 Dambo la Sabata lingafiile, liye oowambeela funji-a musunagoge. Moi athu anjinji anayo kamuvuruwana koodabwa noonga ira: “Kodi muthu unola unavilanda waani vyongo vyevi? Nanga chifukwa n’ni ava-iwe zelu dedi, koma teto ira apangenga chito dakopolo dedi? 3 Kodi muthu unola kai kalipentala opala matabwa, mwana wa Mariya, koma teto nchimwenae wa Yakobo, Yosefe, Yudasi na Simoni? Moi arongolae kai anala nin’na iyo limo-i vevano?” Eno aluwa koowambeela kumudwa na vyevyo apanga liye. 4 Koma Yesu ooawandela ira: “Namaongela kanalemekeziwa udela lawaniwa, ngakale abalae, koma teto athu a m’banja lae, koma unalemekeziwa udela limo-i.” 5 Eno liye kapangile chito dilidetene dakopolo wewo, koma akede ela mandae va athu obulela oyeva nowachili-a. 6 Liye oodabwa ona ira athwayo katan’na iroromelo. Eno liye oodowa m’madela avakwikwi noambeela funji-a athu.

7 Vanduli viwa ooaitana ofunjedae 12 nowambeela atumiza ambin’li ambin’li moi oowava-a kopolo ira kawandenga kumi-a mizimu dotakala. 8 Koma teto oowalamula ira katilande yongo iliyetene va ulendoyo koma kalande imwiri yoka ba-i. Oowalamula teto ira katilande mkate, thumba la vyodja kapena ndalama* muvikwama viwa, 9 koma ooawandela ira kaware sapato koma katilande malaya amo-iwa.* 10 Koma teto ooawandela ira: “Mwafiya vande va muthu, mukalenga vevo mpakana thawi yodowa ingakwakwanile. 11 Uliwetene wewo athu katiuwachelileni kapena uvuruwanani, mwavenyanga wewo tatani tumbulu umanyalo winyu ira ukale umboni wa aluwa.” 12 Eno aluwa koodowa laleela ira athu kalape, 13 moi kookumi-a viwanda vinjinji, koma teto azoli-a makura athu anjinji obulela nowachili-a.

14 Ndiye Mwene Herodi oovwa vyevi chifukwa zina la Yesu loochuka vinjinji moi athu kaonga ira: “Yohani M’batizi uvenya wa okhwa chichifukwa iwa unapanga chito dinjinji da kopolo.” 15 Koma athu amo-iwa kaonga ira: “Ngu Eliya.” Moi amo-iwa kaonga ira: “Ngu namaongela ngati mwemo anamaongela awale kaliliathu.” 16 Koma Herodi angavwile vya Yesu aongile ira: “Ndithu Yohani unoyo ndamuphazile miyo murule uvenyi-iwa.” 17 Herodi oowonga vyevi chifukwa ootumiza athu ira kadowe kamu-inde Yohani nomumanga moi koomu-eela mundende chifukwa yoi Herodiyo oomutela Herodiya, iyana wa nchimwenae Filipo. 18 Oopanga vyevi chifukwa yoi Yohani amuwandela Herodi ira: “Kai vyololeya ira mumutele iyana wa nchimweninyu.” 19 Chifukwa ya vyevi Herodiya oomusungela idani Yohani m’murimani mwae moi oofuna mupha, koma kaakwakwani-ile panga vyevyo. 20 Herodi oomuova Yohani chifukwa ooiziwa ira ali muthu olungama koma teto owela, moi oomutetezela. Angavwile vyevyo Yohani aonga liye oomaliwa zelu, komave oopitiliza muvuruwana mosangalala.

21 Ndiye dambo loi Herodiya akwakwaneli-ede vyolinga vyae loofiya. Leli lali dambo loumbuwela baliwa wa Herodi moi Herodiyo ooitana nduna dae, andimuwa andimuwa a asilikali na athu ochuka vinjinji awu Galileya ira kaze kadjele limo-i yodja ya mazulo. 22 Ndiye mwana wa iyana wa Herodiya oowambeela ina, moi oomusangalasa Herodi na athu amo-i anayo kadja limo-i na liye. Sopano mwene oomuwandela sikanoyo ira: “Undivepe iliyetene ineyo unafuna we moi ndinouva-a.” 23 Mweneyo oolumbela ira: “Yongo iliyetene ineyo unandivepe we ndinouva-a, ngakale hafu ya umwenangola.” 24 Eno sikanoyo ookuma dowa mufuka m’mae ira: “Ndidowe ndavepe n’ni?” M’maeyo oomuwandela ira: “Udowe wavepe muru wa Yohani M’batizi.” 25 Thawi ineyo oodowa wa mweneyo mombaraanya novepa ira: “Ndinafuna mundiva-e muru wa Yohani M’batizi m’mbale chineneveva.” 26 Mwene angavwile vyevi oovwa chisoni vinjinji, koma liye oopanga vyevyo sikanoyo avepile liye voganizela vyevyo alumbelile liye koma teto alendo anayo kali vevo.* 27 Eno, thawi ineyo mwenoyo oomuruma silikali unoyo amuing’anela nomulamula ira adowe azena muru wa Yohani. Liye oodowa phaza muru wa Yohani mundendemo 28 moi oouzana muruyo m’mbale. Ndiye oomuva-a sikanoyo moi sikanoyo ooudowana wa m’mae. 29 Ofunjedae kangavwile vyevi kooza za landa mtembwae dowa u-ela m’manda.*

