Olembiwa na Mateyu

26 Yesu angamari-ile onga vyongo vyetene vyevi, ooawandela ofunjedae ira: 2 “Nyo munoiziwa ira vikede ala malambo men’li ira Pasika aireye, moi Mwana wa muthu unopelekiwa ira aphiwe.”

3 Vathawi inela, asembe alukulu koma teto andimuwa koosonkana vanyumba ya ndimuwa wa asembe zina lae Kayafa. 4 Aluwa koopangana vyoi kamu-inde Yesu moenjela nomumanga na yolinga yoi kamuphe. 5 Koma kaonga ira: “Kanize nimu-inde va dambo la ikondwelelo, ovela ira athu kanoza kapange ipolowe.”

6 Vathawi ineyo Yesu ali liye wu Betaniya m’mba mwa Simoni wa makate, 7 iyana m’mo-iwa oofiya angalandile botolo lopangiwa na libwe la alabasitala mungali makura onukela odura vinjinji moi oowambeela mukutulela Yesu makurayo m’muru vevo adja liye vatebulo. 8 Ofunjedae kangaonile vyevi koolunduwa noonga ira: “Chifukwa n’ni unaononga makurala? 9 Makurala kookoza guli-iwa ndalama dinjinji moi ndalamado doopelekiwa wa athu osauwa.” 10 Yesu ooiziwa vyevi moi ooawandela ira: “Chifukwa n’ni munamuvuti-a iyanola? Liye undipangela vyongo vyapama vinjinji. 11 Osauwayo munokalanawo thawi detene, koma kamunaza mukalave na miyo thawi detene. 12 Iyanola u-ela makura onukelala vathuthu vanga, vokozeela eliwa wanga m’manda. 13 Ndithu ndinaauwandelani, uliwetene wewo uthenga wapama unazeathu ulaleiwe vailambo yetene, athu kanoza kafotokozenga vyevyo iyanola upangile liye vomuumbuwela.”

14 Vanduli viwa m’mo-i wa ofunjeda 12, unoyo aiziweya ira Yudasi Isikariyoti, oodowa wa asembe alukulu 15 nowafuka ira: “Kodi munaza mundiva-a n’ni ndamupeleka wa nyo?” Aluwa koolonjeza ira kanoza kamuva-e ndalama 30 dasiliva. 16 Ambeela thawi ineyo liye oowambeela saelasaela mpata wapama ira amupeleke.

17 Va dambo lowambeela la ikondwelelo ya Mikate Do-okaana Vyofufumi-a, ofunjeda kooza wa Yesu nomufuka ira: “Kodi munafuna ira nidowe nausakaedeleni waani malo odjelawo Pasika?” 18 Liye aawandelile ira: “Dowani mu mzinda, mwemo munodowa mwagumane na muthu m’mo-iwa, moi mudowe mwamuwandele ira, ‘Mphunzisi uongile ira: “Thawanga ineyo ya-eliwe iandamela. Ndinoza ndipange phwando la Pasika limo-i na ofunjedanga waninyu.”’” 19 Eno ofunjedayo koopanga vyetene mogwilizana na vyevyo Yesu aawandelile liye moi koolinganiza vyongo vyetene vyofuneya va Pasika.

20 Mazulo, liye na ofunjedae 12 koogarati vatebulo nowambeela dja. 21 Vathawi ineyo kadjaathu, Yesu aongile ira: “Ndithu ndinauwandelani ira, m’mo-i wa nyo unondipeleka.” 22 Aluwa kookaana chisoni vinjinji chifukwa ya vyevi, moi uliwetene oowambeela mufuka ira: “Mbwiyeni, kodi mwina ngu miyo?” 23 Liye oosomeda ira: “Unoyo unadja m’mbale limo-i na miyo ngunoyo unandipeleke. 24 Vyoona, Mwana wa muthu unodowa, mogwilizana na vyevyo Malemba kanaongaathu vyokuza liye. Koma soka wa muthu unoyo unamupeleka Mwana wa muthu! Vyookala pama aakale ira muthu unola kabaliwile.” 25 Yudasi unoyo ali anga-alile vang’ono mupeleka asomedile ira: “Nanga mwina ngu miyo Rabi?” Yesu amusomedile ira: “Uongile wekave.”

