Olembiwa na Luka
6 Va dambo la sabata, vevo Yesu avira liye m’munda wa tirigu ofunjedae koowambeela vurula tirigu nomutikitelanga m’mandani mwiwa koma teto djanga. 2 Afarisi amo-iwa kangaonile vyevi kaongile ira: “Chifukwa n’ni munapanga vyongo vyevyo kai vyofwanelela vipanga va dambo la Sabata?” 3 Koma Yesu oowasomeda ira: “Kodi kamuwelengile vyevyo Davide limo-i na alombwana anayo kali limo-i na liye, kapangileathu kangan’na ndala? 4 Kodi kamuwelengile ira liye oovolowa munyumba ya Mulungu moi oodja mikate dopelekiwa sembe wa Mulungu, dedo katafuneya dja malinga na malamulo, koma asembe oka mbanayo kafuneya dja?” 5 Eno oopitiliza awandela ira: “Mwana wa muthu ngu Mbwiye wa Sabata.”
6 Vadambo limo-iliwa la sabata, Yesu oovolowa musunagoge nowambeela funji-a. Mwemo mookala muthu unoyo ndanda lae lodjana lali lorangala. 7 Alembi na Afarisi koomuing’anechecha vinjinji ira kaone akala unamuchili-e muthuyo vadambo la Sabata na yolinga yoi kamuimbe mulandu. 8 Koma liye ooiziwa vyevyo kaganizaathu. Eno oomuwandela muthu orangala ndandoyo ira: “Venya, kaza vaariva.” Muthuyo oovenya noimela. 9 Vanduli viwa Yesu oowafuka ira: “Kodi malamulo kanalola panga n’ni vadambo la Sabata, panga yongo yapama kapena yotakala? Vulumucha moyo kapena pha?” 10 Yesu angaaing’anile athu etene, oomuwandela muthuyo ira: “Tapula ndanda lawo.” Liye oolitapula moi ndandalo lookala pama. 11 Koma aluwa koolunduwa vinjinji moi koowambeela kambilana vyevyo kanamupangenaathu Yesu.
12 Dambo limo-i, Yesu oodowa umwangoni dowa pempela moi oochezela ma-iyu etene apempelanga wa Mulungu. 13 Unde ungachile, oowaitana ofunjedae moi vaari viwa oosakulavo athu 12, anayo aava-ile liye zina loi anamarumiwa. 14 Liye oomusakula Simoni, unoyo aromoliwa ira Petulo, na nchimwenae Andreya. Oomusakula teto Yakobo, Yohani, Filipo, Batolomeyo, 15 Mateyu, Tomasi, Yakobo mwana wa Alifeyo, na Simoni oromoliwa ira “watindi.” 16 Koma teto oomusakula Yudasi mwana wa Yakobo na Yudasi Isikariyoti, unoyo vanduli viwa amupelekile Yesu.
17 Vanduli viwa, Yesu ootita m’mwangonimo limo-i na ofunjedae dowa imela vamalo afulati. Vevo vookala gulu lilukulu la ofunjedae. Vookala teto gulu la athu okumela wu Yudeya wetene na wu Yelusalemu wetene, koma teto okumela m’madela etene a m’mbali mwa nyanja ya wu Turo na wu Sidoni. Athu etene anayo kooza ira kaze kamuvuruwane koma teto ira aze aachili-e. 18 Ngakale teto athu anayo kazuzumi-iwa na mizimu dotakala koochili-iwa. 19 Athu etene kooesaesa ira kamu-inde, chifukwa kopolo dookuma mwa liye nochili-anga athu etene anayo.
20 Vanduli viwa oowaing’ana ofunjedae nowambeela awandela ira:
“Osangalala ngu nyo athu osauwa, chifukwa Umwene wa Mulungu ngweenyu.
21 Osangalala ngu nyo anayo mun’na ndala, chifukwa munoza murumbale.
Osangalala ngu nyo anayo munaula, chifukwa munoza muteye.
22 Muli osangalala athu kaidananga na nyo, kausalangani, kaunyozangani koma teto kakoondanga* zina linyu onganga ira tilotakala, chifukwa ya Mwana wa muthu. 23 Vyevi vyaireya musangalale teto mulupe mosangalala, chifukwa mphoto ineyo Mulungu unaze liye auva-eni chiilukulu,* voi vyongo vyevi pivyevyo teto makolwiwa awale kaapangeleathu anamaongela.
24 Koma soka wa nyo anayo mun’na chuma, chifukwa munaawachela wale vyongo vyetene vyousangalasani.
25 Soka wa nyo anayo munarumbala vathawiila, chifukwa munoza mukaena ndala.
Soka wa nyo anayo munateya vathawiila, chifukwa munoza mukaena chisoni koma teto munoza muule.
26 Mukaana soka athu etene kaonganga vyapama vyokuza nyo, voi vyongo vyevi pivyevyo teto makolwiwa awale kaapangeleathu anamaongela onama.
