Olembiwa na Mateyu

22 Yesu ooawandela teto mafanizo amo-iwa ira: 2 “Umwene waudimu uli ngati mwene unoyo amupangele mwanae walombwana phwando laukwati. 3 Liye ooruma akapolwae ira kadowe kaitane athu anayo kaitaniwe vaphwando laukwati, koma athwayo katazile. 4 Vanduli viwa ooruma akapolo amo-iwa noawandela ira, ‘Dowani mwaawandele athu oitaniwa ira: “Miyo ndiphiya wale yodja, ndipha ng’ombe danga dapongo koma teto nyama danga doruva, moi vyetene vimala linganiziwa. Zani uphwando laukwati.”’ 5 Koma athwayo koonyalanyaza moi katadowilewo. M’mo-i oodowa umundae teto m’mo-iwa oodowa oguli-a malondae. 6 Koma amo-iwayo koowa-inda akapolo anayo karumiwayo moi koowavaza nowapha.

7 Mwenole angaiziwile vyevi oolunduwa vinjinji moi ootumiza asilikalae dowa pha athu anayo kaphile akapolwae koma teto thumeya mzinda unoyo kakalaathu. 8 Vanduli viwa mwenoyo ooawandela akapolwae ira, ‘Phwando laukwati limala linganiziwa, koma athu anayo naaitanile iyo kali oofwanelela. 9 Eno dowani m’misewu dokumela mu mzindola moi muthu uliwetene unoyo munamufwanye nyo, mudowe mwamuitane ira aze uphwando laukwati.’ 10 Eno akapolwayo koodowa m’misewu teto koosonkani-a athu etene anayo kaafwanyileathu, otakala na apamene. Moi subi lodjelamo phwando laukwati loozaala na athu anayo kaitaniwe.

11 Mwenole angavolowile ira aone athu anayo kaitaniwe, oomuona muthu m’mo-iwa unoyo kaawarile yowara yaukwati. 12 Mwenoyo oomufuka ira, ‘Uvolowile avi muno waanaware yowara yaukwati?’ Koma liye kaaongile yongo iliyetene. 13 Thawi ineyo mwenoyo ooawandela atumikae ira, ‘M’mangeni miwono na mendo era eno mumuvochede unde udima. Wewo liye unodowa aule nokukuta mano.’

14 Chifukwa athu oitaniwa mbaanjinji, koma osakuliwa mboyeva.”

15 Vanduli viwa Afarisi koodowa vambali dowa kambilana ira kamufwanyele vifukwa va vyevyo unaonge liye. 16 Eno aluwa kooruma ofunjediwa limo-i na athu anayo kamu-arela Herodi, moi athwayo kangafiile wa Yesu kaongile ira: “Mphunzisi, ninoiziwa ira nyo munoonga vyoona teto munofunji-a vyevyo Mulungu unafuna liye mogwilizana na choonadi, koma teto kamunapanga vyongo vokeda funa asangalasa athu, chifukwa kamunaing’ana mwemo muthu munaoneela liye. 17 Ndiye niwandeleni, munaganiza avi? Kodi pivyololeya* peleka sonkho wa Kaisara kapena kai vyololeya?” 18 Koma Yesu angaiziwile maganizo otakala anayo kan’naathu aongile ira: “Athu achinyengo nyo! Chifukwa n’ni munandiesa? 19 Ndioni-eni ndalama ya sonkho.” Aluwa koomuzelana ndalama imo-i ya dinari. 20 Ndiye liye oowafuka ira: “Kodi kovela koma teto mawala pi vya mbaani?” 21 Aluwa koosomeda ira: “Pi vya Kaisara.” Eno liye ooawandela ira: “Ndiye pelekani vyongo vya Kaisara wa Kaisara, koma vya Mulungu vipelekeni wa Mulungu.” 22 Aluwa kangavwile vyevi, koodabwa vinjinji moi koovenyavo nomu-iya.

23 Va dambo lelo Asaduki anayo kataroromela ira okhwa kanoza kavenyi-iwe, kooza wa Yesu nomufuka ira: 24 “Mphunzisi, Mose aongile ira: ‘Akala lombwana ukhwile aanabale a-ima, nchimwenae wa lombwanoyo unafuneya mutela iyana wamasiyeyo nomubalela a-ima nchimwenae unoyo ukhwileyo.’ 25 Sopano vookala alombwana 7 avaibali. Owambeela ootela koma vanduli viwa ookhwa. Ndiye voi kaa-iile a-ima, iyanoyo ooteliwa na nchimwenae wa lombwanole. 26 Vyevi vyooireya teto chimozimozi na wanambili na wanaralu, mpakana wa etene 7. 27 Vogomi-eda viwa, naliyene teto iyanoyo ookhwa. 28 Kodi alombwanala kaza kavenyi-iwa, iyanola unaza akala wa mbaani? Voi etene 7 koomutela.”

29 Koma Yesu oowasomeda ira: “Munolakwi-a. Chifukwa yoi kamunaiziwa Malemba koma teto kamunaiziwa kopolo ya Mulungu. 30 Chifukwa okhwa kaza kavenyi-iwa, alombwana katinaza katela, teto a-iyana katinaza kateliwa, koma kanaza kakala ngati angelo audimu. 31 Koma onga vyokuza venyi-iwa wa athu okhwa, kodi kamuwelengile vyevyo Mulungu aongile liye wa nyo ira: 32 ‘Miyo ndili Mulungu wa Aburahamu, Mulungu wa Isaki na Mulungu wa Yakobo’? Liye ngu Mulungu wa athu amoyo, o-okala okhwa.” 33 Gulu la athulo lingavwile vyevi, loodabwa vinjinji na vyevyo afunji-a liye.

34 Afarisi kangavwile ira Yesu oowapanikiza Asaduki, koosonkana vamo-i monga gulu. 35 M’mo-i mwa aluwa unoyo aiziwa Ilamulo, oomuesa Yesu vomufuka ira: 36 “Mphunzisi, kodi lamulo lilukulu vinjinji mu Ilamulo tiivi?” 37 Liye oomusomeda ira: “‘Umuomeliwengana Yehova Mulungwawo na murimawo wetene, moywawo wetene na maganizwawo etene.’ 38 Leli ti lamulo lilukulu vinjinji koma teto lowambeela. 39 Lanambili lofwanafwana na leli tili: ‘Umuomeliwengana fwawo monga mwemo unaviomeliwana we wekave.’ 40 Ilamulo yetene koma teto vyevyo anamaongela kalembileathu vikumile va malamulo men’li anala.”

41 Sopano Afarisi kangasonkanile vamo-i, Yesu oowafuka ira: 42 “Munaganiza avi vya Kristu? Kodi ngu mwana wa mbaani?” Aluwa koosomeda ira: “Ngu mwana wa Davide.” 43 Liye oowafuka teto ira: “Nanga chifukwa n’ni mosogoleliwa na zimu, Davide amuromolile ira Mbwiye, vevo aongile liye ira, 44 ‘Yehova oomuwandela Mbwiyanga ira: “Kala undanda langa lodjana mpakana ndinga-elile adanawo vati va manyalwawo”’? 45 Ndiye akala Davide amuromolile ira Mbwiye, vinawandeya avi ira akale mwanae?” 46 Koma kalivo unoyo awandile musomeda, moi kumela dambo lelo kalivo muthu unoyo alimbile murima mufuka vyofuka.