30 Anamarumiwa koosonkana wa Yesu muwandela vyetene vyevyo aluwa kapangileathu koma teto funji-a. 31 Liye ooawandela ira: “Nyo zani uno, nidowe umalo aeki-u ira mudowe mwavume vang’ono.” Chifukwa athu anjinji kooza koma teto dowa moi katan’na thawi yoi kavume ngakale teto yoi kadje. 32 Ndiye koogwela ngalawa dowa umalo aekiwa o-okala athu. 33 Koma athu anjinji koowaona vevo kadowaathu moi anjinji kooiziwa vyevi. Eno kumela m’mizinda detene athu kootamangela wewo wavati moi athwayo mbanayo kali owambeela fiya umalwayo. 34 Koma Yesu angatitile mungalawamo oowona gulu lilukulu la athu moi oowavwela chisoni, chifukwa kali ngati khosa dedo kadin’na m’busa. Ndiye oowambeela afunji-a vyongo vinjinji.

35 Sopano zuwa livolowanga ofunjedae kooza wa liye noonga ira: “Uno kuundendai na athu moi thawi imala. 36 Awandeleni athwala ira kamaruwe, kadowe manyumba avakwikwi ira kadowe kagule yodja yoi kadje.” 37 Koma liye oowasomeda ira: “Nyo muwava-e yodja.” Yesu angaongile vyevi aluwa koomufuka ira: “Kodi nidowe nagule mikate da ndalama dokwakwana madinari* 200 nodipeleka wa athwala ira kadje?” 38 Liye oowafuka ira: “Mun’na mikate dingasi? Dowani mwaone!” Kangaonile kaongile ira: “Dilivo 5 na somba mbin’li.” 39 Vanduli viwa ooawandela athwayo ira: “Garatini m’magulu vamanachi obiliwila. 40 Moi koogarati m’magulu, amo-i athu 100, amo-i athu 50. 41 Ndiye oolanda mikate 5 na somba mbin’li dile noing’ana udimu moi oopempela. Vanduli viwa oomeyameya mikate dile nodipeleka wa ofunjedae ira kapeleke wa athwayo koma teto oomeyameya somba mbin’li dile nowagawela athu etene. 42 Eno athu etene koodja norumbala 43 moi koododela madengu 12 ozaala a mikate dedo da-alile, o-owelengela somba. 44 Athu anayo kadjile mikatedo kalivo alombwana okwakwana 5 000.

45 Ndiye mombaraanya, Yesu oowandela ofunjedae ira kagwele ngalawa nosogola dowa ukombela imo-iwa vakwikwi na wu Betisaida. Koma liye oo-alela munduli na yolinga yoi aawandele athwayo ira kadowenga waniwa. 46 Angamari-ile sazikana na athwayo, liye oodowa umwangoni dowa pempela. 47 Vevo unde wadimbaathu, ngalawele yali ingali vaari va nyanja, koma liye ali ekave ukumani. 48 Liye angaonile ira ofunjedayo kanapalasa movuteela chifukwa yolimbana na lipevo lakopolo, oodowa vevo kaliathu. Thawi inela yali m’bandakucha,* koma liye aenda ngati unafuna akede akwaranya. 49 Kangamuonile aendanga vanyanjavo ofunjedayo koowambeela ganiza ira: “Ndithu anala mba masomphenya!” Moi kookuwa mogweli-a mawu. 50 Kapangile vyevi chifukwa etene anayo koomuona moi koowova vinjinji. Koma thawi ineyo liye ooawandela ira: “Limbani murima, ngu miyo. Kamuove.” 51 Ndiye Yesu oogwela mungalawamo moi lipevolo looimela. Aluwa kangaonile vyevi koodabwa vinjinji. 52 Ndiye chifukwa yoi katavwechechile yodabwi-a ya mikate, aluwa koovuteyave ira kavwecheche vyongo vyetene.

53 Kangalambuwele ukumani, koofiya wu Genesareti noimecha ngalawiwa. 54 Koma kangakede tita mungalawamo, athu koomuzindikila. 55 Eno athu kootamangela m’madela o-iyana-iyana nowambeela tukula vamachila athu etene anayo kabulela, nowadowana wewo wali Yesu. 56 Moi uliwetene wewo adowa liye m’mavande na m’mizinda, athu koomuzelana obulela m’misika. Aluwa koomuchondelela ira kakede inda ulusi oluwa wa mpepetele mwa malayae aunde, moi athu etene anayo ka-indile ulusiyo koochila.