26 Vevo kapitilizaathu dja, Yesu oolanda mkate moi angapempelile wa Mulungu, ooumeyameya nowava-a ofunjedae. Liye aongile ira: “Landani, mudje. Mkatela unaimelela thuthu langa.” 27 Vanduli viwa oolanda kapu ya vinyu moi angapempelile, oowava-a noonga ira: “Ng’wani etene nyen’ne. 28 Vinyula unaimelela ‘magazanga a pangano,’ anayo kanaze kakhesiwe chifukwa ya athu anjinji ira machimwiwa kakululukiwe. 29 Koma ndinauwandelani ira: “Kandinaza nding’wa nawili yong’wa iliyetene yopangiwa kumela wu mphesa ngati inela mpakana dambo lelo ndinaze miyo nding’we yong’wa isha limo-i na nyo mu Umwene wa Babanga.” 30 Vogomi-eda viwa, kangamari-ile imba nyimbo dotamanda Mulungu,* koodowa wu Mwango wa Maolivi.

31 Vanduli viwa Yesu ooawandela ira: “Ma-iyu a peeno, etene nyen’ne munotawa nondi-iya mekave, chifukwa Malemba kanaonga ira: ‘Ndinoza ndiphe m’busa moi khosa dinoza dibalaleye.’ 32 Koma ndaza ndivenyi-iwa, ndinoza ndisogole dowa fiya wu Galileya nyo mwaanafiyewo.” 33 Koma Petulo oomusomeda ira: “Ngakale etene anala kangatawile nou-iyani, miyo mekave kandinaza nditawa!” 34 Yesu oomuwandela ira: “Ndithu ndinaauwandela ira, ma-iyu a peeno tambala aanaule, weyo unondikoonda maulendo maralu.” 35 Petulo oosomeda ira: “Akala uli khwa, miyo ndinokhwa limo-i na nyo, koma kandinaukoondani ngakale vang’ono.” Ofunjeda amo-iwayo teto koowonga chimozimozi.

36 Vanduli viwa Yesu na ofunjedae koofiya vamalo oromoliwa ira Gesemani. Ndiye ooawandela ira: “Garatini veva, miyo ndinadowa ule ndapempele.” 37 Vevo adowa liye wewo oomulanda Petulo na a-ima ambin’li a Zebedayo. Moi liye ookaana chisoni koma teto oovuteya vinjinji m’murimani mwae. 38 Vanduli viwa liye ooawandela ira: “Miyo ndikaana chisoni* vinjinji mpakana ala vang’ono khwana. Garatini veva, teto mukaleve maso limo-i na miyo.” 39 Eno angadowile vasogolo vang’ono, ookokora mpakana kovae vati moi oopempela ira: “Babani, akala pivyowandeya, ndichoseleni kapwila. Koma ookala mofuna mwanga, koma mofuna mwinyu.”

40 Angawelele wa ofunjedae aafwanyile kagonanga. Eno oomufuka Petulo ira: “Vyoona kamunawande kalave maso limo-i na miyo wa ola limo-i loka? 41 Kalanive maso, teto mupitilizeve pempela ira kamuvolowe m’maesero. Pivyoona ira murima ngofunechecha, koma thuthu tilofooka.” 42 Oodowa teto ulendo wanambili dowa pempela ira: “Babani, akala kai vyowandeya ira mundichosele kapwila mpakana ndingang’wile vyevyo vili mukapu inela, vyevyo munafuna nyo viireye.” 43 Angazile ulendo wanambili aafwanyile teto kagonanga, chifukwa yoi kookaana kove. 44 Eno oowa-iya nodowa pempela ulendo wanaralu moi ooweli-eda mawu amo-ive anale. 45 Vanduli viwa oowelela wa ofunjedae noawandela ira: “Vyoona thawi ngati ila nyo munaagona novuma? Konani! Thawi yoi Mwana wa muthu apelekiwe m’mandani mwa athu ochimwa iandamela. 46 Venyani, tiyemoni nidowenga. Konani! Unoyo unafuna ndipeleka uli vakwikwi.” 47 Aanamari-e onga, Yudasi m’mo-i mwa ofunjeda 12, oofiya limo-i na gulu lilukulu la athu kangalandile masupada na vimwiri. Aluwa karumiwe na asembe alukulu koma teto andimuwa.

