Olembiwa na Mateyu
10 Eno Yesu oowaitana ofunjedae 12 nowava-a kopolo ira kawandenga kumi-a mizimu dotakala koma teto kawandenga chili-a marenda a tundu uliwetene anayo athu kabulelanaathu.
2 Mazina a anamarumiwa 12 anala mbala: Simoni, unoyo aromoliwa ira Petulo* na nchimwenae Andireya. Yakobo mwana wa Zebedayo na nchimwenae Yohani. 3 Filipo na Batolomeyo, Tomasi na Mateyu okomi-a misonkho, Yakobo mwana wa Alifeyo na Tadeyo. 4 Simoni Kananiya* na Yudasi Isikariyoti, unoyo vanduli viwa amupelekile Yesu.
5 Yesu ootumiza anamarumiwa 12 anala moi oowava-a malangizo ala: “Kamudowe musewu uliwetene wa athu a mitundu dimo-i koma teto kamuvolowe mu mzinda uliwetene wa Asamariya. 6 M’malomwiwa, thawi detene mudowenga wa khosa do-olowa da nyumba ya Isaraeli. 7 Mwadowa mwalaleelenga ira, ‘Umwene waudimu uwandamela.’ 8 Muchili-enga obulela, venyi-a okhwa, chili-a a makate koma teto mukumi-enga viwanda. Moowachela waulele, mupelekenga teto waulele. 9 Kamulande golide, siliva kapena mkuwa muvikwama vinyu vya ndalama. 10 Vaulendola kamutukule yodja kapena malaya ambin’li* kapena sapato kapena teto imwiri chifukwa wachito unafuneya wachela yodja yae.
11 Mwavolowa mu mzinda kapena mudela lililetene, musaelenga muthu unoyo uli ofwanelela muwandela uthenginyu, moi mukalenga m’mbamwae mpakana thawi yodowa. 12 Mwafiya vande va muthu, muwalonjelenga athu avandevo. 13 Akala kauwachelileni pama, murendelinyu ukale na aluwa, koma akala katiuwachelileni pama, murendelinyu uwelele wa nyo. 14 Uliwetene wewo athu katinauwachelani kapena katinafuna vuruwana mawinyu, mwakumanga vandevo kapena mwakumanga mu mzinda unoyo mutatenga tumbulu umanyalwinyu. 15 Ndithu ndinaauwandelani, va Dambo la Iweluzo, ilango ya mzindoyo inaza ikala yovoreya vinjinji kwaranya ya Sodomu na Gomora.
16 Konani! Miyo ndinaautumizani monga khosa vaari va mimbulu. Eno mupangenga vyongo moenjela ngati nyowa koma mukalenga oona murima ngati kangaiwa. 17 Enjelani na athu, chifukwa kanoza kaudowenani umakhoti ang’onong’ono, moi kanoza kauvazeni m’masunagoge mwiwa. 18 Kanoza kaudowi-eni wa abwanamkubwa na mamwene chifukwa yoi muli o-arelanga, ira aluwa koma teto athu a mitundu dimo-i kafunjede vyokuza miyo. 19 Koma kaza kaudowi-ani wewo, kamuze mukumbanye ira munaza muonga avi kapena ira munaza muonga n’ni, chifukwa munoza muwandeliwe thawi ineyo vyevyo munaonge nyo. 20 Vili eno chifukwa yoi oonga kamunaza mukala nyo, koma zimu wa Babinyu unoza uonge zela mwa nyo. 21 Koma teto muthu unoza amupeleke balae ira aphiwe moi baba unoza amupeleke mwanae. A-ima kanoza kaukele makolwiwa teto kanoza kapangi-e ira kaphiwe. 22 Teto athu etene kanoza kaidane na nyo chifukwa ya zina langa, koma muthu unoyo unaze avilele* mpakana mapeto ngunoyo unaze avulumuwe. 23 Kauzuzumi-ani mu mzinda umo-i, mutawele mu mzinda umo-iwa. Ndithu ndinaauwandelani, kamunaza mumari-a rungunuwa mizinda detene da Isaraeli Mwana wa muthu aanafiye.
24 Ofunjeda kanakwaranya mphunzisae teto kapolo kanakwaranya mbwiyae. 25 Ofunjeda unakeda fwanafwana na mphunzisae teto kapolo unakeda fwanafwana na mbwiyae. Akala athu kanamuromola mwinyailo wa nyumba ira Belezebule,* uli avi na athu a m’banja lae? 26 Eno kamuwaovenga, chifukwa yongo iliyetene yobiseya inoza iululeye koma teto yongo iliyetene yaisisi inoza iiziweye. 27 Vyevyo ndinauwandelani miyo mudima, muviongenga vowela, teto vyevyo mwavwile nyo athu kanong’onanga, muvilaleele wa athu etene. 28 Kamuovenga anayo kanapha thuthu koma katinawande pha moyo. M’malomwiwa, muovenga unoyo unawande ononga vyetene viili, moyo na thuthu wu Gehena.* 29 Kodi vale mbalame mbin’li kai kanodiguli-a ndalama imo-i yoyeva kopolo?* Koma kilivo ngakale imo-i ineyo inamorele vati Babinyu waudimu o-oiziwa. 30 Moi ngakale sisi letene la m’muru mwinyu unoliwelenga. 31 Eno kamuove, nyo muli ofuneya vinjinji kwaranya mbalame doinjiva.
32 Muthu uliwetene unoyo unasomedela vamaso va athu ira ngofunjedanga, namiyene teto ndinoza ndimusomedele vamaso va Babanga waudimu ira ngofunjedanga. 33 Koma muthu uliwetene unoyo unaze andikoonde vamaso va athu, namiyene teto ndinoza ndimukoonde vamaso va Babanga waudimu. 34 Kamuganize ira ndazide vailambo yavati ira ndizena murendele. Koma ndazidena supada. 35 Ndazide ira ndigaani-e athu. Ira mwana walombwana aruni-ane na ababae, mwana wa-iyana aruni-ane na am’mae koma teto iyana oteliwa aruni-ane na apongozae aa-iyana. 36 Onga vyoona, adani a muthu kanaza kakala athu a m’banja lae. 37 Muthu uliwetene unoyo unamuomeliwana vinjinji babae kapena m’mae kwaranya miyo kai ofwanelela ira akale ofunjedanga. Moi uliwetene unoyo unamuomeliwana vinjinji mwanae walombwana kapena wa-iyana kwaranya miyo kai ofwanelela ira akale ofunjedanga. 38 Koma teto muthu uliwetene unoyo kanafuna tukula tengwae ozuzumelavo* nopitiliza ndi-arela kai ofwanelela ira akale ofunjedanga. 39 Uliwetene unoyo unafuna vulumucha moywae unoza autatile, koma unoyo unatatila moywae chifukwa ya miyo unoza aufwanye.
40 Uliwetene unoyo uuwachelileni undiwachela teto miyo moi unoyo undiwachelile miyo umuwachela teto unoyo andirumile. 41 Muthu uliwetene unoyo umuwachelile namaongela unoza awachele mphoto yofwanafwana na ineyo namaongela unawachela liye, teto unoyo umuwachelile muthu olungama unoza awachele mphoto yofwanafwana na ineyo muthu olungama unawachela liye. 42 Uliwetene unoyo umuva-ile m’mo-i mwa a-imala ngakale kapu imo-i ya ma-inje odidila ira ang’we chifukwa yoi ngofunjedanga, ndithu ndinaauwandelani, muthu unoyo mphotwae kinaza idiwaleya ngakale vang’ono.”