27 Koma nyo anayo munandivuruwana, ndinauwandelani ira: “Pitilizani aomeliwana adaninyu koma teto apangela vyapama athu anayo kanaidana na nyo. 28 Pitilizani adalisa athu anayo kanautembelelani koma teto apempelela athu anayo kanaunyozani. 29 Muthu auvaza likhofi tama la mbali imo-i, umuva-e teto tama la mbali imo-iwa. Muthu unoyo uuwakile malayawo aunde, umuva-e teto malayawo amuwari. 30 Muthu uliwetene unoyo uuvepile yongo umuva-e, teto unoyo uuwakile vyongo kumukanyi-ede ira auweli-ede.
31 Koma teto, vyongo vyevyo munafuna nyo ira athu amo-iwa kaupangeleni, nanyen’ne teto muwapangele vyevyo.
32 Kodi mwakedanga aomeliwana athu oka anayo kanauomeliwanani, munaza mupindula n’ni? Chifukwa ngakale teto athu ochimwa kanakeda aomeliwana athu oka anayo kanaaomeliwanaathu. 33 Akala munakeda apangela vyapama athu oka anayo kanaupangelani vyapama, munaza mupindula n’ni? Chifukwa ngakale teto athu ochimwa kanapanga vyevyo. 34 Koma teto, akala munangongoli-a o-okaana katapila wa athu oka anayo munaembekezela nyo ira kanoza kauweli-edeni ngongoleyo, munaza mupindula n’ni? Naaluwene teto athu ochimwa kanowangongoli-a ochimwa afwiwa o-okaana katapila, ira kaze kaaweli-ede vyongo vyevyo. 35 Mo-iyana na vyevi, nyo pitilizani aomeliwana adaninyu. Pitilizani panga vyapama nongongoli-a o-okaana katapila, kamuembekezelenga wachela yongo iliyetene. Mwera eno, mphotwinyu inaza ikala ilukulu moi munoza mukale a-ima a Wamudimu Vinjinji, chifukwa liye ngooma murima wa athu o-oyamikela na wa athu otakala. 36 Pitilizani kala achifundo, mofwanafwana na Babinyu unoyo ngwachifundo.
37 Koma teto, iyani weluza athu amo-iwa, mwapanga eno nyo teto kamunaza muweluziwa. Iyani runi-a athu amo-iwa moi nyo teto kamunaza muruni-iwa. Pitilizani akululukela athu machimwiwa moi machimwinyu teto kanoza kakululukiwe. 38 Kalani ova-a moi nanyen’ne teto athu kanoza kauva-eni. Kanoza kakutulele m’matumba mwinyu mulingo wapama, ozaala vinjinji, koma teto osefuwela. Chifukwa mulingo unoyo munalingelana nyo athu amo-iwa, naaluwene teto kanaza kaulingelani unoyo.”*
39 Vanduli viwa ooawandela teto fanizo loi: “Kodi muthu o-oona unokoza musogolela muthu o-oona fwae? Kodi kapanga eno etene ambin’li katinaza kamorela muzenje? 40 Ofunjeda kanamukwaranya mphunzisae, koma muthu uliwetene unoyo ufunji-iwe pama unoza afwanafwane na mphunzisae. 41 Nanga chifukwa n’ni unaing’ana nachi lelo lili m’maso mwa balawo, koma lepela ona nachi lelo lili m’maso mwawo? 42 Unamuwandele avi balawo ira, ‘Balanga kaimela ndiuchose nachi m’maso mwawo,’ koma weyo ulepelanga ona nachi lelo lili m’maso mwawo? Wachinyengowe! Ambeela chosa nachi lelo lili m’maso mwawo. Wera eno unoza uone pamapama, moi unoza uwande chosa nachi lelo lili m’maso mwa balawo.
43 Tengo wapama kunabale ipaso yovunda moi tengo ovunda kunabale ipaso yapama. 44 Chifukwa tengo uliwetene unoiziweya na vipaso viwa. Mwaisazo, athu katinacha vipaso vya nankuyu kapena mphesa mutengo waminga. 45 Muthu wapama unoonga vyongo vyapama chifukwa m’murimani mwae muzaalile vyongo vyapama, koma muthu otakala unoonga vyongo vyotakala chifukwa m’murimani mwae muzaalile vyongo vyotakala, chifukwa vamulomo vanoonga vyongo vyevyo vizaalile m’murimani.
46 Nanga chifukwa n’ni munandiitana ira ‘Mbwiyeni! Mbwiyeni!’ koma o-opanganga vyevyo ndinaonga miyo? 47 Muthu uliwetene unoyo unaza wa miyo za vuruwana mawanga, nopanga vyevyo uvwile liye, ndinouwandelani muthu unoyo unafwanafwana na liye: 48 Liye uli ngati muthu unoyo vomanga nyumba, atimbile modii-a vinjinji no-ela maziko valibwe. Ndiye inje ungasefuwele, ma-inje koovaza nyumbeyo, koma katawandile igwi-a chifukwa yoi ooimanga pama. 49 Koma muthu unoyo uvwile mawangala koma lepela a-indi-eda chito, uli ngati muthu unoyo umangile nyumba yo-okaana maziko vateya. Veva teto inje ungasefuwele ma-inje koovaza nyumbeyo, moi thawi ineyo nyumbeyo yoogumuwa.