48 Vathawi inela, muthu unoyo afuna mupelekole ali angaava-ile athwale izindikilo yoi: “Muthu unoyo ndinamukise miyo ngunoyo, mudowe mwamu-inde.” 49 Kangafiile, Yudasi oodowa vevo vali Yesu noonga ira: “Kacheluwani Rabi!” Moi oomukisa. 50 Koma Yesu oomufuka ira: “Kodi uzile uno ira uze upange n’ni?” Thawi ineyo, athwayo koomuwandamela moi koomu-inda Yesu nomumanga. 51 Koma m’mo-i mwa athu anayo kali limo-i na Yesu ookumi-a supada lae nopaza libaru la kapolo wa ndimuwa wa asembe. 52 Ndiye Yesu oomuwandela ira: “Weli-eda supada lawo m’malomwiwa, chifukwa etene o-inda supada kanoza kakhwe na supada. 53 Kapena unaganiza ira kandinamuvepe Babanga ira anditumizele magulu akhondo okwaranya 12 a angelo chineneveva? 54 Koma ndapanga vyevi, nanga Malemba anayo kanaonga ira vyevi vinafuneya ireya kanaza kakwakwaneli-ediwa avi?” 55 Vathawi ineyo Yesu oofuka gulu la athulo ira: “Bwanji muzile za ndi-inda mungalandile masupada na vimwiri ngati munafuna muze mulimbane na wachifamba? Dambo na dambo ndali limo-i na nyo mukachisi nofunji-anga, koma kamwandi-indile. 56 Koma vyetene vyevi viireile ira vyevyo anamaongela kalembileathu vikwakwaneli-ediwe.”* Vanduli viwa ofunjedae etene koomutawa nomu-iya ekave.

57 Athu anayo kamu-indile Yesu koomudowana wa Kayafa ndimuwa wa asembe, wewo alembi na andimuwa kasonkanileathu. 58 Koma Petulo oopitiliza mu-arela angali vandendai, mpakana oofiya vanyumba ya ndimuwa wa asembeyo. Angavolowile muwari, oogarati limo-i na achito a vandevo ira aone vyevyo vyafuna ireya.

59 Ndiye asembe alukulu na Khoti letene Lilukulu la Ayuda* koosaelasaela umboni oyi kamunamedele Yesu mulandu na yolinga yoi kamuphe. 60 Koma katafwanyile umboni uliwetene ngakale ira ooza mboni dinjinji donama. Vanduli viwa, ooza mboni dimo-i mbin’li 61 noonga ira: “Muthu unola aonga ira, ‘Ndinokoza gwi-a kachisi wa Mulungu nomumanga nawili malambo maralu.’” 62 Ndimuwa wa asembe angavwile vyevi ooimela nomufuka ira: “Chifukwa n’ni kunasomeda? Kodi kunavwa vyevyo athwala kanaongaathuvi?” 63 Koma Yesu kaasomedile iliyetene. Eno ndimuwa wa asembe oomuwandela ira: “Lumbela muzina la Mulungu wamoyo, uniwandele akala uli Kristu, Mwana wa Mulungu!” 64 Yesu oomusomeda ira: “Muongile ekinyu. Koma ndinauwandelani ira: Ambeela vathawiila mpakana usogolo munoza mumuone Mwana wa muthu angagaratile undanda lodjana lakopolo. Munoza mumuone teto azanga m’mirambo daudimu.” 65 Vanduli viwa ndimuwa wa asembe oong’amba malayae aunde noonga ira: “Unyoza Mulungu! Kodi vanofuneya teto mboni dimo-idiwa veva? Nyo muvivwela ekinyu mwemo unamunyozela liye Mulungu. 66 Ndiye nyo maganizwinyu mboi avi?” Aluwa koosomeda ira: “Unafuneya khwa ba-i.” 67 Eno koowambeela mutapeda umaso koma teto muvaza na khonya. Athu amo-iwa koomuvaza likofi 68 noonga ira: “Akala uli Kristu ro-a. Uuvazile mbaani?”

69 Sopano sikana m’mo-iwa wachito ooza vevo Petulo agaratile liye noonga ira: “Nanyen’ne teto mwali limo-i na Yesu wa wu Galileya!” 70 Koma liye ookoonda vamaso va athu etene ira: “Kandinaiziwa vyevyo unaonga we.” 71 Angakumile m’mba dowa vageti, sikana m’mo-iwa teto oomuzindikila moi oowandela athu anayo kali vevo ira: “Muthula ali limo-i na Yesu Mnazareti.” 72 Veva teto Petulo ookoonda nawili moira lumbela moi aongile ira: “Ndithu muthu unola miyo kandinamuiziwa.” 73 Vangavirile thawi yoyeva, athu anayo kaimelile vakwikwi koowambeela muwandela Petulo ira: “Mookaikela nawen’ne teto uli mugulu la ofunjedae moi onga wawo upangi-a ira niuzindikile.” 74 Thawi ineyo liye oowambeela vitembelela ekave nolumbela ira: “Muthu unola kandinamuiziwa ngakale vang’ono!” Thawi ineyo tambala ooula. 75 Ndiye Petulo ooumbuwela mawu anayo Yesu aongile liye oyi: “Tambala aanaule, weyo unondikoonda maulendo maralu.” Moi ookuma vande nowambeela ula movoreiwa murima vinjinji.